2011 台灣行 (上篇)

事緣舊年12月時,奄尖大少話想去台灣浸溫泉,至於旅遊行程安排,訂飛機,酒店,梗係由我呢個業餘旅遊領隊全權策劃喇,終於上星期一出發.

Day 1, 因為唔想太早起身,而且酒店下晝3點先可以check in,所以揀咗搭呢班機,第一次坐"長榮"航空,估唔到機位都幾寬敞,但...飛機餐就超難食,個天使麵焗到好似一pat糊咁,結果一放低行李,就即刻去醫肚,食牛肉麵,再番酒店抖一陣,去台北車站買定明日去九份車票,再坐火車去基隆,行廟口夜市.

火車一出松山站上到路面,已經開始落毛毛雨,幸好有睇定台灣天氣預告,已經帶咗遮去,原來都要坐成45分鐘以上,因為係區間車,站站停,成10個站,出到站後就揸住張地圖行,點知早咗兩個街口轉彎,結果行過龍,天又黑又落雨,街名比較難睇到,結果搵咗一陣,終於搵到入口.

於是開始掃街,首先食好似關東煮嘅野,包括有滷水豆腐,海苔,素雞卷,魚餅,跟住見到現做印度咖哩薄餅,又食,再飲燒仙草,苦瓜鳳梨汁,最後食埋呢款鐤邊銼,個肚已經脹哂,加上攤檔好少有位坐,要一邊擔遮,一邊行邊食,真係幾狼狽架.

食完後就慢慢散行咁行番去車站,搭火車番台北,沿途經過呢段基隆河,夜晚景色唔錯.

Day 2

一宿無話,今日要離開台北市,將行李喼暫時寄存係酒店,明日番嚟都會住番係度,我哋食完早餐後,搭10點幾班火車去瑞芳,再轉巴士去九份,可能係平日關係,加上陰天小雨,所以唔算太多人,但因為係山上,所以霧都好濃

呢個係舊道口入口,沿途同奄尖大少又係咁一路食到上山,包括魷魚片,鹽酥飽魚菇,燒香腸

呢檔"賴阿婆"芋圓,最後仲要食埋綜合魚丸,大約全程成兩個幾鐘先再搭車離開九份番瑞芳車站.

去到瑞芳站見時間尚早,就行咗入去市場,買咗啲生果,再番車站搭火車去礁溪,今晚會住間5星級溫泉酒店,因為之前同酒店聯絡咗,佢哋有車接我哋番酒店,唔駛自己搵車.

由酒店餐廳望出去,周圍環境真係令人好舒服

出面有戶外溫泉可以浸,住客免費任浸,祗要自備泳衣

但其實房間裡面已經有浸溫泉浴缸,祗要落下窗簾,就可以自成一國.

而佢哋供應梳洗用具,放係布袋內,男女各一份,好精緻架,仲歡迎攞走,雪櫃汽水,礦泉水,小食免費供應,仲包兩位自助早,晚餐,所以一晚雖然要HK$2,3XX,但無論服務,食物質素都好好,所以我哋都覺得好值.

滋潤洗髮皂

上次做洗髮皂差唔多用哂,朋友試過都話好用,我都覺得幾好,而家洗完頭都唔駛再用護髮素,所以又再打多一批繼續用,今次用咗成6隻唔同油,包括有椰子油,棕櫚油,蓖麻油,苦茶油,芝麻油,荷荷芭油,最後加埋薰衣草精油,不過經過3日後甩模仍然未夠硬身,而今次用皂模係新買,好似花紋唔夠深? 個Hello Kitty頭好朦吓.

抗氧化防曬日霜

老友encore話想要我曾經送俾佢個隻抗氧化防曬日霜, 梗係無托手掙,今朝一起身食完早餐就即做,主要成份包括有甜杏仁油,荷荷巴油,金縷梅花水,紅酒多酚,Vita B5, 角鯊烷稀,二氧化鈦,乳化蠟,加咗少少麝香精.

第一次收到DIY麵包

識我嘅人都知我成日整麵包,加上佢哋多數都唔識整,所以從來都無人請我食自己整麵包,直至昨日相約舊公司同事,攞啲自己手工打肥皂,同面霜俾佢,佢竟然回贈自家製麵包俾我,其實都好開心,今日早餐就切片試食.

麵包幾軟熟,應該係有玉桂,朱古力味,其他就唔記得嚕....

好友共聚生日飯

昨晚兩位老友同我預祝生日,今次我哋揀咗去食某獲好評酒店自助餐.

睇吓有乜野食?

因為有做定功課,所以首先就食刺身,果然帶子,海膽,甜蝦都好新鮮,一啲都唔腥.

生蠔就細隻啲,但勝在即開夠新鮮,而天婦羅都係即炸,一份有兩隻蝦,一塊南瓜,一塊蕃薯,脆漿夠薄.

不過跟住串燒就麻麻,太乾,祗係夾住中間大蔥段比較甜,好味啲.

有4種冷切肉,伴兩種蜜瓜,呢個都好食,不過我最鍾意食反而係右下角個煙三文魚卷,唔係好咸認為,好過食魚生,我食咗兩個.

呢碟係我朋友食,包括有長腳蟹,龍蝦,琵琶蝦,翡翠螺,我覺得祗係翡翠螺比較爽甜,其他始終熱食好過凍食,我哋基本上無乜食熱盤,因為種類唔太吸引,太普通,肉車,淥粉麵又無幫襯過.

反而甜品就食咗好多,包括呢款燃燒近焦糖布丁

Tiramisu,香蕉pan cake,奶凍杯,柚子啫哩等等

呢碟係我朋友食,芝士餅我無食,因為我唔鍾意食太肥膩.

