甜品蛋糕技巧課程-第五堂_蘋果紅茶慕士蛋糕

今日學呢個蛋糕比較複雜,寫筆記都寫到有啲混亂,主要分為3個部份,蛋糕底,蘋果醬,紅茶慕士.

首先用分蛋法,分別打起蛋白+糖,再將蛋黃分數次加入,最後加埋已過篩嘅麵粉,鷹粟粉成粉漿放入唧袋,係牛油紙上打蛇餅咁唧出兩個圓形蛋糕圈.

其餘粉漿唧成波波形,面上灑上糖霜先放入焗爐焗會脆啲.

焗完後出爐就係咁樣嘞.

跟住將蘋果去皮切粒,用鑊煮乾水份,然後落糖加蘋果汁一齊煮至杰身,落蘋果酒,最後打粟粉獻待涼.

仲要繼續準備紅茶慕士,將奶煮熱加入茶包焗約5分鐘,搾出奶茶汁待用,另外蛋黃同蛋白分別加糖坐熱水中打起,奶茶就倒入蛋黃漿中,再加入已坐溶嘅魚膠粉液,然後將打起嘅蛋白混合,最後加埋已經打至杰身嘅淡忌廉就大功告成.

終於可以準備砌餅啦,放一片蛋糕片係底,蛋糕面搽上之前已準備好嘅蘋果紅茶糖水,將蘋果餡放上糕面,再放一塊蛋糕片,蛋糕面塗上打起杰身淡忌廉,將之前焗好嘅波波放入糖水中浸一陣,放係淡忌廉面.

最後倒入紅茶慕士漿,刮平糕面,就可以攞去雪凍.

由於時間關係,Miss無整到啫哩面,雪凍後就切開分俾我哋帶走,不過呢過蛋糕太多野要準備,我唸如果自己整嘅話,就淨係做紅茶慕士算啦,唔好攪咁多樣,又或者分開兩日做.

第一次做嘅芒果慕士蛋糕

已經學做蛋糕差唔多有4個月時間,但從來無係屋企親手做過一次慕士蛋糕,趁今日要去拜訪朋友,所以昨日做咗個芒果慕士蛋糕作為手信.

首先一早焗好個海綿蛋糕,攤凍後片去底面唔要,再片開兩層一分為二片.

然後準備打起慕士餡,將芒果一啲打成蓉混合慕士漿中,一部份切成粒,放係蛋糕中間,另外一部份挖成圓球&捲起作餅面裝飾.

慕士漿做法:

1)將淡忌廉打起7成左右成軟雪糕狀放入雪櫃暫放.

2)然後係鑊中煲熱咗嘅水中,坐住打起蛋黃同糖,加入已經溶解嘅魚膠片&芒果蓉,放至稍涼.

3)另外亦將蛋白打起泡後加糖攪勻後,亦要放係有熱水鑊中打起.

呢個步驟係加熱消毒蛋白&蛋黃,再將雪凍淡忌廉混合一齊成為慕士餡.

而家可以開始砌蛋糕,最底放蛋糕片,倒一半慕士餡,將一半芒果粒放係慕士餡面,再放入一塊蛋糕片,將其餘一半慕士餡放入,芒果粒亦混入其中,抹平糕面,放入雪櫃雪凍2-3個鐘.

當慕士蛋糕雪至凝固後,放上芒果球&卷做裝飾,淋上芒果啫喱溶液係糕面,放番入雪櫃雪凍一晚.

今朝攞佢出來,用風筒吹熱慕士圈甩模,圍上膠圈加埋之前做嘅藍莓果醬就可以出發去探朋友lu...,雖然蛋糕裝飾麻麻,但係試過食入面慕士餡都幾好,好似始終無Miss打得咁滑,有機會要再練習多啲.

中日素食-第五課_日本麵豉湯&天婦羅

今日中日素食教嘅係日本麵豉湯同天婦羅,

由於係素菜,所以麵豉湯底係用大荳芽菜煲,但首先要將芽菜用少少油炒過,先好放落滾水中加埋薑汁辟寒,而海帶就用日本個隻,因為無咁多沙同無咁咸,浸一陣已經可以撈起,草菇切片後同埋海帶都係要炒一炒,落些少胡椒粉去"UP'味,然後放埋落去一齊滾約30分鐘,差唔多好就放埋豆腐粒,最後落麵豉醬,鹽,糖等調味,就可以飲得,味道比較清淡,都幾好飲.

