白汁三文魚帶子意粉 & 椰汁馬豆糕

今日朋友嚟我家,學做DIY護膚品,順便一齊食晏,為咗節省時間,所以就由佢負責帶沙律菜嚟,而我就負責煮意粉,佢又唔鍾意蕃茄汁,所以我就煮咗呢款白汁三文魚帶子意粉,跟住甜品就係前幾日整嘅椰汁馬豆糕,真係食到好飽呀.

用天然酵母蒸饅頭

近排開始改用天然酵母蒸饅頭,雖然相對發酵時間長咗,但比較用速酵/泡打粉好食好多,而且又健康,等待都係值得嘅.

當芒果成熟時

朋友特別於網上訂購了兩相台灣愛文芒果,剛空運到香港,送了4個俾我食,我真係有口福喇.

大吃大喝的日子

我平時飲食都好健康, 盡量會少油,少糖,少鹽,蔬菜/水果會多食,但偶而有時都會想放縱一下,今日就約咗朋友一齊去食lunch buffet, 呢間之前食過幾次,食物質素有一定水準,今次都保持到水準,實在好少一次性食咁多野落肚,結果...今晚飯就唔駛預我喇.

夏日消暑甜品-芒果椰汁西米撈

天時暑熱,始終都要食冰凍甜品先可以解暑.

希望在明天

買呢張卡材料包時,係諗住送俾一個朋友,作為幫佢打氣加油,今日食完早餐就立刻開工,結果都係要用咗成5個幾鐘先完成,不過見到製成品,都覺得唔錯,希望朋友收到會喜歡喇.

 可以作為掛飾之用

DIY 立體生日卡

係上次上堂後順手買嘅材料包,奄尖大少就快生日,於是今日開工,順便當練習,呢張卡size細啲,加上物件又細而多,真係剪到我頭暈暈,而且所用時間都多好多,幸好完成後作品都唔錯,可以送到俾人嘅.

自製立體手工藝卡

老友買咗團購去學整立體手工藝卡,上堂前自己揀卡款做,我失策揀咗呢張好多又細物件,本來上堂包一張卡材料,但呢款複雜又大張要加多$20, 短短兩個鐘祗完成咗一半,於是將剩餘部份帶回家繼續做,終於今日有時間完成埋喇,都要用多成2個半鐘,不過成品真係幾靚,日本紙無論印刷,紙質都好好,我放學後因為憑收據可以買滿$100減$20,於是買咗兩份材料包,遲啲再做過.

 加埋絲帶可以作掛飾用

 呢款係我老友做嘅,都好靚架

星星後餘波

前排播完韓劇"星星"後,好多人茶餘飯後都有講炸雞+啤酒,我雖然無中毒,亦唔飲得酒精類飲品,但行過附近新開759店舖,見到有不同味道炸雞塊,而且有7折,於是就買咗一包有檸檬味炸雞塊試下,我用焗爐焗番脆,無再用油炸,但點呢個泰國雞醬食都好好味呀,偶一為之,有時都放縱下自己喇.哈哈!

新玩意-煎蛋卷機

朋友送嘅蛋卷機,今日就嚟開張試用下,唔難用,製成品都OK,不過可能祗係落咗一隻蛋,所以唔會自動升出嚟,而且用完要洗個蛋桶,都幾麻煩,如果祗係單煎蛋,不如開鑊仲快手,如果要俾錢買,就可以慳番啲錢,覺得唔太實用.

提早包粽

原本想遷就同老友今個星期日約會,順便送啲粽俾佢,點知今日成日黃雨+雷暴警告,約會要改期,呢啲叫做人算不如天算,我今年改咗糯米/綠豆比例,變成綠豆/糯米係2:1,食落無咁滯,昨日解開試食都唔錯喎.

今日晏晝-菠菜煙肉芝士蛋批

昨日晚餐食剩菠菜,如果今日晏晝又再食,好悶下,諗起西菜中嘅呢味都都唔錯喎,於是就攪攪新意思,我講嘅咪就係菠菜煙肉芝士蛋批,我加咗脆麵包粒做底,代替批皮,點知以為批碟免黏,唔駛搽油,其實係...錯嘅,結果焗完黏到呢...,幸好味道唔錯,都幾好食.

自家種沙律生菜有收成喇!

其實種植真係需要好多心血/時間,才可以有收成,都係多得我家農夫嘅恆心同堅持.

生榨粟米汁

味道微腥,不過有鮮甜味,都OK喎.

時令芒果金奇異果醬

唔知點解今年芒果不算太多且偏貴,我呢3個係超市買,已經放係米桶成3日,頭部份已開始有黑點, 所以雖然未熟透都要整,因此煮完後無乜芒果香味.

