腐竹意米白果糖水

基本上我係唔鍾意食糖水,咁點解會煲糖水呢? 都係因為上次煲腐竹白果粥剩低腐竹,見到話意米都好有益,於是就破例煲少甜糖水,不過原來浸完再煲意米發漲好多,結果好似煲到好杰,似粥多過似糖水,不過費是加水溝稀,始終都係食落自己個肚, 遲啲會再煲意米水,用完腐竹又剩意米,真係循環不息呀.

奇雅籽(Chia Seed)方包

今次用咗奇雅籽(Chia Seed)做方包, Chia Seed係南美野生鼠美草種籽,含有豐富Omega3, 係三文魚3倍,仲有Omega6,用水浸泡後會發漲,外國人用佢作減肥之用,因為食咗後會飽肚,我就用佢做湯種同麵團混合搓包,但係非常黏稠,如果無攪拌機用人手搓包,就好難搓得成團,祗係落咗些少芥花籽油,始終無低溫中種發酵咁鬆軟.

是日午餐-腐竹白果粥+芽菜肉絲炒麵

好耐都無煲過腐竹白果粥,次次煲粥都勁黏底,加上唔太好食粥,但而家發覺原來可以隔晚浸米後,大火煲十分鐘左右,然後熄火焗到臨瞓,再煲滾一次,蓋實到第二日,咁就有煲靚粥食,唔駛黏底之餘,又慳柴火,所以就隔晚煲定呢款粥再加多芽菜肉絲炒麵做晏晝,好過出街食或叫外買好多.

玫瑰花香磚

今日除咗整包整餅外,仲做咗呢款玫瑰花香磚,將佢放係衣櫃,櫃桶,打開就有陣陣香味飄出嚟,今次加咗麝香,白玫瑰,白合3種香精,仲加啲色粉,咁就個樣似玫瑰花靚啲,香味都唔錯,幾好聞,當香味消失後,可以將香磚溶解,再加其他喜歡香精,循環再用,都好環保架.

提子車輪包,芝麻方包&杏仁曲奇

天氣轉涼無咁熱,開始有啲心機整野食,今朝攞咗個"哎呀"車輪包模,焗咗個提子車輪包,剩低麵團就做埋山形芝麻方包.

今次表皮燶咗啲,因為剛剛有朋友來電,結果遲咗出爐.

幸好裡面都好鬆軟,今次用咗17小時低溫發酵,所以麵包組織發得比較理想.

開焗爐焗麵包,於是將之前剩餘脆皮奶黃月餅皮,切成一塊塊,加上原粒杏仁,焗成杏仁曲奇餅,好味又鬆脆,不過唔可以成日食,否則膽固醇實超標.

金縷梅防敏感面霜+椰子油潤膚霜

老友要求我做面霜俾佢,梗係應承無甩拖喇,因為佢皮膚比較容易敏感,所以今次材料主要有金縷梅花水,尿囊素,Vita B5,蘆薈萃取,甘油,玫瑰果油,荷荷巴油等成份.



見到天氣開始轉涼/乾燥,咁就順便做多一樣椰子油潤膚霜,用嚟搽吓手腳,好簡單淨係用咗EV冷壓椰子油,甘油,純水,做好後聞到有淡淡椰子香味,好舒服.

荷葉糯米雞

見到朋友post咗佢嘅製成品係FB,覺得幾有新意,於是自己又試吓整, 首先將2/3糯米+1/3粘米浸軟身,將切碎櫻花蝦爆香,加入冬菇粒,蔥粒,蒜蓉,紅蔥頭,最後加入糯米兜勻,再蒸熟.

將雞身裡外用鹽,玫瑰露,老抽搽勻醃4-5個鐘,再塞入蒸熟糯米飯,外面包上已浸軟身荷葉,蒸約45分鐘度.

蒸好打開荷葉.

切開攞出糯米飯再將雞斬件,就可以開飯嚕...,糯米飯好好味,而雞又剛剛熟,好嫩滑,正!

8號風球下芝麻卷

今次打風吹東南風,正正係房間窗口位置,成晚都好嘈,差唔多無乜瞓過咁,但又唔想日頭再瞓,驚今晚瞓唔著覺,麵包又食晒,所以決定整麵包,我成日貪方便整方包,今日就試吓用麵包機攪麵團加埋用剩老麵,再自己造型,捲好再焗,就變成呢款芝麻卷嘞.

麵包組織都OK,總好過全部用麵包機整,不過我另外有部專門攪麵團用攪拌機,所以應該唔駛用麵包機攪,今次都係試驗性質玩吓.

素瓷飯

糯米飯+滷齋菜(豆百頁,木耳,冬菇絲)=?

就係我今日晏晝,端午節包粽有剩糯米,如果正宗瓷飯餡料唔係好啱我口味,所以就煮咗呢款清淡口味齋菜做餡,用保鮮紙捲實就食得喇,可以做兩條份量,不過我都係食咗一條已經好飽嚕.

紫雲膏

呢款葯膏差不多所有DIY護膚品嘅人都會做,祗不過配方會有啲出入,我呢個配方除咗主要紅條紫草根外,再加埋當歸,白芷一齊浸泡,油品係冷壓芥花籽油,因為如果用古方芝麻油會太肥膩,另外混合時再加乳油木果脂,精油包括有尤加利,茶樹,迷迭香等.

祗係整咗75g度,用完再整,好過整得太多又要派街坊,但又唔係人人鍾意用呢啲自製葯膏呢.

