不夜天蕃薯包

其實呢個係改良網友Toby嘅冬季薯仔包食譜,舊年冬天我已經做過一次,非常成功,真係多謝佢嘅分享,令我又識多一個做麵包嘅方法,不過我改咗用紫心蕃薯蓉,一樣掂喎.

昨晚將剩餘嘅紫心蕃薯蓉加入麵包同其他材料中.

跟住用機打至麵團撕開見到有薄模,就變成呢一個紫紅色嘅麵團.

好似平時咁樣,經過第一次發酵,放氣,再第二次發酵,分割成9個,滾圓,放係焗模上,不過發酵時間比平時短,每次約30分鐘左右,跟住我將成盤包放係廚房窗口旁邊,就上床訓覺覺lu..ZzzzZzzzz

一宿無話,今朝起身,就見佢發大咗好多.

跟住即刻預熱焗爐,搽上蛋汁同灑上金寶碎,去洗面刷牙後,就可以放入焗爐焗啦.

約焗咗18-20分鐘左右,就可以出爐

撕開啲包仍然見到一絲絲黏住

食落非常柔軟同濕潤,係寒冷嘅朝早,食到新鮮熱辣辣嘅出爐麵包,真係有種幸福滿足嘅感覺,遲啲再做多一次添.

中日素食-第二課_綠茶鲤魚年糕&黑白千層糕

今日又到上中日素食課程嘅日子,由於年近歲晚,所以今堂都係教蒸糕.

其中一款係綠茶鲤魚年糕,其實任你用乜野模都得,或者唔用綠茶粉,轉用其他代替品都可以,祗要粉同水比例啱就得,仲要記住掃油係模上,否則蒸完就好難甩. 呢個係蒸完未甩模嘅樣,仲有Hello Kitty添.

甩模後反轉就變成咁啦,好香綠茶味,但我就嫌稍甜,我整會減糖.

另外一款係黑白千層糕,層數越多越薄就最好,黑色係炒香芝麻,加糖水再打成蓉,隔出芝麻水再溝粉攪拌而成,白色係椰漿加糖,再加入粉攪拌,至無粉粒,如有需要要過篩,粉漿會比較滑.

慶生禮物-BB冷外套套裝

之前好朋友報告喜訊,今年5月會增添新家庭成員,非常替佢開心,所以趁而家天氣凍,即刻織&勾定一套BB外套加帽子&鞋子,準備遲啲送俾佢做禮物.由於唔知性別,所以用咗呢隻花冷,但我自己唔鍾意織花冷,因為織花好難見到清楚,祗好織高/低針,最基礎個種織法,非常沉悶.

BB冷外套

BB帽子

BB鞋正面&後面

消滅剩餘物資嘅晏晝

今日為咗要消滅椰菜同埋粉果餡,所以做咗椰菜包做晏晝.

呢啲就係椰菜&剩餘嘅粉果餡.

將椰菜葉逐塊摘下洗淨,然後拖熱水至軟身.

將餡包入捲起,放係已掃油碟,然後攞去蒸.

大概蒸咗10分鐘,就可以攞出來食得,因為我當晏晝食,所以無打獻汁,如果唔係餡內有瘦肉粒,咁就係素菜包,都幾健康架,又容易整,用咗30分鐘就有得食lu...

紫芋芝麻方包

由於早前幫襯網友買咗包紫芋粉,所以今日焗麵包試吓加埋落去,睇吓效果如何?

今日我用中種法,將呢包紫芋粉約5g加入中種面團,再加少許糖,伊士&糖,一齊搓勻唔黏手又唔黏缸就得,擺係度靜置約4個鐘.

今日天氣好凍,所以要攞出露台,借助陽光令溫度高番啲,麵團溫度約28-29度左右.

經過4個鐘之後,就將主麵團材料加入,用機搓至起薄膜,不過變成一個淡粉紅色麵團,唔係紫色,所以下次要再重手,加多啲紫芋粉先至得.

跟住如常一樣經過兩次發酵,放氣,整形後,放入方包模作最後發酵至8-9成滿,搽上蛋汁,灑上芝麻,就可以攞去焗啦.

焗咗約25分鐘後就可以出爐,呢個係麵包正面&側面.

切開食都好鬆軟,濕潤,都幾好食,不過就無芋頭味,我減咗糖,又改咗用葡萄籽油,所以都算健康嘅麵包.

甜品蛋糕技巧班-第二堂-紅豆毛士綠茶蛋糕

昨日又去上甜品蛋糕堂,今次教嘅係紅豆毛士綠茶蛋糕

首先當然要製作綠茶蛋糕先啦.其實同普通海綿蛋糕無乜大分別,祗係係麵粉內加入綠茶粉,然後一齊過篩.

