水泡包-Bagel

今日試吓整呢個包,上堂時見阿Sir整都唔係幾難,而且幾健康,無油,奶,蛋,祗有筋粉,水,伊士,少許鹽&糖.

同普通搓麵包一樣,用手搓或機打至起薄膜後,發酵至兩倍大,放氣,分割,搓圓,再鬆弛10分鐘左右,用手指係麵團中間鑽一個洞,將佢擴大,另外3 個我捲成花卷形.

然後將麵團放入滾水(已加入少許砂糖)中煮約20秒後,撈起.

分別灑上麥皮,小麥胚芽&黑白芝麻係面,就可以放入焗爐焗啦.

焗咗約20分鐘就出爐.

切開入面就係咁樣,食落係皮脆肉UN,同平時食嘅麵包唔同,中間可以夾餡或搽果醬都得.

自家混醬-青瓜雞絲粉皮

感冒咗差唔多兩個禮拜,仍然未全部好番,無乜胃口,所以今日晏晝就整咗呢個清清地嘅麻醬青瓜雞絲粉皮.

將雪藏雞柳肉加些少調味,胡椒粉,鹽,燒酒等蒸熟後,用手撕開成為雞絲,最好唔好貪快用刀切,食落口感無咁好,會比較鞋啲.

青瓜去皮或者連皮,去囊切絲,我用乾粉皮,所以要用滾水浸一陣,約4-5分鐘,浸軟身後再用冷水浸,令粉皮爽口啲,隔水切成條狀

我自己就用麻醬,花生醬,豉油,糖,烏醋等混合成醬汁,淋上面就食得,都好方便同容易做.

甜品蛋糕技巧課程-第六堂_洋金菊慕士蛋糕

繼上禮拜嘅蘋果紅茶慕士蛋糕後,今個禮拜仍然係慕士蛋糕,係洋金菊慕士蛋糕,但就無上次咁複雜.

主要有杏仁蛋糕底,洋金菊朱古力醬,要用來搽上蛋糕面,另外仲要準備洋金菊慕士心同埋牛奶朱古力慕士.

杏仁蛋糕用分蛋法,唔需要落油,祗要將蛋白加糖打起至起角,再混入蛋黃,杏仁粉,過篩麵粉就可以攞去焗,倒扣攤凍後切成蛋糕片備用.

洋金菊係花茶店有得買,或者係超級市場買茶包,但都係要用乾磨機打成粉先可以用,再同蛋黃,砂糖,牛奶,坐溶魚膠片,打至杰身嘅淡忌廉混合成慕士,倒落模中雪凍成為慕士心備用.

跟住準備洋金菊朱古力醬,將洋金菊粉末同溶解牛奶朱古力&無鹽牛油,熱奶,淡忌廉混合成醬.

至於牛奶朱古力慕士都係大同小異,唔用洋金菊粉,加入溶解嘅朱古力漿而已.

好啦,開始砌餅,最底層係杏仁蛋糕片,搽上洋金菊朱古力醬.

再將雪凍嘅洋金菊慕士心放在朱古力醬上面.

最後倒入牛奶朱古力慕士覆蓋成個蛋糕,雪凍甩模就可以切嚟食,如果想糕面靚啲,可以淋上朱古力漿或其他裝飾.

切開裡面就係咁樣,食落真係有洋金菊味,無俾牛奶朱古力慕士蓋過,又幾軟滑,唔錯.

柚子蜜雪芳蛋糕

今日再利用柚子蜜整咗呢個雪芳蛋糕,打算明天送俾朋友食,但今次蛋糕配方同上兩次有啲唔同,我無落泡打粉,又無加多一隻蛋白,所以發得唔算太高.

柚子蜜要事先用熱水開稀,仲要將柚子皮切碎或剪碎,否則撈落麵糊時會太重下沉.

我真係傻吓傻吓,放入焗爐成10分鐘先發覺淨係開咗上發熱線,下面根本無開到,唯有即刻開番,好彩都無太大問題.

好啦,出爐後倒扣攤涼就放入雪櫃雪佢一個鐘,再攞番出來,用刀沿模邊界開,跟住界埋模底,咁就輕易地甩咗個蛋糕出來,睇落都幾似樣,可以呃吓人.

切開都無乜問題,試食後柚子蜜味道好濃郁,因為我加重咗份量,蛋糕質地比較濕潤,應該可以焗多5分鐘咁就好啲.