另類甜品-冰糖燉香蕉止咳

係網上見到話冰糖燉香蕉,可以止咳,反正現成屋企有蕉,於是燉嚟試下食,祗需要十零廿分鐘就可以. 睇下有無效先?

今日晏晝-一波多折菠菜水餃

事緣幾個禮拜前去超市買野,順便買盒水餃當晏晝食,但打開見到細隻又少餡,價錢都唔平,於是趁買餸時,順便買些水餃皮,諗住自己包,點知又唔記得淖熟椰菜切絲先同免治豬肉混合,結果水餃包唔成,加蛋/粉,變咗椰菜燒餅,再跟住開始傷風感冒,咳到得番半條命,更加唔會包水餃,今日精神好番啲,無咳得咁利害,於是係雪櫃內抄番包水餃皮出嚟,竟然無變壞,於是就將剩下菠菜淖熟,搾乾水切碎加入免治豬肉內,當晏晝食,又大隻又多餡,成本都係$15之內,祗要有時間,肯郁下手,真係抵好多.

神奇止咳燉洋蔥汁

兩星期前我傷風感冒後,咳到甩肺,係網上睇到有人推介蒸/燉洋蔥汁可以止咳,於是即管試下,方法好簡單,將一個洋蔥去衣後切片/切絲,蒸燉30-40分鐘,隔出汁液飲,唔駛加水,我就索性切碎放入燉盅,再用電壓煲燉一個鐘,盡量壓出多些汁液.而洋蔥渣唔食,味道清甜,無辛辣味,幾易入口,我飲咗第一次,兩個鐘後已經停止咳嗽,但晚上仍然有咳,於是昨日又燉嚟飲,全日都無咳過,見仲有一個洋蔥,今日飲埋應該唔駛再飲喇,其實原因係洋蔥含有豐富硫代亞硫酸鹽（thiosulfinate）及檞黃素（quercetin),都係對氣管炎有幫助,下次大家遇到同樣情形,可以不妨一試.

蕃茄牛肉粥

每當我食呢款粥時,即係代表我唔舒服,我平時已經係氣管敏感,尤其當轉季時,多數會中招,今年都唔例外,上星期日開始傷風感冒,勁咳,到今個星期叫做好些,但仍然咳/多痰,加上食埋醫生開嘅藥,完全無胃口,呢個時候我就多數煮呢款粥食,因為味道清淡,酸甜味,開胃些.

綠田園天台近貌

我家農夫由開始小量種植白菜仔,菜芯,但屢屢被雀仔啄食,加上無落農藥,結果引致蟲患,成日要捉蟲,後來佢不斷嘗試加防備設施,現在已漸入佳景,於是擴大種植區域,再加種生菜等其他種類.

為咗防止雀仔啄食,農夫鋪上透明膠紙,鑽小洞,再加竹仔

沙律生菜

 牛油生菜

 菜芯苗

芫茜

 出花老蔥,農夫話要留番做種喎

是日晏晝-簡簡單單自家叉燒蛋炒飯

由舊年下半年開始,我已經絕少去茶餐廳食晏,因為覺得越來越貴,成$4X-$5X,祗係一個例湯或飲品,加一碟頭飯,我寧願自己晒些功夫自己整,好似呢碟叉燒蛋炒飯,成本約$12,已經食到飽飽,祗係要自己洗切同洗碗碟啫,我寧願自己郁下手,慳番十零廿元好過.

今日晏晝-意想不到燒餅

原本今日晏晝想包水餃食，點知一時忘記將椰菜絲淖軟身再同餡料混合，結果包咗兩隻已經投降，最後將燒餅粉，蛋混埋一齊，煎燒餅食就算，隨遇而安好了。

又嚟蒸蘿蔔糕

原因係朋友俾咗另一個蘿蔔糕食譜我,水/粉量比例不同,所以我想比較一下,佢呢個食譜係將粘米粉/栗粉混合後,當煮滾蘿蔔絲後熄火,將臘味,蝦米加入後再灑粉撈勻,我擔心粉漿灑入不均勻,結果我寧願用水先開粉,而當煮蘿蔔絲時,再扣回開粉漿水份,但唔知結果如何? 因為明日攤凍後切開先知,今次我無加冬菇,因為話加咗會容易變壞,我又試下係咪先.

有心人送自家種有機菜

其實可以日日都係green day, 今朝一早收到有心人送嘅自家種油麥菜/西蘭花,新鮮真係零舍不同,呢度可以夠食兩/三餐,呢排菜價咁貴,真係慳番唔少, Good!

柑桔果醬

過年後生果檔通常都會有柑桔賣,我喜歡柑桔清新味道,所以每年都會煮果醬,可以搽麵包,焗蛋糕或麵包,什至乎沖水飲都好美味架.

恭賀新禧

今年因為天氣暖和,今日年初一已經花開富貴,開得非常燦爛,願各位馬到功成,身體健康,萬事如意!

