今年冰皮月餅

舊年開始自己整冰皮月餅,朋友同埋屋企人都比較鍾意食麻蓉餡個款,所以今年再encore,另外一款係今年新學嘅士多啤梨冰皮月餅.

芝麻冰皮月餅材料比較簡單,麻蓉餡係用開邊綠豆煮淋壓爛成茸,再加油,糖煮至硬身,芝麻炒香打成茸混合一齊,冰皮係將熟麵粉,糕粉,固體菜油,糖霜搓勻雪凍.

切出等量冰皮同芝麻餡包好,滾上糕粉,壓模,雪凍就食得嘞.

另外一款士多啤梨冰皮月餅就較為繁複,將新觧士多啤梨打成茸,一部份加入溶解魚膠液,糖&粟粉攪勻雪凍成餡心,其餘就加熟麵粉,糕粉,固體菜油,糖霜搓成皮備用.

將忌廉芝士同煮好綠豆蓉溝勻成餡,中間包入士多啤梨凍作餡心.

將冰皮包入餡,滾上糕粉,再壓入模中吸出就成為呢款冰皮月餅嚕....

兩款唔同口味,明日攞去送俾好朋友.

俾大家睇吓內餡,都唔錯架,不過......士多啤梨個款因為放得餡太多,所以包到穿崩,認真唔靚仔,下次都係唔好咁貪心囉.

試食後士多啤梨酸酸地都幾好味,但始終比較鍾意食麻蓉,減咗糖唔太甜啱我食多啲.

月餅課程(2)-士多啤梨冰皮月餅

今日下晝繼續學整月餅,今次係整士多啤梨冰皮月餅,冰皮月餅皮係用士多啤梨汁加焗/炒熟麵粉,加糕粉,白油,糖搓至滑身,放入雪櫃雪凍.

餡心則用士多啤梨汁加少少糖煮溶,加粟粉水煮完後雪凍,雪硬後切粒狀作餡心備用.

餡料主要用開邊綠豆浸軟後加水煮爛,再隔去水份壓成蓉,加油,糖,粟粉水等,煮至捻起可成四方形,再攤凍,然後加芝士忌廉,糖霜,士多啤梨乾切碎粒攪拌就完成.

用餡料包住餡心,再出冰皮包住外層.

外層碌上糕粉,壓入模中再吸出雪凍後就食得嘞.

一人可以有5個帶走,番到屋企食咗一個,唔係好甜,都幾好食,唔錯.

特色蛋糕甜品班-第九課-雲尼拉雪糕&合桃蜂蜜蛋糕

眨吓眼已經番到第9堂,今日學嘅甜品&蛋糕,其實係重複上期課程,即係已經學過,但上次Miss無用雪糕機,所以雪糕係短時間根本仍然好稀,但今次Miss自備雪糕膽帶回來雪定,所以雪糕攪完後好滑,好好食,攪到有啲同學想買部雪糕機添.

一人分得唔算太多,但少食多滋味,無所謂啦.

至於合桃蜂蜜蛋糕,本來焗兩個,但因為一個被焗爐爐溫唔妥,攪到焗燶面,有啲遺憾,但蛋糕內在就無乜問題,都好鬆軟.

除咗即場食之外,一人都可以攞走一塊.

回憶中排包

諗起剛讀完書初出嚟工作時,先知自己真係唔夠料,所以一放工就趕去尖沙咀上夜學,每次經過彌敦道"車厘哥夫"餅店,聞到新鮮麵包出爐,都忍唔住行入去買幾塊排包食,跟住係附近士多買盒維他奶,企係行人路旁邊就開餐,然後去上堂,直至晚野9點幾番到屋企先食晚飯.

後來美心都出咗排包,雖然好鬆軟,好食,但已經唔係我惱海中以前個種味道,今日我就焗咗呢個排包嚟懷勉過去先.

排包要落多啲蛋或者蛋黃先有蛋香味,我祗係用簡單直接法,搓成麵團,發酵完後再分成等份靜置,再搓成長條形,放係焗盤上,但要快手,否則頭尾麵包發酵時間會唔均勻.

最後發酵完就搽上蛋汁入爐嚕.....睇吓兩邊直情迫到爆哂.

出爐後就係咁樣.

撕開一塊見到一絲絲,都好好食,麵包好柔軟,但當然唔會係記憶中個種味道啦.

我的第一次-蛋黃蓮蓉月

舊年去學完整月餅後,因為時間太緊,所以無整過,今年有備而戰,一早5月已經煮定轉化糖漿,前兩日又炒定蓮蓉餡,卒之今日可以開工嘞.

