特色蛋糕甜品班-第十課-蛋撻＆椰撻

好快已經上到第１０堂，亦即最後一堂，今日學嘅係蛋撻＆椰撻。

基本上撻皮係一樣，祗係餡料唔同，用室溫牛油加糖霜打至奶白色，加入蛋，再加筋粉，麵粉搓勻雪凍備用。

而蛋撻水就將奶，花奶，滾水溶糖，蛋攪勻，再過篩，椰撻餡將椰絲，麵粉，糖，泡打粉，牛油搓勻，臨入爐時，再將花奶加蛋加入撈勻放入撻皮中。

將撻皮由雪櫃攞出，切成粉團，壓入錫紙兜中，頂部搓成圍邊。

倒入９成滿蛋撻水或放入椰撻餡料。

放入焗爐焗至蛋水凝結，而椰撻則要焗到中途用另一焗盤庶面，令撻餡中間隆起爆口。

焗完出爐啦。

自己個份

趁墟唔成,仍有斬獲

上個禮拜已經知道Le Crueset開倉大減價,今日約咗朋友食晏,諗住順便去銅鑼灣睇吓,有無野啱買？點知今朝10點45分左右去到,已經有成70人排隊,要每15分鐘先放8-10個人入去,計過至少要排個半鐘或以上,肯定超過約會時間,所以排咗20分鐘度已經放棄,咁就無聊去行SOGO消磨時間,上到7樓家庭用品部,見到Le Crueset Counter有一套４件矽膠刮（大，中，細碼加油掃），做特價折咗約６折左右，佢註明可以抵受高溫至攝氏４２５度，二話不說，揀齊同一顏色即買。

跟住再上９樓特價場，買埋呢把日本出防ＵＶ太陽傘，雖然價錢貴過出面，但無論傘骨，線口都耐用好多，所以都要買番一把放係手袋。

無花果麥片包-麥皮湯種

今日呢個包都算幾健康,湯種係用麥片,豆漿加少少高筋粉開勻煮成糊狀攤凍備用,我見份量咁少,就用微波爐叮,效果都係一樣.

將攤凍麥皮湯種加入筋粉,砂糖,新鮮酵母,奶(因為無豆漿),牛油搓勻發酵完後,碌開麵團成長方形,鋪上用Rum酒浸過切成絲無花果乾.

捲起成圓柱體,切成3等份,放入麵包模中作最後發酵.

發酵完畢,麵包面塗上奶,再灑上麥片,就可以放入焗爐焗嚕...

焗完出爐甩模攤涼.

切開見到麵包發得唔錯,食落麵包都好軟熟.

今日晏晝-久違豉汁排骨蒸飯

原本今日約咗朋友食晏,但天氣惡劣,所以改期,另日再約,自己一個無聊地去行超級市場,見到有細盒包裝排骨,自從奄尖大少驗出膽固醇過高後,已經好少食肉,好想食豉汁排骨,一於買番去自己整,好簡單洗,醃,落啄爛豆豉蒜蓉撈勻,蒸飯,飯熟,將排骨鋪上面,蒸熟後,灑上蔥粒,熄火焗一陣就可以食,前後都係用咗半粒鐘.

少食多滋味,都幾好食架.

今年冰皮月餅

舊年開始自己整冰皮月餅,朋友同埋屋企人都比較鍾意食麻蓉餡個款,所以今年再encore,另外一款係今年新學嘅士多啤梨冰皮月餅.

芝麻冰皮月餅材料比較簡單,麻蓉餡係用開邊綠豆煮淋壓爛成茸,再加油,糖煮至硬身,芝麻炒香打成茸混合一齊,冰皮係將熟麵粉,糕粉,固體菜油,糖霜搓勻雪凍.

切出等量冰皮同芝麻餡包好,滾上糕粉,壓模,雪凍就食得嘞.

另外一款士多啤梨冰皮月餅就較為繁複,將新觧士多啤梨打成茸,一部份加入溶解魚膠液,糖&粟粉攪勻雪凍成餡心,其餘就加熟麵粉,糕粉,固體菜油,糖霜搓成皮備用.

將忌廉芝士同煮好綠豆蓉溝勻成餡,中間包入士多啤梨凍作餡心.

將冰皮包入餡,滾上糕粉,再壓入模中吸出就成為呢款冰皮月餅嚕....

兩款唔同口味,明日攞去送俾好朋友.

俾大家睇吓內餡,都唔錯架,不過......士多啤梨個款因為放得餡太多,所以包到穿崩,認真唔靚仔,下次都係唔好咁貪心囉.

試食後士多啤梨酸酸地都幾好味,但始終比較鍾意食麻蓉,減咗糖唔太甜啱我食多啲.

月餅課程(2)-士多啤梨冰皮月餅

今日下晝繼續學整月餅,今次係整士多啤梨冰皮月餅,冰皮月餅皮係用士多啤梨汁加焗/炒熟麵粉,加糕粉,白油,糖搓至滑身,放入雪櫃雪凍.

餡心則用士多啤梨汁加少少糖煮溶,加粟粉水煮完後雪凍,雪硬後切粒狀作餡心備用.

餡料主要用開邊綠豆浸軟後加水煮爛,再隔去水份壓成蓉,加油,糖,粟粉水等,煮至捻起可成四方形,再攤凍,然後加芝士忌廉,糖霜,士多啤梨乾切碎粒攪拌就完成.

