南瓜戚風蛋糕

南瓜茸除咗用嚟整糯米糍外,另外一部份就用嚟焗戚風蛋糕,準備明日送俾朋友見面禮.
剛出爐時蛋糕面有裂紋,經過冷凍收縮後就已經平好多,反轉甩底睇落都唔錯,呢款蛋糕用菜油,少糖又可以食得健康啲.

南瓜豆沙糯米糍 & 黑木耳紅豆水羊羹

前幾日買咗個南瓜番嚟做餸,但有剩用唔晒,於是將剩低南瓜蒸熟刮茸同糯米粉,奶,糖混合蒸熟,而豆沙都係自己整,係出面買嘅豆沙,落好多油&糖,都係自己整健康啲.
呢盒攞去俾奶奶,孝敬吓佢老人家.

自己整食得放心,完全無添加任何人造色素,不過新鮮即整即食,外皮比較軟身.

烚紅豆水都唔晒,加堆葛粉,黑木耳粉,大菜絲,少糖就成為呢款健康紅豆水羊羹嘞...

素千層麵

見到免費報紙有呢個食譜,屋企又有乾千層麵,於是又試吓整,原本有甜椒,雪櫃無就唔落,祗係有紅蘿蔔,南瓜煮熟切粒,加蒜蓉,Orengo香草,橄欖油炒一陣,用麵粉,奶,橄欖油,鹽做咗個奶醬取代番茄醬,再逐層鋪係玻璃兜內,最後鋪埋Mozzarella Cheese 係面就可以焗.
因為用片裝芝士,蓋唔晒麵皮面,有啲瀉開咗.

切開食落味道好清新,有紅蘿蔔,南瓜甜味, 一啲都唔覺肥膩,如果想再健康啲可以用低脂奶,同芝士.

淘寶新玩具-智能腰背牽引帶

由於以前番工長期坐係度對住電腦,而家唔做野,又長期上網,攪到腰骨成日痛,係淘寶見到有呢樣野可以拉鬆背脊骨,我以前做過物理治療時,發覺真係有效,不過要瞓係張床上頭尾兩邊拉扯,但呢個簡單啲,用一排睇吓有無效先?

今日晏晝-越式豬扒撈米線

近排咁熱,真係有米懶煮,尤其是晏晝一個人食,更加唔想做,好多時都係睇吓隔夜有無野剩低,有乜食乜就算,今朝見到有羅馬生菜剩,於是去買咗幾塊梅頭豬扒番嚟醃咗,加埋自製越式"碌淋汁",灑上花生,炸蔥碎就食得嚕..好清新好好味!

洋甘菊蘆薈化妝水

洋甘菊有舒緩緊張情緒功效,蘆薈有保 ​濕作用, DIY好處係可以因應個人需要,組合不同成份.

自家秘製燒排骨

昨日去大埔探奶奶,順便去佢隔離街市凍肉鋪買咗一包豬仔骨,用咗自家調教醬料醃咗一晚,今日就開焗爐焗,中途將汁料掃上肉面,令佢無咁乾身,最後5分鐘搽上蜜糖再焗就可以出爐.
睇吓買相都唔錯啩?不過今次焗得燶咗啲.

好彩斬開後,肉質仍然好鬆軟,外表雖然無街賣顏色咁吸引,但勝在無住何人造色素,食落都放心好多.

艾草首烏洗髮皂

之前係淘寶買嘅"亞架力"皂模,可以兩用做直板,橫板渲染都得,所以今次試吓做橫板間渲染,睇吓出嚟效果如何?
上次用佢嚟做直板家事皂,點知等兩日先脫模,好難甩,旁邊都甩到爛晒,今次睇咗有關脫模資料,係皂模頭尾部份先貼上牛油免焗紙再倒入皂液,脫模就用好似甩戚風蛋糕咁,果然容易好多,不過皂比較軟身,加上天氣熱,好似成舊皂都滲油咁.

