烹飪課程-第三課(葡國雞&黃薑飯)

今日又去上烹飪課程,教嘅係葡國雞&黃薑飯,Miss專登去印度商店買印度米嚟煮飯,我間中都有煮葡國雞,但Miss用咗隻水牛牛油起鑊爆香香料同乾蔥,就非常香,最後仲加埋新鮮椰絲鋪面入焗爐焗香,味道就更加VERY正.

炆近已經香噴噴嘅葡國雞

灑上新鮮椰絲再焗至金黃色,就更加好味,祗係可惜汁少咗啲,撈飯食一流

呢個就係蒸好嘅黃薑飯,飯粒係長形成條狀,入口係散收收,加埋豆寇,丁香,小茴,桂皮,黃薑粉等香料去煮,同我哋平時食嘅飯唔同,我自己就唔多慣.

食包包食飽

過咗忙碌嘅昨日,今日都唔俾自己停,因為上個禮拜上堂整嘅麵包已經食哂,課程又完咗,所以開始自己做包先有早餐,因為我嘅早餐淨係鐘意食麵包,如果唔係就要買,但係自從學識做麵包後,已經儘量唔食出面嘅麵包,因為知道落咗好多化學添加劑和人造色素.

好耐都未整個中式蒸包啦,因為發麵種都幾煩複,要早最少2-3日開始,今日蒸咗兩款包,但唔知係咪唔記得醒發,所以包皮唔夠鬆軟,食完後再要試整過至得.

有咸同甜包:圓形無扭紋係桂花紅豆沙餡,有扭紋係椰菜豬肉餡

朋友生日飯食越南菜

有好朋友呢個月生日,上網睇Openrice介紹,終於決定去位於帝苑酒店內嘅Le Solieil食晚飯,因為佢哋做近Promotion,印Openrice嘅贈卷,有八折(4個人或以上),兼夾今個月生日嘅客人有生日蛋糕送.

因為朋友遲咗放工,所以一坐低好肚餓,就將枱面嘅炸蝦片全部食哂,仲想Encore添,以下係我們揀咗嘅菜式:

首先登場係越南海鮮薄餅,表皮好薄同脆,裡面有香濃嘅芝士芽菜,蝦粒等等.

跟住係鮮蝦酸湯,有番茄,波羅 同香芧,味道酸酸甜甜,好開胃,幾好飲.

再來就係香芧牛肉生菜包,牛肉好嫰滑,用生菜包埋墊底嘅米粉,酸紅蘿蔔絲,好清新唔覺肥膩.

呢碟係叫做炒越南龍豆,經理介紹話係越南來嘅疏菜,味道非常清爽帶有甜味,類似天葵嘅食法,係意外驚喜咁好食.

當然要食啲飯頂肚,呢個鬆郁濛就係椰盅海鮮焗飯,個汁好香,有金不換葉落咗

亦都多料,由於侍應攞咗個椰盅去分飯,所以影唔到.

最後生日蛋糕出場啦,應該都有一磅蛋糕,現場仲有鋼琴&小提琴合奏生日歌,氣氛好溫馨!

回程係尖東海徬影過對面曚曚查嘅香港夜景,作為今晚完美嘅結束.

忙碌嘅一日

昨日一早起身未刷牙洗面已經衝入廚房煲浸過夜嘅紅豆,準備陣間要炒紅豆沙,因為我想今日蒸豆沙包,當做哂朝早指定動作約10:30左右,紅豆已經稔身就開始大製作(自己話),到咗大概11:30已經大功告成,立刻又係雪櫃攞咗冷飯,叉燒&雞蛋出來炒飯,因為趕完要下晝學蛋糕.

Miss應同學要求,提早教整焗南瓜芝士蛋糕應節,不過焗完出來,唔覺有芝士味,可能因為用咗Mascapone芝士,所以味道唔係好濃,但蛋糕就好鬆軟.

