酪梨橄欖油嫩肌皂

見到有好多油存貨,所以就消耗啲,以免擺到過期,今次無落椰子油,用咗棕櫚油,棕核仁油,橄欖油,米糠油,酪梨油,所以皂比較軟身,要厚切,但相對而言,就溫和啲,BB&皮膚敏感人士都啱用.

雞尾包&菠蘿包

呢類港式包,一次唔可以食太多,雖然我已經減糖又減油,今次祗係將上次整剩餡料,皮料做埋啫.

夏日消暑甜品-雜果涼粉

呢排天氣真係好熱,成日都想飲同食啲涼野,但飲太多汽水,食雪糕對健康又唔係咁好,諗起屋企有剩涼粉草,於是冒著炎熱天氣都整咗佢,經過一輪工夫,終於凝固成一盤涼粉嚕,今次參考咗另外一個做法,效果好好多.

上午整攤凍後放入雪櫃凝固,下午已經可以切粒食嚕....

當然要加埋啲新鮮生果,少少糖漿,咁就好好味,食完真係好似無咁熱喎

今日午餐-日式蛋包飯

原來係平平無奇嘅日式咖哩飯,但加咗蛋皮包裹住,同埋唧上茄汁,就變成另外一種食法.

自家製河粉&齋腸

見到好多網友整腸粉之餘,都會整埋河粉,等我又嚟趁吓熱鬧先,今次用咗另外一個食譜,加多咗木薯粉,咁會煙軔啲.

首先蒸熟粉皮攤凍.

再切成粉條撕開條狀.

我就即刻加埋小棠菜,雞絲成為炒河,粉條雖然無街賣咁幼細,但粉質就好軟熟,一啲都唔乾硬.

除咗整河粉,有剩就捲成齋腸,留番明日做早餐,一舉兩得.

夏日時令菜色

今朝去到街市,無論肉檔,菜檔都有免費荷葉送,睇清楚寫住原來明日係小暑,不過咁熱真係唔想煲湯整咁多野,祗係買咗塊新鮮荷葉包住雲耳,冬菇田雞蒸,再加多碟XO醬蒜蓉炒通菜就開得飯嘞..

將雲耳,冬蓉,醃過田雞放入拖過水軟身荷葉內,包裹好再用牙簽拮住反轉放在碟內,就可以攞去蒸嚕....

蒸熟後剪開荷葉頂部加入蔥粒,就可以開飯.

仲有加埋呢碟XO醬蒜蓉炒通菜,就夠晒冶味.

改良少油版-乾炒牛河

乾炒牛河如果係酒樓,飯館食,一定落好多油,食完碟底仲有成層油,所以好少係出面食,不過見到網友有post過改良健康版乾炒牛河,又心郁郁試吓自己整,睇吓效果如何?
材料都係個幾樣,不過關鍵在預先用老抽,豉油,糖混合後再同河粉撈勻醃一陣,等佢入味同埋有色,用極少油炒芽菜,牛肉醃時已加入少量油,所以唔駛用太多油炒,跟住將醃過河粉一齊加入炒埋一齊,唔駛再加油落去炒,因為炒粉本身已經有油免黏,最緊要係鑊一定要夠熱,夠猛火急炒再加些少麻油竟更香.

眨吓眼已經炒好有得食喇,味道都OK喎,偶然放縱吓自己都唔錯架.

夏日甜品-椰汁西米糕

天氣炎熱,又係開始停工製作美食時候,祗不過見到之前買落西米擺係度已經好耐,現成又有其他材料,於是就整咗呢款甜品.泰式做法應該用班蘭葉摺兜,但唔係送俾人食,好似好浪費,班蘭葉若果唔煮過,香味唔會好出,所以祗係用玻璃兜載就算嘞.

其實呢款甜品最晒時間係煮西米,又要焗到透明,又要用凍水或冰水再沖水,去除膠質,令口感爽口啲,今次用咗椰糖漿+粟米粒.

再將椰汁加糖,生粉水煮至杰身,倒上面鋪平雪凍就食得,可惜椰汁漿太少,結果糕面唔夠平滑.

又到包糉時候

今年端午節閏月,所以遲到6月尾先到,天氣已經好熱,考慮咗好耐包唔包糉好呢? 但奄尖大少好少欣賞我整嘅野,除咗蘿蔔糕,同埋糉之外,一年一次唯有都係包喇,不過要開行冷氣嚟做野,都幾唔環保架.

自己包得咁辛苦,當然餡料要豐富啲先可以抵償番人工.

今年已經係第5年包糉,回想番第一次真係難包到呢...包完散晒又從頭再包,結果隻糉好似大雜會咁,所有野撈埋一埋,真係核突到呀...,而家雖然唔算包得好好,至少已經無漏餡,漏米出嚟,叫做過得去,仍然好似以往咁,分開無鹹蛋黃俾奄尖大少,全隻鹹蛋黃嘅俾我兩位老友,半隻鹹蛋黃就係自己同俾阿媽.

至於解開呢隻係最後包嘅糉,將剩餘餡料,多綠豆,少糯米,全部包埋一齊,好似大雜會咁,不過仍然好好味,因為無放入雪櫃冷藏,比較軟滑, 自己試頭啖湯先嚕...

