近日手作製成品

呢排頻頻落雨,如果無特別事,都係留係屋企好過,於是又搬出荒廢已久布料出嚟,做咗以下3款製成品,包括有:
同學送十字繡企鵝手提包

內籠加咗兩個插卡片袋

俄B3折口金包,好難就到公仔在中間

另一面公仔祗能在側面

中層口金架超難上,背面係平面,祗能靠估去插洞,足足拮咗成3粒鐘先完成3邊.

最後呢個係當魚兒愛上貓鎮匙包

麵包機焗熱狗包

新買咗一個可以放入麵包機桶內矽膠熱狗包模,今日就試吓用,但效果唔太理想,因為麵包機發熱線係環狀,所以麵包底面都無色,攪到要用焗爐再加色,順便將剩餘麵團分成兩個小圓包,用麵包機焗,反而仲好過熱狗包添.

種蔥

屋企有人鍾意種植物,我提議不如種些實用又食得落肚植物,例如..蔥,果然好快有收成,可以隨時要就摘嚟用,夠晒新鮮夾慳錢.

夏日DIY護膚品出爐

夏天終於來臨,唔單止衣服要換季,連護膚品都要換清爽些,中間支裝係杏仁橄欖卸妝油,加入杏仁粉有輕鬆磨砂作用.
從左至右,茉莉橄欖油護手霜,成份包括有橄欖油,卵燐脂,甘油,茉莉花水,而中間係金盞花卵麟脂晚霜,成份包括有荷荷巴油,甜杏仁油,金盞花水,Vita E,甘油等等,最後右邊係金盞花防曬日霜,成份包括有自家浸金盞花浸泡橄欖油,甘油,二氧化鈦,金盞花有消炎殺菌功效,呢度可以到秋天嚕...

魷魚冬菇肉餅

醉翁之意不在酒,其實主要試吓麵條機絞肉配件,有3個不同刀頭,今次用中等個隻,屋企某人話要將魷魚,冬菇掉埋落去一齊絞,但魷魚乾纖維太韌,繞住刀頭,好彩無燒機啫, 但絞得太碎,食落無咬口,無咁好食.

又嚟自製pizza

係上次用剩材料,趁開爐焗麵包,順便整埋當晏晝,不過今次無用高溫石板,改用批碟,貪可以放多些材料,仲勁落芝士,遮到實晒,密不透風添,但批底唔夠上次用石板焗咁脆.

山型全麥方包-天酵種

仍然用天然酵母酵種(天酵種),喜歡麵包組織有質感,真係好難再用番乾酵母,難怪用開天酵種網友話係條不歸路,而家明白點解,我多謝送咗天然酵母俾我嘅老友,如果唔係,我未必會開始用.我用開17小時低溫發酵方法,所以又唔覺得幾麻煩咋,都係用兩日,第一日係雪櫃倒出要用酵種一半份量,另外一半份量加粉,水或少少糖,咁酵種會生猛些,放係室溫3-4個鐘後,再加入其他材料打成麵團,室溫發酵約2-3個鐘,放番入雪櫃一晚,第二日攞麵團出嚟,擺係室溫回暖約兩個鐘,整形作最後發酵至約1.5-2倍,放入焗爐焗就攪掂,所以唔覺得咁難.

小饅頭-麵條機

繼續要試用麵條機其他用途同模具,亦同時用埋新買矽膠蒸籠墊

麵團第一次壓出嚟好粗糙

所以再壓多一次先比較理想

蒸好試食都可以,但無人手壓皮捲麵咁鬆軟,而且外觀唔靚,而矽膠蒸籠墊就非常好,無膠味,又真係唔黏底,無買錯.

New York Cheese Cake

蕃茄肉醬意粉-自製意粉

今日主要同部新麵條機開光,祗係做咗一半份量,怕唔得,不過原來真係好容易用,將麵粉倒入攪拌箱內,再沿蓋邊慢慢加入蛋液,水,少少油,3-4分鐘停機.

再等1-2分鐘後按壓麵掣就開始見到麵條出,機下面田四方空格會有風出,用作吹乾麵條,不過我仍然不停加生粉,令意粉唔好黏埋一齊.

最後麵條出晒就按關掣熄機,但拆開清洗時出麵條洞仲有好大舊麵團,下次記得攞番出嚟用刀切成麵條,否則會好浪費.

麵條比較硬身,要煮成8分鐘以上,下次可能要改用細啲麵條模,加埋之前蕃茄肉醬食,麵條夠煙韌,好味,以後可以隨時整不同麵食嚕....

又嚟淘寶網購集運

自從上次嘗試集運成功後,今次大膽咗,同6個不同賣家買野,5樣都係國內包郵費,再集運到香港,主打係部自製麵條機+絞肉配件,另附10個麵條模,要慢慢暸解後,再摘日開工.

星野天角然酵種-方包

近排成日整鄉村包,所以今日就焗番個方包,不過係用天然酵母發酵種,所以麵包組織會韌啲,有咬口,唔係軟熟口感.

今日午餐-自製pizza

早前買咗入爐高溫石板,同埋pizza鏟,加埋前兩日煮好蕃茄醬,自不然要整個pizza試吓,今次係做薄餅底,有1/4用香草醬做底,因為有人唔食蕃茄醬,新鮮出爐,脆卜卜好食.

莓莓果醬(藍莓+士多啤梨)

上次整雜莓果醬差不多食晒,所以又要再補充,今次係藍莓+士多啤梨,百分百果肉,天然果膠,無加任何色素,香精,人造糖膠,食得放心.

