2011 台灣行 (下篇)

Day 3

起身食完一頓豐富自助早餐後,就行去酒店山後嘅瀑布,趁機消化肚裡面食物,沿住馬路大約行咗20分鐘左右,就到咗入口.

旁邊有個步行路線圖.

呢個瀑布分3層,全部都有石級,唔算太辛苦,但由於我膝蓋關節問題,結果祗係行到第2層,係涼亭休息吓,就落山,無上到去頂層,其實一來一回,都要成個半鐘以上,番到酒店大汗夾細汗,即刻沖涼,然後再check out,都係坐番酒店架車去火車站,買好下晝番台北車票後,就係礁溪市遊蕩.

行行吓,又落雨,結果嚟咗個公園避雨,個度專登免費俾遊客浸腳,啲溫泉水有煙出,不過其實水溫唔太熱,和和暖暖啫.

食完晏之後就搭車番台北,晚野去咗"欣葉"食台菜,去咗台灣N次,但從來未試過食正宗台菜,味道都唔錯,不過價錢就稍為貴啲,跟住早啲番酒店抖吓,因為明日要7點左右起身搭火車遊平溪線.

Day 4

晨早起身,求其係火車站附近食咗早餐就搭火車去瑞芳站,再買平溪線一日遊火車票,轉火車去菁桐尾站,上車時雨勢開始越來越密,到咗車站後,見到地下階磚圖幾別緻.

係旁邊商店買咗呢兩塊木風景postcard寄番俾自己,番香港後3日就已經收到嚕.

好多人將祝福字句寫係竹筒上,再掛係度,但當日落雨,無開檔做生意.

呢個就係菁桐出名幸福郵筒,當然要影張相留念喇,見下一班車要成12點幾,所以就擔住遮行去平溪站,大概都要成半個鐘以上.

呢度就係平溪地標,其實都無乜特別嘅野可以行,於是就搭去十分嘅火車離開.

去到十分已經成12點幾,又落雨,於是去醫肚順便避雨,跟住就所有遊客都會做嘅野,就係放天燈,買咗個4色天燈,唔同顏色代表事業,健康,財運,平安等等.

由店主幫手燃點,係火車軌旁邊就放咗上天嚕...,因為下一班車要成個半鐘後先到,所以就行去十分瀑布,雨仍然無停,我件羽絨褸淋到濕晒,結果行咗成40分鐘有多,過咗兩條吊橋先到,但入去係要俾入場費,眼見時間無多,所以無入去就走番轉頭,沿途影吓相就算.

啱啱有火車經過,睇吓幾貼近民居.

又濕又滑仲要行過去吊橋.

終於搭番火車番台北,一番到酒店房間,即刻就由頭洗到落尾,然後再坐捷運去西門町食自助麻辣火鍋,其實我哋兩個根本唔食得辣,好彩火鍋湯底可以揀兩樣,一邊唔辣,其實食物質素普通,但最抵係無限量供應10幾款Haggen Dazz雪糕,全場啤酒,汽水,果汁任飲,6-7款生果任食,10幾款甜品/蛋糕,以港幣$150-160,都OK喇,今日真係行咗好多路,對腳好攰,所以都無再行夜街,就番去酒店休息.

Day 5

今日可以遲啲起身,行去後面街食奄尖大少至愛"永和豆漿"早餐,跟住番酒店執好行李,就check out 出機場,我揀咗下晝兩點幾班機,因為唔想太夜先番到香港.

總括今次行程,全部去晒,100%完成,每日除咗瞓之外,就不停飲飲食食,結果番嚟足足肥咗3磅,睇嚟又要努力減磅.

呢度大部份手信都係送俾屋企人或者奄尖大少同事,留低俾自己唔係咁多,但就攞餐死,唉! 有時人情真係無得講.

2011 台灣行 (上篇)

事緣舊年12月時,奄尖大少話想去台灣浸溫泉,至於旅遊行程安排,訂飛機,酒店,梗係由我呢個業餘旅遊領隊全權策劃喇,終於上星期一出發.

