特色蛋糕甜品班-第二課-紅豆栗子綠茶蛋糕卷

今日學嘅係蛋糕卷,亦係我最弱嘅一環,已經做過4次,都未算十分成功.

首先用分蛋法打起蛋黃同蛋白加糖,再將過篩麵粉,粟粉加入撈勻,一半加入綠茶粉,再分別將兩種麵糊放入唧袋,相隔斜線唧落焗盤內.

刮平麵糊就可以放入焗爐焗.

當焗至表面微金黃色,按下有彈性回彈就可以出爐攤凍.

跟住準備餡料,先將栗子蓉加RUM酒撈勻,再加入蒸淋原粒紅豆,再加入溶解魚膠液,最後加入已打至軟雪糕狀嘅淡忌廉,將蛋糕反轉,將紙掀起,再將蛋糕反轉做底(亦即捲起後蛋糕面),搽上己凝固成膏狀餡料.

用保鮮紙墊底捲起成圓筒狀雪至硬身.

雪凍後就可以切件,食落唔甜幾好,有時間會試吓自己整.

班蘭KAYA醬

我幾鍾意KAYA醬香味,以前細個時會用楊協成出鐵罐裝KAYA醬搽麵包,係網友蜜蜜睇到可以自製斑蘭KAYA醬,於是自己又試吓做.

材料有斑蘭葉一札(約65g),椰汁細罐,我改用椰糖會多啲椰子香味,雞蛋,馬蹄粉少量等.

將斑蘭葉剪碎同椰汁一齊用攪拌機打爛隔渣.

再將椰糖,雞蛋,馬蹄粉加入斑蘭椰汁中,隔熱水攪至椰糖溶解,過篩,開慢火煮至杰身,熄火.

呢個時候KAYA醬相當粗鞋,有好多顆粒,攤凍後要再放入攪拌機打滑.

然後放入已經消毒玻璃樽,我做咗食譜一半份量,但唔止一樽,另外有一細膠盒添,試味後香味好濃郁同埋無街賣咁甜,正...

顏色比較深係因為椰糖關係,但無損味道.

士多啤梨蛋糕卷

已經第四次做蛋糕卷,之前3次都失敗,今次用日本棉花蛋糕食譜,再嚟試吓.

首先焗好棉花蛋糕,因為爐細火猛,所以要降低爐溫焗,總算OK.

倒扣攤至微涼就搽上打好嘅士多啤梨忌廉.

跟住用牛油紙捲實雪凍,今次無爆裂,但係解開後,發覺士多啤梨忌廉溶解唔見哂,真係唔知攪乜?

所以今次係成功咗一半,但仍需研究甜忌廉點解變成咁?同埋要減糖,覺得甜咗啲.

特色蛋糕甜品班-第一課-木瓜椰汁蛋糕

今日新一期嘅蛋糕課程又開鑼啦,第一堂教嘅係木瓜椰汁蛋糕.

首先焗海綿蛋糕做底,倒扣攤凍後,底面都唔要,將蛋糕一開二分為兩層.

而餡料由木瓜茸加椰汁,奶,坐溶魚膠液混合,將糖加些少水煮至約123度,撞入打起蛋白撈勻,最後加入打起6成嘅淡忌廉,同海綿蛋糕相隔放入模中雪至硬身.

餅面則用糖,奶,椰汁,魚膠液混合倒係雪硬身餅面上,再放入雪櫃雪凍,咁就可以食得嘞,但因為今次木瓜唔夠熟,所以味道比較淡,但唔甜,夏天食幾清新.

切開蛋糕內部.

紅蘿蔔方包-低溫中種法

呢款麵包做過好多次,不過係用唔同發酵方法,包括湯種,老麵種,麵包機,今次就用27小時低溫中種,加入鮮搾紅蘿蔔汁同紅蘿蔔絲,因此水份多咗,比平時打麵團時間較長,先有薄膜,而且非常軟身同黏手.

呢舊係打完嘅麵團,打側個盤,麵團會倒向一邊.

由於太黏手,所以造型比較困難,要加多啲手粉,捲好後就放入麵包模至8-9分滿.

然後蓋好頂蓋就可以放入焗爐焗.打開蓋時係平頂,但甩模後立即回縮兼收腰,唯有立刻側放.

但我衰心急,未夠攤凍已放入盒中盒埋,結果麵包滲入倒汗水,由於水份多,所以隔日食都非常柔軟,可能天氣熱,所以麵包都發得唔錯.

今日晏晝-三絲冷麵

呢幾日天氣咁熱,如果一食熱野,肯定汗流浹背,更加唔想對住個火爐,今日晏晝就整咗呢個好適合而家食嘅冷麵.

首先將急凍雞胸肉蒸熟拆絲,手工幼麵條煮熟過冷河,再用冰水雪凍,紅蘿蔔同埋青瓜切絲,再自製個麻醬汁,撈勻就食得嘞,唔......Yummy.

