應節柑桔

新年過後見到有柑桔賣,於是決定趁當造就煮柑桔醬,今朝買咗一斤,洗乾淨後將綠艼摘除.

再對半開邊,加水煮約30分鐘

撈起柑桔去核,去囊.

將柑桔皮切碎回煲,加砂糖同埋之前柑桔水一齊煮,要不停攪拌,以免黏底,最好加啲檸檬汁,如果唔係好似淨係得甜味.

煮到好似平時煮果醬濃稠度就適合,然後倒入已消毒玻璃樽內冷卻,放入雪櫃一晚.

今日下午茶點-蒜蓉多士

今日晏晝食得少,諗起雪櫃有方包嘅邊皮,係咁食太UN又厚皮,於是就烘做多士+自製蒜蓉牛油,咁就又脆又好味,正呀!

蒸粉果+芒果奶凍+護膚品

今日朋友仔嚟我屋企學整護膚品,首先一齊下廚DIY,包粉果食晏晝先,今次用兩種唔同粉溝澄麵粉做粉果皮.

呢盤係用澄麵粉溝糯米粉,食落比較淋身.

呢碟用澄麵粉溝生粉,粉果皮比較煙un,有剩麵團搓成銀針粉,結果大家都覺得呢碟好食啲.

除咗蒸粉果,仲有飯後甜品,芒果奶凍,內外兼有芒果,好味道,正呀!

食到飽飽後,終於開工整護膚品喇,總共做咗3款,包括有左邊冷壓椰子油護手霜,中間個支係玫瑰花橄欖脂潤手霜,右邊係雲尼拉橄欖油防晒日霜.

一牛二食

係超市買咗pack鮮牛肉,一個人食份量太多,於是一半煮蕃茄牛肉,另一半做成免治,加埋碎薯仔粒,成為牛肉薯仔餅,咁就可以食兩餐,經濟實惠之選.

叮叮薯片

今日用咗新買微波爐薯片器做試驗,首先將去皮薯仔刨成薄片.


再將薯仔薄片插入薯夾,然後放入微波爐叮.

結果呢....跟說明書設定時間,全部燶晒,變晒深啡色,呢批係第二次做,減少咗一分鐘時間,終於可以入得口,但唔係街買炸薯片嘅口感,薯片乾脆唔係鬆脆,但就有薯仔香味,甜味,適合想健康嘅人食,遲啲試吓叮南瓜, 番薯,再同大家分享.

網購小玩意

我雖然唔係網購迷,但屋企唔係市區,來回車錢都好貴,加上未必可以買到心想嘅物品,但如果係網上可以搜尋下,當然賣家信用同成立時間要小心留意,而且最好價錢唔好太昂貴,以免被人欺騙,或貨不對辦, 今次我又買咗以下呢幾樣,而家比較少係淘寶買野,人民幣升值,加上運費,上門送貨費,真係好抵先會買.

左上剝粟米器,右上微波爐薯片器,左下通渠消潔鈎,右下USB兩用暖手器+手機充電器, 郵費祗係$10.

DIY 護膚品

今朝一口氣做咗呢幾樣護膚品,包括
1) 左邊粉紅色係洋甘菊爐甘石止痕露,材料有洋甘菊花水,甘油,紫草浸泡橄欖油,乳化臘 爐甘石粉,氧化鋅,精油有尤加利,德國洋甘菊
2) 右邊係茉莉檸檬香茅洗面啫哩,材料有茉莉花水, 椰子油起泡劑,無淚起泡劑,Tween80, CDE增稠劑,檸檬香茅精油,令味道清新啲.
3) 前面紅色係紫雲膏, 祗係將之前紫草浸泡橄欖油+蜜臘

柚子蜜戚風蛋糕

新年過後,天氣晴朗又和暖番,於是開工練習吓,焗咗呢個柚子蜜戚風蛋糕,不過攪完蛋糕漿,先諗起未切柚子條,如果唔切碎,分分鐘會沉底,唯有死死地氣用匙羹逐條撈番出嚟,切碎再倒番入去,幸好焗出嚟OK,試食後都幾好味,保持水準喎.

