大手筆-換手機

我部手機已經用咗成6-7年,好多功能都無,加上現在上烹飪課,會影啲相作為參考,所以決定換部新手機,趁昨日出去旺角,就行去"先達"睇吓,原本目標想買Nokia N86,因為相機有800萬象素,但原來實物好重同寬身,唔係咁啱女性用,後來同sales傾吓,就介紹我買同牌子,舊年出嘅N97 mini,雖然相機功能唔及N86,但都有500萬象素,試影都好清浙,但價錢就貴多成$700-800,最後決定豪一次,咁大個女未買個咁貴手機架.

呢款珍珠白色,sales話舊年聖誕先推出喎.

一打開個螢幕,直情眼花,主要係上網功能,GPS地圖等功能,仲可以用WIFI添,不過除咗少數政府免費場地,基本上要俾錢先可以用,佢係觸控屏幕,唔駛四圍襟掣先搵到啲功能架,或者可以用附送筆控都得,不過主要都係用手指點就可以.


除此之外,側邊滑開上層,下層原來係一個類似電腦鍵盤,仲可以用速成,真係啱哂我用.

睇吓影相都算幾清淅啩?仲可以zoom近鏡/遠鏡,同有閃光燈,自動對焦添,至於音樂/收音機個部份,音質都幾好,因為自己要求唔算高.

咁多野玩,我都要慢慢摸熟部機先至得囉,另外原因係部機咁貴,一定要好好用盡至得.

香蕉合桃包

我用香蕉合桃焗個蛋糕,鬆餅,但好似從來無用佢哋焗過麵包,於是今日試吓整,睇吓好唔好食?

我用咗熟透梅花點香蕉,加焗香切碎合桃,隨便搓成兩條辮扭埋一齊,放入掃油模裡就拎去焗.

一時唔記得香蕉蓉甜,會容易上色,遲咗蓋錫紙,所以面比較燶啲.

切開試吓味道,都好有香蕉味,少甜,好鬆軟,聽講擺多一日,香蕉味會出啲,一於明天食,睇吓係咪先?

再嚟encore燒腩仔

今次再整燒腩仔,係應奄尖大少要求,佢食過番尋味,覺得自己焗好食過出面買燒肉,不過做法都有啲改變,同上次有啲唔同,譬如醃料加咗淮鹽,所以肉質比較鹹香,其次放入雪櫃兩日抽乾水份,但焗完後肉質較乾身實淨,最後焗完除去粗鹽外層後,搽上白醋,但發覺分別唔大,豬皮都係差唔多鬆化.

睇吓焗完後,將肥豬肉迫哂油出嚟,所以都好廋,但仍然見到一層層.

焗叉燒餐包

屋企有食剩叉燒,所以加埋洋蔥粒,整咗個叉燒餡做包,但由於汁料稀咗啲,焗完後有些少漏餡,又早咗鋪錫紙遮面,面包上色不夠,焗盤太細,互相插壓下,變咗唔得圓,食味無影響,祗係賣相麻麻.

派對開心小食課程-第七課-芝士條&腸仔酥

今日繼續學整酥,分別有芝士條&腸仔酥.

芝士條

首先將上禮拜已經搓定酥皮由雪櫃取出,碌薄後掃上蛋汁,灑上芝士碎,再對摺後切約0.5CM幼麵條,然後將兩端捲起好似扭毛巾咁,再將頭尾端壓在已掃油錫紙,放上焗盤,掃上蛋汁,刨上車打芝士絲於面.就可以焗喇.

焗完出爐就可以食,果然有芝士鹹香味,又好脆,好味!

腸仔酥

將酥皮碌薄後,因應腸仔長度,將麵皮切到可以捲起腸仔再寬多半隻手指位,係麵皮一端掃上蛋汁,將腸仔捲好,接口位要壓實有蛋汁位置,用手指壓實,用刀將已黏實接口輕輕切開,再一開4件,放上已掃油焗盤,再鬆弛多15分鐘先焗,會比較鬆脆.

焗完後想鬆脆啲可以較細火,再烘多一陣.

佳節精選課程-第八課-桂花燻蛋&粟米魚肚羹

今日學嘅係呢兩款菜色,分別桂花燻蛋&粟米魚肚羹.

桂花燻蛋,主要用鴨蛋,煲蛋/焗蛋時間掌握好重要,會令到蛋黃是否會流出,冷凍後剝蛋殼,好晶瑩剔透.

將桂花,黃砂糖放係已鋪錫紙鑊上,再擺架係上面,將蛋排好,要有啲距離,令整隻蛋可以煙燻到.

初時要大火,直至出煙就轉細火.轉眼間蛋已煙燻成金黃色.

切開睇吓全部都流黃,食落好軟滑,不過稍嫌淡味啲.

另一菜色粟米魚肚羹,將魚尾煎香煲成魚湯,原條粟米蒸熟後,用刀將粟米粒切出,用攪拌機打成粟米茸,魚肚浸軟身後,用薑,蔥,酒滾水拖水後,將魚肚切粒,同埋粟米茸放入魚湯中,開馬蹄粉水,慢慢攪至均勻,最後將蛋打散,加入成蛋花就完成.