中日素食-第六課_日本壽司&綠茶草餅

今日學嘅係包壽司&綠茶草餅.

其實兩樣我自己係屋企都整過,過程大同小異,由於係素食,所以壽司材料都係以素為主,包括有素魚生,素飽魚,素肉鬆,日本黃蘿蔔,青瓜等等.

包法就可以用竹蓆捲起後切片,或用紫菜條捲住飯團,中間包片狀嘅材料,至於珍珠米浸透後就隔水蒸熟,再落醋,糖,鹽,麻油等調味,攤凍就可以包啦.

呢啲係我包嘅壽司,捲得唔夠實,比較鬆散.

再睇吓Miss示範啲幾靚.

至於綠茶草餅,就係將糯米粉,澄麵粉,花奶,砂糖,綠茶粉混合後蒸熟,再將粉團包入豆沙餡,滾上椰絲或綠茶粉+片栗粉,就係咁簡單咋.

藍莓車輪包

之前煮咗啲藍莓果醬送俾朋友,留起咗小部份俾自己,加埋藍莓乾,今日就攞來整呢個藍莓車輪包.

材料包括有藍莓果醬,浸咗RUM酒嘅藍莓乾,發咗一晚嘅中種麵團,高筋粉.

將藍莓果醬加入主麵團,中種一齊混合,用機打至起薄膜,跟住發酵至2倍左右,放氣,再發酵多15-20分鐘,用棍將麵團碌成長方型,鋪上藍莓乾,捲起成長條狀,放入模內作最後發酵至8-9成滿,就可以放入焗爐焗.

焗咗30分鐘左右就可以出爐.

呢個係切開麵包入面個樣,因為減咗糖,所以唔算好甜,有些微酸甜味,比較平時麵包濕潤,可能水份較多原故,麵包都幾鬆軟.睇吓明日再食會唔會仍然咁鬆軟? 照計用中種法嘅麵包會無咁快老化(硬).

大雞三味

今晚奄尖大少同朋友食飯,於是我就要食自己嘞,靈機一觸,去街市買咗隻新鮮雞番來,首先一開二,半邊攞去浸豉油雞,其餘半邊嘅一半用冬菇雲耳蒸,咁樣留番第二餐食,就可以唔駛再買餸lu..

另外剩下半邊嘅一半加埋潤腸,冬菇,就用來煮煲仔飯作為我嘅晚飯.

煲好食得啦,可惜係餸多飯小,煲同焗時間要長咗,結果飯焦好厚,得番半碗飯,不過食埋碟菜就已經好飽.

今晚唔單祗整雞,其實我仲焗咗一盤曲奇餅,明日見舊同事,送俾佢哋食.上面個款係百爵紅茶曲奇,比較硬,唔係好鬆化,左下角係櫻花蝦芝士曲奇(咸味),右下角模型個款係榛子曲奇,好鬆化,好好味,本來有部份攞去滾上朱古力邊,但滾完後好肉酸,唔多掂,都係自己食咗算啦.

甜品蛋糕技巧課程-第五堂_蘋果紅茶慕士蛋糕

今日學呢個蛋糕比較複雜,寫筆記都寫到有啲混亂,主要分為3個部份,蛋糕底,蘋果醬,紅茶慕士.

首先用分蛋法,分別打起蛋白+糖,再將蛋黃分數次加入,最後加埋已過篩嘅麵粉,鷹粟粉成粉漿放入唧袋,係牛油紙上打蛇餅咁唧出兩個圓形蛋糕圈.

其餘粉漿唧成波波形,面上灑上糖霜先放入焗爐焗會脆啲.

焗完後出爐就係咁樣嘞.

跟住將蘋果去皮切粒,用鑊煮乾水份,然後落糖加蘋果汁一齊煮至杰身,落蘋果酒,最後打粟粉獻待涼.

仲要繼續準備紅茶慕士,將奶煮熱加入茶包焗約5分鐘,搾出奶茶汁待用,另外蛋黃同蛋白分別加糖坐熱水中打起,奶茶就倒入蛋黃漿中,再加入已坐溶嘅魚膠粉液,然後將打起嘅蛋白混合,最後加埋已經打至杰身嘅淡忌廉就大功告成.