切去頭尾部份,順住花紋就切成咁樣,祗係艾草粉,首烏粉顏色唔係好強烈對比,不過唔想加色粉,都係自然好啲.

呢張係直紋擺放,效果還算OK.

高纖健康水餃

早兩日諗起買咗包木耳絲,擺係度無用過,於是決定用佢嚟包水餃,今次用咗厚水餃皮,因為我鍾意水餃皮厚啲有得嘴饞.
呢度兩個人份量,所以我食一半,另外一半放入冰格,留番第二餐食.

我鍾意多啲菜少啲肉,餡料包括有,木耳絲,冬菇,椰菜,免治廋肉.

呢份就係我今日嘅午餐

切開睇吓饀料都好豐富架,飽肚嘅一餐.

榛子杏仁曲奇

今朝起身,風球仍然未落,天陰又落雨,梗係唔出街喇,咁就整咗呢款曲奇餅.
今次焗得幾好,控制到爐溫唔太猛

左面個啲曲奇除咗有杏仁,榛子粉外,仲加埋原粒杏仁,咁就可以香口啲,食落好鬆化,好香,不過唔可以成日整,因為知道落咗幾多牛油係入面.

DIY白芷醋蘆薈啫哩

近排發覺面上同手背班點越來越明顯,於是就試吓整番啲白芷醋搽吓先,係約一星期前將白芷切碎加入白醋,適量純水浸泡,間中搖勻下,今日將白芷醋過濾後,加入蘆薈膠,加強保濕,攪勻後就開始搽係班點嘅地方,睇吓會唔會淡班先.
其實唔止呢盒咁少,總共整咗3盒,另外再將白芷醋液倒入膠樽內,用完如果有效會繼續整.

黑糖栗子饅頭

成日都係焗麵包,今次就改為蒸包,用咗朋友送俾我個包黑糖,再加埋包粽剩低嘅栗子,製成栗子蓉,捲埋切成均等一段段,醒發後就蒸得,真係快捷簡單.

試食咗一舊,唔太甜啱我,咁樣明日/後日早餐都有著落嚕....

New York Cheese Cake-日本版

見到近期網上愛好烹飪blogger,好讚賞呢款cheese cake,屋企又有材料,所以試吓跟住食譜做.

今次專登較低爐溫,而寧願延長多少少時間,結果蛋糕出爐無裂開.

但甩模要好小心,因為蛋糕體好軟熟,太大力會好容易裂開,前功盡廢.

攤凍一陣後,切咗一舊試食,唔知係咪熱食呢? 芝士味道比較淡,但蛋糕體都好軟滑,我無整sour cream係面,因為屋企無,自己食無所謂喇,不過如果俾我揀,我鍾意食日式芝士蛋糕多啲.

又嚟包粽

雖然端午節已經過咗,但之前包粽材料有剩下,於是再買多些少其他材料包多一次,一來順便練習包粽技巧,二來天氣咁熱,包咗放係冰格,一隻當一餐晏食,咁就唔駛煮嘞,所以係一舉兩得.

不過今次數量無上次咁多,約一半左右,當然要包番幾隻無咸蛋黃俾奄尖大少,仲要包兩隻無冬菇俾朋友.

包粽技巧無乜進步,仍然包得唔工整,啲水草紮得唔夠實,不過執生就進步咗,見粽葉裂開,就加多一塊,見水草鬆咗就紮多一條,所以粽蒸完都仲好完整,反而有一隻因為被水草紮得太實,連粽葉都裂開添.

順理成章今日晏晝就食新鮮蒸完嘅粽.

切開睇吓內餡好豐富架,自己食又唔係賺錢,梗係要對自己好啲喇,係咪?

炎炎夏日,消暑妙品,無添加香蕉雪糕

好耐無整過雪糕食,呢排真係好熱,踫巧前日用咗蛋白,剩低有蛋黃,於是就攞出呢部前年係網上買嘅cheap cheap雪糕機,開工大吉嚕...

