一份麵團兩款包

昨日打好麵團,仍然用天酵液種,喂完粉兩個鐘頭後就打麵團,再室溫發酵兩個鐘,放番入雪櫃內,繼續低溫發酵12個鐘,今朝室溫解凍後就整形做兩款包,咁就無咁單調. 玉桂提子卷+提子餐包

種瓜得瓜

經過我家農夫辛勤淋水,施肥,為怕有化學物質渗入植物內, 仲親自堆肥,結果終於開始有收成嘞,相片內西瓜三兄弟,左邊係黃肉西瓜,中間係黑美人,右邊連農夫都唔清楚係乜瓜,祗係怕分薄養份,摘咗落嚟先,跟住都會繼續有收成,不止呢幾個瓜嘅, 真替佢開心.

是日午餐-一人前日式溫泉蛋海帶雞卷拉麵

早兩日行過凍肉鋪見到$11/3隻雞脾,於是買番嚟做咗滷水雞卷,今日再用鰹魚粉+味醂做湯底,煮札日本拉麵,再加料落溫泉蛋同海帶,咁就成為日式拉麵,如果出街食又要成$5X,有時間我就寧願自己煮好過喇.

黑椒香草薯片

趁開焗爐焗麵包,順便試下朋友早前送刨絲/片器,用嚟刨薯片,但唔知係咪初用,發覺好難控制,而且刀頭不利,未買我就建議唔好買,費事晒錢,而薯片就厚薄不均勻,又做唔到waffle格仔效果,加上我重手落多咗黑椒粉,變成咗辣辣薯片添.

曬黑嘅土司(米飯麴酵)

早排買咗包米麴,自製豉油麴,係網上見到有網友話可以加飯,糖,水發酵成酵液焗麵包,既然有存貨,梗係要試下,發了30個鐘後,仍然好少泡泡,於是用保鮮紙遮蓋樽口,再用牙簽拮洞,果然6個鐘後已活躍好多,於是立即隔出汁液打麵團,發酵兩個鐘後就放入雪櫃,繼續低溫發酵, 今朝先攞出嚟室溫解凍,約過了一個鐘後就分割麵團作最後發酵,需時都要成兩個鐘,用番平時土司模,焗爐溫度/時間相同,點知焗好打開蓋,完全深啡色,真係唔明係咪因為米飯麴酵液原故,攤凍後明日食之前片去外皮好了,有啲無奈,唉!

米飯麴發酵情形,不過我無再續養,都係用番原本星野液種算嘞.

 睇下幾深啡,旁邊仲爆皮添

蒸饅頭 (星野酵母液種)

今日3號風球高掛,橫風橫雨,不宜外出,留係屋企,無所事事,於是攞出已喂粉星野酵母液種蒸饅頭,但唔明點解用頭尾麵團搓成個舊,會皺咗皮,其他就無事喎.

自家種有機西瓜

農夫一放工返嚟,見橫風橫雨,即刻當機立斷,上天台摘咗呢個西瓜,本來應該可以再大些先摘嘅,奈何風雨無情呢.

跟風-煉奶牛奶包

成日係網上都見有人整,我又嚟跟風試下先,一出爐已經好香,食落都好軟熟,但背後材料...好魔鬼,偶然食下都無妨嘅(自我安慰中).

泡製豉油麴

聽講日本好流行用鹽麴/豉油麴代替普通調味料,話有好多益處,之前朋友都俾咗一些自製鹽麴我,但奈何健康問題,我好少用鹽,反而多用低鹽豉油,昨日行過City叔婆,見到有米麴,忍唔住買咗一包,今日就跟袋上做法,試下整自家低鹽豉油麴先,遲些會試下用米麴嚟做天然酵母焗麵包,睇網上好多人都話得.

忌廉排包

今日突然間好想食排包,於是即刻焗,唔知係咪天氣太熱,人都傻咗添,我無落牛油,所以無咁香味,但都好食喎.

自家種有機通菜

我家農夫近日新品種,就係種有機通菜,菜梗比較幼嫩,因為佢話太老唔好食喎.

一包兩吃

昨晚飯後,無端端突然想食菜肉包,於是即刻係雪櫃攞出天酵喂粉,又將冰格免治豬肉搬回普通冷藏格解凍,今朝食完早餐,就開始攪大龍鳳,因為天酵發得比較慢,終於食晏前完成,我將一部份做生煎包,另一半就蒸菜肉包,生煎包呢..剛煎好即食,包底夠脆,好香口,而蒸菜肉包就夠鬆軟,不同口味,咁就可以滿足到自己,其實生活有時真係可以好簡單就快樂.

今日飯後甜品-夏威夷果仁雲尼拉雪糕拌芒果粒

呢排頻頻整甜品,除咗天氣熱想食冰凍甜品外,就係之前買咗1 LTE淡忌廉,開咗要盡快用完,否則過期就晒咗,今次模仿H字頭雪糕,加咗烘香夏威夷果仁碎,真係好好味,雖然無H字頭雪糕咁滑,但係無加人工雪糕乳化劑同增稠劑,就可以食得放心.

