杏仁粉去角質洗面奶

見到以前買落嘅洗面奶差不多用完,而家去上完堂已經知道點做,梗係自己DIY喇,今次用咗橄欖油,再加椰子油起泡劑,氨基酸不流淚配方起泡劑,TWEEN80, 係咁意攪吓已經好杰身,左手邊個支無乜特別,而右邊粉紅色蓋個支就加咗杏仁粉,咁就可以當輕微磨砂,去角質用,試洗完面後,塊面一啲都唔乾,唔錯,以後又多一樣護膚品可以DIY嚕....

今日甜品-生磨杏仁茶+燕窩

見到仲有燉好燕窩剩,係咁食好似單調啲,於是就浸咗一小撮杏仁,米一齊,下午就用攪拌機攪成杏仁米漿,蓄意唔過篩,寧願犧牲口感無咁滑,但就唔會浪費有益,有營養價值嘅杏仁碎.
攪完倒入煲裡面,煮至杰身加少少糖,撈埋燕窩落去就食得嚕...真係夠晒滋潤,補身.

今日西式午餐

今日有朋友到訪,所以煮咗個西式午餐請佢食,首先有南瓜忌廉湯,湯底係自己煲魚湯,無落味精架,湯面灑上雜香草,因為想食多啲纖維,所以無用攪拌機攪爛再過篩.


跟住就係呢個蝦仁黑松露菌香草醬意粉,仲加咗煙肉,紅洋蔥碎,蒜蓉,味道好香,好惹味,唔錯.

最後食埋呢個滋潤嘅燕窩燉杏汁鮮奶蛋白,真係飽晒嚕...

金盞花玫瑰花保濕精華液

開始踏入冬季,天氣亦變得乾燥,最緊要加強保濕,呢支保濕精華液,用咗金盞花萃取液,水溶性荷荷巴油,氨基酸加強保濕劑,玫瑰花水.

罌粟子芝麻包

唔想荒廢部麵包機唔用,於是今日就半自動式,用麵包機搓麵團,+人手滾圓搓包再放番入焗盤中,再開麵包機烘焗功能,但之前做咗個中種,放係室溫發酵兩粒鐘再加主麵團,其實唔慳得幾多工夫,祗係測試可行性,明日再試吓麵包組織是否OK?

蟹柳雜菜燒餅

今日我嘅午餐,簡簡單單蟹柳雜菜燒餅.

首烏茶籽洗髮皂

本來想做渲染,點知皂液好快就over trace,結果變成矇矇矓矓分層,今次用咗圓形模,切開之後好似蛋糕咁,不過洗時揸手應該唔係咁好,下次都係唔好用圓模.

蜜糖鄉村裸麥包

準備要做麵包,見到有包裸麥粉未用完,於是就做咗呢款蜜糖鄉村裸麥包,可惜麵包面界花紋唔夠深,影響外觀唔夠好睇,不過同麵包組織和味道無乜關係.


因為用咗17小時低溫中種發酵,所以麵包好柔軟,不過裸麥粉味道唔係個個人都鍾意架.

香蔥火腿蛋餅

今日突然諗起每次去台灣,都會去永和飲豆漿,食蛋餅做早餐,於是即刻上網搵吓蛋餅食譜,下午就開工整,首先搓好麵團,靜置完畢分割成小團,再碾薄成小圓餅,煎熟成餅皮.

再將切碎蔥粒同埋蛋漿撈勻,倒入煎pan內,蓋上餅皮,反轉鋪火腿係面,捲埋切開就食得嘞,因為新鮮現做現食外皮脆又有蛋香,幾好味,不過當餅皮冷卻後,可能會變硬,下次食時要加熱,令佢軟身番先食得.

應節南瓜芝士焗餅

萬聖節就快到,之前有食剩南瓜,所以就索性做咗呢款焗餅,但因為芝士份量唔夠,唯有用淡忌廉補夠,再加埋南瓜蓉,所以芝士味唔夠濃,但味道都OK,希望收到朋友唔好嫌棄就好嘞.

