健康南瓜黍米粥+芽菜牛柳絲炒麵

今朝老友親自將換咗部新麵包機送嚟我屋企, 為咗表示少少心意,就整咗個簡單晏晝一齊食,好過出街同人迫,而且食物質素又越來越差.
好簡單昨晚浸咗米,臨瞓前先放水+米煲15分鐘,再落埋南瓜粒,黍米粒,煲多10分鐘,熄火,由得佢焗通霄,今朝起身再加番少少水煲滾就食得,慳時間又慳火力, 但炒麵就要現炒,不過自己整就可以多芽菜,少肉.盡量少油.

我又一新玩具-新麵包機_白方包

之前老友俾過一部麵包機我,但程式太簡單, 焗出嚟麵包厚皮又容易老化,結果後來轉送咗俾人就算,前排發現用銀行信用卡積分可以換另一個model好啲麵包機,自己又唔夠積分,於是搵我老友幫手換,結果佢竟然送埋俾我,唔收錢,真係攪到我都唔好意思,唯有用其他方法報答番佢喇.
本來唔係換呢個model,不過因為原本個款已經換晒無貨,所以就改咗呢款,上網查吓原來賣成$1,6XX架,令我更加唔好意思收咁大份禮.

拆開包裝盒,裡面就係咁嘞,功能有好多種,日後要慢慢試先再講俾大家知道.

機身比我想像中稍為大咗啲.

隨機仲附有呢本麵包食譜,以後要試吓做先知道掂唔掂?

為咗要測試清楚,如果7日內有問題要即刻拎去換,所以立刻開機,試焗最簡單白方包(500g), 經過3小時有多後,麵包終於出爐. 麵包顏色都OK喎.

即刻切開試食,麵包組織都唔差,因為即刻切所以有好多麵包碎,不過都叫做成功,祗係無自己焗咁好啫.

薰衣草香醋

應朋友要求,幫佢用薰衣草浸醋,功用可以消炎,治暗瘡,我未用過唔知得唔得?不過味道就好過白芷醋,我仲加咗甘油,蘆薈啫哩,可以保濕啲,希望佢啱用.
大個盒俾佢,細個盒留俾自己試吓用.

今日飯後甜品-椰汁紅豆西米露

祗係將整砵仔糕剩低紅豆,加埋西米,椰汁,椰糖漿攪勻,就成為今日飯後冰凍甜品,所以賣甜品其實好好賺,不過香港租咁貴,可能已經抵銷咗喇.

久違紅豆砵仔糕

真係好耐無整過砵仔糕,見到仲有啲紅豆剩低,於是就用咗佢,費是擺係度生"谷牛".
以前買落整砵仔糕瓦碗仔,打爛咗幾個,所以今次用星星矽膠模.

果然非常容易甩模,少甜多紅豆啱我口味.

生煎豉油王蝦碌

休魚期剛過咗, 見到有生猛游水花蝦賣,價錢都唔太貴,所以買番嚟整咗呢味簡單嘅生煎豉油王蝦碌,味道鮮而肉質彈牙,果然游水嘅蝦寧舍不同.
買番嚟仲要剪蝦腳,去沙囊,工夫比較多.

經過一輪工夫,終於有得食嘞,自己整好味又食得放心.

夏日消暑甜品-芒果西瓜椰汁西米露

呢幾日熱得交關,諗起有西米係度未用完, 一於整番個甜品消吓暑先得,最麻煩係煮西米,又要煲又要焗,再用冷水沖走膠質,最後仲要用冰水浸先夠爽口,其他就好容易做,各適其適,鍾意點溝都得, 今次我就用生果加椰汁,少少糖水,凍食完當堂人都舒服好多.

玫瑰蘆薈長春滕保濕精華素

今次做呢款精華素係應老友要求,因為之前供應俾佢嘅精華素用晒,於是就好似做實驗咁,搬晒一樽,2樽原料係枱面,然後左溝右溝,攪勻佢就完成嚕....
成份有玫瑰花水,蘆薈+長春滕萃取液 ​,1,3丁二醇等等,夏天咁熱,其實如果皮膚唔太乾,可以淨係搽呢款 ​精華素保濕已經足夠.