Day 1, 因為唔想太早起身,而且酒店下晝3點先可以check in,所以揀咗搭呢班機,第一次坐"長榮"航空,估唔到機位都幾寬敞,但...飛機餐就超難食,個天使麵焗到好似一pat糊咁,結果一放低行李,就即刻去醫肚,食牛肉麵,再番酒店抖一陣,去台北車站買定明日去九份車票,再坐火車去基隆,行廟口夜市.

火車一出松山站上到路面,已經開始落毛毛雨,幸好有睇定台灣天氣預告,已經帶咗遮去,原來都要坐成45分鐘以上,因為係區間車,站站停,成10個站,出到站後就揸住張地圖行,點知早咗兩個街口轉彎,結果行過龍,天又黑又落雨,街名比較難睇到,結果搵咗一陣,終於搵到入口.

於是開始掃街,首先食好似關東煮嘅野,包括有滷水豆腐,海苔,素雞卷,魚餅,跟住見到現做印度咖哩薄餅,又食,再飲燒仙草,苦瓜鳳梨汁,最後食埋呢款鐤邊銼,個肚已經脹哂,加上攤檔好少有位坐,要一邊擔遮,一邊行邊食,真係幾狼狽架.

食完後就慢慢散行咁行番去車站,搭火車番台北,沿途經過呢段基隆河,夜晚景色唔錯.

Day 2

一宿無話,今日要離開台北市,將行李喼暫時寄存係酒店,明日番嚟都會住番係度,我哋食完早餐後,搭10點幾班火車去瑞芳,再轉巴士去九份,可能係平日關係,加上陰天小雨,所以唔算太多人,但因為係山上,所以霧都好濃

呢個係舊道口入口,沿途同奄尖大少又係咁一路食到上山,包括魷魚片,鹽酥飽魚菇,燒香腸

呢檔"賴阿婆"芋圓,最後仲要食埋綜合魚丸,大約全程成兩個幾鐘先再搭車離開九份番瑞芳車站.

去到瑞芳站見時間尚早,就行咗入去市場,買咗啲生果,再番車站搭火車去礁溪,今晚會住間5星級溫泉酒店,因為之前同酒店聯絡咗,佢哋有車接我哋番酒店,唔駛自己搵車.

由酒店餐廳望出去,周圍環境真係令人好舒服

出面有戶外溫泉可以浸,住客免費任浸,祗要自備泳衣

但其實房間裡面已經有浸溫泉浴缸,祗要落下窗簾,就可以自成一國.

而佢哋供應梳洗用具,放係布袋內,男女各一份,好精緻架,仲歡迎攞走,雪櫃汽水,礦泉水,小食免費供應,仲包兩位自助早,晚餐,所以一晚雖然要HK$2,3XX,但無論服務,食物質素都好好,所以我哋都覺得好值.

滋潤洗髮皂

上次做洗髮皂差唔多用哂,朋友試過都話好用,我都覺得幾好,而家洗完頭都唔駛再用護髮素,所以又再打多一批繼續用,今次用咗成6隻唔同油,包括有椰子油,棕櫚油,蓖麻油,苦茶油,芝麻油,荷荷芭油,最後加埋薰衣草精油,不過經過3日後甩模仍然未夠硬身,而今次用皂模係新買,好似花紋唔夠深? 個Hello Kitty頭好朦吓.

抗氧化防曬日霜

老友encore話想要我曾經送俾佢個隻抗氧化防曬日霜, 梗係無托手掙,今朝一起身食完早餐就即做,主要成份包括有甜杏仁油,荷荷巴油,金縷梅花水,紅酒多酚,Vita B5, 角鯊烷稀,二氧化鈦,乳化蠟,加咗少少麝香精.

第一次收到DIY麵包

識我嘅人都知我成日整麵包,加上佢哋多數都唔識整,所以從來都無人請我食自己整麵包,直至昨日相約舊公司同事,攞啲自己手工打肥皂,同面霜俾佢,佢竟然回贈自家製麵包俾我,其實都好開心,今日早餐就切片試食.

麵包幾軟熟,應該係有玉桂,朱古力味,其他就唔記得嚕....

好友共聚生日飯

昨晚兩位老友同我預祝生日,今次我哋揀咗去食某獲好評酒店自助餐.

睇吓有乜野食?

因為有做定功課,所以首先就食刺身,果然帶子,海膽,甜蝦都好新鮮,一啲都唔腥.

