一年一度又嚟開工包粽嚕..

以前咁多個節日,我最唔鍾意端午節,又唔鍾意食粽,每年我媽包粽從來都唔幫手,番工時都係同事送一啲自家製粽俾我,加埋3-4隻,攞番嚟俾奄尖大少食就算,但唔做野之後,為咗奄尖大少鍾意食,又送開一啲俾朋友,結果包開就年年都要包,今年已經第4年,睇吓有無進步?

材料就係呢啲嘞,粽葉係鏡頭以外.

好彩昨日天氣唔太熱,結果用蟻速包完晒,可以攞去烚喇.

大概都包咗有27隻,其中兩隻無咸蛋黃已經一早俾奄尖大少帶返工當午餐食.

剛巧有朋友嚟探我,佢又未食早餐,所以就解開一隻俾佢試食.

佢一路食不停話好味,但係飢不擇食嘅人都係唔好信咁多/

不過切開買相都幾吸引,唔錯,派晒出街後,除咗有3隻無咸蛋黃留俾奄尖大少,都係剩番2-3隻俾自己食咋.

試新皂印

前幾日係淘寶買咗一批皂印,其中兩個仲有自己個名,好似好pro咁,啱啱有啲皂晾近,於是攞幾舊試吓先.

呢幾舊都唔錯,幾清楚,中間個舊其實已經包含兩個皂印圖案.

至於呢兩舊茶籽首烏洗髮渲染皂,因為overtrace先入模,先天已經有缺陷,同皂印無關,但印出嚟都好清淅. 本來仲有兩舊,可惜皂已經太硬.印完皂都甩晒出嚟,所以無謂影相.

古法馬拉糕

好耐都無整呢款糕點,因為做法比較繁複,我又唔係咁鍾意食馬拉糕,今次再整都係有朋友佢話鍾意食,明日約咗一齊食晏,咁咪投其所好囉. 今次發麵種時間長,超過12個鐘,第二次發時擺入雪櫃,發到今朝先攞出嚟回溫.

點知蒸完好似變成發糕咁,點解呢?唔通個糕盤太細,向上迫爆咗,或者火力太猛,又或者泡打粉/梳打粉落多咗? 真係唔明.

但好彩切開試食,味道唔錯,馬拉糕好鬆化,有番啲內涵,係樣衰啲啫.

網上密密買

我呢幾個禮拜,唔知做乜事,抽起條筋,雖然無乜去街,但原來足不出戶,都可以駛好多錢,原因現在買野太方便,祗要有部電腦可以上網,基本上已經可以買到好多野,睇吓以下啲相,就知道我買啲乜?

首先係美國一個買維他命網站,買咗4樽花粉丸,一樽納豆萃取丸,一罐綠石泥粉,花粉丸係屋企人食,唔係我嘅,如果買野唔超過3磅約1KG左右,又唔怕運送時間長少少,10-14日度,祗係4元美金運費,超抵.

然後又係台灣網上書店,原本買兩本教做渲染皂嘅書,但見到有3本75折,於是就買咗4本,但用DHL速遞,唔計書價,平均一本郵費成HK$3X,加埋總共HK$1xx郵費,有啲貴.

以下就全部係淘寶網淘番嚟嘅,包括有:

蜜蠟500g兩包,菎麻油一支(500g),3包花粉(皂角粉,青黛粉,玫瑰花粉),梅花,星形,圓筒形皂模,人民幣不斷升值,加埋運到香港後,送到住宅再加收費用,但仍然仲平過係香港,台灣買,不過買咗啲皂模都唔知幾時用呢?

跟住買咗呢個亞架力板間渲染模,貪佢夠硬身,又可以直間,橫間,我去速遞門市店自取,連運費要HK$13x,不過一定平個係香港買.賣家仲大方送多一個刮板間皂板器俾我添.

最後買咗8個皂印章,其中兩個有埋自己個名,平均連運費$3x一個,都係去快遞門市自取,慳番送貨費.

我諗今個月唔會再網購喇,實在太敗家,遲啲先再買嚕....

雙色方包

我見有罐朱古力粉係度,唔好晒整麵包時,加啲落部份麵團裡面,再一齊捲埋,咁就唔駛咁齋,淨係牛奶麵包,今次用番普通中種法,真係比上次用湯種發酵鬆軟好多喎,都係食慣無得用番直接法.

