2012年淘寶第一擊-電暖水毯

想買張電毯好耐,但又怕唔安全,1516之際,偶然係淘寶發現呢款電暖水毯,好似安全啲,新年前係旺旺問咗店主好多問題,都未決定買,但經過新年初1-3咁鬼死凍,所以前兩日再同店主議論一下,決定買張試試,今日經快遞就送到嚟.

外面包裝盒


佢嘅原理同暖水袋一樣,將純水注入黑白暖水箱,一邊同暖水毯水管口連接,另一邊插電加熱水,灌注入毯內矽膠暖水管,可以自行調較溫度(最高36度),時間或設定睡覺自動掣式,好處係無電毯危險,但加熱時間要耐啲,唔用要倒出水份,晾曬乾才可以收埋,不過可以放入洗衣機用洗衫袋包裹清洗,其實價錢同電毯差不多

花開富貴年花

昨日好似打扙咁,終於買咗年花喇,百合雖然無舊年咁大朵,但一分錢一分貨,價錢合理,算係咁,好似我而家心態,不再強求百分百完美,係呢度我恭祝大家
龍年財運亨通,身體健康心想事成,萬事如意.

今年最後一糕-瑤柱蘿蔔糕

今朝起身食完早餐即刻開工蒸瑤柱蘿蔔糕, 可能上幾個禮拜做過一次,好似快手好多,11點幾已經蒸完,今次試吓切粗條蘿蔔絲,因為昨日睇到大廚話要切到筷子尾咁粗,加上奄尖大少要求加多孖臘腸,佢鍾意濃味啲,剛蒸好試咗味都唔錯喎.

睇吓蒸完仲仍然見到一絲絲蘿蔔.

獨自一人慶祝生日

以前後生生日就會好期待同朋友一齊去慶祝,後來已經降到祗係會放一日假攤抖吓,唔想生日都做到好似隻狗咁,今年開始想自己一個人靜靜地渡過,唔再攪任何活動,遷就奄尖大少放假,星期日買啲海鮮自己兩個人撐枱腳食,今朝起身見到檯面有一張生日卡,都算佢有心喇.

睇吓都幾靚架,內裡文字就不便公開喇.

今日晏晝就出街食自己鍾意日本定食,仲加埋一客軟殼蟹手卷,不過太肚餓,食晒無影到相,好少一個人食咁多野,不過就好滿足.

仲買咗呢本蛋糕書俾自己做生日禮物添,就算唔整睇吓都幾賞心悅目吖.

健怡芝士蛋糕

本來打算今日大掃除,但起身見到外面天氣仍然潮濕微雨,若果再做大掃除,室內肯定濕上加濕,因此改變計劃延期再做,改為焗蛋糕,將用剩忌廉芝士,加埋浸泡雲尼拉籽橄欖油混合,成為呢個健康版芝士蛋糕.

分段式蒸糕-芋頭糕

今年我改變咗蒸糕策略,唔再好似往年咁一次過蒸晒鹹甜糕,又洗,又煮,又切,係廚房攪足一日,令到自己好攰,反正無諗住送俾人,蒸好唔駛一定等到新年先食,可以當早餐食都得,所以繼前日蒸完桂花紅豆年糕,今日就蒸芋頭糕,下星期再蒸多底蘿蔔糕就可以收爐,每款留番啲過年食就OK.

福字桂花紅豆年糕

上禮拜蒸嘅試驗版桂花紅豆年糕,出乎意料之外,奄尖大少竟然鍾意食,往年祗係應酬式食1-2件就完全唔再食,所以趁昨日得閒就再蒸,因為嫌上次糕比較軟身,所以今次減少水份,並用番烚紅豆嘅水,點知奄尖大少嫌硬身,唔多like添,唉! 真係各人口味都唔同,好難服侍.

日式芝士蛋糕

之前同朋友上深圳廚安居買咗個8吋蛋糕模,今日試攞佢嚟焗日式芝士蛋糕,平時焗開6吋蛋糕,都好驚失敗,好彩都算成功,不過改用另一牌子忌廉芝士,香味唔夠濃郁.

預習新年蒸糕

今年老友想學蒸新年糕點,所以今日提早當預習蒸多一次,分別有鹹蘿蔔糕,甜桂花紅豆年糕.

攤凍試食,仍然可以保持水準,放心讓老友帶走一盤番屋企食.


桂花紅豆年糕都OK, 唔太甜又有好香濃桂花味.


蒸完糕後,就煮咗呢個黑松露菌香草醬海鮮麵做晏晝,一邊食一邊談天說地,寫意生活就係咁簡單.