用低溫隔水焗咗50分鐘,終於可以出爐喇.

攤凍再放入雪櫃雪一晚先甩模.

切開睇吓買相唔錯,祗係味道比較淡啲,不過勝在夠健康.

腐竹意米白果糖水

基本上我係唔鍾意食糖水,咁點解會煲糖水呢? 都係因為上次煲腐竹白果粥剩低腐竹,見到話意米都好有益,於是就破例煲少甜糖水,不過原來浸完再煲意米發漲好多,結果好似煲到好杰,似粥多過似糖水,不過費是加水溝稀,始終都係食落自己個肚, 遲啲會再煲意米水,用完腐竹又剩意米,真係循環不息呀.

奇雅籽(Chia Seed)方包

今次用咗奇雅籽(Chia Seed)做方包, Chia Seed係南美野生鼠美草種籽,含有豐富Omega3, 係三文魚3倍,仲有Omega6,用水浸泡後會發漲,外國人用佢作減肥之用,因為食咗後會飽肚,我就用佢做湯種同麵團混合搓包,但係非常黏稠,如果無攪拌機用人手搓包,就好難搓得成團,祗係落咗些少芥花籽油,始終無低溫中種發酵咁鬆軟.

是日午餐-腐竹白果粥+芽菜肉絲炒麵

好耐都無煲過腐竹白果粥,次次煲粥都勁黏底,加上唔太好食粥,但而家發覺原來可以隔晚浸米後,大火煲十分鐘左右,然後熄火焗到臨瞓,再煲滾一次,蓋實到第二日,咁就有煲靚粥食,唔駛黏底之餘,又慳柴火,所以就隔晚煲定呢款粥再加多芽菜肉絲炒麵做晏晝,好過出街食或叫外買好多.

玫瑰花香磚

今日除咗整包整餅外,仲做咗呢款玫瑰花香磚,將佢放係衣櫃,櫃桶,打開就有陣陣香味飄出嚟,今次加咗麝香,白玫瑰,白合3種香精,仲加啲色粉,咁就個樣似玫瑰花靚啲,香味都唔錯,幾好聞,當香味消失後,可以將香磚溶解,再加其他喜歡香精,循環再用,都好環保架.

提子車輪包,芝麻方包&杏仁曲奇

天氣轉涼無咁熱,開始有啲心機整野食,今朝攞咗個"哎呀"車輪包模,焗咗個提子車輪包,剩低麵團就做埋山形芝麻方包.

今次表皮燶咗啲,因為剛剛有朋友來電,結果遲咗出爐.

幸好裡面都好鬆軟,今次用咗17小時低溫發酵,所以麵包組織發得比較理想.

開焗爐焗麵包,於是將之前剩餘脆皮奶黃月餅皮,切成一塊塊,加上原粒杏仁,焗成杏仁曲奇餅,好味又鬆脆,不過唔可以成日食,否則膽固醇實超標.

金縷梅防敏感面霜+椰子油潤膚霜

老友要求我做面霜俾佢,梗係應承無甩拖喇,因為佢皮膚比較容易敏感,所以今次材料主要有金縷梅花水,尿囊素,Vita B5,蘆薈萃取,甘油,玫瑰果油,荷荷巴油等成份.



見到天氣開始轉涼/乾燥,咁就順便做多一樣椰子油潤膚霜,用嚟搽吓手腳,好簡單淨係用咗EV冷壓椰子油,甘油,純水,做好後聞到有淡淡椰子香味,好舒服.

荷葉糯米雞

見到朋友post咗佢嘅製成品係FB,覺得幾有新意,於是自己又試吓整, 首先將2/3糯米+1/3粘米浸軟身,將切碎櫻花蝦爆香,加入冬菇粒,蔥粒,蒜蓉,紅蔥頭,最後加入糯米兜勻,再蒸熟.

將雞身裡外用鹽,玫瑰露,老抽搽勻醃4-5個鐘,再塞入蒸熟糯米飯,外面包上已浸軟身荷葉,蒸約45分鐘度.