剛焗好出爐,有少少裂紋,不過反轉後呢個係底,所以唔太靚都無乜所謂.

睇吓甩模後反轉個樣都幾掂.


切開蛋糕都幾有彈性,味道唔錯,幾好食又健康,祗係落咗芥花籽油咋.

棄舊迎新

估唔到未過完年就要換新雪櫃,年初五舊雪櫃壞咗攪到全屋插蘇位無電到,電器修理師傅話要換零件(2手)都要成$1400,所以決定買部新好過,希望今次長久啲,呢部機冷凍格係下面,不過入面無間隔位,放野唔係好方便.

2012年淘寶第一擊-電暖水毯

想買張電毯好耐,但又怕唔安全,1516之際,偶然係淘寶發現呢款電暖水毯,好似安全啲,新年前係旺旺問咗店主好多問題,都未決定買,但經過新年初1-3咁鬼死凍,所以前兩日再同店主議論一下,決定買張試試,今日經快遞就送到嚟.

外面包裝盒


佢嘅原理同暖水袋一樣,將純水注入黑白暖水箱,一邊同暖水毯水管口連接,另一邊插電加熱水,灌注入毯內矽膠暖水管,可以自行調較溫度(最高36度),時間或設定睡覺自動掣式,好處係無電毯危險,但加熱時間要耐啲,唔用要倒出水份,晾曬乾才可以收埋,不過可以放入洗衣機用洗衫袋包裹清洗,其實價錢同電毯差不多

花開富貴年花

昨日好似打扙咁,終於買咗年花喇,百合雖然無舊年咁大朵,但一分錢一分貨,價錢合理,算係咁,好似我而家心態,不再強求百分百完美,係呢度我恭祝大家
龍年財運亨通,身體健康心想事成,萬事如意.

今年最後一糕-瑤柱蘿蔔糕

今朝起身食完早餐即刻開工蒸瑤柱蘿蔔糕, 可能上幾個禮拜做過一次,好似快手好多,11點幾已經蒸完,今次試吓切粗條蘿蔔絲,因為昨日睇到大廚話要切到筷子尾咁粗,加上奄尖大少要求加多孖臘腸,佢鍾意濃味啲,剛蒸好試咗味都唔錯喎.

睇吓蒸完仲仍然見到一絲絲蘿蔔.

獨自一人慶祝生日

以前後生生日就會好期待同朋友一齊去慶祝,後來已經降到祗係會放一日假攤抖吓,唔想生日都做到好似隻狗咁,今年開始想自己一個人靜靜地渡過,唔再攪任何活動,遷就奄尖大少放假,星期日買啲海鮮自己兩個人撐枱腳食,今朝起身見到檯面有一張生日卡,都算佢有心喇.

睇吓都幾靚架,內裡文字就不便公開喇.

今日晏晝就出街食自己鍾意日本定食,仲加埋一客軟殼蟹手卷,不過太肚餓,食晒無影到相,好少一個人食咁多野,不過就好滿足.

仲買咗呢本蛋糕書俾自己做生日禮物添,就算唔整睇吓都幾賞心悅目吖.

健怡芝士蛋糕

本來打算今日大掃除,但起身見到外面天氣仍然潮濕微雨,若果再做大掃除,室內肯定濕上加濕,因此改變計劃延期再做,改為焗蛋糕,將用剩忌廉芝士,加埋浸泡雲尼拉籽橄欖油混合,成為呢個健康版芝士蛋糕.