而天婦羅主要都係蔬菜,包括有三色西椒,茄子,金菇,新鮮冬菇等,切好蔬菜成條狀,茄子則成扇狀,冬菇係面界十字,然後開炸漿,等30分鐘後再將蔬菜放落炸漿中,再黏上麵包糠放入沸油中炸至浮起就食得.

由於我喉嚨痛,所以無試食,但我稍嫌肥膩同熱氣,同埋係日式餐廳食係無落麵包糠,所以有啲奇怪.

明日早餐-柚子蜜吐司

今日見到樽柚子蜜都無乜郁過,為免過期,又要焗麵包做早餐,於是就整咗呢個柚子蜜吐司(湯種).

同其他甜麵包份量差唔多,祗不過用咗柚子蜜代替部份糖,我自己都再減咗糖,經過一般發酵麵包程序後,最後將麵團分為3舊,搓圓壓扁捲起放落方包模發酵.

發至8-9成滿,就放入焗爐焗約35分鐘,就可以出爐,不過無頂角,而且包面又唔夠金黃.可能因為面火唔夠大,同埋筋粉唔夠啩.

不過切開後試食都好鬆軟,但下次會落多啲柚子蜜,今次味道淡啲未夠濃.

BB冷背心

由於上次織BB冷衫套裝,剩低一舊冷(未開過),所以去換咗另外一隻顏色BB冷,再加多兩舊,就織咗呢件BB冷背心,準備送埋俾我個朋友,因為已經照到係女,所以可以用隻有粉紅同淺黃嘅花冷.

甜品蛋糕技巧課程-第四堂_聖安娜蛋糕

今日學嘅係聖安娜蛋糕,但主要成份係以泡芙為主,有別於平時以蛋糕為主.

首先要做餅底,用牛油,麵粉,水同鹽搓勻成麵團,再擺放約15分鐘以上,搓薄吸出餅模size作底.

跟住準備泡芙麵漿,放入唧袋唧出圓圈形係餅底之上,圓圈一定要有距離,否則膨脹時會向上烘起,就可以放入焗爐焗熟,另外將一半泡芙麵漿唧出小圓形以作稍後裝飾之用.

仲要煮熟吉士忌廉,攤凍後裝入唧袋,用作唧入小泡芙同焗好嘅餅底之上.

最後要煮糖膠至金黃色,用來黏小泡芙係餅面同糖絲裝飾.



將小泡芙黏上糖膠,圍邊黏住焗好嘅餅底,中間唧入吉士忌廉.

將糖膠用數隻筷子或剪開嘅鐵線打蛋器,製造糖絲旋轉繞下於蛋糕上.

蛋糕咁就做好啦,係咪好靚呢?不過手工都好多,尤其是煮糖膠,要好注意溫度,又要唔可以郁個煲,又要留意糖膠顏色,如果我自己整,一定做泡芙就算數,唔會做咁多功夫.

今日晏晝-$10成本排骨粗炒

今朝起身,突然想食上海粗炒,於是趁去街市買餸,順便買咗兩件新鮮豬扒($10兩塊),另外$8上海粗麵,番屋企就可以開工煮lu.

好簡單嘅材料,將1/3上海粗麵($8/3=$3.7)煮淋,過冷河,隔水後俾少少油撈勻,以防黏埋一舊,豬扒就用刀背啄鬆,用生抽,老抽,糖,胡椒粉,仲有我至愛嘅玫瑰露,麻油(奄尖大少最唔鍾意,覺得肥膩),醃約30分鐘.

首先用猛火煎香豬扒至僅熟,待稍涼切條或塊狀,然後落薑絲炒白菜仔,最後炒上海麵,落埋個獻汁(生抽,老抽,麻油,糖,豆粉,少少水)同之前白菜仔兜勻,就可以上碟,豬扒肉放面,味道都唔錯,拍得住出面嘅味道.

雖然話無咁肥膩,但始終要用油炒,所以間唔中食吓好啦.

成本係一塊豬扒($5)-另一塊留番明日淥湯粉/麵+上海麵1/3份量($3.7)+白菜仔$1($3.3一斤,$10有3斤)=$9.7,但再加煤氣,油,鹽,糖,我唸應該約$13-14左右,計得咁清楚俾大家知,無非想講,有時間如果自己郁吓手,真係價廉物美架.

自炒鳳梨酥餡

次次整鳳梨酥都係出面買餡番來包,但係見到好多網友都係自己整,睇落都唔太複雜,起碼真係有菠蘿係裡面,所以我又試吓自己整.

係網上搵到以下呢個配方,首先將罐頭菠蘿隔去糖水,將菠蘿圈切碎,攪爛成蓉,然後隔出約半杯汁液.