材料有月餅皮,用後面個樽自製轉化糖漿,加低筋粉,鹼水,油等搓成團,麵團會好黏手,最少要等3-4個鐘先可以用,我呢舊係隔晚已經搓定,仲有蓮蓉,蒸熟鹹蛋黃.

將餅皮,餡料分成等份,用蓮蓉包實鹹蛋黃,搓圓.

將餅皮包住蓮蓉餡後,表面上粉再放入模中壓實吸出月餅.

我將剩餘餅皮造成米奇老鼠&Hello Kitty形狀

掃去粉末後噴水入爐,焗約5分鐘攞出掃上蛋黃汁,要再重複多一次,但.......卡通餅外形已經因為膨脹到唔見咗個樣呀.

再回爐焗多10分鐘,就可以出爐,但表面好似好乾,其實需要等多2-3日月餅先會回油,所以而家唔可以切開睇住,總結今次效果普通,唔知係咪壓模唔夠實,所以月餅形狀唔夠突出,而蓮蓉因為用咗去衣,芯嘅蓮子煮,香味唔夠,糖漿煮得太杰,希望明年會有改進,整得好啲.

芝麻牛奶麥包-低溫中種

呢個麥包我用奶&淡忌廉代替水份,好簡單咁做咗兩個熱狗包加一個山形土司,焗完出嚟效果無平時中種咁鬆軟,比較煙韌,各有食法,連奄尖大少見到都食咗一個話好食喎,真係出乎意外.

切開後入面麵包組織都發得唔錯.

月餅課程(1)-奶黃月餅

其實舊年已經跟Miss學過整月餅,不過見今年有教做中式奶黃餡,所以又再學多一次,溫故知新.

餅皮主要用金獅糖漿,麵粉,梘水,油等搓勻,初時麵團會好稀,至少要放置3-4個鐘以上,如果過夜要放入雪櫃.

搓成長條形,切出粉團,重量要視乎模大細而決定,同餡比例最好係5(餡):1(皮)

中式奶黃餡原來都要落好多材料,包括麵粉,吉士粉,糖,奶粉,花奶,煉奶,榔汁,牛油,蛋黃等,撈勻後要隔水蒸,5-6分鐘之後,要攪吓佢,重複攪5-6次成糕狀後熄火,攤凍啲就將蒸熟搓爛咸蛋黃茸加入趁熱搓滑身.

將皮包餡後,碌上麵粉放入模中壓實倒出就成月餅嘞.

將散粉掃走,噴水係餅面,入爐焗5分鐘,攞出掃蛋黃汁,重複一次掃蛋黃汁後,再焗多10分鐘就可以出爐.

第一次掃蛋黃汁

第二次掃蛋黃汁

焗好出爐

一人有3個帶走,因為要等兩日回油,所以未食得住.

特色蛋糕甜品班-第八課-士多啤梨蛋白戚風蛋糕

如果照課程應該係學另一款蛋糕,不過Miss話因為芒果唔靚,所以改學呢款戚風蛋糕,蛋白戚風因為無咗蛋黃漿,所以打起蛋白後要將小部份蛋白同奶,油溝勻,再落麵粉撈埋,最後將剩餘蛋白同麵糊撈勻,然後放入焗爐焗.

今日用咗4吋模,兩個人可以分一個.

攤凍後就可以甩模,但因時間關係,所以底部片得唔好,有些少缺陷.

跟住橫片開兩半,塗上打起甜忌廉,而出面整個蛋糕都要塗勻,有啲似水泥批盪咁,而蛋糕面就放上士多啤梨做裝飾.

呢個就係我同埋同學一齊做出嚟嘅蛋糕嘞, 不過蛋糕側面就批得唔平滑,醜樣啲.

番到屋企肚餓,便即刻食,其實味道幾好,不過甜忌廉始終無淡尼廉咁香滑.

鳳梨酥

我嘅舊同事將會離開舊公司,北上另闖天地,佢好鍾意我整鳳梨酥,成日讚不絕口,其實唔係我整得特別好食,祗不過係佢鍾意食鳳梨酥咋.明天會相約見面,所以特別整定送俾佢.

鳳梨餡係早幾日自製,一個新鮮菠蘿加一罐罐頭菠蘿,將菠蘿用叉叉成絲狀,加埋已經浸去糖份糖冬瓜,切碎放入攪拌機攪爛成茸,壓去汁液放入雪櫃雪凍成為新鮮菠蘿汁,因為我用嘅罐頭係用菠蘿汁唔係糖水,英文係(in its own juice),否則就唔好攞嚟飲.

