檸檬芝士戚風蛋糕

今日焗咗呢個戚風蛋糕,主要係加咗檸檬汁&檸檬皮茸,忌廉芝士.

今次試吓用係廚安居買嘅細天使蛋糕模,焗時蛋糕升高得唔錯.

倒扣後攤凍甩模.

切開食落唔算甜,有檸檬味,但唔太覺芝士味,但感覺好似無忌廉芝士餅咁肥膩,味道清新啲.

合桃無花果麥包-17小時低溫中種

其實呢個包低溫中種發酵唔夠17小時,但因為趕時間,祗好提早兩個鐘攞佢出嚟,放係室溫發酵補數,所以發酵效果分別不大.

今次主麵團加入烘香合桃切粒,無花果切粒,同埋全麥粉一齊搓,經過第一次發酵後就分割等份,靜置約20分鐘度.

然後滾圓,搓成水滴形,作最後發酵約2.5-3倍,係包面噴水,灑上高筋粉,再界面就可以放入焗爐焗,初期噴水入焗爐幾次.

咁就焗好出爐啦.

切開麵包入面,係好柔軟,但可能噴水唔夠,皮唔係好脆.

今日晏晝-蕃茄牛肉粥

記得以前我生病時,阿媽會煲呢種粥俾我食,其實我最唔鍾意食糊口嘅野,所以唔係病唔會主動煲同食粥,但唔知點解我對蕃茄牛肉粥又無咁抗拒.

因為呢幾日腸胃炎,所以煲咗呢款粥食,咁就可以懷勉吓以前嘅歲月同埋味道.

材料好簡單,有隔夜冷飯,咁就好容易煲爛,唔駛咁哂柴火,切碎去核蕃茄粒,因為唔鍾意太酸,加埋調咗味牛肉碎.

但煲粥好容易燶底,要不停攪住煲底,當粥煲到差唔多時落蕃茄粒煲一陣,再加埋牛肉碎,調味熄火就食得嚕..

.

楓蜜栗子包-17小時低溫中種

仍然繼續用17小時低溫中種,主要覺得呢種發酵方法,麵包比較軟熟,就算幾日後仍然保持柔軟.

但係今次味道唔係咁突出,主要係個隻栗子蓉無乜香味,連楓蜜味道都好似無,加上模太細,焗嘅時候東歪西倒,但呢啲無乜影響麵包質感,祗係個樣唔靚仔而已.

睇吓個模係焗爐裡面側埋一邊就知.

呢個係焗好個樣,正面睇唔係好覺樣衰.

切開後就見到個包側埋一邊,而且唔係圓形,直情走哂樣,不過唔緊要,我都可以照啃得落嘅.

合桃香蕉朱古力蛋糕

今日除咗焗麵包外,仲焗埋蛋糕,準備明日送俾朋友.

我專登留低一隻香蕉熟到出梅花點,去皮後加煉奶壓成茸,將牛油放至室溫同糖粉一齊打至變奶白色,加入蛋黃,香蕉茸,朱古力溶液,牛奶,最後加入已篩混合麵粉,蘇打粉,無糖可可粉,放入模內,將麵糊掃平,放上合桃,就可以焗嘞.

焗約20分鐘左右就可以出爐.

攤凍後,本來想灑上防潮糖粉,但又搵唔到,唯有切開係咁食,但都好鬆軟,同好香蕉味,我又減咗糖,都算唔錯.

肉鬆麥包-17小時低溫中種

呢排不停試用不同發酵時間焗麵包,發覺出嚟效果差異不大,所以今次用番17小時低溫中種就算.

中種麵團加入主麵團打至有薄膜後,就可以作第一次發酵,跟住排氣,分割,滾圓,再靜置約20分鐘,就可以開始整形.

將麵團拍扁,搽上沙律醬.

灑上肉鬆壓實,再捲成圓柱體,放入模中作最後發酵.

但由於麵團太軟熟,放入模後好似飲醉酒咁,係模內企唔穩,東歪西倒,都無法唯有照焗.

一入爐係咁向上升,要即刻蓋錫紙,同較低爐溫,以免變燶雞,所以有模個部份上得唔夠色,其實可以再焗耐啲,但又唔係送俾人,自己食,亦都唔影響食味,費事再攪咁麻煩,算數囉,至多下次再整好啲啦.

精緻蛋糕甜品班-第十課-紅豆蛋白蛋糕

終於今日上埋呢個課程最後一堂嘞,原本今日要學嘅有兩樣款式,一款係雲尼拿雪糕,另一款係紅豆蛋白蛋糕,但因為時間關係,又唔係用雪糕機做,雪糕要一路雪一路攪,要好耐先食得,所以Miss祗係示範做嘅方法同埋俾我哋試味,之後俾我哋帶番屋企繼續攪,繼續雪,直至食得為止.

由於雪糕祗係需要蛋黃,所以蛋白就攞嚟做咗呢個蛋糕,首先紅豆要浸4-5個鐘,或一晚再用煲焗方法令紅豆淋身,而麵粉,泡打粉過篩,菜油蜂蜜溝勻,跟住將蛋白加糖打起至勾狀,加入已篩麵粉,泡打粉,撈勻後再加入蜂蜜,茶油就倒入模,放入焗爐焗約45分鐘.