蜜糖桂花杞子葛粉糕

得閒又要滅吓粉,不過葛粉比較削身,無乜彈性,勝在夠滑,各人口味不同,好唔好食,就真係見人見智.

今日一人午餐-芝士蕃茄肉醬意粉粒

朋友送咗包意粉粒俾我試食,好似粒米咁,專登煮個蕃茄肉醬嚟食,用3種唔同蕃茄慢煮成3粒鐘,包括有新鮮蕃茄,罐頭去皮蕃茄,油浸蕃茄乾,咁令到蕃茄味濃郁些,再加芝士焗,好食些.

今日飯後甜品-芒果奶凍

今日老同學到訪,於是趁芒果熱賣中,就整咗呢款甜品一齊食,好味!

康寧煲焗鄉村包

原理類似免搓揉麵包,麵包內部較為濕潤,好處係唔駛在焗爐另外製造蒸汽.

祗有內餡法棍

以為用咗高溫石板,效果會好啲,但奈何焗爐太細,麵包外皮始終唔得,幸好麵包內部組織都唔錯.

淘寶網購

而家係淘寶買野,唔好淨係見到貨品價格平就買,仲要計埋運費,今次得到朋友介紹用開集運,同埋詳細解釋流程,於是就膽粗粗,自己試吓買3個不同地方貨品,再用集運,非常成功,祗係比用直運到香港多兩日時間,但價錢...就平好多,不過可惜係祗有一個係國內包郵,另外兩個都要俾國內運費,好彩唔算貴,買到心頭好就好了.

五穀雜糧鄉村包

今次加入五穀雜糧粉,除咗可以增加膳食纖維外,亦會增加麵包香味.

今日下午茶點-焦糖杏仁蛋糕卷

今日一早又開始落雨，令人好鬱悶，係雪柜見到有盒就快過期淡忌廉，於是決定整呢個焦糖忌廉杏仁蛋糕卷，除咗蛋糕內加咗杏仁粉，焦糖忌廉內亦加入焗香打碎杏仁粒，所以食落好香，不過下次蛋糕糖份要再減，覺得稍甜啲。

布藝-小配飾

春雨綿綿,無特別事都係留係屋企好過,搵番老友送嘅材料包,做咗呢個可以作衣服裝飾或吊飾用配件.

繼續鄉村包

為咗令奄尖大少不會斷糧無早餐,出街食埋唔健康麵包,於是繼續整呢款包,不過次次做法都有啲唔同,今次係麥芽糖水同棵麥粉,高粉,全麥粉攪拌成團約4小時後再加酵種,呢個方法叫浸粉,係由日本麵包書睇番嚟,而且縮短室溫時間一個鐘,令麵團無發到咁高放入雪櫃15小時,室溫回暖兩小時後再整形個半鐘,不過出嚟效果又同前幾次差別不大喎.

13小時全麥方包

經過漫長發酵時間,由早上7點幾攪到晚野成8點,終於有包食喇,主要原因我想麵包組織綿密啲,減咗1/3酵種,延長發酵時間,果然效果係好好多,不過肚餓就唔好用呢種方法喇,否則餓死都未有得食,

再嚟柑橘果醬

見到生果檔仲有柑橘賣,於是買多兩磅番嚟煮,不過今次酸些,無上次柑橘咁甜,無添加任何水份,100%果肉,果皮同糖,少甜,準備當手信送俾朋友.

啡色西樵大餅?

 其實係棵麥全麥包,用埋天然酵母酵種,經過我不斷嘗試改良,參考其他高手網誌後,
1) 今次攪麵團時間縮短約7-8分鐘,水份亦成70%,跟住室溫每半小時向四邊折疊5-6次,室溫再放一個鐘,放番雪櫃一晚
2) 朝早攞番出嚟回暖兩個鐘,可惜麵團勁黏手,就算鋪布都黏實,最後求其灑上黍米粉放入爐
3) 石春同埋焗盤預早加熱至250度,放入麵團後,立即倒入200g暖水,10分鐘後移出石春焗盤,再將麵團焗盤移上中層,降低爐火至220度,焗多10分鐘就得嘞.
都係要快些買番個滕藍發酵先,今次算做得比較好,睇吓包肉啲大洞洞,好濕潤軟熟,同歐陸包有9成接近,亦令到外皮薄脆啲,連屋企奄尖人都話今次幾好食, 一切開已經食咗1/4個,明朝仲帶埋返工當早餐食添,真係捧場.

格仔餅_預伴粉

朋友俾咗盒pancake/waffle預伴粉我,於是趁今日得閒開機整吓,今次無落糖,同埋祗係落咗少少芥花籽油,夠晒健康.

小法包

小法包-不枉我專程去買特製法包粉,加埋天然酵母培養酵種,亦都有參考其他法包高手網誌,集各家之大乘,呢次算係比較滿意喇.

雜莓果醬

 剛剛果醬食完,難得一見有桑椹賣,所以就索性買埋草莓,藍莓混合一齊,做咗呢樽雜莓果醬.

山形土司-白神山酵母

今次試用朋友送俾我另外一隻日本天然酵母,雖然發酵時間比平時長,但焗好後外皮脆到裂開,而麵包肉好軟熟,所以即刻整份腿蛋治,作為下午茶,不過仍有不足係心急,排唔晒氣,結果氣孔大咗些.另外半份我用咗嚟培養酵種,下次再用.

又嚟鄉村包(混合酵母)

係咪大家都有啲悶呢? 無法喇,因為暫時得呢款麵包奄尖大少先肯捧場,唯有整呢款囉,不過今次因為見到天然酵母威力開始減弱,於是加咗少少速發酵母,加快發酵時間,但食唔出分別嘅.