試做環保酵素

適逄朋友要晒果皮,有大量柑肉剩下,於是問佢攞咗嚟試做環保酵素,希望3個月後成功可用喇,不過真係等到頸都長埋呀.

總共有30個柑肉+砂糖,唔想晒錢買咁貴黑糖,求其用白砂糖先.

首先將柑肉切粒並盡量去除果核

再用攪拌機打碎果肉,主要搾取汁液計準水/果渣份量

最後混合糖水就完成嘞

做法就好簡單,但跟住要日日放氣攪拌一次,再等多兩個月,總共3個月先用得,希望唔好發霉喇,否則就前功盡廢嚕...

DIY 護膚品

天氣開始轉涼同乾燥,又係時候要轉護膚品喇. 共做咗4款,包括玫瑰果油卵鄰脂滋潤晚霜(左上), 椰子油可可脂護手霜(右上),可可巴/甜杏仁油/可可脂潤唇膏(左下), 玫瑰果油保濕防曬日霜(右下)

新玩具-氣泡水機

睇韓劇時,俾我發現一部可以係家居用氣泡水機,原來淘寶都有買,香港亦有人由英美等地入口呢種機賣,經過研究比較後,決定都係幫香港人買,比較有保証,雖然價錢幾貴,但係現在又無乜嗜好,所以忍痛決定買咗番嚟,以後唔需要買出面加咗人工色素/味道,高糖汽水飲,唯獨支CO2用完後要再搵賣家幫手充氣就麻煩啲,但都係用完60L後先要充氣.
隨機附上6種唔同味道糖漿,一支可以沖1L,我試咗橙汁味,同街買橙汁汽水無乜分別,幾好飲.

自製豬肉乾

現在街買食物安全成疑,有時間自己整都好容易,求其係網上搵個食譜,再自行加減,第一次整比較鹹啲,下次要加多些糖或減豉油.

狂淘

我每年都會留意淘寶集運有無攪promotion平啲運費?咁就一次買多些要替換家庭用品,上禮拜自取首重有75折,所以決定提早買家庭用品,到年尾大掃除替換就唔駛再買,不過今次要俾國內運費,加埋轉運費都要成$9X港紙,好難計係咪平過係香港買?祗係唔駛四圍搵,格價,顏色/SIZE都會齊些,又慳番時間咋,所以是否要去淘寶買野會平?睇你自己決定.

左邊紫色間條毛拖鞋秒殺價$1人仔,拖鞋下面玫瑰花防熱手套+護墊,$5人仔一套,當然唔係樣樣都咁平喇

 左邊3層浴室雜物架$4.99人仔咋

龍眼紅茶菌二酵

我一向有飲紅茶菌,但唔知道可以二酵,自從加入一個FB發酵食品谷後先知道,見有龍眼就即刻試下,祗用少量紅茶菌液加埋龍眼肉,放在室溫一日,今日飲有些甜龍眼味,無咁酸,幾好.

又嚟蒸饅頭

昨日焗麵包俾自己做早餐,今日就輪到蒸饅頭俾奄尖大少,剛巧星期六會見老友,佢鍾意我整饅頭,所以順便蒸多一份,但又唔想重複一樣味道,於是改下原料,加椰子油/椰糖,變成原味同椰糖饅頭兩款,各式其式喇.

迷迭香蜜糖燒雞扒配意粉

今日趁開爐焗麵包,順便焗埋迷迭香蜜糖燒雞扒,迷迭香因為比較少用,越生越多,於是剪幾棵用嚟醃雞扒,加埋低鹽豉油麴,煮些少茄汁意粉就攪掂晏晝一餐.

Ceasar 凱撒麥包

初時學整麵包時,心中有一團火,狂買下一堆麵包模,若干年過去後今天,無咁狂熱,加上有咗麵包機後,多數都整方包就算,今日攞番呢兩個麵包模出嚟開焗爐焗麵包,當重溫下整形包手技吧.

當年淘寶仲未好流行,係網上同麵包網友買嘅日本貨,都幾貴吓

原本應該係硬包,但我無落石春,蒸汽變成軟包就算,自己食都無乜所謂

懶人叮飯-紫菜青瓜蟹柳絲飯

前排行過759見到有韓式叮飯賣,買咗一盒試下,現在天氣咁熱,真係有米懶煮,今日就加咗紫菜,青瓜,蟹柳絲,用飯素+麻油撈叮飯一齊食,味道幾好,飯軟硬適中,好過上次買日本叮飯.

夏日消暑特飲-香茅檸檬蜜糖水

昨日農夫剪了一堆香草,曬乾後諗住留作日後使用,我見到有香茅,屋企又有檸檬,蜜糖,於是就剪碎一支香茅,加冰水打爛,過濾渣滓後,加檸檬/蜜糖飲,味道清新,都幾好飲喎.

香腸蛋卷

為了唔想晒咗朋友一番心意,又攞部蛋卷機出嚟用,今次加香腸,效果好些,蛋卷熟時可以自動升起,而且之前混合蛋漿再倒入筒中,蛋質感嫩滑些.