用餡料包住餡心,再出冰皮包住外層.

外層碌上糕粉,壓入模中再吸出雪凍後就食得嘞.

一人可以有5個帶走,番到屋企食咗一個,唔係好甜,都幾好食,唔錯.

特色蛋糕甜品班-第九課-雲尼拉雪糕&合桃蜂蜜蛋糕

眨吓眼已經番到第9堂,今日學嘅甜品&蛋糕,其實係重複上期課程,即係已經學過,但上次Miss無用雪糕機,所以雪糕係短時間根本仍然好稀,但今次Miss自備雪糕膽帶回來雪定,所以雪糕攪完後好滑,好好食,攪到有啲同學想買部雪糕機添.

一人分得唔算太多,但少食多滋味,無所謂啦.

至於合桃蜂蜜蛋糕,本來焗兩個,但因為一個被焗爐爐溫唔妥,攪到焗燶面,有啲遺憾,但蛋糕內在就無乜問題,都好鬆軟.

除咗即場食之外,一人都可以攞走一塊.

回憶中排包

諗起剛讀完書初出嚟工作時,先知自己真係唔夠料,所以一放工就趕去尖沙咀上夜學,每次經過彌敦道"車厘哥夫"餅店,聞到新鮮麵包出爐,都忍唔住行入去買幾塊排包食,跟住係附近士多買盒維他奶,企係行人路旁邊就開餐,然後去上堂,直至晚野9點幾番到屋企先食晚飯.

後來美心都出咗排包,雖然好鬆軟,好食,但已經唔係我惱海中以前個種味道,今日我就焗咗呢個排包嚟懷勉過去先.

排包要落多啲蛋或者蛋黃先有蛋香味,我祗係用簡單直接法,搓成麵團,發酵完後再分成等份靜置,再搓成長條形,放係焗盤上,但要快手,否則頭尾麵包發酵時間會唔均勻.

最後發酵完就搽上蛋汁入爐嚕.....睇吓兩邊直情迫到爆哂.

出爐後就係咁樣.

撕開一塊見到一絲絲,都好好食,麵包好柔軟,但當然唔會係記憶中個種味道啦.

我的第一次-蛋黃蓮蓉月

舊年去學完整月餅後,因為時間太緊,所以無整過,今年有備而戰,一早5月已經煮定轉化糖漿,前兩日又炒定蓮蓉餡,卒之今日可以開工嘞.

材料有月餅皮,用後面個樽自製轉化糖漿,加低筋粉,鹼水,油等搓成團,麵團會好黏手,最少要等3-4個鐘先可以用,我呢舊係隔晚已經搓定,仲有蓮蓉,蒸熟鹹蛋黃.

將餅皮,餡料分成等份,用蓮蓉包實鹹蛋黃,搓圓.

將餅皮包住蓮蓉餡後,表面上粉再放入模中壓實吸出月餅.

我將剩餘餅皮造成米奇老鼠&Hello Kitty形狀

掃去粉末後噴水入爐,焗約5分鐘攞出掃上蛋黃汁,要再重複多一次,但.......卡通餅外形已經因為膨脹到唔見咗個樣呀.

再回爐焗多10分鐘,就可以出爐,但表面好似好乾,其實需要等多2-3日月餅先會回油,所以而家唔可以切開睇住,總結今次效果普通,唔知係咪壓模唔夠實,所以月餅形狀唔夠突出,而蓮蓉因為用咗去衣,芯嘅蓮子煮,香味唔夠,糖漿煮得太杰,希望明年會有改進,整得好啲.

芝麻牛奶麥包-低溫中種

呢個麥包我用奶&淡忌廉代替水份,好簡單咁做咗兩個熱狗包加一個山形土司,焗完出嚟效果無平時中種咁鬆軟,比較煙韌,各有食法,連奄尖大少見到都食咗一個話好食喎,真係出乎意外.

切開後入面麵包組織都發得唔錯.

月餅課程(1)-奶黃月餅

其實舊年已經跟Miss學過整月餅,不過見今年有教做中式奶黃餡,所以又再學多一次,溫故知新.

餅皮主要用金獅糖漿,麵粉,梘水,油等搓勻,初時麵團會好稀,至少要放置3-4個鐘以上,如果過夜要放入雪櫃.

搓成長條形,切出粉團,重量要視乎模大細而決定,同餡比例最好係5(餡):1(皮)

中式奶黃餡原來都要落好多材料,包括麵粉,吉士粉,糖,奶粉,花奶,煉奶,榔汁,牛油,蛋黃等,撈勻後要隔水蒸,5-6分鐘之後,要攪吓佢,重複攪5-6次成糕狀後熄火,攤凍啲就將蒸熟搓爛咸蛋黃茸加入趁熱搓滑身.

將皮包餡後,碌上麵粉放入模中壓實倒出就成月餅嘞.

將散粉掃走,噴水係餅面,入爐焗5分鐘,攞出掃蛋黃汁,重複一次掃蛋黃汁後,再焗多10分鐘就可以出爐.

第一次掃蛋黃汁

第二次掃蛋黃汁

焗好出爐

一人有3個帶走,因為要等兩日回油,所以未食得住.