蛋糕面比較燶,因為已經落堂,蛋糕仍然未熟,Miss心急開猛火焗

今次一人有3塊帶番屋企食

一落堂就急急腳番屋企梳洗換衫,然後搭車出尖東,因為有朋友生日,約咗出來食飯慶祝,結果食完飯番到屋企已經10:30PM,抖一陣本來準備瞓覺,但心思思拆開朋友送嘅智慧珠遊戲拼盤試吓玩,阿SO都有係電視介紹過,話可以訓練IQ,因為我無乜,點知一玩已經到凌晨,唯有收埋上床瞓,結果今朝非常唔想起身,覺得好攰,終於都掙扎起床,然後出去跑步.真係玩物喪志,下次都係要自律好啲.咁就過咗唔知忙乜嘅一日啦.

又嚟一煲過蒸飯

今日晏晝繼續蒸飯,不過係黑白糯米飯,因為之前包稯剩下啲黑白糯米放係冰格, 所以攞出嚟解凍食咗佢.

首先切碎已浸過嘅蝦米,江瑤柱(已撕成絲)&冬菇,鋪係米面,怕惺可以加羗絲,放係已煲熱滾水嘅電飯煲裡面蒸,中途翻動一下,如有需要可以加些水,之後淥菜,咁又攪掂一餐,我無落油同鹽,因為蝦米,江瑤柱已有醎味,所以都算幾健康嘅一餐.

鋪好材料係米面,準備水滾蒸飯

眨眼就蒸好食得飯啦

一煲過嘅簡易午餐

今日預咗唔出街,所以之前已經買咗免治牛肉放在冰格,今朝攞番出來解凍,首先係煮飯前一個鐘頭,將半嘜米(量米膠杯)用一個不銹鋼兜浸水僅僅過米多少少,加幾滴油,咁飯就唔會咁黏身. 因為免治牛肉會有汁,所以米唔好加到平時煲飯嘅水份. 我通常一個人會蒸飯,因為可以唔駛煲咁多飯,而飯少又會黏埋底.好麻煩

然後學阿SO咁用些少豉油,糖,胡椒粉將免治牛肉醃一陣,利用此空檔時間切碎羗,蔥同埋已浸過嘅陳皮,跟住放入豆粉,&麻油牛肉裡面,然後分數次加水,不停攪拌,直至感覺牛肉輕身,再加回切碎羗,蔥,陳皮,放入雪櫃一陣,約半個鐘左右.

跟住倒水入電飯煲內,開掣煲沸水再將個兜已浸水嘅米放係煲裡蒸大概25-30分鐘,要視乎米受水情形決定,我係中途將米翻轉2次,等米平均受水,當飯熟時,可以將牛肉平均放上飯面,再蒸多約10分鐘,攞起兜飯,加少少煲仔飯豉油,將菜放落飯煲熱水中淥熟,就食得啦,而且唔駛洗咁多碗碟.

其實我覺得免治牛肉餅真係可朔性好高,可以加青豆,黍米,紅蘿蔔,窩蛋,老少咸宜,簡單易做,所以我好多時都會買定擺係冰格,以備不時之需.

用電飯煲蒸飯熱水淥菜

本來想加窩蛋,但係見牛肉餅好多,差唔多同飯一樣厚度,所以無加.

曲奇餅製作課程

好多人都話整曲奇餅係唔駛學,因為做法簡單,我因為總覺得雖然簡單,總會有啲竅妙之處,係睇書或且跟網友食譜未必會寫得咁清楚,見到一堂可以學5種唔同款嘅曲奇,於是上星期走去報名.

今朝長途跋涉出尖沙咀上堂,成班竟然有24人之多,真係人頭湧湧,見阿Sir同埋助手都幾忙,因為短短3個鐘要做5款,有啲仲要事先做定雪藏或且等餅皮風乾,上完後都覺得幾值得,因為真係要一路上堂阿Sir一路講至知,譬如烘焗時間,溫度控制,乜野材料可以加減都好重要,會影響到製成品,甚至切或搓嘅形狀都會唔同食法.

每款都有5塊左右帶走,都算大豐收,食後我自己嘅評價係:

第一名:綠茶芝麻曲奇-夠鬆化,芝麻味又香,會考慮自己整

第二名:柚子蜜曲奇-柚子蜜味道幾濃郁,如果切成塊狀可能會無咁實

第三名:芝士曲奇-芝士味唔多夠,又唔鬆化,如果日後自己做,可能要加重料.