粟米魚肚羹,味道好清新,幾好飲,過程又唔複雜,值得係屋企自己整,如果嫌整粟米茸麻煩,可以買罐頭粟米茸,同埋雞湯代替煲魚湯.

成功自製燒腩肉

好耐之前曾經焗過一次燒肉,但皮完全唔脆,之後都就無再整過,但見到好多網友都成功做到,於是又想再嘗試整吓,昨日去街市買咗舊比較正方形腩肉,洗淨出水後,搽上醃料同酒,放係雪櫃一晚,抽乾水份,今朝再攞出嚟吊咗8個鐘,再用粗鹽蓋實豬皮面,旁邊用錫紙圍邊,焗約50分鐘,將鹽塊/錫紙除去,繼續焗至皮脆為止,其間要攞出嚟用豬插均勻再插豬皮.

睇吓呢舊就係焗完出爐嘅燒腩嘞,望落都唔錯啩?

由奄尖大少手起刀落斬大舊燒肉,未到開飯兩個已經食咗一半有多,真係皮脆肉滑,自家製用新鮮豬肉,寧舍不同.

派對開心小食課程-第五課-蝴蝶酥

過完新年又繼續上烹飪堂,今日教整酥皮,同整蝴蝶酥,其實已經學過好多次酥皮,各導師方法大同小異,今次教摺法係3x4x3x4,即共144層,阿Sir話已經係最盡層數,唔好再摺,因為會令層數模糊,變成反效果.

今次3個人一組,自己整,務求各人都有機會做,做好嘅酥皮,最好放係雪櫃一日先開酥皮,焗出嚟會好啲.

經過一輪功夫,將酥皮碌薄,底面灑上砂糖,由兩邊向中間捲好,切成等份就可以攞去焗喇.

一路焗已經聞到陣陣香味,出爐攤凍後食,非常好味又唔太甜,真係好正,但大部份好食嘅野,都唔係好健康,所以小食多滋味就好嘞.

甘荀方包&香蕉合桃朱古力鬆餅

今日又一心二用,同一時間整兩樣野,就係甘荀方包&香蕉合桃朱古力粒鬆餅.

因為仍然係新年,所以做麵包都整色整水,就係用甘荀一半刨絲,一半甘荀蓉,同麵團一齊搓勻,加埋低溫中種,就焗咗呢個甘荀方包.

今次因為最後發酵時間夠,所以四邊頂角.

攤凍切開睇吓都唔錯,但因為水份比例多,兩側始終都有啲收腰現象.

趁麵包發酵期間,就焗咗呢個香蕉朱古力合桃鬆餅,準備明日送俾舊同事試吓,今次用咗第二個食譜,將牛油加糖打至鬆身後,加入蛋黃,麵粉,泡打粉,奶攪至滑身,另外打起蛋白加糖至企身,再同麵糊混合一齊,果然效果好好多,係我整咁多次鬆餅以來,最成功嘅一次.

可惜焗爐溫度唔平均,攪到有啲比較燶,有啲又唔太上色,下次再諗吓點樣調較爐溫先.

佳節精選課程-第七課-甘荀菜肉水餃&水餃皮

新年過後,又恢復上烹飪堂,今日教嘅菜肉水餃,自己平時係屋企都會包,但特別之處係教埋做水餃皮,仲加埋甘荀汁,特別健康啲,顏色都靚啲.

水餃皮主要用麵粉,鹽,水搓成麵團,切開數大塊,再搓成圓柱體,切等份一粒粒,用棍碌薄成水餃皮,但都幾哂工夫時間,要逐塊碌薄

至於餡料,其實視乎各人口味,可以全素,或加免治豬肉,今日嘅餡料包括已經拖水椰菜,甘荀,木耳,全部切絲,最後加調味,薑蔥汁等撈勻,用水煮熟水餃後再放入另一鑊已加入麻油滾水中,除咗可以增加香味,最主要係餃子唔會黏埋一齊.

呢碟係甘荀菜肉水餃.

呢碟係俾食素同學,餡料無加肉,至於試食後,就覺得水餃皮比出面街買現成嘅煙韌,好食啲.如果自己整要多啲人食會好啲,一個人就唔好哂咁多功夫囉.

破例食菠蘿油

自從去學整麵包之後,知道菠蘿包材料,已經介食咗菠蘿包好耐,但聽講元朗呢間餅家,菠蘿包好正,所以破例買一個試吓.

既然破例,就索性夾埋牛油.

咁就變身成為菠蘿油嘞.

但.....一啖咬落去,成個包已經扁哂,唔駛講梗係落咗麵包膨脹劑喇,不過回心一計,祗係賣$3一個,計埋材料,人工等等成本,就收貨算吧,都係試一次啫,我應該唔會再買嚟食.