生蠔就細隻啲,但勝在即開夠新鮮,而天婦羅都係即炸,一份有兩隻蝦,一塊南瓜,一塊蕃薯,脆漿夠薄.

不過跟住串燒就麻麻,太乾,祗係夾住中間大蔥段比較甜,好味啲.

有4種冷切肉,伴兩種蜜瓜,呢個都好食,不過我最鍾意食反而係右下角個煙三文魚卷,唔係好咸認為,好過食魚生,我食咗兩個.

呢碟係我朋友食,包括有長腳蟹,龍蝦,琵琶蝦,翡翠螺,我覺得祗係翡翠螺比較爽甜,其他始終熱食好過凍食,我哋基本上無乜食熱盤,因為種類唔太吸引,太普通,肉車,淥粉麵又無幫襯過.

反而甜品就食咗好多,包括呢款燃燒近焦糖布丁

Tiramisu,香蕉pan cake,奶凍杯,柚子啫哩等等

呢碟係我朋友食,芝士餅我無食,因為我唔鍾意食太肥膩.

最後唔放過嘅仲有呢款雪糕,我食過Vanila好滑,不過就稍甜,我朋友一口氣至少食咗3盒.

最後餐茶,我哋叫咗檸檬蜜糖茶,依照我哋慣例,蜜糖全部帶走,真係好開心,雖然昨夜室外氣溫唔夠10度,但同老友過咗一個愉快又溫馨晚上, 人生得一知己何求?

咖啡合桃包

我個FD鍾意食,今晚同佢有約,所以特別做嚟請佢食,不過今日氣溫得7度,真係要用多一倍時間發酵先得,焗完後試食,發現咖啡味唔夠濃,但麵包就好軟熟.

喜氣洋洋迎兔年-手挽口金包

係網上買嘅日式和風縐布, 就嚟過年,所以就用咗呢塊布做咗個手挽口金包,準備去拜年,裡面仲車多一個暗袋.

柿子乾方包

因為長期都係整麵包做早餐,如果唔加啲新野落去會好悶,近排見到有韓國嘅柿子乾賣,都好軟身,買嚟除咗當零食外,靈機一觸,將佢切成塊狀,同麵團攪埋一齊,今次用咗黃糖,所以麵包顏色好睇啲.

4片口金包

因為應承朋友做個口金包送俾佢,所以又開工,今次做4片式,而口金架仲有埋鎖匙扣.

呢個係正面

背面,布款花紋有啲唔同

底部

裡面

紫菜芝麻梳打餅&藍莓牛油曲奇

今朝起身,發覺出面又濕又凍,幸好雪櫃有餸菜,可以唔駛出街,於是就整咗呢款好耐都想試做紫菜芝麻梳打餅,但因為呢款餅乾祗係用蛋白,所以就順便用埋剩低蛋黃做多款藍莓牛油曲奇.

我切得比較細塊,咁就可以一啖一塊嘞.

焗好之後,膨脹咗好似厚身啲,不過由於我無跟食譜係餅面洒鹽,所以食落唔似街出面賣嘅梳打餅,反而有少少甜味添,餅身比較硬.

藍莓牛油曲奇夠鬆脆,不過我焗爐細,變相爐溫高,雖然已降低爐溫,但仍然有幾塊焗得燶過頭要掉,哂咗啲....

2011年第一款-班蘭方包

踏入2011年第一次整嘅係麵包,因為想用完剩底嘅班蘭葉汁,所以就做咗呢款方包,不過今次無加椰汁,味道真係無咁香喎,而且發現麵包組織內有啲大洞,唔知係咪最後無將麵團內氣泡壓出呢? 不過麵包都好軟熟,食得過嘅.

班蘭椰香戚風蛋糕

今晚有中學同學聚會,班主任老師都會出席,見到屋企有上次未用完班蘭汁剩,加埋椰汁,就焗咗呢個班蘭椰香戚風蛋糕,準備送俾佢.

一焗完出爐表面好似火山爆發咁,不過唔駛驚,根據我經驗,反轉倒扣後會回縮,加上甩底後呢面反轉做底,所以淡定.

睇吓今次都唔錯喎,因為要送俾人,所以無切開.

加上簡單包裝,咁就可以攞去送禮嚕....