聖誕禮物

今日同志同道合DIY好友食晏,意外地收到佢親手DIY兩份禮物俾我, 左邊係新鮮剛做好嘅洛神花果醬,其實之前我自己都想做,但因為雪櫃內已有幾款唔同果醬未食完,所以忍手無做,而家竟然不勞而獲,真係正中下懷.

右邊係隔熱墊,難得佢上次嚟我屋企,細心觀察到我塊隔熱墊已經破爛,所以做嚟送俾我,有時禮物貴重與否,同價錢未必成對等,我自己反而喜歡收到包含誠意禮物, 多過名牌禮品, 多謝哂.

一年一度又去行工展會

今日趁約咗朋友係銅鑼灣食晏,順便又去行吓工展會,今次由銅鑼灣方向入,天后方向出,首先當然要買入場卷喇,可能係平日關係,基本上唔駛排隊,就買到.

門票+指南,裡面有唔同優待卷,但我都無用過.

咁跟住就即刻入去開始遊蕩.

入咗門口右手邊係食品區,有好多唔同種類零食,但估唔到平日都咁多人,簡直塞到水洩不通,行都行唔到,於是急急忙忙買咗自己想買嘅野,就即刻離開個區.

我祗係走馬看花,又唔想攞太重糧油食品,買咗幾樣野就由天后個面出番去嘞,前後都行咗一個鐘有多架.

睇吓我買咗啲乜野番嚟? 包括有無縫橡木枮板,蝦米,蠔豉,泰國札肉5條,亞麻籽兩包,楊枝甘露,因為口渴,所以買咗兩枝,即刻已經飲咗一枝,雖然好似買咗好少野,但係計吓數已經駛咗成$7XX,所以我都係留番係屋企上網好啲喇....

吉士檸檬蛋糕卷

又嚟整蛋糕卷,因為奶就快過期,加上整藍莓果醬用剩檸檬汁,所以就整咗呢款蛋糕卷,而蛋糕體係全蛋法,本來想用分蛋法,但分蛋時一唔小心有啲蛋黃跌咗落蛋白中,所以唯有用全蛋法,但蛋糕體無上次咁柔軟.

今次用外捲法,而餡料係吉士檸檬餡.

食落覺得餡料比較酸,下次要減少檸檬汁,但味道都唔錯架.

栗子蛋糕卷

呢排頻頻用栗子整野食,焗麵包,栗子炆雞,今日又整栗子蛋糕卷,原因有人傻咗.買咗3磅栗子番嚟,為咗要消耗哂,祗好諗不同食譜,用哂為止.

其實整栗子蓉都幾麻煩,用好多功夫,唯一係價錢平,比起係烘焙店買嘅栗子蓉罐頭,蛋糕體就用65度熨麵分蛋法,即係將牛油,牛奶加熱至65度,加入己打發好蛋黃,砂糖內,最後混入麵粉,粟粉,再溝埋打至企身蛋白混合.

好開心呀,捲完後蛋糕無裂開喎,主要係蛋糕體夠軟熟.

切開入面都OK,連平時唔like食蛋糕奄尖大少都一口氣食咗3件,真係捧場,証明好食喇.

栗子方包

呢排栗子當造,所以買嚟除咗蒸熟當小食外,仲攞咗嚟整麵包,真係另有一番風味架.

似狗骨頭嘅法國長棍

之前係烘焙店買咗法包預拌粉,今日就開工試吓整,但要小心預拌粉內已有鹽混合,所以可以唔駛再另外加鹽,否則會過咸.

今次用咗紅伊士,係特別用嚟係整咸包,但因為焗盤太細,所以影響造型,所以焗完出爐後似狗骨頭多過法國長棍,界紋又淺,外形完全"肥佬",下次應該做兩條好過分3條,,至少個形無咁幼長.

放涼後即刻試吓切開搽牛油食,幸好皮脆肉軟,非常好食,麵包氣孔唔算太大,但都叫做OK囉.

開心果牛油磅蛋糕

上次去上海街買野,經過烘焙店,順便買咗包牛油磅蛋糕預拌粉,袋上說明話祗要加3隻蛋,85g牛油撈埋就焗得,於是買咗一包粉試吓.

不過對於我嚟講85g牛油係好多,於是減咗10g,一半溶牛油,一半葡萄籽油,照足程序,不過我就分幾次落油,慢慢將油同麵糊攪勻,仲加埋開心果仁,但界直紋就麻麻,所以蛋糕面唔多靚.

切開入面睇吓都OK, 食落都唔錯,但牛油蛋糕肥死人,都係少食多滋味,唔可以成日整.

簡簡單單芝麻方包

唔知係咪整得麵包多,而家越嚟越懶,唔太想逐個滾圓做形,淨係做方包就算,而且可以隨意搽果醬,或者夾三文治又得,彈性好大,適合我呢種一年365日都食麵包做早餐嘅人,今日呢款包加咗芝麻粉,有啲香味,可惜我唔記得加大咗爐溫,時間應該縮短番,結果外皮較燶,麵包乾身咗啲.