將糖冬瓜浸去糖份,然後切碎,將半杯菠蘿汁液加入砂糖混合後,再打成蓉.

再將之前嘅菠蘿蓉加入混合後,落鑊放一湯匙油,不停攪動,煮乾水份,可以加入少許菠蘿香油,令顏色同味道提升.

炒至半乾,剩低少許水份就加入糕粉撈勻成黏杰狀就攪掂lu..好香菠蘿味,無出面個啲咁假,因為減咗糖,食落有些少微酸,不過我覺得好過買番來個啲餡囉.

全麥吐司-麥皮湯種

今日跟"65度C湯種麵包"書焗咗呢個健康嘅全麥吐司,但其實唔係100%都用全麥粉,否則一定起唔到筋性,所以實際上袛係40%全麥粉,60%係高筋粉,我見上次用麥皮湯種,麵包都幾軟熟,今次繼續用呢個配方嘅湯種.

呢個係打好嘅麵團,要比平時用多啲時間先打到有薄膜.因為全麥粉無乜筋性.

今日天氣同溫度都好,所以麵團發得唔錯,經過第一次發酵,排氣,第二次發酵後,就整形,捲好放入麵包模作最後發酵,今次用正方形麵包模.

發酵至8-9成滿,我再加料係包面搽上牛奶後,灑上小麥胚芽,咁就更加健康嘞.

經過35分鐘就焗好出爐.呢個係麵包正面同側面.不過唔夠一陣麵包就開始廋腰(中間凹陷),即刻將佢側放直至涼.

攤凍後切開,試食覺得麵包質地都好軟熟.明朝可以作三文治夾火雞肉+滑蛋,唔....唸起都好味.

中日素食-第三課_安琪梨&壽桃

新年過後又恢復上烹飪堂,今日學嘅係中式甜點,主要係做形.

用大滾水沖入調配好嘅澄麵粉+少許糯米粉+幼砂糖水或糖霜,若果是綠色皮就加入幾滴斑蘭葉油,紅色可以加食用紅色素,或士多啤梨色素,搓勻後,若果整安琪梨就用綠色皮做外皮,白色做內皮,搓成圓兜狀,包入白芝麻或黑芝麻餡,頂部插上桑寄生枝作果柄,約蒸5分鐘就得.

其實壽桃造法都差唔多,將紅色外皮包白色內皮,再包芝麻餡,搓成尖圓形,用牙簽係中間壓出一直線,另外再用綠色皮搓成尖長形壓扁,用牙簽刻出樹葉紋,黏上壽桃中就可以攞去蒸熟. 呢啲都係我堂上整嘅作品.

另外Miss趁我哋忙碌之際,自己同時又整咗紅蘋果&士多啤梨俾我哋參考,呢個點心如果蒸起即刻食都幾軟熟同好香麻蓉味,但如果凍咗,皮會變硬,就要重新蒸軟番先可以食.

潮州粉果&豉油雞

今日奄尖大少開始番工,而我亦可以做番我自己鍾意嘅野,就係整點心,潮州粉果.

餡料有沙葛,菜莆,冬菇,紅蘿蔔,蝦米,廋肉,唐芹,焗香花生,要全部切粒,都要用幾多時間.

跟住將所有餡料飛水,除咗唐芹&花生,用蔥頭(啄成蓉)起鑊,落餡料炒香,打獻後再加唐芹粒&花生攤凍.

將澄麵粉,生粉開好漿,用熱滾水撞勻,約焗2分鐘後倒出,再加入剩餘生粉同埋木薯粉,加少許油,搓成粉團,就可以包餡啦.

大火蒸約6-7分鐘,再焗多3-4分鐘,就食得啦,味道都唔錯,我無跟食譜落味精,以前幾次都無落炒花生,今次落咗就香口好多.不過都好化時間,連洗,切,煮,包,蒸,用咗3個鐘先有得食呀.

另外,由於奄尖大少要求我整豉油雞,趁住新年後,活雞價回落,所以買咗隻嘉美雞浸豉油雞,將上次豉油雞汁煮番滾後再加唐芹,芫茜,少許八角,花椒,玫瑰露煲一陣熄火焗3個鐘,先開始浸雞,為免好似上次咁雞脾位唔熟,今次浸多10分鐘,仲用瓦碟壓住,我唸今次一定熟啩?

點知斬開之後...雞脾位仍然見紅,即刻將雙脾放係飯面再焗一陣,先至可以食得,果然嘉美雞真係皮薄少肥膏,肉質都算嫩滑,雖然價錢貴啲但都值嘅.