蒸好打開荷葉.

切開攞出糯米飯再將雞斬件,就可以開飯嚕...,糯米飯好好味,而雞又剛剛熟,好嫩滑,正!

8號風球下芝麻卷

今次打風吹東南風,正正係房間窗口位置,成晚都好嘈,差唔多無乜瞓過咁,但又唔想日頭再瞓,驚今晚瞓唔著覺,麵包又食晒,所以決定整麵包,我成日貪方便整方包,今日就試吓用麵包機攪麵團加埋用剩老麵,再自己造型,捲好再焗,就變成呢款芝麻卷嘞.

麵包組織都OK,總好過全部用麵包機整,不過我另外有部專門攪麵團用攪拌機,所以應該唔駛用麵包機攪,今次都係試驗性質玩吓.

素瓷飯

糯米飯+滷齋菜(豆百頁,木耳,冬菇絲)=?

就係我今日晏晝,端午節包粽有剩糯米,如果正宗瓷飯餡料唔係好啱我口味,所以就煮咗呢款清淡口味齋菜做餡,用保鮮紙捲實就食得喇,可以做兩條份量,不過我都係食咗一條已經好飽嚕.

紫雲膏

呢款葯膏差不多所有DIY護膚品嘅人都會做,祗不過配方會有啲出入,我呢個配方除咗主要紅條紫草根外,再加埋當歸,白芷一齊浸泡,油品係冷壓芥花籽油,因為如果用古方芝麻油會太肥膩,另外混合時再加乳油木果脂,精油包括有尤加利,茶樹,迷迭香等.

祗係整咗75g度,用完再整,好過整得太多又要派街坊,但又唔係人人鍾意用呢啲自製葯膏呢.

兩用袋

老友10月頭生日, 照慣例人手做份禮物送俾佢,所謂"物輕情意重",最緊要係有心&誠意,希望佢鍾意同感受到.
呢塊防水布買咗好耐,夏天太熱,完全好似動物冬眠咁,直情唔想郁,而家天氣開始稍涼,有啲心機開始動工.

加咗"D"字扣,可以扣上皮帶斜背.

或者除咗皮帶,翻出手挽帶,作手挽用.

入面水點裡布係朋友送俾我作為襯色,我仲係袋口加上厘士花邊.

Banana Walnut Bread

今次試吓用麵包機焗蛋糕,英文食譜叫做"bread",其實係蛋糕至真,但個程式將液體同粉祗係攪咗6分鐘就開始焗,基本上都未完全混合好,我見到即刻再用膠刮人手攪一陣,令所有蛋糕漿混合,焗咗大約1個鐘有多就完成可以出爐,我無跟足食譜落牛油,糖,全部減咗1/3,鬼佬佢哋食得好油,好甜,唔啱我口味.


攤至稍涼後就切開試食,香蕉味好濃,蛋糕都OK,不過始終唔及人手焗蛋糕咁好食,所以麵包機呢...都係適合唔識整麵包/蛋糕人用,但要求就唔可以太高嘞.

價廉物美自家肉絲芽菜炒麵

材料成本+燈油火蠟都係$12-13度,但付出代價係洗煮切,食完仲要洗碗碟,抵唔抵? 真係見人見智.

珍寶和牛漢堡扒

有日去超市買野,見到有隻珍寶和牛漢堡扒賣,係澳洲出品,順手買埋番屋企,但又唔知點食好? 因為真係幾大塊,好少一次食咁大塊肉,今日終於決定煎咗佢,加埋紅洋蔥絲,炒蛋(整奶黃月餅剩),糙米飯,點知一路煎一路出油,煎完後,鑊裡面至少有兩湯匙油咁多,見到都得人驚呀.
終於開餐嘞,睇吓係咪好大塊? 味道呢...我好少食肥牛,因為怕個陣"酥"味,結果梗係食唔落喇,幸好仲有紅洋蔥,蛋,同埋飯食,漢堡扒食唔到一半就放棄,所以以後試新野都要諗過先.