焗好後分成數片,祗要兩片就夠,蛋糕頂&底部通常唔要.

同普通毛士餡製作一樣,都係蛋黃加糖坐熱水打起,再將椰奶,浸軟魚膠片溶入其中,最後將打起淡忌廉混合埋一齊,同埋加入已烚稔嘅紅豆入內,然後逐層鋪入模中,最底層一定係蛋糕,最面一層係毛士漿,放入雪櫃雪至硬身.

同場加影嘅係Miss將毛士漿夾入蛋糕頭,尾層,成為三文治蛋糕俾我咃食埋,一啲都唔浪費.

當蛋糕雪硬後,就將綠茶啫喱倒上面加上紅豆裝飾,但由於天氣太凍,綠茶啫喱好快凝固,所以淋上糕面時唔得均勻,買相麻麻.

但都無影響食味,一人一舊攞番屋企慢慢食lu..

拉腸粉

自從舊年夏天,廚房火爐咁熱,就好耐都無拉腸粉,而家趁天氣凍凍哋,又再開工啦.

首先開好粉漿,另外有鮮蝦&上次包粉果剩低嘅餡料.

工具有腸粉盤同埋兩塊腸粉布,用來輪流替換.

當鑊中熱水滾起時,放平腸粉盤,再鋪腸粉布,落一層較稀嘅粉漿墊底,唔係要來食嘅.

將呢塊腸粉布放落凍水中浸一浸攞起,再鋪番入盤中,落粉漿加餡料,蒸約2分鐘,見粉漿起泡,即係熟,可以攞出腸粉布,反轉鋪係已經掃咗油嘅枮板或茶盤上,然後用竹籤沿邊緣挑起,慢慢將粉皮撕離塊布,用界麵團刀捲起成腸粉.

睇吓捲起灑上炒香芝麻同淋上煲仔飯豉油就食得啦,由於有包餡個幾條買相好唔掂,又穿咗洞,無面見人,俾我食咗落肚lu..,腸粉真係好幼滑,可以拍得住酒樓嘅出品.

但都幾難拉,而且鑊中滾水好熱,放粉漿同攞腸粉布上來,都要好小心,好容易炙傷手腕內側,之前我都試過,況且屋企個鑊係圓底,所以好難將腸粉盤放平,而令到粉漿可以平均啲.

我整嘅老婆餅

我幾鍾意食老婆餅,以前經過元朗恆香多數會買番屋企食,但自從舊年學咗之後,一次都無整過,原因係知道油皮用超多豬油,但點都要整番一次先安樂,至多搵人食咗佢,唔駛肥死自己一個.

材料包括有麵粉,高筋粉,砂糖,糖冬瓜,糕粉,自己煎嘅豬油(買豬肉時問豬肉檔攞,免費),炒香芝麻.

糖冬瓜浸熱水去糖份後打碎加入糕粉,糖水,少許油,炒香芝麻搓勻成餡(放入雪格雪15-20分鐘),另外要搓水皮,左上角個舊就係,同埋油皮,左下角個舊(搓勻後要放入雪格雪約20分鐘稍為硬身先可以用).

將3樣野分成等份搓圓(我分咗10份),用水皮包住油皮成圓形,摺口各下.

將圓形粉團用棍碌成橢圓形.

然後向自己方向捲埋一卷

再將呢卷粉團由右向左橫捲一次,再豎立成咁樣,做咁多野無非都係想增加層次感啫.

之後將上述粉團壓扁,用棍碌成稍大圓形包餡.,摺口向下.

包餡時最好用右手大姆指同食指嘅虎口位卷成,將多餘粉團搣走.

反轉放入焗盤,壓扁麵團,剪十字係中間,掃蛋黃汁,灑上芝麻,就可以入爐焗.

第一盤出爐啦,買相認真唔掂,有啲仲爆埋餡添,點解會咁?

原因1)我想餡多皮薄,結果撐爆外皮 2)壓得太平,餡多皮就向橫裂開.

呢盤係第二盤焗好嘅餅,經過失敗後檢討再改良,唔再將佢壓得太扁,另外將中間十字形剪大啲,等餡可以有位向上升,唔駛向橫迫爆皮,個樣無第一盤咁衰.

睇吓皮真係好薄而餡又厚,食落同恆香有8分相似,好香好鬆化,我又減咗糖,所以唔係好甜幾好食,但我唔會自己食哂,否則會危害健康,要唸辦法送俾人食,

雖然都幾化時間,但都幾好玩,不過有排都唔會再整,因為太肥膩,就算做好多運動都唔掂.