至於菠蘿茸就用鑊煮至乾身,再加糖,麥芽糖煮至杰身,金黃色,將麵粉水倒入煮到水份收乾攤凍,放入雪櫃雪硬就可以用.

至於詳細做法可以參考我呢篇自製鳳梨餡.

而酥皮係將低筋麵粉,少許高筋粉,粟粉,芝士粉過篩備用,將一半白油,一半牛油(今次用金桶)加糖粉打至鬆發,分幾次加入蛋汁,最後用膠刮將麵粉加入撈勻成團狀,記住唔好大力搓.將麵團放入保鮮袋,搓成圓柱體,放入冰格雪至硬身,約半個鐘.

攞出麵團切成一舊舊,麵團同餡料比例係1:1,包好壓入模中,用手掌壓平表面就可以入爐焗,焗咗約8分鐘要將鳳梨酥反轉再焗多6分鐘就可以出爐.

因為酥皮用牛油/白油,所以好容易甩模.

切開試食,都幾香菠蘿味,酥皮鬆化得嚟但唔會散,而鳳梨餡有微酸唔太甜,今次都算唔錯,可以保持水準.

另一至愛碟頭飯

除咗前幾日post嘅青豆洋蔥免治牛飯外,另外我仲意食呢個蕃茄免治牛飯.

材料都係好簡單同埋好快有得食.

材料包括有去核切碎蕃茄粒,醃過免治牛肉,白飯一碗.

起油鑊將醃過免治牛肉炒至8成熟,鏟起後落蕃茄粒,可以唔再落油,加調味(糖&鹽),如果鍾意甜,就落多啲糖,鍾意醎啲就落多啲鹽,加些少水煮至蕃茄至微爛,就回鑊落免治牛肉兜勻,打獻鏟起係白飯碟上就可以開餐.

味道酸甜又有汁,好開胃啱而家咁熱天氣食,都係用咗20分鐘就攪掂食得,唔計煮飯,因為我祗係將冷飯加暖水叮熱而已.

我最喜愛碟頭飯

已經好耐未煮過呢款碟頭飯食,我鍾意自己整,因為可以落多啲喼汁去醃色治牛肉同煮汁.

將洋蔥碎爆香,再加青豆炒一陣,之後炒熟醃過嘅免治牛肉,將全部材料兜勻後打獻,咁就可以放係白飯面,上碟食得,前後用咗15分鐘,唔計白飯,真係簡單得嚟又好味呀..Yummy.

柑桔麥包-低溫中種

又要焗麵包做早餐嘞,見到雪櫃有之前自製嘅糖柑桔,所以就做咗呢款麵包,加埋全麥粉,咁就可以增加多啲纖維.

如常經過麵包發酵,排條,靜置過程後,再捲成圓柱體,放入模中作最後發酵,但模大咗啲,所以麵團東倒西歪.

眨眼就焗完出爐,但太遲鋪錫紙係面,結果面太燶.

底同側面還可以, 一出爐已經聞到好香柑桔味,麵包都好鬆軟.

特色蛋糕甜品班-第七課-酥皮啤梨條

今日Miss示範呢款酥皮,但唔係用傳統夾牛油酥皮方法,佢話叫做快速酥皮,將冰凍牛油切粒,加入低筋,高筋粉各一半,再加冰水,鹽等,就用手輕力搓勻,用棍拍扁麵團成長方形經過4次3摺而成,中途如果見到牛油開始溶,就要放落雪櫃至硬身再碌過,最後碌平至2mm厚度長方形,靜置約30分鐘後,切成約3吋寬長條形,而作面層麵皮要闊過底層.以便覆蓋.面層麵皮要橫切開一條條,但仍然相連唔斷.

餡料有去皮去心新鮮啤梨切粒,用牛油炒軟身,再加入切粒罐頭桃,蛋糕碎,果仁粒(杏仁+合桃),少許吉士粉撈勻.

掃全蛋汁係底層麵皮,放上餡料,再用面層麵皮覆蓋,掃上蛋汁就可以放入焗爐焗嘞.

焗好出爐就係咁樣.

然後切開一塊塊,雖然好食,但始終落好多牛油,所以我自己就唔想整太多呢類酥皮或者批.

斑蘭戚風蛋糕

今日焗咗呢個戚風蛋糕,準備明日送俾阿媽,今次加入之前自製斑蘭咖吔醬.

眨吓眼就焗好出爐,賣相都OK.

至於甩模....底部有啲蛋糕碎.

呢個係切開蛋糕入面,都好鬆軟,但如果再落多啲斑蘭咖吔醬,味道會濃郁啲.