白汁三文魚帶子意粉 & 椰汁馬豆糕

今日朋友嚟我家,學做DIY護膚品,順便一齊食晏,為咗節省時間,所以就由佢負責帶沙律菜嚟,而我就負責煮意粉,佢又唔鍾意蕃茄汁,所以我就煮咗呢款白汁三文魚帶子意粉,跟住甜品就係前幾日整嘅椰汁馬豆糕,真係食到好飽呀.

用天然酵母蒸饅頭

近排開始改用天然酵母蒸饅頭,雖然相對發酵時間長咗,但比較用速酵/泡打粉好食好多,而且又健康,等待都係值得嘅.

當芒果成熟時

朋友特別於網上訂購了兩相台灣愛文芒果,剛空運到香港,送了4個俾我食,我真係有口福喇.

大吃大喝的日子

我平時飲食都好健康, 盡量會少油,少糖,少鹽,蔬菜/水果會多食,但偶而有時都會想放縱一下,今日就約咗朋友一齊去食lunch buffet, 呢間之前食過幾次,食物質素有一定水準,今次都保持到水準,實在好少一次性食咁多野落肚,結果...今晚飯就唔駛預我喇.

夏日消暑甜品-芒果椰汁西米撈

天時暑熱,始終都要食冰凍甜品先可以解暑.

希望在明天

買呢張卡材料包時,係諗住送俾一個朋友,作為幫佢打氣加油,今日食完早餐就立刻開工,結果都係要用咗成5個幾鐘先完成,不過見到製成品,都覺得唔錯,希望朋友收到會喜歡喇.

 可以作為掛飾之用

DIY 立體生日卡

係上次上堂後順手買嘅材料包,奄尖大少就快生日,於是今日開工,順便當練習,呢張卡size細啲,加上物件又細而多,真係剪到我頭暈暈,而且所用時間都多好多,幸好完成後作品都唔錯,可以送到俾人嘅.

自製立體手工藝卡

老友買咗團購去學整立體手工藝卡,上堂前自己揀卡款做,我失策揀咗呢張好多又細物件,本來上堂包一張卡材料,但呢款複雜又大張要加多$20, 短短兩個鐘祗完成咗一半,於是將剩餘部份帶回家繼續做,終於今日有時間完成埋喇,都要用多成2個半鐘,不過成品真係幾靚,日本紙無論印刷,紙質都好好,我放學後因為憑收據可以買滿$100減$20,於是買咗兩份材料包,遲啲再做過.

 加埋絲帶可以作掛飾用

 呢款係我老友做嘅,都好靚架

星星後餘波

前排播完韓劇"星星"後,好多人茶餘飯後都有講炸雞+啤酒,我雖然無中毒,亦唔飲得酒精類飲品,但行過附近新開759店舖,見到有不同味道炸雞塊,而且有7折,於是就買咗一包有檸檬味炸雞塊試下,我用焗爐焗番脆,無再用油炸,但點呢個泰國雞醬食都好好味呀,偶一為之,有時都放縱下自己喇.哈哈!

新玩意-煎蛋卷機

朋友送嘅蛋卷機,今日就嚟開張試用下,唔難用,製成品都OK,不過可能祗係落咗一隻蛋,所以唔會自動升出嚟,而且用完要洗個蛋桶,都幾麻煩,如果祗係單煎蛋,不如開鑊仲快手,如果要俾錢買,就可以慳番啲錢,覺得唔太實用.

提早包粽

原本想遷就同老友今個星期日約會,順便送啲粽俾佢,點知今日成日黃雨+雷暴警告,約會要改期,呢啲叫做人算不如天算,我今年改咗糯米/綠豆比例,變成綠豆/糯米係2:1,食落無咁滯,昨日解開試食都唔錯喎.

今日晏晝-菠菜煙肉芝士蛋批

昨日晚餐食剩菠菜,如果今日晏晝又再食,好悶下,諗起西菜中嘅呢味都都唔錯喎,於是就攪攪新意思,我講嘅咪就係菠菜煙肉芝士蛋批,我加咗脆麵包粒做底,代替批皮,點知以為批碟免黏,唔駛搽油,其實係...錯嘅,結果焗完黏到呢...,幸好味道唔錯,都幾好食.

自家種沙律生菜有收成喇!

其實種植真係需要好多心血/時間,才可以有收成,都係多得我家農夫嘅恆心同堅持.

生榨粟米汁

味道微腥,不過有鮮甜味,都OK喎.

時令芒果金奇異果醬

唔知點解今年芒果不算太多且偏貴,我呢3個係超市買,已經放係米桶成3日,頭部份已開始有黑點, 所以雖然未熟透都要整,因此煮完後無乜芒果香味.