兩用袋

老友10月頭生日, 照慣例人手做份禮物送俾佢,所謂"物輕情意重",最緊要係有心&誠意,希望佢鍾意同感受到.
呢塊防水布買咗好耐,夏天太熱,完全好似動物冬眠咁,直情唔想郁,而家天氣開始稍涼,有啲心機開始動工.

加咗"D"字扣,可以扣上皮帶斜背.

或者除咗皮帶,翻出手挽帶,作手挽用.

入面水點裡布係朋友送俾我作為襯色,我仲係袋口加上厘士花邊.

Banana Walnut Bread

今次試吓用麵包機焗蛋糕,英文食譜叫做"bread",其實係蛋糕至真,但個程式將液體同粉祗係攪咗6分鐘就開始焗,基本上都未完全混合好,我見到即刻再用膠刮人手攪一陣,令所有蛋糕漿混合,焗咗大約1個鐘有多就完成可以出爐,我無跟足食譜落牛油,糖,全部減咗1/3,鬼佬佢哋食得好油,好甜,唔啱我口味.


攤至稍涼後就切開試食,香蕉味好濃,蛋糕都OK,不過始終唔及人手焗蛋糕咁好食,所以麵包機呢...都係適合唔識整麵包/蛋糕人用,但要求就唔可以太高嘞.

價廉物美自家肉絲芽菜炒麵

材料成本+燈油火蠟都係$12-13度,但付出代價係洗煮切,食完仲要洗碗碟,抵唔抵? 真係見人見智.

珍寶和牛漢堡扒

有日去超市買野,見到有隻珍寶和牛漢堡扒賣,係澳洲出品,順手買埋番屋企,但又唔知點食好? 因為真係幾大塊,好少一次食咁大塊肉,今日終於決定煎咗佢,加埋紅洋蔥絲,炒蛋(整奶黃月餅剩),糙米飯,點知一路煎一路出油,煎完後,鑊裡面至少有兩湯匙油咁多,見到都得人驚呀.
終於開餐嘞,睇吓係咪好大塊? 味道呢...我好少食肥牛,因為怕個陣"酥"味,結果梗係食唔落喇,幸好仲有紅洋蔥,蛋,同埋飯食,漢堡扒食唔到一半就放棄,所以以後試新野都要諗過先.

脆皮奶黃月餅

原本今年我唔打算整月餅,不過見到個個都讚,呢款脆皮奶黃月餅好食,我啲朋友又整,咁我又試吓整先得,睇吓係咪真係咁好食?

隔晚煮定奶黃餡,我加咗搓爛鹹蛋黃碎,少甜.

包好餡,用月餅模吸出月餅後放上焗盤就開始焗嚕....

少少地,祗係做咗8隻玩吓咋,而且好彩睇咗網友分享失敗裂餅面經驗,經過調低爐溫,熄底火焗等等工序後,月餅終於焗好喇.


當然唔少得指定試食動作,外皮果然鬆脆,奶黃饀又唔甜,味道唔錯,不過就唔似食月餅,我仲係鍾意食傳統蛋黃蓮蓉月多啲,而且呢個餅皮好容易裂,一邊包餡,一邊都好擔心,最後幸好彩唔係裂得好利害啫.

櫻花蝦蔥油餅

我的新嘗試-櫻花蝦蔥油餅,加咗切碎櫻花蝦,即刻提升香味,下次要試整厚身蔥油餅,睇吓邊款好食啲?

自家煮茶餐廳碟頭飯-洋蔥照燒雞柳飯

而家百物騰貴,係茶餐廳食碟頭飯,至少都要成$3X,自己煮一半價錢已經有得食,但關鍵在於要自己煮+要有時間,對於我呢啲無業遊民梗係無問題喇.

回鍋油家事皂液

雖然有去學過打皂液,但覺得打皂時間長,最重要係高溫蒸煮皂液時,會令冷壓油有益成份消失,但今次係因為同學仔俾咗啲回鍋油我(回鍋油=煮食用過嘅油,無晒營養成份,祗係環保概念而已),咁就可以攞嚟實習,但驚清潔力唔夠,我都加咗1/3椰子油一齊打.

呢張相係已經皂化咗7日後,好似杰嘅麥芽糖,但又未算完全透明.

呢張係已經14日後,好似比較透明咗啲,不過唔理咁多,都試吓稀釋用先.

將皂團撕成小皂塊

再加熱滾水,檸檬汁(辟回鍋油益味),硼砂水(加強黏稠作用),檸檬香精攪拌,靜置溶解.

完全溶解後就可以用作洗碗碟或衣物,試用後下次水份要調成1:1會好啲,因為好似潔力唔夠強,PH鹼值=8,仲有些少油益味,要再落多啲檸檬香精至得.

新鮮熱辣出爐牛奶方包-麵包機時間設定

為咗想試吓用麵包機時間設定,又想一早起身食新鮮出爐麵包感覺,於是昨晚臨瞓前跟麵包機食譜指示,放晒麵包材料入去,較定早上出爐時間就去瞓覺覺嚕....
黑暗中影嘅麵包機設定時間倒數開始.

今朝瞓醒就已經焗好喇.


切開望吓,麵包組織都幾好喎.


沖埋杯茶餐廳奶茶,搽埋沙律吞那魚醬,真係好享受一餐早餐.,但呢種用時間掣設定焗麵包,都有啲限制,唔可以落牛奶,雞蛋,芝士容易變壞材料,因為係室溫超過7-8個鐘先開始焗.