原味戚風蛋糕

第一次用紙戚風模,諗住送俾朋友好睇啲,但焗完之後發現焦燶蛋糕碎一點點佈滿週圍,諗住甩模,但又黏底,結果蛋糕底甩到凹凸不平,我諗要切到平頂先至可以送俾人,唉!真失敗.

冬日暖包-綠茶豆沙蒸包

我成日都係焗麵包,今日溫故知新,於是就蒸包,今次跟足食譜,點知可能因為天氣凍,無論酵母份量,發酵時間都唔夠,下次都係跟番自己經驗,睇當時情況好過.

包頂裝飾係蔓越乾

豆沙都係自己煮,可以少油少糖,健康啲.

eWarmer-USB保暖用品

係網上見到新出USB保暖用品,係淘寶雖然價錢平啲,加埋運費就唔算底,想試吓係咪真係保暖? 結果我決定係香港拍賣網買.
今日收到後立刻測試,插入USB一陣就感覺到微熱,但今日成18-19度,所以唔知係咪真係保暖? 要等到氣溫降至10度或以下再試先知.

魔鬼牛油蛋糕

我好少整牛油蛋糕,因為要落好多牛油,膽固醇真係要超標,加上唔知點解試過唔同食譜,都做得唔好,但偶而都會想食,所以今日又試整,基本上除咗糕面較燶,都算是最成功一次.

稍為開面火焗多兩分鐘,結果...就變成燶面.唉!

牛油蛋糕切開試食,好香牛油味又夠軟熟,真係好食過街買好多.

再嚟蒸雞飯

今次呢個雞飯係上次台式麻油雞飯改良版,將米酒改用紹興酒,用水溝稀煮飯,果然酒味無咁濃,另外亦減少麻油份量,咁食落就無咁肥膩,呢個版本啱我胃口多啲.

懶人牛奶方包

自從朋友送咗部麵包機俾我之後,經過一段時間,終於搵到適合程式,令到麵包組織接近以前人手搓包,用焗爐焗製成品,為咗減少洗用具,人手操作時間,今次連最後人手造型都摼埋,咁就可以越來越得閒嚕.

切開睇吓麵包組織,有啲氣孔比人手放氣再造型大咗啲,麵包柔軟程度就差不多,以後又可以減少啲人手操作時間嚕....

暖苙苙冬日午餐-牛柳冬菇絲蒸飯+芥蘭苗

近日天氣寒冷,人就越來越唔想郁,好似冬眠咁,無特別攪作,所以寫少好多Blog,今日上晝焗完麵包,就自己郁手整晏晝食,材料新鮮又唔肥膩,好過出街食好多.

牛柳冬菇絲蒸飯+芥蘭苗

是日晏晝-台式麻油雞飯

係網上見到台灣名師煮嘅麻油雞飯,於是又試吓學整,主要用麻油爆香薑,雞塊再加米酒稍為煮熱,再放係洗好米上面,用電飯煲煮好後,再焗10分鐘就食得,係煲飯途中,傳出陣陣酒香,麻油香味,但食落就覺得酒味稍為強烈啲下次要加水溝淡米酒至得,不過我仍然鍾意傳統煲雞飯多啲.

滋潤保濕晚霜

老友用完我做俾佢面霜,佢又想自己DIY,所以今日嚟我屋企學做晚霜,當然材料份量我事前已經預備好,佢祗係跟步驟去做就完成,材料包括有: 玫瑰花浸泡橄欖油,酪梨油,卵磷脂,Vita E,金縷梅花水,海澡萃取液,甘油,伊蘭伊蘭精油等.

是日午餐-鹵水牛踺_牛筋撈麵

今日朋友嚟我屋企學做面霜,諗起佢鍾意食鹵水牛踺,所以隔日整好,今日晏晝就撈蝦子麵+菜,就食得,因為用咗新鮮牛筋,牛踺,所以真係有牛鮮味.

電飯煲-海味煲仔飯

睇落去好似好簡單一煲過,唔駛再煮其他餸,但其實預備工夫都幾多,譬如要早一日浸透江瑤柱,蠔豉,冬菇,再隔水蒸淋,切粒,臘腸亦需要切粒,黃鱔拖水後切絲用蒜蓉,酒爆香,蝦仁去殼切粒,放入飯煲之前,再用鑊爆香所有材料,飯差不多收乾水之前,放入焗,最後加入適量煲仔飯豉油就食得,材料豐富,又夠乾身,好好味呀!