分段式蒸糕-芋頭糕

今年我改變咗蒸糕策略,唔再好似往年咁一次過蒸晒鹹甜糕,又洗,又煮,又切,係廚房攪足一日,令到自己好攰,反正無諗住送俾人,蒸好唔駛一定等到新年先食,可以當早餐食都得,所以繼前日蒸完桂花紅豆年糕,今日就蒸芋頭糕,下星期再蒸多底蘿蔔糕就可以收爐,每款留番啲過年食就OK.

福字桂花紅豆年糕

上禮拜蒸嘅試驗版桂花紅豆年糕,出乎意料之外,奄尖大少竟然鍾意食,往年祗係應酬式食1-2件就完全唔再食,所以趁昨日得閒就再蒸,因為嫌上次糕比較軟身,所以今次減少水份,並用番烚紅豆嘅水,點知奄尖大少嫌硬身,唔多like添,唉! 真係各人口味都唔同,好難服侍.

日式芝士蛋糕

之前同朋友上深圳廚安居買咗個8吋蛋糕模,今日試攞佢嚟焗日式芝士蛋糕,平時焗開6吋蛋糕,都好驚失敗,好彩都算成功,不過改用另一牌子忌廉芝士,香味唔夠濃郁.

預習新年蒸糕

今年老友想學蒸新年糕點,所以今日提早當預習蒸多一次,分別有鹹蘿蔔糕,甜桂花紅豆年糕.

攤凍試食,仍然可以保持水準,放心讓老友帶走一盤番屋企食.


桂花紅豆年糕都OK, 唔太甜又有好香濃桂花味.


蒸完糕後,就煮咗呢個黑松露菌香草醬海鮮麵做晏晝,一邊食一邊談天說地,寫意生活就係咁簡單.

原味戚風蛋糕

第一次用紙戚風模,諗住送俾朋友好睇啲,但焗完之後發現焦燶蛋糕碎一點點佈滿週圍,諗住甩模,但又黏底,結果蛋糕底甩到凹凸不平,我諗要切到平頂先至可以送俾人,唉!真失敗.

冬日暖包-綠茶豆沙蒸包

我成日都係焗麵包,今日溫故知新,於是就蒸包,今次跟足食譜,點知可能因為天氣凍,無論酵母份量,發酵時間都唔夠,下次都係跟番自己經驗,睇當時情況好過.

包頂裝飾係蔓越乾

豆沙都係自己煮,可以少油少糖,健康啲.

eWarmer-USB保暖用品

係網上見到新出USB保暖用品,係淘寶雖然價錢平啲,加埋運費就唔算底,想試吓係咪真係保暖? 結果我決定係香港拍賣網買.
今日收到後立刻測試,插入USB一陣就感覺到微熱,但今日成18-19度,所以唔知係咪真係保暖? 要等到氣溫降至10度或以下再試先知.

魔鬼牛油蛋糕

我好少整牛油蛋糕,因為要落好多牛油,膽固醇真係要超標,加上唔知點解試過唔同食譜,都做得唔好,但偶而都會想食,所以今日又試整,基本上除咗糕面較燶,都算是最成功一次.

稍為開面火焗多兩分鐘,結果...就變成燶面.唉!

牛油蛋糕切開試食,好香牛油味又夠軟熟,真係好食過街買好多.

再嚟蒸雞飯

今次呢個雞飯係上次台式麻油雞飯改良版,將米酒改用紹興酒,用水溝稀煮飯,果然酒味無咁濃,另外亦減少麻油份量,咁食落就無咁肥膩,呢個版本啱我胃口多啲.

懶人牛奶方包

自從朋友送咗部麵包機俾我之後,經過一段時間,終於搵到適合程式,令到麵包組織接近以前人手搓包,用焗爐焗製成品,為咗減少洗用具,人手操作時間,今次連最後人手造型都摼埋,咁就可以越來越得閒嚕.

切開睇吓麵包組織,有啲氣孔比人手放氣再造型大咗啲,麵包柔軟程度就差不多,以後又可以減少啲人手操作時間嚕....