拼布手挽袋

近期買咗本做袋嘅書,見到呢個款幾好,加上係10元店買咗塊牛仔布料,幾適合做袋用,於是就開工,加上簡單貼布縫,同埋花邊,不過上手挽位比較難用衣車,所以就用手縫.

用番襯色厘布,一個暗格位,再釘上磁扣就完成嚕...,睇落個樣都見得吓人,自己都幾滿意.

蜂蜜馬賽牛乳皂

天氣轉為乾燥,所以打咗啲較滋潤肥皂用作沖涼,今次參照娜娜媽個本"自己做100%保養級乳香皂"一書,但發覺用牛乳冰好難溶解NAOH,我又無分幾次加入NAOH,結果有部份沉係底部,要化好多時間先可以全部溶哂.

因為做馬賽皂,所以用咗75%橄欖油,我足足打咗起碼40分鐘先可以呈現"light trace"狀態,真係打到手都抽筋呀.

我將皂液一部份倒入新皂模,另一部份倒入牛奶盒印上皂章.

皂模呢幾舊都甩得幾好喎.

但皂身仍然唔夠硬,所以用印章呢幾塊就有啲走樣,不過算喇,核突個啲就留番俾自己用,靚樣就送俾朋友.

今次全部製成品

今日去睇咗電子版清明上河圖

多得朋友幫手,佢去排隊買票,預埋我個份,我專登揀咗平日朝早10點個場,自己一個人去睇,又唔駛假期同人迫餐死.

今朝預早啲出門,轉咗一次巴士9:30左右已經到咗博覽館,我都係第一次嚟呢度咋,睇吓四周都好空曠,橙色帳篷係場館入口處,四圍都無乜人.

入到去見有時間,就順便睇吓記念品攤檔,不過就無買到任何野.

9:45分已經開放入場,未睇上河圖時,入口處有啲關宋朝,同埋上河圖歷史簡介俾人參觀,入場梗係要收門票喇,你睇吓等侯區有成個足球場咁大,但朝早人唔多,所以根本唔駛等已經入得場,而且有場刊派.

我因為早入場,當時唔算太多人,所以都可以影到一啲比較清淅嘅相.

日景-駱駝隊入城

駱駝隊經過趙太丞家門前

日景-河邊人民活動

夜景-船

船上活動

婦人坐驢

豪華四頭馬車

虹橋,可惜小童追豬情景太快,好難影到,一閃即逝.

我都前後來回睇咗成2-3次,逗留時間都有成個鐘,不過後來太多人,個個都舉機猛影相,結果我係外圍區影啲相,未夠鐘趕人離開,我就走先嘞,我覺得真係幾有意思,值得一睇架.

淘寶快速物流服務

昨日下晝夾埋一齊學護膚品/肥皂同學仔上淘寶網買油&花水,經網上代付後都攪到成4:30有多,點知今日下晝3:00左右,快遞已經call我收貨,其實我已經幫襯過呢個賣家幾次,佢嘅油品質唔差,價錢都算抵,最緊要佢用個間快遞唔駛到香港再收乜鬼特別行政費,因為我屋企要行4層樓梯,佢哋都肯照行上嚟,完全唔駛收額外費用,所以我要買野,通常都幫襯佢.

今次足足買咗8公斤油,花水,NAOH, KOH等等,都幾重架.

手工皂液+潤唇膏

過去星期日參加咗由老師特別為我哋開手工皂液示範班,但其實同實習班差唔多,因為由計落KOH,水,手打都係輪流由我哋負責,因為用蒸煮法,所以分咗皂團就可以番去立刻稀釋,我用咗玫瑰花水,有香味又保濕,加埋CDE椰子增稠劑,咁就唔駛用慕絲樽,但第一日量度鹼值8-9度,所以用完皮膚覺得痕癢,咁等到今日再試,鹼值已經回落到約6-7度,用完覺得皮膚較潤滑好多,但始終覺得用CP皂比較皂液好啲,因為唔需加熱太高溫度,油份營養價值保存會更多.

另外因為潤唇膏存貨已送哂俾朋友,所以今日又再做多10幾支,準備送俾老公屋企人用.粉紅色&白色樽加咗薰衣草精油,透明色係無味.材料包括有荷荷巴油,甜杏仁油,可可脂,蜜蠟,加埋新買嘅堪地拉蠟, 呢款潤唇膏,朋友用完都讚好滋潤架.

綠茶方包+腸仔&豆沙包

昨日打好中種麵團做方包,準備星期六BBQ時可以用嚟夾豬扒,牛扒食,點知今日天氣轉陰涼同埋毛毛雨,天氣預告話明日差不多,咁即係BBQ多數攪唔成,於是將麵團一分為二,一份改做綠茶方包,一份做腸仔&豆沙包,咁就可以有排食嚕....