另類甜品-冰糖燉香蕉止咳

係網上見到話冰糖燉香蕉,可以止咳,反正現成屋企有蕉,於是燉嚟試下食,祗需要十零廿分鐘就可以. 睇下有無效先?

今日晏晝-一波多折菠菜水餃

事緣幾個禮拜前去超市買野,順便買盒水餃當晏晝食,但打開見到細隻又少餡,價錢都唔平,於是趁買餸時,順便買些水餃皮,諗住自己包,點知又唔記得淖熟椰菜切絲先同免治豬肉混合,結果水餃包唔成,加蛋/粉,變咗椰菜燒餅,再跟住開始傷風感冒,咳到得番半條命,更加唔會包水餃,今日精神好番啲,無咳得咁利害,於是係雪櫃內抄番包水餃皮出嚟,竟然無變壞,於是就將剩下菠菜淖熟,搾乾水切碎加入免治豬肉內,當晏晝食,又大隻又多餡,成本都係$15之內,祗要有時間,肯郁下手,真係抵好多.

神奇止咳燉洋蔥汁

兩星期前我傷風感冒後,咳到甩肺,係網上睇到有人推介蒸/燉洋蔥汁可以止咳,於是即管試下,方法好簡單,將一個洋蔥去衣後切片/切絲,蒸燉30-40分鐘,隔出汁液飲,唔駛加水,我就索性切碎放入燉盅,再用電壓煲燉一個鐘,盡量壓出多些汁液.而洋蔥渣唔食,味道清甜,無辛辣味,幾易入口,我飲咗第一次,兩個鐘後已經停止咳嗽,但晚上仍然有咳,於是昨日又燉嚟飲,全日都無咳過,見仲有一個洋蔥,今日飲埋應該唔駛再飲喇,其實原因係洋蔥含有豐富硫代亞硫酸鹽（thiosulfinate）及檞黃素（quercetin),都係對氣管炎有幫助,下次大家遇到同樣情形,可以不妨一試.

蕃茄牛肉粥

每當我食呢款粥時,即係代表我唔舒服,我平時已經係氣管敏感,尤其當轉季時,多數會中招,今年都唔例外,上星期日開始傷風感冒,勁咳,到今個星期叫做好些,但仍然咳/多痰,加上食埋醫生開嘅藥,完全無胃口,呢個時候我就多數煮呢款粥食,因為味道清淡,酸甜味,開胃些.

綠田園天台近貌

我家農夫由開始小量種植白菜仔,菜芯,但屢屢被雀仔啄食,加上無落農藥,結果引致蟲患,成日要捉蟲,後來佢不斷嘗試加防備設施,現在已漸入佳景,於是擴大種植區域,再加種生菜等其他種類.

為咗防止雀仔啄食,農夫鋪上透明膠紙,鑽小洞,再加竹仔

沙律生菜

 牛油生菜

 菜芯苗

芫茜

 出花老蔥,農夫話要留番做種喎

是日晏晝-簡簡單單自家叉燒蛋炒飯

由舊年下半年開始,我已經絕少去茶餐廳食晏,因為覺得越來越貴,成$4X-$5X,祗係一個例湯或飲品,加一碟頭飯,我寧願自己晒些功夫自己整,好似呢碟叉燒蛋炒飯,成本約$12,已經食到飽飽,祗係要自己洗切同洗碗碟啫,我寧願自己郁下手,慳番十零廿元好過.

今日晏晝-意想不到燒餅

原本今日晏晝想包水餃食，點知一時忘記將椰菜絲淖軟身再同餡料混合，結果包咗兩隻已經投降，最後將燒餅粉，蛋混埋一齊，煎燒餅食就算，隨遇而安好了。

又嚟蒸蘿蔔糕

原因係朋友俾咗另一個蘿蔔糕食譜我,水/粉量比例不同,所以我想比較一下,佢呢個食譜係將粘米粉/栗粉混合後,當煮滾蘿蔔絲後熄火,將臘味,蝦米加入後再灑粉撈勻,我擔心粉漿灑入不均勻,結果我寧願用水先開粉,而當煮蘿蔔絲時,再扣回開粉漿水份,但唔知結果如何? 因為明日攤凍後切開先知,今次我無加冬菇,因為話加咗會容易變壞,我又試下係咪先.

有心人送自家種有機菜

其實可以日日都係green day, 今朝一早收到有心人送嘅自家種油麥菜/西蘭花,新鮮真係零舍不同,呢度可以夠食兩/三餐,呢排菜價咁貴,真係慳番唔少, Good!

柑桔果醬

過年後生果檔通常都會有柑桔賣,我喜歡柑桔清新味道,所以每年都會煮果醬,可以搽麵包,焗蛋糕或麵包,什至乎沖水飲都好美味架.

恭賀新禧

今年因為天氣暖和,今日年初一已經花開富貴,開得非常燦爛,願各位馬到功成,身體健康,萬事如意!