麥包-麵包機

自從舊曆年前蒸完N底糕後,已經有好耐無自製任何食品,因為要清咗啲糕先,其次天氣太凍,成日都唔想郁,做完之後洗碗碟,更加凍,自來水好似冰水咁.

卒之今日見到啲糕已經清得7788,所以去整麵包嘞,但為咗唔想洗咁多工具,所以就搬出麵包機代勞,仍然用低溫中種法.

由於麵包機唔可以較爐溫,所以焗出嚟比較深色.

加上麵包機發熱線係環繞旁邊,唔係上,下面,所以麵包四周比較燶,食之前要批皮先得.

切開後麵包組織都OK,當然無自己搓麵團,發酵同用焗爐焗咁好,但就乾手淨腳,放哂材料入去就攪掂,勉強食埋呢幾日,等天氣無咁凍先再搓包.

開年行大運,兼夾入廟拜神

今日年初二,例牌要去奶奶屋企開年,晏晝食完開年飯後,就進行指定動作,由奶奶率領大家逐間廟拜神祈福,希望來年保佑合府平安,大人工作順利,事事順景,小朋友就學業進步.

首先去第一間係文武廟,今日可能陰天落雨,所以唔算太多人,不過入面煙火都好勢利,有一部份家人就會順便求簽,我就無做,因為如果求得下簽,就成日會有陰影,都係隨遇而安就好喇.

接住就行去呢間道教"省躬草堂",入面唔係燒普通香燭,而係燒檀香,所以行入去聞到檀香味道,個人幾舒服,仲有求簽之前要擲勝杯,問"大將軍"係唔係度?若果擲到3次有兩次係正杯先可以繼續求簽,否則求到都會唔靈喎.

最後就去埋天后廟拜埋天后娘娘先可以收工,打道回府.

唔知係咪覺得拜得神多神庇佑呢? 所以奶奶要我哋拜足咁多間廟,我自己就無乜所謂,祗要大家團團圓圓,高高興興就好.

終於蒸完糕喇!

眨吓眼又過咗一年,年近歲晚,我呢種鍾意係廚師攪攪震嘅人,點會錯過機會呀?但今年比較辛苦,因為奄尖大少要加班,所以得我自己一個人大掃除,洗床單被袋,仲要蒸糕,都幾踢腳,所以唔可以一氣呵成蒸糕,分開幾日先蒸完哂. 睇吓我蒸咗啲乜糕?

今年用咗呢隻出名糯米粉蒸糕,本來買埋粘米粉,點知攞錯咗,攪到買咗兩包都係糯米粉,仲山長水遠係大埔墟買,所以由佢擺係度用就算,費事哂車錢去換.

南瓜黃金鯉魚糕加兩個樣衰唔夠油甩模細年糕,用咗呢隻糯米粉好似軟身啲.

芋頭糕,芋頭唔夠粉,完個芋頭我唔太識揀.

馬蹄糕試用咗另一個食譜,但糕身比較削,下次都係用番自己嘅食譜.

仲有一大底蘿蔔糕,自從舊年去學整蘿蔔糕,用切條方法,奄尖大少鍾意食,話可以食到一條條蘿蔔絲,所以今年都沿用番呢個切法. 無裝飾糕面,原因係有個麻煩友唔鍾意芝麻&芫茜,所以慳番.

我趁蒸糕空檔時間,仲整埋髮菜江瑤柱炆冬菇蠔豉,留番新年期間做餸.

最後祝各位網友新年發財,萬事如意,來年虎虎生威,DIY次次成功!

佳節精選課程-第六課-七彩腰果炒雞丁&荔芋春卷

今日學嘅兩款菜色,分別係七彩腰果炒雞丁&荔芋春卷

七彩腰果炒雞丁,首先將腰果放落已經加咗砂糖滾水中,滾2分鐘,撈起索乾水份,再放入暖油內炸至金黃色,隔去油份,灑上少許海鹽備用.

將3色椒,洋蔥,沙葛或馬蹄,菜脯切粒,雞脾肉切粒稍為醃下再走嫩油,然後燒熱鑊,爆香薑茸,乾蔥茸,洋蔥粒,將所有菜粒加入炒勻贊酒,將雞脾肉粒回鑊,落調味料兜勻,上碟後撤上腰果就完成.

準備各種材料

而荔芋春卷,就首先要將芋頭去皮切大塊,隔水蒸淋,而鹹蛋黃亦一齊蒸熟,全部壓爛成茸,免治豬肉加入調味醃一陣,加埋蔥粒,芫茜炒熟同芋茸,鹹蛋黃茸撈勻成餡料,用春卷皮包起落鑊炸,初期用中火炸至浮起變金黃色,撈起再開大火回鑊炸一陣,將油迫出,索乾油份上碟就食得喇.

手震影得麻麻.

春卷即炸即食,熱辣辣當然好味,但都好熱氣,所以我食咗一條,就放棄權利,讓俾其他同學食,而腰果炒雞丁,味道幾好,祗係切粒粒功夫較多,嫌麻煩可以用雜菜粒代替三色椒.