香蕉合桃蛋糕

見到有梅花點香蕉係度,手痕痕就整咗呢款蛋糕,不過呢個食譜同做法唔多掂,下次要搵另外一個食譜至得.
我減咗油,糖,味道OK,不過唔知係咪開過爐門轉盆?唔係幾發得起,質感似"糕".

薰衣草橄欖油護膚霜

轉天氣後,呢排用多咗護膚霜,無論搽手,腳,或沖完涼搽身都要用,所以唯有密密做,仲有做多啲先夠用,今次用材料包括有: EV橄欖油,橄欖脂,Vita E,甘油,薰衣草花水/精油.

慳家之作-自製薑汁酒

以往都係買開現成薑汁酒,貪佢方便,當醃肉,醃魚一次攪掂,不過今年物價貴得驚人,所以慳得就慳喇,而且又無乜難度,祗要將你用開嘅燒酒,或米酒,或紹油,加埋已刨皮薑塊放入攪拌機攪爛,再過濾,倒番入酒樽就OK, 不過放一段時間會有薑沉殿物,用時再搖勻就無問題,至緊要成本平過現成一半.

又一新攪作-雞肝醬

差不多逢肝類我都鍾意食,不過就覺得鵝肝雖然幼滑同香,但食完一小塊已經覺得好肥膩,上星期巡網俾我發現到原來可以自己DIY雞肝醬,立即搵到幾個啱心水食譜,自己再改良吓,今日買咗半斤雞肝番嚟,試吓DIY先.
經過一輪工夫,今次我用半蒸焗方法,終於出爐嚕....,不過食落質感無鵝肝咁滑,粗孩啲,味道就OK唔錯喎.

Baking day-Boston Cream Pie & White Bread

趁今日得閒,焗咗之前好想整波士頓忌廉批,其實即係忌廉蛋糕,祗不過用咗批碟焗蛋糕,用戚風蛋糕體,攤凍後再切開3片,夾入忌廉餡,我做咗一層原味,另一層朱古力,咁就無咁單調.

蛋糕面買相唔靚,因為將多餘忌廉搽上面,再加糖霜灑上去.

不過切開嚟食就真係好好味,我用咗淡忌廉+魚膠片,因為我唔鍾意用甜忌廉(植脂),反式脂肪較多,無咁健康.

除咗焗蛋糕外,仲開埋部麵包機一齊焗白方包,近排試驗後,發覺祗係用機"攪麵團"和"焗"功能,麵包組織都OK,主要係貪唔駛洗咁多工具.

一氣呵成共6款口金包

已經好耐無做過布藝手工,之前買嘅布布,口金架晒咗好耐無郁過,前兩日終於開工,一次做咗6個,準備聖誕或新年禮物送俾朋友,雖然手工麻麻,祗係勝在夠誠意.


背面花紋都有啲唔同,不過就素啲.

是日甜品-元肉紅棗雪耳糖水

主要係想消滅存貨,唯有盡量諗辦法食咗佢,好過要掉,自己煮糖水可以少甜,唔似出面賣糖水,總係覺得好甜,好耐無煲過雪耳,原來都要煲好耐,大概成45分鐘,叫做勉強夠諗,仍然有啲爽口.

防晒保濕日霜

為自己整嘅防晒保濕玫瑰日霜-今次用咗一種新材料,紅景天萃取液,係生長於高山植物,可以防紫外線,當然唔少得有二氧化鈦(防晒),保濕有甘油,Vita B5,仲有玫瑰花浸泡橄欖油,玫瑰花水,玫瑰花精油等等.

因為加咗二氧化鈦,顏色本來好白,於是就加咗少少色素,果然變得靚好多,不過呢啲整色整水野,同面霜質地無乜關係,祗係外觀而已.

健康燕麥糠牛奶方包

呢排主要都係用麵包機攪麵團,加第一次發酵,再攞麵團出嚟人手放氣,再做形,放番入麵包兜內作最後發酵,再按麵包機"焗"功能焗麵包,雖然可能俾人手焗麵包多咗啲時間,但係好處係唔駛洗咁多工具,又唔駛用完麵包攪拌機,又再搬焗爐出嚟焗麵包,但仍然要用中種發酵,咁出嚟麵包組織,同鬆軟程度都差唔多,將要求降低少少,但可以慳水,慳洗潔精,同埋時間洗野,都值得代替人手焗麵包要求.

今次將麵團一分為二,再捲成長條形,將麵包機中間攪拌漿拔走,將長形麵團放回入麵包兜內,按"焗"掣就得喇.

放涼後切開望吓,麵包組織都OK架.