湯種牛奶方包

自從發覺用17小時低溫中種,麵包發得最軟熟,同埋唔會咁快老化後,已經好耐無用湯種法,今日要溫故知新,首先煮咗過湯種先,再翻開書本,搵番相應麵包食譜.

雖然帶蓋,同一爐溫,但好似麵包外皮燶咗啲.

稍為攤凍,切開麵包組織都好軟熟.

不過同上次用低溫中種焗嘅牛奶全麥包比較,麵包發酵得好啲,睇落好似鬆軟啲.

繁忙嘅一日

今朝一早起身,食完早餐就趕住焗麵包,如果唔係明朝早餐無著落,而家出面街賣麵包除咗價錢貴之外,仲落咗好多麵包改良劑嘅化學野,所以都係盡量自己整,加上今晚舊同事放工會親自攞本麵包書俾我,所以係度等麵包發酵未得時,就趁機焗條牛油蛋糕送俾佢食,點知在製造過程中,有另一位朋友又邀約我北上深圳灣行街街,心大心細,考慮後決定麵包,蛋糕一出爐就立刻出門,幸好係路口已經有"B2"巴士站,由出門去到深圳灣口岸全程都係大半小時,仲快過搭車出九龍.

首先合桃提子牛油蛋糕出爐,自己立刻切一塊試味先,牛油味好香,加埋我最鍾意合桃,正!

跟住牛奶麥包都出爐喇,仍然可以保持水準.

今次全麥粉落少咗,不過仍然咁鬆軟.

講番係深圳灣口岸同朋友匯合後,基本上直行直過,5分鐘之內已經過晒兩面出境/入境,跟住同朋友搭橙色RMB$1小巴去到蛇口沃爾瑪站落車,行過一條天橋,先去"迪化龍",買咗3件全棉T恤俾奄尖大少夏天替換著,每件RMB$25,以咁嘅質地,都算好抵,然後行過去"沃爾瑪",我竟然係無打算買任何野情況下,結果買咗張竹片席(4呎)加埋兩塊竹片枕頭套,再落下面超級市場陪朋友買餸,忍唔住又買咗一公斤中筋粉,一打土雞蛋,仲有其他濕碎野,拎到我死死吓,最後終於買完差不多成兩點先食晏,就係朋友介紹嘅"真工夫"蒸飯套餐.

呢份係我食嘅北菇雞腿蒸飯套餐,包括有北菇蒸雞腿一碟,不知名燉雞湯(好味精),油菜一碟,白飯一兜,盛惠RMB$23,雖然人民幣兌率升高,仍然覺好抵,係香港食會貴好多.

我朋友個份,除咗餸唔同,佢要炆排骨,其他完全一樣,都係RMB$24咋.

食飽飽,就離開行去搭番橙色小巴去深圳灣口岸番香港,攞住咁重嘅野,仲要擔傘,你都咪話唔辛苦,不過仍然覺得好開心,有玩有食,又唔駛同人迫,呢啲係住新界西嘅好處.

熱製硼砂軟膏

呢款硼砂軟膏,大多數人都唔會鍾意用,更加無乜DIY嘅人整,原因係呢款軟膏質感好似"蛾羅納英"雪花膏咁,好黏稠,香港天氣又唔係咁冷,無人鍾意咁痴lup嘅膏,咁我點解會整嚟用? 因為我覺得原來用佢搽腳踭軟化硬皮,成效幾好架,上堂學完攞返嚟個盒仔已經用晒,上次又分咗啲硼砂,唔駛買咁大包,咁就開工試做,雖然佢係膏狀,但其實要用滾熱水溶解硼砂,不停攪拌至完全成液體,再倒入加溫溶解橄欖油蜜蠟中,我用打咖啡泡小型攪拌機,不停攪至杰身,再加自己喜歡精油/香精都得,但倒入盒中不平均,所以表面不平滑,好粗孩咁樣,不過諗住自用,無所謂喇,呢度一大一小兩盒,至少可用半年.

應節提子紅莓乾十字包

復活節快到,而做早餐麵包啱啱食完,所以平時好少整細包,都應吓節整番一次,不過無跟傳統食譜落玉桂粉,都係鍾意用番17小時低溫中種發酵法,上次用麵包機直接法,麵包組織始終唔及中種鬆軟.