二人撐檯腳團年飯

因為家人有啲要番工,有啲要上學,所以團年飯上星期日已經提早食咗,但我家主人仍然希望就算兩個人,都要食啲傳統餸菜,所以我就預早準備,比平時豐富些,包括瑤柱炒豆苗,海參蠔豉冬菇炆廋肉,香蔥蒜蓉乾煎蝦碌,其實仲有花旗參廋肉燉湯,不過未食飯之前已經飲咗,所以不在相片內.

一年一度新年蒸糕

我從未新年係街買糕,未結婚前阿媽會蒸糕,結婚後自己蒸,雖然質感/味道可能不如買番嚟,但肯定真才實料,無添加劑,食得放心,但蘿蔔糕呢...因我家大人要求用手切,佢話比較刨絲可以保留蘿蔔甜味,同食到一絲絲蘿蔔絲,一年一次,雖然比較辛苦,佢肯捧場,就都照切喇.
都係傳統三種糕,包括芋頭糕,瑤柱蘿蔔糕,黑糖薑汁年糕

彈牙馬蹄糕預習

以前蒸馬蹄糕,以為馬蹄粉漿一倒入糖水中,變成透明,就倒落糕盤蒸,所以係好淋身,唔好食,但舊年搵到一個宣稱彈牙馬蹄糕食譜,可能我攪粉漿時間唔夠耐,唔係次次都彈牙,今年捲土重來,提早蒸俾兩隻白老鼠(我老友)試食,實行較定時間掣攪足規定時間,但真係好攰,因為糕黏力太大,攤凍試食後都算幾彈牙,唔錯.

熊貓曲奇

平時我好少整曲奇,嫌落太多牛油無益,偶然係淘寶見到呢套熊貓曲奇模,好得意,於是淘咗佢番嚟,今日開光試下整,結果都唔錯喎,雖然功夫多些,不過唔知幾時先會做下次? 因為真係唔多好食曲奇.

麵包布甸

我每日都食麵包,但麵包皮都比較硬,我好多時就會烘成多士,或煎西多方法食埋,今日就用嚟做甜品,首先將麵包皮烘乾搽牛油,再切粒放在焗盅上,提子乾+玉桂粉放在麵包粒上,蛋/奶/糖/淡忌廉打勻後過篩倒入焗盅內,隔水焗約40分鐘左右就食得,都幾容易做,雖然味道不錯,但不是我杯茶.

2014年新攪作-香草蒜蓉豬肉腸

2014年剛開始,第一炮新攪作就係嘗試整香腸,其實之前用豬腸衣試做過廣東式臘腸,可惜調教味道不對,腸衣太韌,又晒得太乾,所以費事post上嚟獻醜,今次再買過羊腸衣,試做西式香腸,灌完腸後,放入雪櫃內,風乾一個鐘再細火蒸熟,味道都幾好,但仍然有幾樣野要改良,由於無落肥肉,雖然有加粟粉,麥皮碎,仍然削身,其次豬肉質地唔夠軟滑,下次可能再加蛋液,令佢潤滑些,或者試做雞肉腸,聽講肉質好過豬肉.
上圖係灌好生腸,下圖係蒸熟個樣.

黑糖桂花杞子海珊瑚糖水

呢幾日天氣寒冷又乾燥,諗起好耐之前朋友送嘅海珊瑚(海燕窩),就攞嚟浸軟後加黑糖,桂花,杞子煮糖水,滋潤下,而且海珊瑚膠原蛋白豐富,至啱女士們食.

玫瑰士多啤梨果醬

果醬差不多食完,想偷懶買現成就算,但見到果醬糖漿比例頗重,而且唔會百分百生果,結果決定都係勤力些去生果檔買咗兩盒$25士多啤梨共500g自己煮,昨日將士多啤梨洗淨切丁用沙糖醃一晚,今朝開工,將乾玫瑰花蕾浸軟身後,切去花托,籽唔要,花瓣切碎一齊煮,總共有兩樽.

意大利聖誕麵包-Panettone

我每年都會做一次,兩個月前已經開始用Rum酒浸雜乾果,焗好後酒味會消失,剩低香氣.

切開見到麵包好多乾果,好味.

香草雜果仁碎包

朋友送手信(香草雜果仁碎), 本用作加橄欖油/醋點包食,我就用嚟整包,味道唔錯.

紅酒桂圓包

我copy台灣名店一款麵包食譜,但無跟足發酵方法,因為幾麻煩,前後至少3日,祗係做咗液種冷藏一日就算,除咗桂圓,合桃外,又另外加添杞子,葡萄乾,原本麵包質感似歐陸包,皮脆肉韌,我懶得用鐵鍋蓋,加蒸汽,所以質感係軟熟,食落有淡淡紅酒香味,幾得意.