生日海鮮午餐

屋企人生日,決定自己係屋企整海鮮做午餐慶祝,晏晝食可以長啲時間消化,唔駛晚野食完頂住個胃瞓唔到覺,今次全部用蒸,咁就健康又美味,兩者兼得.

上面個隻係琵琶蝦,差不多有成斤重,街市唔係成日有得賣,肉味都好鮮甜.

經過一輪工夫,可以開餐嚕...,包括由右上角開始有清蒸琵琶蝦,薑蔥蒸蟹, 果皮蒸飽魚, 蒜蓉粉絲煎扇貝.

仲有兩條燕星斑, 留番今晚蒸,以免一次食太多消化不良.

芒果3色奶凍

繼上次整完芝麻&綠茶奶凍後,因為買咗成一LT淡忌廉,所以想盡快用完,其次奄尖大少就快生日,佢又唔多like食蛋糕,所以就整咗呢個奶凍代替生日蛋糕俾佢.

綠茶&芝麻奶凍

上午焗麵包,下晝就做甜品,一個人都可以樂在其中.
上面3杯綠茶味,下面3杯芝麻味,不過右手面兩杯份量少啲,預唔啱份量.

椰蓉檳

今個星期有親友來港渡假,會係我屋企住幾日,於是昨日,今日焗定麵包放係雪格,準備做嚟近幾日早餐,昨日焗全麥方包,無乜特別,所以唔pose相喇,今日就焗椰蓉檳,甜包加蛋,加椰汁,應該好食啩.

魚簍型小提袋

今日落雨濕濕,無街去,開工做定準備送俾就快生日嘅老友,外面個層係防水膠布,希望耐用啲喇.

焗住焗香蕉蛋糕

因為屋企人趁特價買咗兩梳蕉,結果擺唔到3日,已經全部變晒梅花點,食都食唔切,唯有攞嚟焗蛋糕,盡快消滅啲蕉.

趁新鮮出爐食,好香蕉味,減咗糖,唔太甜,幾好 !

秘製豉油雞

見到朋友係FBpost整豉油雞,而我自己都好鍾意食,所以問佢攞咗食譜,再改良吓,做法就跟咗阿蘇,即係每5分鐘將雞轉面一次,共4次,最後雞胸,雞背再轉多一次,咁就熟得均勻啲.
可惜隻雞有少少甩皮,不過自己食就無乜所謂,況且我哋唔食雞皮.

攤凍後就斬件,再淋上過濾過雞汁,就可以食嘞.

加多碟菜,就可以開餐嚕...結果碟雞兩個人差不多食晒,証明都唔錯喇.

胡蘿蔔素渲染皂

沖涼皂已經差不多用完,所以就打咗呢批胡蘿蔔素渲染皂, 今次除咗用椰子油,棕櫚油,橄欖油外,仲加多一隻米糠油,而渲染就添加天然胡蘿蔔素粉, 印上不同皂印,等皂化完成後就可以用作洗白白嚕....

潮州粉果

朋友今日嚟探我, 順便幫我攞用信用卡積分,換番嚟有蓋煎pan,真係好感激佢,一場嚟到,於是晏晝就一齊包咗呢個潮州粉果,有得玩有得食,真係開心.

就係呢個不锈鋼有蓋煎pan, 我係一田見過公價要賣成1,XXX, 而家朋友用佢積分換俾我,真係好感激佢.

呢個粉果食落都唔錯,祗係計錯水份,要後加生粉,木薯粉,結果蒸好後,粉果皮比較煙UN咗.

2人撐枱腳-海鮮餐

因為奄尖大少攞咗幾日大假抖吓,加上我又收到啲不勞而獲嘅錢,所以決定好好地大刷一餐,出去食淨係一碟叉燒飯都成$3X,而家出面食真係貴到離譜,所以就由我呢個買手負責買海鮮,而奄尖大少就負責做大廚.

原材料包括有老虎蝦,南非飽魚.

仲有本地龍蝦

經過奄尖大少一輪烹調工夫後,就成為以下呢幾碟, 蒜蓉蒸龍蝦,陳皮蒸飽魚,豉油王煎蝦碌,煎倉魚,仲有未蒸嘅班腩,留番今晚食,因為一次唔食得咁多野,所以採取分段食法.

另外仲買咗現成嘅潮州滷水鵝腎,豬脷,豆腐,我諗一餐一定食唔晒,可能要食多兩餐先可以清貨.

叮叮蝦米腸

今朝天氣好差,打完皂後都唔知想整乜做晏晝好,突然想食蝦米腸,但又唔想蒸拉布腸咁複雜,於是就試吓用微波爐叮叮蝦米腸, 但微波爐膠盒底最好墊張微波爐保鮮紙再掃油,會容易攞起同埋捲,否則要落好多油係盒底,唔係咁健康.

落晒蔥粒,蝦米,所以有一條係齋腸.

加埋甜豉油,芝麻,甜醬就食得嚕...,叮叮腸粉質感同街賣腸粉差不多,但無拉布腸咁薄,柔滑.