終於可以準備砌餅啦,放一片蛋糕片係底,蛋糕面搽上之前已準備好嘅蘋果紅茶糖水,將蘋果餡放上糕面,再放一塊蛋糕片,蛋糕面塗上打起杰身淡忌廉,將之前焗好嘅波波放入糖水中浸一陣,放係淡忌廉面.

最後倒入紅茶慕士漿,刮平糕面,就可以攞去雪凍.

由於時間關係,Miss無整到啫哩面,雪凍後就切開分俾我哋帶走,不過呢過蛋糕太多野要準備,我唸如果自己整嘅話,就淨係做紅茶慕士算啦,唔好攪咁多樣,又或者分開兩日做.

第一次做嘅芒果慕士蛋糕

已經學做蛋糕差唔多有4個月時間,但從來無係屋企親手做過一次慕士蛋糕,趁今日要去拜訪朋友,所以昨日做咗個芒果慕士蛋糕作為手信.

首先一早焗好個海綿蛋糕,攤凍後片去底面唔要,再片開兩層一分為二片.

然後準備打起慕士餡,將芒果一啲打成蓉混合慕士漿中,一部份切成粒,放係蛋糕中間,另外一部份挖成圓球&捲起作餅面裝飾.

慕士漿做法:

1)將淡忌廉打起7成左右成軟雪糕狀放入雪櫃暫放.

2)然後係鑊中煲熱咗嘅水中,坐住打起蛋黃同糖,加入已經溶解嘅魚膠片&芒果蓉,放至稍涼.

3)另外亦將蛋白打起泡後加糖攪勻後,亦要放係有熱水鑊中打起.

呢個步驟係加熱消毒蛋白&蛋黃,再將雪凍淡忌廉混合一齊成為慕士餡.

而家可以開始砌蛋糕,最底放蛋糕片,倒一半慕士餡,將一半芒果粒放係慕士餡面,再放入一塊蛋糕片,將其餘一半慕士餡放入,芒果粒亦混入其中,抹平糕面,放入雪櫃雪凍2-3個鐘.

當慕士蛋糕雪至凝固後,放上芒果球&卷做裝飾,淋上芒果啫喱溶液係糕面,放番入雪櫃雪凍一晚.

今朝攞佢出來,用風筒吹熱慕士圈甩模,圍上膠圈加埋之前做嘅藍莓果醬就可以出發去探朋友lu...,雖然蛋糕裝飾麻麻,但係試過食入面慕士餡都幾好,好似始終無Miss打得咁滑,有機會要再練習多啲.

中日素食-第五課_日本麵豉湯&天婦羅

今日中日素食教嘅係日本麵豉湯同天婦羅,

由於係素菜,所以麵豉湯底係用大荳芽菜煲,但首先要將芽菜用少少油炒過,先好放落滾水中加埋薑汁辟寒,而海帶就用日本個隻,因為無咁多沙同無咁咸,浸一陣已經可以撈起,草菇切片後同埋海帶都係要炒一炒,落些少胡椒粉去"UP'味,然後放埋落去一齊滾約30分鐘,差唔多好就放埋豆腐粒,最後落麵豉醬,鹽,糖等調味,就可以飲得,味道比較清淡,都幾好飲.

而天婦羅主要都係蔬菜,包括有三色西椒,茄子,金菇,新鮮冬菇等,切好蔬菜成條狀,茄子則成扇狀,冬菇係面界十字,然後開炸漿,等30分鐘後再將蔬菜放落炸漿中,再黏上麵包糠放入沸油中炸至浮起就食得.

由於我喉嚨痛,所以無試食,但我稍嫌肥膩同熱氣,同埋係日式餐廳食係無落麵包糠,所以有啲奇怪.

明日早餐-柚子蜜吐司

今日見到樽柚子蜜都無乜郁過,為免過期,又要焗麵包做早餐,於是就整咗呢個柚子蜜吐司(湯種).

同其他甜麵包份量差唔多,祗不過用咗柚子蜜代替部份糖,我自己都再減咗糖,經過一般發酵麵包程序後,最後將麵團分為3舊,搓圓壓扁捲起放落方包模發酵.

發至8-9成滿,就放入焗爐焗約35分鐘,就可以出爐,不過無頂角,而且包面又唔夠金黃.可能因為面火唔夠大,同埋筋粉唔夠啩.

不過切開後試食都好鬆軟,但下次會落多啲柚子蜜,今次味道淡啲未夠濃.