簡單好味燒排骨

前幾日經過凍肉店,見到有豬仔骨賣,立刻通知好友,佢搵咗好耐,而且仲做特價添,我都唔執輸,買番一塊,都係$21,昨日解凍後,用醬汁醃一日,今日開爐焗當晚飯餸菜其中一樣,再炒碟菜,真係所費無幾,好過出街食呢.

一份麵團兩款包

昨日打好麵團,仍然用天酵液種,喂完粉兩個鐘頭後就打麵團,再室溫發酵兩個鐘,放番入雪櫃內,繼續低溫發酵12個鐘,今朝室溫解凍後就整形做兩款包,咁就無咁單調. 玉桂提子卷+提子餐包

種瓜得瓜

經過我家農夫辛勤淋水,施肥,為怕有化學物質渗入植物內, 仲親自堆肥,結果終於開始有收成嘞,相片內西瓜三兄弟,左邊係黃肉西瓜,中間係黑美人,右邊連農夫都唔清楚係乜瓜,祗係怕分薄養份,摘咗落嚟先,跟住都會繼續有收成,不止呢幾個瓜嘅, 真替佢開心.

是日午餐-一人前日式溫泉蛋海帶雞卷拉麵

早兩日行過凍肉鋪見到$11/3隻雞脾,於是買番嚟做咗滷水雞卷,今日再用鰹魚粉+味醂做湯底,煮札日本拉麵,再加料落溫泉蛋同海帶,咁就成為日式拉麵,如果出街食又要成$5X,有時間我就寧願自己煮好過喇.

黑椒香草薯片

趁開焗爐焗麵包,順便試下朋友早前送刨絲/片器,用嚟刨薯片,但唔知係咪初用,發覺好難控制,而且刀頭不利,未買我就建議唔好買,費事晒錢,而薯片就厚薄不均勻,又做唔到waffle格仔效果,加上我重手落多咗黑椒粉,變成咗辣辣薯片添.

曬黑嘅土司(米飯麴酵)

早排買咗包米麴,自製豉油麴,係網上見到有網友話可以加飯,糖,水發酵成酵液焗麵包,既然有存貨,梗係要試下,發了30個鐘後,仍然好少泡泡,於是用保鮮紙遮蓋樽口,再用牙簽拮洞,果然6個鐘後已活躍好多,於是立即隔出汁液打麵團,發酵兩個鐘後就放入雪櫃,繼續低溫發酵, 今朝先攞出嚟室溫解凍,約過了一個鐘後就分割麵團作最後發酵,需時都要成兩個鐘,用番平時土司模,焗爐溫度/時間相同,點知焗好打開蓋,完全深啡色,真係唔明係咪因為米飯麴酵液原故,攤凍後明日食之前片去外皮好了,有啲無奈,唉!

米飯麴發酵情形,不過我無再續養,都係用番原本星野液種算嘞.

 睇下幾深啡,旁邊仲爆皮添

蒸饅頭 (星野酵母液種)

今日3號風球高掛,橫風橫雨,不宜外出,留係屋企,無所事事,於是攞出已喂粉星野酵母液種蒸饅頭,但唔明點解用頭尾麵團搓成個舊,會皺咗皮,其他就無事喎.

自家種有機西瓜

農夫一放工返嚟,見橫風橫雨,即刻當機立斷,上天台摘咗呢個西瓜,本來應該可以再大些先摘嘅,奈何風雨無情呢.

跟風-煉奶牛奶包

成日係網上都見有人整,我又嚟跟風試下先,一出爐已經好香,食落都好軟熟,但背後材料...好魔鬼,偶然食下都無妨嘅(自我安慰中).

泡製豉油麴

聽講日本好流行用鹽麴/豉油麴代替普通調味料,話有好多益處,之前朋友都俾咗一些自製鹽麴我,但奈何健康問題,我好少用鹽,反而多用低鹽豉油,昨日行過City叔婆,見到有米麴,忍唔住買咗一包,今日就跟袋上做法,試下整自家低鹽豉油麴先,遲些會試下用米麴嚟做天然酵母焗麵包,睇網上好多人都話得.

忌廉排包

今日突然間好想食排包,於是即刻焗,唔知係咪天氣太熱,人都傻咗添,我無落牛油,所以無咁香味,但都好食喎.

自家種有機通菜

我家農夫近日新品種,就係種有機通菜,菜梗比較幼嫩,因為佢話太老唔好食喎.

一包兩吃

昨晚飯後,無端端突然想食菜肉包,於是即刻係雪櫃攞出天酵喂粉,又將冰格免治豬肉搬回普通冷藏格解凍,今朝食完早餐,就開始攪大龍鳳,因為天酵發得比較慢,終於食晏前完成,我將一部份做生煎包,另一半就蒸菜肉包,生煎包呢..剛煎好即食,包底夠脆,好香口,而蒸菜肉包就夠鬆軟,不同口味,咁就可以滿足到自己,其實生活有時真係可以好簡單就快樂.