食後我覺得呢款蛋糕味道普通,無乜特別,加入麵粉較多,比較實.

又買咗新玩具-鈉米能量杯

見到報紙賣廣告好耐,但價錢都幾貴,一隻杯最少都要成300幾元,但成效仍然係個謎,當然唔會買嚟試啦,但近日我係淘寶網見到有得賣,而價錢加運費都唔駛100元港紙,於是就買嚟試吓,今日由速遞公司送到屋企嘞.

佢個正式名稱叫做微電解製水器,除咗呢個包裝,外面仲有個卡通箱,用膠紙封實.

打開紅色包裝,裡面就係個杯,其實仲有說明書,保養証,同一隻光碟介紹呢隻杯.

而主要電解作用係靠呢個杯芯,入面有經鈉米技術將生化陶瓷,不同礦石係高溫下提取有用成份融合而成粒子,當將普通水倒入杯中,搖動杯身幾下,再等5分鐘度,咁水會變為弱鹼性,飲咗之後可以中和人身體內過多酸性,但呢個杯芯用一段時間就會無效,要再更換新杯芯,為期好似2-3年.

講真太誇張成效可以不理,祗不過飲鹼性水對身體都有啲幫助啩?所以買咗佢飲一段時間睇吓點先.

椰汁馬豆糕-附食譜

繼上禮拜整完椰汁紅豆糕後,因為有網友問食譜,但我自己祗係大約份量,所以再做多一次,記錄低重量&做法,同大家分享.

材料份量:

乾馬豆....................100g,用水浸3-4個鐘,之後煲約30分鐘,熄火焗15分鐘,如果發覺未夠淋,再重覆一次,直至淋身,隔水備用.

大菜絲.....................8g

水.............................450ml

粟粉60g+水80g, 開稀至無粉粒

砂糖.........................140g

椰汁..........................400g (1大罐)

花奶..........................100g

做法:

1) 將大菜絲用水(份量以外水份)浸軟後,隔去水份,剪碎大菜絲備用.

2) 煲滾450ml水,將剪碎大菜絲放入水中,煮至全部溶解.

3) 加入椰汁,花奶於大菜溶液中

4) 當(3)煮至再滾起時,加入砂糖,可以分幾次加,然後試味,通常凍甜品糖份比平時食糖水甜,否則雪凍後就唔夠甜味.

5) 將粟粉水再次攪起,慢慢倒入煲中,但要不停攪動直至杰身,有泡由糊中冒起熄火.

6)將煮淋馬豆加入攪勻,倒落模中攤涼,放入雪櫃雪凍至硬身就食得.

呢度係上述份量做出嚟,如果用前面塑膠啫喱杯,應該有7-8杯左右,加入大菜絲原因係令糕身較挺,同爽滑,若果唔加會淋身好多架.

攤凍雪凍後,食落.....都可以保持水準,幾香滑,唔錯.

36小時低溫中種-豆腐麥麩包

今日又嚟做實驗,試吓36小時中種同17小時有乜分別?為咗整呢個包,重專登去買咗一舊日本豆腐,因為知道用唔哂全部,昨晚攞咗一半浸魚湯,淨係覺得豆腐好滑,但豆味又唔算太濃喎.

講番呢個包,星期日做定中種,今日由雪櫃攞出嚟加入主麵團,豆腐要隔去水份先好撈勻,照平時一樣,發酵,排氣,分割,滾圓,第二次靜置,整形,放入模中作最後發酵,當發至2.5-3倍大,就由模倒轉落焗盤.

睇吓發得幾勁,灑上筋粉係面就入爐,中途噴水入焗爐中2-3次.

約20分鐘,呢個疑似UFO物體就出爐嘞.

攤涼切開麵包內部組織都幾好,食落皮脆內心軟熟,但再放耐啲,包皮已經唔脆,包心仍然保持軟熟,但又食唔出同17小時中種有好大分別喎.

滋味家常菜餚課程_第十課_白菌雞批&焗芝士雞皇飯

終於嚟到最後一堂,亦即第十堂,今日Miss教嘅係白菌雞批&焗芝士雞皇飯,其實兩款餡料係一樣,不過一款係做批,另一款係將餡料鋪上飯面,再鋪上芝士焗.

首先講批皮做法,將麵粉過篩後與冰凍牛油,糖粉混合,再將蛋汁慢慢加入撈勻,千祈唔好用手搓,否則批皮會唔鬆化,跟住將麵團碌薄,用模吸出批皮,壓入鍚紙模內,而餡料需要預早煮好,凝固成團,先可以放入批皮中,而錫紙模底部要拮洞,等焗時可以疏去水氣.

將另一塊批皮鋪上面,按壓實邊位,用叉係週邊壓花紋,再搽上蛋黃汁,用竹簽係批面界鑽石花型,就可以放入焗爐焗嘞.