夏日甜品-芒果布甸

咁熱天氣,最好食番啲透心涼嘅甜品,咁啱係廚櫃裡面搵到呢盒布甸粉,加埋有現成熟透靚芒果,咁仲唔即刻開工咩.

好簡單加熱水溶咗芒果布甸粉,加奶,芒果粒,倒入模內,攤凍,放入雪櫃雪凍.

祗要肯郁吓手,好容易咁就有得食嘞.

檸檬芝士戚風蛋糕

今日焗咗呢個戚風蛋糕,主要係加咗檸檬汁&檸檬皮茸,忌廉芝士.

今次試吓用係廚安居買嘅細天使蛋糕模,焗時蛋糕升高得唔錯.

倒扣後攤凍甩模.

切開食落唔算甜,有檸檬味,但唔太覺芝士味,但感覺好似無忌廉芝士餅咁肥膩,味道清新啲.

合桃無花果麥包-17小時低溫中種

其實呢個包低溫中種發酵唔夠17小時,但因為趕時間,祗好提早兩個鐘攞佢出嚟,放係室溫發酵補數,所以發酵效果分別不大.

今次主麵團加入烘香合桃切粒,無花果切粒,同埋全麥粉一齊搓,經過第一次發酵後就分割等份,靜置約20分鐘度.

然後滾圓,搓成水滴形,作最後發酵約2.5-3倍,係包面噴水,灑上高筋粉,再界面就可以放入焗爐焗,初期噴水入焗爐幾次.

咁就焗好出爐啦.

切開麵包入面,係好柔軟,但可能噴水唔夠,皮唔係好脆.

今日晏晝-蕃茄牛肉粥

記得以前我生病時,阿媽會煲呢種粥俾我食,其實我最唔鍾意食糊口嘅野,所以唔係病唔會主動煲同食粥,但唔知點解我對蕃茄牛肉粥又無咁抗拒.

因為呢幾日腸胃炎,所以煲咗呢款粥食,咁就可以懷勉吓以前嘅歲月同埋味道.

材料好簡單,有隔夜冷飯,咁就好容易煲爛,唔駛咁哂柴火,切碎去核蕃茄粒,因為唔鍾意太酸,加埋調咗味牛肉碎.

但煲粥好容易燶底,要不停攪住煲底,當粥煲到差唔多時落蕃茄粒煲一陣,再加埋牛肉碎,調味熄火就食得嚕..

.

楓蜜栗子包-17小時低溫中種

仍然繼續用17小時低溫中種,主要覺得呢種發酵方法,麵包比較軟熟,就算幾日後仍然保持柔軟.

但係今次味道唔係咁突出,主要係個隻栗子蓉無乜香味,連楓蜜味道都好似無,加上模太細,焗嘅時候東歪西倒,但呢啲無乜影響麵包質感,祗係個樣唔靚仔而已.

睇吓個模係焗爐裡面側埋一邊就知.

呢個係焗好個樣,正面睇唔係好覺樣衰.

切開後就見到個包側埋一邊,而且唔係圓形,直情走哂樣,不過唔緊要,我都可以照啃得落嘅.

合桃香蕉朱古力蛋糕

今日除咗焗麵包外,仲焗埋蛋糕,準備明日送俾朋友.

我專登留低一隻香蕉熟到出梅花點,去皮後加煉奶壓成茸,將牛油放至室溫同糖粉一齊打至變奶白色,加入蛋黃,香蕉茸,朱古力溶液,牛奶,最後加入已篩混合麵粉,蘇打粉,無糖可可粉,放入模內,將麵糊掃平,放上合桃,就可以焗嘞.

焗約20分鐘左右就可以出爐.

攤凍後,本來想灑上防潮糖粉,但又搵唔到,唯有切開係咁食,但都好鬆軟,同好香蕉味,我又減咗糖,都算唔錯.

肉鬆麥包-17小時低溫中種

呢排不停試用不同發酵時間焗麵包,發覺出嚟效果差異不大,所以今次用番17小時低溫中種就算.

中種麵團加入主麵團打至有薄膜後,就可以作第一次發酵,跟住排氣,分割,滾圓,再靜置約20分鐘,就可以開始整形.

將麵團拍扁,搽上沙律醬.

灑上肉鬆壓實,再捲成圓柱體,放入模中作最後發酵.

但由於麵團太軟熟,放入模後好似飲醉酒咁,係模內企唔穩,東歪西倒,都無法唯有照焗.

一入爐係咁向上升,要即刻蓋錫紙,同較低爐溫,以免變燶雞,所以有模個部份上得唔夠色,其實可以再焗耐啲,但又唔係送俾人,自己食,亦都唔影響食味,費事再攪咁麻煩,算數囉,至多下次再整好啲啦.