最後唔放過嘅仲有呢款雪糕,我食過Vanila好滑,不過就稍甜,我朋友一口氣至少食咗3盒.

最後餐茶,我哋叫咗檸檬蜜糖茶,依照我哋慣例,蜜糖全部帶走,真係好開心,雖然昨夜室外氣溫唔夠10度,但同老友過咗一個愉快又溫馨晚上, 人生得一知己何求?

咖啡合桃包

我個FD鍾意食,今晚同佢有約,所以特別做嚟請佢食,不過今日氣溫得7度,真係要用多一倍時間發酵先得,焗完後試食,發現咖啡味唔夠濃,但麵包就好軟熟.

喜氣洋洋迎兔年-手挽口金包

係網上買嘅日式和風縐布, 就嚟過年,所以就用咗呢塊布做咗個手挽口金包,準備去拜年,裡面仲車多一個暗袋.

柿子乾方包

因為長期都係整麵包做早餐,如果唔加啲新野落去會好悶,近排見到有韓國嘅柿子乾賣,都好軟身,買嚟除咗當零食外,靈機一觸,將佢切成塊狀,同麵團攪埋一齊,今次用咗黃糖,所以麵包顏色好睇啲.

4片口金包

因為應承朋友做個口金包送俾佢,所以又開工,今次做4片式,而口金架仲有埋鎖匙扣.

呢個係正面

背面,布款花紋有啲唔同

底部

裡面

紫菜芝麻梳打餅&藍莓牛油曲奇

今朝起身,發覺出面又濕又凍,幸好雪櫃有餸菜,可以唔駛出街,於是就整咗呢款好耐都想試做紫菜芝麻梳打餅,但因為呢款餅乾祗係用蛋白,所以就順便用埋剩低蛋黃做多款藍莓牛油曲奇.

我切得比較細塊,咁就可以一啖一塊嘞.

焗好之後,膨脹咗好似厚身啲,不過由於我無跟食譜係餅面洒鹽,所以食落唔似街出面賣嘅梳打餅,反而有少少甜味添,餅身比較硬.

藍莓牛油曲奇夠鬆脆,不過我焗爐細,變相爐溫高,雖然已降低爐溫,但仍然有幾塊焗得燶過頭要掉,哂咗啲....

2011年第一款-班蘭方包

踏入2011年第一次整嘅係麵包,因為想用完剩底嘅班蘭葉汁,所以就做咗呢款方包,不過今次無加椰汁,味道真係無咁香喎,而且發現麵包組織內有啲大洞,唔知係咪最後無將麵團內氣泡壓出呢? 不過麵包都好軟熟,食得過嘅.

班蘭椰香戚風蛋糕

今晚有中學同學聚會,班主任老師都會出席,見到屋企有上次未用完班蘭汁剩,加埋椰汁,就焗咗呢個班蘭椰香戚風蛋糕,準備送俾佢.

一焗完出爐表面好似火山爆發咁,不過唔駛驚,根據我經驗,反轉倒扣後會回縮,加上甩底後呢面反轉做底,所以淡定.

睇吓今次都唔錯喎,因為要送俾人,所以無切開.

加上簡單包裝,咁就可以攞去送禮嚕....

柚子蜜牛油蛋糕

前排係書局買咗呢本中譯日文專門製作磅蛋糕書,見到屋企有材料,所以嘗試跟住整,但其實無論材料,步驟都比較繁複,剩係酒都用3種,油都要分牛油,橄欖油,糖亦分紅糖,白糖,所以剩係磅材料,準備功夫都用咗成40分鐘以上.

結果出嚟嘛...我就覺得差強人意,蛋糕唔係好高,唔知係咪最後落麵粉攪拌太耐,令到蛋白泡消失太多? 但味道,質感都唔錯,下次可能要掉轉程序,最後先同發起蛋白混合.

椰糖栗子包&饅頭

因為想消滅屋企啲剩餘物資,加上連續3日聖誕節假期,所以做嚟俾奄尖大少做早餐,連栗子蓉餡都係自己煮架.

但唔知係咪新鮮酵母過期,無咗效力,等咗半個鐘都仲未發到理想程度,不過都照蒸,好彩蒸好食落都OK喎,祗係甜咗啲.

剩低仲有麵團,見到酵母又發唔起,所以臨時用泡打粉開少少水,再同麵團搓勻,靜置鬆弛5分鐘後再捲,切成饅頭,然後再蒸,果然鬆軟好多.

應節 Panettone

聖誕節就快到,所以做咗呢款 Panettone 應吓節, 乾雜果皮係舊年聖誕整Stollen麵包時買多咗,於是用Rum酒浸住,放係雪櫃內,有成一年,係咪好耐呢?不過真係令麵包焗完出爐後,香味好多,今年都會去買一盒再浸到出年用至得,為咗健康著想,我減咗牛油,如果跟足食譜,真係超多,我寧願無咁美味,都要健康好過囉.

由於無高身圓麵包模,所以用焗爐紙將圓形蛋糕模加高圍邊,個麵包面稍為燶咗啲,因為太早揭起蓋面錫紙.

攤凍後切開試食,幾好味唔錯.

聖誕禮物

今日同志同道合DIY好友食晏,意外地收到佢親手DIY兩份禮物俾我, 左邊係新鮮剛做好嘅洛神花果醬,其實之前我自己都想做,但因為雪櫃內已有幾款唔同果醬未食完,所以忍手無做,而家竟然不勞而獲,真係正中下懷.

右邊係隔熱墊,難得佢上次嚟我屋企,細心觀察到我塊隔熱墊已經破爛,所以做嚟送俾我,有時禮物貴重與否,同價錢未必成對等,我自己反而喜歡收到包含誠意禮物, 多過名牌禮品, 多謝哂.