保濕滋潤面霜

老友話我之前做俾佢嘅面霜已經用完,要求我繼續供應,老友叫到梗係無托手錚,今日就整咗呢款保濕滋潤面霜,成份包括有玫瑰花水,荷荷巴油,卵磷脂,花粉,納豆萃取液,薰衣草精油等.

南乳薯仔炆鴨

我印象中好似未試過整鴨,因為屋企飲食習慣少食,加上皮下脂肪好厚,好肥膩,但又想試吓整,於是買咗半隻鴨,叫檔主代為去皮,斬件,番嚟祗係再將剩餘脂肪切走,爆香薑片,紅蔥頭,蒜片,再落南乳,柱候醬,酒,滷水料,片糖一齊炆,後加薯仔就攪掂,味道都唔錯,應該啱奄尖大少食,佢鍾意濃味嘅野.

焗蜜汁叉燒

已經好耐無自己焗叉燒,近排天氣咁熱,真係無乜食慾,亦都唔知買乜餸好? 於是就買咗條新鮮豬柳番嚟,醃咗兩日,趁今日開爐焗麵包,順便焗埋佢,今晚又可以煮少樣餸嚕.
叉燒顏色無街賣咁紅,因為自己食梗係唔落人工色素喇,因為用豬柳,所以雖然全廋肉,都唔會太韌.

今日買到3件寶

昨日巡blog, 知道用Manning印花可以換康寧廚具,我自己都有用開,見到都幾底,今朝問個fd,原來佢有可以讓俾我,仲借埋會員卡俾我添,所以今日下晝約埋佢,即刻去萬寧換,順便攞埋之前買嘅迷你電飯煲,因為屋企人少,而飯煲又大咗啲,真係黏底多過食落肚.

買咗番嚟,梗係要即刻開盒檢查吓,電飯煲洗乾淨後,再用水加熱煮一次,今晚試吓用佢嚟煮飯,至於水壺套裝就遲啲先用.

蒸椰糖雞蛋糕

前兩日炒蛋白,剩低蛋黃,唔知做乜好? 見到有椰糖漿,一於就蒸咗呢個快,靚,正嘅椰糖雞蛋糕.
蒸完攞出嚟見到好圓漲起,都知今次應該掂.

再切開睇吓蛋糕裡面都好軟熟,今日下午茶點有著落嚕.....

南瓜戚風蛋糕

南瓜茸除咗用嚟整糯米糍外,另外一部份就用嚟焗戚風蛋糕,準備明日送俾朋友見面禮.
剛出爐時蛋糕面有裂紋,經過冷凍收縮後就已經平好多,反轉甩底睇落都唔錯,呢款蛋糕用菜油,少糖又可以食得健康啲.

南瓜豆沙糯米糍 & 黑木耳紅豆水羊羹

前幾日買咗個南瓜番嚟做餸,但有剩用唔晒,於是將剩低南瓜蒸熟刮茸同糯米粉,奶,糖混合蒸熟,而豆沙都係自己整,係出面買嘅豆沙,落好多油&糖,都係自己整健康啲.
呢盒攞去俾奶奶,孝敬吓佢老人家.

自己整食得放心,完全無添加任何人造色素,不過新鮮即整即食,外皮比較軟身.

烚紅豆水都唔晒,加堆葛粉,黑木耳粉,大菜絲,少糖就成為呢款健康紅豆水羊羹嘞...

素千層麵

見到免費報紙有呢個食譜,屋企又有乾千層麵,於是又試吓整,原本有甜椒,雪櫃無就唔落,祗係有紅蘿蔔,南瓜煮熟切粒,加蒜蓉,Orengo香草,橄欖油炒一陣,用麵粉,奶,橄欖油,鹽做咗個奶醬取代番茄醬,再逐層鋪係玻璃兜內,最後鋪埋Mozzarella Cheese 係面就可以焗.
因為用片裝芝士,蓋唔晒麵皮面,有啲瀉開咗.