最後發酵完成,搽上蛋汁,唧上十字紋,不過焗爐太細,自然焗盤更細,但又唔想分兩盤焗,唔係嫌煩,而係後焗個盤,恐怕發酵過度唔均勻.所以一盤焗晒,迫到好似深水埗籠屋咁.

焗完出爐後,中間個幾個走晒樣,變咗唔係圓包,不過無所謂喇,反正都係食落自己個肚,不過麵包真係鬆軟好多.

再焗日式芝士蛋糕

明日約咗舊同事食晏,所以焗定蛋糕送俾佢食,但今次遲咗蓋錫紙,所以餅面有裂痕,唔得靚仔添,不過就焗得幾鬆軟,應該幾好味.

低油少甜健康中式豆沙包

好耐都無蒸包,明晚有聚會,其中一個朋友好鍾意食中式紅豆包,所以就整啲請佢食,今次連豆沙都自己煮,因為試過買現成豆沙,好油膩好甜,為咗健康著想,都係辛苦啲都自己整好過.

今次得到醒目媽咪提點,蒸出嚟包皮靚好多,雖然仍然有少少豆皮,但比較之前蒸嘅包已經好好多.

趁蒸好切開試吓味道如何先? 都OK喎,啱我口味,朋友食可能會覺得豆沙餡唔夠甜.

保濕滋潤蜂蜜椰子油潤唇膏

之前做嘅潤唇膏已經派晒街坊,自己個幾盒都用得7788,又要開工補番啲存貨,今次試吓用有機椰子油,加蜂蜜,蜜蠟, 當溶油同蠟後,聞到一陣陣椰子香味,又幾潤,真係唔錯組合,呢個配方,台灣牛爾本書極力推介架.

倒入溶液後,將蓋蓋好,放入雪櫃雪至硬身,就可以自用或送禮,又天然又滋潤,無添加劑,好好用架,似唔似賣廣告呢?

溫故知新-麵包機焗全麥方包

好耐之前朋友用信用卡積分換番嚟麵包機,再轉贈俾我,但我嫌麵包機始終焗出嚟麵包組織,無自己用人手發酵,焗爐咁軟鬆,而且容易老化,但如果唔用,遲早可能壊咗,就更加對老友唔住,所以間中都要攞部機出嚟用吓,今次跟足麵包機食譜上比例,因為上幾次用自己麵包食譜,焗出嚟麵包唔掂.

呢款麵包機好簡單,祗有3種款式,無時間掣,無任何setting.

麵包機好處係可以唔駛洗咁多用具,全部依次序放晒係兜裡面,開掣就差不多攪.

麥包出爐後,稍為攤凍切開麵包組織,睇吓都算OK,因為我嫌程序設定"焗"時間太長,令到麵包外皮又燶又厚,因此用我肉眼監察住,再用竹籤插入,發覺無生麵團黏住,就熄火,所以麵包比較軟熟.

板間渲染皂

今期又報咗學打皂,除咗上次介紹過原來可以用食物入皂後,另外一個課題就係學渲染,圖中呢兩塊係板間渲染皂, 黑色係用備長炭粉,紅色係用紅珊瑚石泥粉,入皂後各有不同功效,又學多咗野喇,所謂"學海無涯",真係無錯.

食物材料可以與打皂共用?

唔學唔知,原來食物材料都可以同打肥皂共用,譬如呢幾款,左上角係香蕉牛奶皂,右上角係日式芝士皂,左下角係士多啤梨乳酪,右下角係玫瑰果蜜糖皂,不同食材入皂就會有不同功效.

榛子橙酒朱古力

今日除咗整英式提子鬆餅,仲做咗呢款簡易又易做榛子橙酒朱古力,我用咗一半85%苦朱古力,一半牛奶朱古力,溶完朱古力後再落橙酒攪勻,面再灑上榛子碎,放入雪櫃雪一個鐘就食得嘞,味道比較苦澀啲,啱我食囉.

英式提子鬆餅

之前曾經試過用lemon soda汽水整scone,但發覺雖然比較健康,但較為硬身,無乜香味,所以今次轉試用英式傳統做法,即係有牛油,酸忌廉,蛋,糖,泡打粉,仲自己加埋忌廉芝士,一焗完出爐已經好香.

趁稍為攤凍後,切開搽上自製藍莓果占食,外脆內軟,真係好味到唔停得口呀,不過明知好味代價係高脂肪,膽固醇,所以會分甘同味,送啲俾朋友試吓,絕對唔會獨食架.