呢部雪糕機雖然簡單,但勝在輕巧,可以連機頭(用筆芯電)一齊放入冰格,攪3-5秒,停5分鐘,說明書話要40-50分鐘,但....結果我用咗差不多3倍時間,即係成2.5鐘.

雪咗成晚,今日終於有得食嘞,我仲加埋朱古力醬,焗香杏仁碎粒,真係好好味架,而且雪糕都好軟滑,同"H"字頭雪糕有得揮,哈哈!

我很醜,但係一舊好滋潤保濕嘅皂.......牛奶蜜糖橄欖再生皂

之前去學打皂,其中有一堂學做再生皂,在堂上要將皂塊刨成皂絲,真係刨到手差唔多斷,心裡面諗住番屋企,自己一定唔整呢款皂,但係而家用開皂沖涼,洗頭,不知不覺間就剩低一堆皂頭皂尾,又唔想掉晒佢哋,於是唯有硬住頭皮刮皂絲,可能數量無上堂時咁多,用咗約45分鐘已刨晒,跟住用蜜糖,牛奶,橄欖油攪勻再隔水加熱,但仍然唔係好溶解,上網發現原來可以用熱蒸方法,倒入矽膠模後,再隔水蒸,令皂團溶解,又可以唔太高溫,咁好方法梗係要跟喇..我祗係蒸咗20分鐘左右,就熄火入尼龍箱保溫,第二日已經可以甩模,再晾多2-3日,已經可以循環再用嚕...,所以一旦用開手工皂,真係一條不歸路.

DIY可愛長牙海象襪子娃娃&mouse pad

前兩日又同朋友北上深圳閒逛,天氣咁熱,於是走咗去少年宮書城睇書,結果買咗呢本教做襪子娃娃嘅書,睇完發覺都唔難做,昨日立即買齊材料開工,一氣呵成做咗兩隻,除咗係玩偶,仲可以當mouse pad用架,準備送俾要返工長用PC兩位老友.

做好第一隻淺藍色時仲係日頭.

食完晚飯後再開工做第二隻灰色,個身塞得太滿,結果變成肥海象.

最後來一個大合照,做完就去瞓覺覺喇.....

今日晏晝-豉汁排骨陳村粉

昨日買咗包陳村粉番嚟,今日試吓加豉汁排骨當晏晝食,其實陳村粉類似一塊未切成河粉前嘅粉皮,將粉皮攤開,慢慢回復成一塊圓粉皮狀,鋪係碟底,上面再放上豉汁排骨,蒸熟後豉汁液流落下面粉皮內,索咗汁液咁就撈勻食,都幾好味.

DIY 防晒蜜粉

夏天已經到喇,女士們出街一定要做足防晒,我都唔例外,所以今日做咗防晒蜜粉,除了可以自用外,仲會送俾我啲女性朋友,一齊分享.

防晒蜜粉材料包括有高嶺土(吸油),粟粉(吸汗,柔滑感覺),小蘇打(清潔),TiO2(防晒),再添加粉紅石泥粉,少許紅石泥粉,玫瑰花粉(可以保濕,抗發炎),玫瑰精油,所以其實可以作香體粉用.

將各種粉類混合後,放入乾磨機攪拌,再過篩幾次,加入精油,令到粉末更幼細,然後再入盒.

再配埋我老友送嘅粉盒就更加相得益璋嘞...

馬鈴薯備長炭家事渲染皂

今次特別為咗一個唔鍾意帶膠手套洗碗碟朋友做家事皂,希望幫到佢,另一方面因為買咗個新板間皂模,都想試吓用,所以加咗備長炭粉,而且睇書話如果加入馬鈴薯汁,可以增加清潔力,所以又試吓.

雖然已經搽咗一層花士令係模內再落皂液,但脫模仍然好困難,結果用刀仔旁邊插入先勉強甩到,不過邊位就唔得整齊.

切開睇吓,花紋還算OK喇,不過仍然有待改進,要多啲練習.

豎起開始晾皂喇,4-5星期後先可以攞去俾朋友用.