切開食落味道好清新,有紅蘿蔔,南瓜甜味, 一啲都唔覺肥膩,如果想再健康啲可以用低脂奶,同芝士.

淘寶新玩具-智能腰背牽引帶

由於以前番工長期坐係度對住電腦,而家唔做野,又長期上網,攪到腰骨成日痛,係淘寶見到有呢樣野可以拉鬆背脊骨,我以前做過物理治療時,發覺真係有效,不過要瞓係張床上頭尾兩邊拉扯,但呢個簡單啲,用一排睇吓有無效先?

今日晏晝-越式豬扒撈米線

近排咁熱,真係有米懶煮,尤其是晏晝一個人食,更加唔想做,好多時都係睇吓隔夜有無野剩低,有乜食乜就算,今朝見到有羅馬生菜剩,於是去買咗幾塊梅頭豬扒番嚟醃咗,加埋自製越式"碌淋汁",灑上花生,炸蔥碎就食得嚕..好清新好好味!

洋甘菊蘆薈化妝水

洋甘菊有舒緩緊張情緒功效,蘆薈有保 ​濕作用, DIY好處係可以因應個人需要,組合不同成份.

自家秘製燒排骨

昨日去大埔探奶奶,順便去佢隔離街市凍肉鋪買咗一包豬仔骨,用咗自家調教醬料醃咗一晚,今日就開焗爐焗,中途將汁料掃上肉面,令佢無咁乾身,最後5分鐘搽上蜜糖再焗就可以出爐.
睇吓買相都唔錯啩?不過今次焗得燶咗啲.

好彩斬開後,肉質仍然好鬆軟,外表雖然無街賣顏色咁吸引,但勝在無住何人造色素,食落都放心好多.

艾草首烏洗髮皂

之前係淘寶買嘅"亞架力"皂模,可以兩用做直板,橫板渲染都得,所以今次試吓做橫板間渲染,睇吓出嚟效果如何?
上次用佢嚟做直板家事皂,點知等兩日先脫模,好難甩,旁邊都甩到爛晒,今次睇咗有關脫模資料,係皂模頭尾部份先貼上牛油免焗紙再倒入皂液,脫模就用好似甩戚風蛋糕咁,果然容易好多,不過皂比較軟身,加上天氣熱,好似成舊皂都滲油咁.

切去頭尾部份,順住花紋就切成咁樣,祗係艾草粉,首烏粉顏色唔係好強烈對比,不過唔想加色粉,都係自然好啲.

呢張係直紋擺放,效果還算OK.

高纖健康水餃

早兩日諗起買咗包木耳絲,擺係度無用過,於是決定用佢嚟包水餃,今次用咗厚水餃皮,因為我鍾意水餃皮厚啲有得嘴饞.
呢度兩個人份量,所以我食一半,另外一半放入冰格,留番第二餐食.

我鍾意多啲菜少啲肉,餡料包括有,木耳絲,冬菇,椰菜,免治廋肉.

呢份就係我今日嘅午餐

切開睇吓饀料都好豐富架,飽肚嘅一餐.

榛子杏仁曲奇

今朝起身,風球仍然未落,天陰又落雨,梗係唔出街喇,咁就整咗呢款曲奇餅.
今次焗得幾好,控制到爐溫唔太猛

左面個啲曲奇除咗有杏仁,榛子粉外,仲加埋原粒杏仁,咁就可以香口啲,食落好鬆化,好香,不過唔可以成日整,因為知道落咗幾多牛油係入面.

DIY白芷醋蘆薈啫哩

近排發覺面上同手背班點越來越明顯,於是就試吓整番啲白芷醋搽吓先,係約一星期前將白芷切碎加入白醋,適量純水浸泡,間中搖勻下,今日將白芷醋過濾後,加入蘆薈膠,加強保濕,攪勻後就開始搽係班點嘅地方,睇吓會唔會淡班先.
其實唔止呢盒咁少,總共整咗3盒,另外再將白芷醋液倒入膠樽內,用完如果有效會繼續整.