今日飯後甜品-夏威夷果仁雲尼拉雪糕拌芒果粒

呢排頻頻整甜品,除咗天氣熱想食冰凍甜品外,就係之前買咗1 LTE淡忌廉,開咗要盡快用完,否則過期就晒咗,今次模仿H字頭雪糕,加咗烘香夏威夷果仁碎,真係好好味,雖然無H字頭雪糕咁滑,但係無加人工雪糕乳化劑同增稠劑,就可以食得放心.

白汁三文魚帶子意粉 & 椰汁馬豆糕

今日朋友嚟我家,學做DIY護膚品,順便一齊食晏,為咗節省時間,所以就由佢負責帶沙律菜嚟,而我就負責煮意粉,佢又唔鍾意蕃茄汁,所以我就煮咗呢款白汁三文魚帶子意粉,跟住甜品就係前幾日整嘅椰汁馬豆糕,真係食到好飽呀.

用天然酵母蒸饅頭

近排開始改用天然酵母蒸饅頭,雖然相對發酵時間長咗,但比較用速酵/泡打粉好食好多,而且又健康,等待都係值得嘅.

當芒果成熟時

朋友特別於網上訂購了兩相台灣愛文芒果,剛空運到香港,送了4個俾我食,我真係有口福喇.

大吃大喝的日子

我平時飲食都好健康, 盡量會少油,少糖,少鹽,蔬菜/水果會多食,但偶而有時都會想放縱一下,今日就約咗朋友一齊去食lunch buffet, 呢間之前食過幾次,食物質素有一定水準,今次都保持到水準,實在好少一次性食咁多野落肚,結果...今晚飯就唔駛預我喇.

夏日消暑甜品-芒果椰汁西米撈

天時暑熱,始終都要食冰凍甜品先可以解暑.

希望在明天

買呢張卡材料包時,係諗住送俾一個朋友,作為幫佢打氣加油,今日食完早餐就立刻開工,結果都係要用咗成5個幾鐘先完成,不過見到製成品,都覺得唔錯,希望朋友收到會喜歡喇.

 可以作為掛飾之用

DIY 立體生日卡

係上次上堂後順手買嘅材料包,奄尖大少就快生日,於是今日開工,順便當練習,呢張卡size細啲,加上物件又細而多,真係剪到我頭暈暈,而且所用時間都多好多,幸好完成後作品都唔錯,可以送到俾人嘅.

自製立體手工藝卡

老友買咗團購去學整立體手工藝卡,上堂前自己揀卡款做,我失策揀咗呢張好多又細物件,本來上堂包一張卡材料,但呢款複雜又大張要加多$20, 短短兩個鐘祗完成咗一半,於是將剩餘部份帶回家繼續做,終於今日有時間完成埋喇,都要用多成2個半鐘,不過成品真係幾靚,日本紙無論印刷,紙質都好好,我放學後因為憑收據可以買滿$100減$20,於是買咗兩份材料包,遲啲再做過.

 加埋絲帶可以作掛飾用

 呢款係我老友做嘅,都好靚架

星星後餘波

前排播完韓劇"星星"後,好多人茶餘飯後都有講炸雞+啤酒,我雖然無中毒,亦唔飲得酒精類飲品,但行過附近新開759店舖,見到有不同味道炸雞塊,而且有7折,於是就買咗一包有檸檬味炸雞塊試下,我用焗爐焗番脆,無再用油炸,但點呢個泰國雞醬食都好好味呀,偶一為之,有時都放縱下自己喇.哈哈!

新玩意-煎蛋卷機

朋友送嘅蛋卷機,今日就嚟開張試用下,唔難用,製成品都OK,不過可能祗係落咗一隻蛋,所以唔會自動升出嚟,而且用完要洗個蛋桶,都幾麻煩,如果祗係單煎蛋,不如開鑊仲快手,如果要俾錢買,就可以慳番啲錢,覺得唔太實用.

提早包粽

原本想遷就同老友今個星期日約會,順便送啲粽俾佢,點知今日成日黃雨+雷暴警告,約會要改期,呢啲叫做人算不如天算,我今年改咗糯米/綠豆比例,變成綠豆/糯米係2:1,食落無咁滯,昨日解開試食都唔錯喎.

今日晏晝-菠菜煙肉芝士蛋批

昨日晚餐食剩菠菜,如果今日晏晝又再食,好悶下,諗起西菜中嘅呢味都都唔錯喎,於是就攪攪新意思,我講嘅咪就係菠菜煙肉芝士蛋批,我加咗脆麵包粒做底,代替批皮,點知以為批碟免黏,唔駛搽油,其實係...錯嘅,結果焗完黏到呢...,幸好味道唔錯,都幾好食.

自家種沙律生菜有收成喇!

其實種植真係需要好多心血/時間,才可以有收成,都係多得我家農夫嘅恆心同堅持.

生榨粟米汁

味道微腥,不過有鮮甜味,都OK喎.

時令芒果金奇異果醬

唔知點解今年芒果不算太多且偏貴,我呢3個係超市買,已經放係米桶成3日,頭部份已開始有黑點, 所以雖然未熟透都要整,因此煮完後無乜芒果香味.