焗咗25分鐘度就可以出爐.

至於另一款芝士焗雞皇飯,就首先洗米蒸飯,將雪藏雞脾放入鑊裡同凍水一齊滾,去咗雪味撈起再重複煲滾熱水,將雞脾放入一陣滾起撈起去雞皮,雞肉切粒,另洋蔥,火腿亦切粒,磨菇切片,用牛油起鑊,爆香洋蔥,再下其他材料,加入調味料,水略煮,放入麵撈(牛油加麵粉,慢火煮成糊狀),淡忌廉,盛起攤凍備用.

將上述餡料放在蒸熟飯面,再鋪上芝士撕成條狀,或灑上芝士碎放入焗爐焗香至表面金黃色就食得啦.

兩樣都好好味,但千祈唔好成日食,真係好高卡路里存架.

精緻蛋糕甜品班-第九課-藍啤梨慕士餅

今日已經上到第九堂,亦即接近尾聲,番埋下禮拜要等到7月中先會再上新課程,今日Miss示範呢個蛋糕比較複雜.

首先要做甜鬆酥批底,又要焗海綿蛋糕,除咗要做藍啤梨慕士餡,仲要做雙色蛋糕圍邊,見到都頭痛,我諗如果自己做會減少啲程序,唔做咁多樣.

上述一切準備就緒,就開始砌餅嘞.

係模底鋪上批底,跟住圍蛋糕邊至模身高度一半左右,搽上藍莓果占,再放一層海綿蛋糕,倒一半份量藍啤梨慕士餡,又鋪一層海綿蛋糕,最後將剩餘一半藍啤梨慕士餡倒上面作頂層,放入雪櫃雪至硬身就可以甩模.

一人一舊,呢舊係我自己嘅.

16小時低溫湯種+44小時低溫中種-超熟鮮奶土司

係網上見到妃娟介紹呢個超熟鮮奶土司,好有興趣試吓整,睇吓同湯種,中種,17小時低溫中種有乜唔同?

呢個星期二朝早煮咗湯種攤凍,放入雪櫃16個鐘,我祗係等咗14個鐘,因為眼瞓想瞓覺,將中種麵團份量加入,搓至光滑,放係室溫1個鐘,再放番入雪櫃,直至星期四下晝先攞出嚟,再加入主麵團,雞蛋,牛油等搓至光滑,有薄膜見到,就作第一次發酵,跟住排氣,切割,滾圓,靜置15分鐘,分成3等份,來回捲壓兩次,捲成同麵包模闊度,放入麵包模作最後發酵.

我因為心急要準備晚飯,所以發咗7成就放入焗爐焗,結果唔可以頂角,同埋包面唔多上色.

但包側邊同底部就OK,而且麵包非常軟熟,見到麵包開始收腰,就即刻打側放直至攤凍為止,

切開包內部組織,氣孔比較精密均勻,雖然隔咗一晚,但食落都好軟熟,不過又唔覺同其他發酵方法有太大分別,加埋牛油就比平時落多成10g,同埋全部落奶,無用水,我自己覺得一試無妨,但唔會再用咁多時間去發酵囉.

今日你攞咗未?

今朝去上蛋糕甜品班,諗起今日PK開始有購物袋換,上星期睇到網友話好受歡迎,好快就換哂,於是唔執輸,即刻入去買咗$88以上嘅野,又唔駛排隊,仲有4個款任揀,我就揀咗呢款,其實袋都好大,但係防水,可以帶去沙灘,唔錯喎,後來下堂後約11:30度,入去Taste遊蕩,聽到話已經全部換哂,好多人抱怨同埋好失望,又要再等下個星期五先再有機會換嚕.....

又嚟大出血

屋企已經無淡忌廉,芝士忌廉,牛油都用得7788,所以今日出荃灣二記入貨,行得入去,當然唔會淨係買講個幾樣野啦,結果係...買咗呢堆野番屋企,如果唔係太重,可能唔祗買咁少添.

買咗5舊牛油係因為特價加埋會員有多95折,計吓條數唔駛$10一舊,出年5月先到期,肯定用得哂,麵包書係因為有8折加會員95折,所以又買多一本,至於其他野係不知不覺咁掉咗入購物籃內又帶埋走,所以我啲咁無自制嘅人,無事都係唔好行咁多DIY店.

椰汁紅豆糕

我差唔多每個夏天都會整椰汁馬豆糕,因為同事同埋屋企人都鍾意食,不過今次係因為好朋友就快生日,佢鍾意食椰汁糕,所以我改咗用紅豆代替馬豆.

首先將紅豆煲淋,不過要成粒狀,跟住將大菜糕浸軟切碎煲溶,落椰汁,花奶,再加糖煮溶,最後慢慢落已用水開稀嘅鷹粟粉,要不停攪住,見到杰身就要熄火落紅豆/馬豆撈勻,倒落模中,攤凍入雪櫃至硬身就食得嘞.

呢個留俾自己食,不過覺得今次椰汁唔夠濃味,下次都係要用番"快X"牌,好似好啲.