第四名:法式杏仁馬卡龍-超甜,若果有糖尿病千祈唔好食,而且風乾時間長,焗餅溫度非常重要,好容易失敗,要有耐性慢慢烘同睇火,阿Sir有一盤餅底唔夠乾都失敗咗,不過唔係我杯茶,未必會整.

第五名:羗餅人曲奇-應該係純粹用來裝飾,因為餅乾死死實實,完全唔好食,阿Sir叫我哋自己番屋企開蛋白糖漿唧圖案,我都懶得做.

烹飪課程-第二課(雞絲紙米卷&三色千層糕)

其實今日教嘅兩樣食物,我自己係屋企都有整,祇不過材料份量有些出入,做法都好容易.

已經蒸好共有9層嘅三色千層糕

切開之後嘅糕,層次分明,但因為未夠凍,所以切落黏刀,同埋食落比較淋

將雞絲,紅蘿蔔絲,青瓜絲,花生碎,九層塔等等,用醬汁撈勻,準備包入紙米卷內

包好咗個樣,但我無切開影相,即包即食,味道幾清新,可以當夏天午餐或沙津食

土法製乳酪

我半年前係網上見到有人可以係屋企自製乳酪,於是也開始嘗試自己整,因為乳酪對腸胃有益同埋可以加強鈣質,經過自己不斷改良,就用咗以下比較方便嘅方法.

預備功夫:

首先要準備一有蓋個器皿(入得微波爐),容量500-1000ml不等,視自己需要份量,我買咗一個有蓋嘅微波爐膠杯約500ml, 用熱滾水消毒,另外一隻茶匙同隔篩都要用滾水消毒

材料:

1) 500=1000ml鮮奶,或高鈣低脂奶,或用奶粉開滾水都可以,不過未試過用豆漿

2) 純乳酪一杯(約100-150ml), 係超級市場買任何牌子都無所謂. 買唔到可以買有生果粒,但要用篩隔去生果粒

3)砂糖2-3茶匙,唔怕酸可以唔放

做法:

1)首先將砂糖同約100-150ml奶混合在一個飯碗或杯中,放入微波爐叮1分鐘或分半鐘,直至糖溶解為止,唔怕酸可以唔駛做呢個步驟.

2)如果買唔到純乳酪,要用隔篩將乳酪中生果隔去

3)將(1)溶咗糖嘅奶同埋剩下約400ml嘅奶一齊倒入有蓋器皿中,放入微波爐中再叮1分鐘,主要將溫度提升約45度C左右,但如果用滾水開奶粉反而要降溫.

  唔怕酸可以直接將500ml 奶加熱

4)將(1)已加熱嘅100=150ml奶與(2)嘅乳酪撈勻於碗或杯中先,再倒回器皿中攪勻

5)用一個細煲加入大半煲水煲熱約1分鐘至70度C左右,就可以熄火,唔駛大滾,用手指試感覺微熱就得

6)用蓋蓋上將已混合咗乳酪嘅奶器皿,放入煲中約6-8個鐘便會凝固

7)將器皿表面水份抹乾放入雪櫃雪約6-8個鐘就食得.

心得:

1)主要留意溫度控制奶溫度一定要係40-45度左右,乳酸菌最活躍.

2)水煲溫度唔好太高,唔係會將乳酸菌熱死.

我都失敗過幾次先成功,有時間大家不妨試吓啦,因為自己做比較經濟,我整一次可以食5日,成本約$3(100ml乳酪),又唔駛四圍去搵酸乳酪粉買咁麻煩.

浸係暖水中嘅乳酪,因為影相怕唔清晰,所以無用蓋

已經凝固嘅乳酪近鏡(由朝早約9時至下午2時)

編織作品-有紀念嘅女裝冷衫

講俾你聽都唔信,呢啲冷係我亡友死前3年由於要移民,所以送俾我,叫我自己織咗佢來著,但我一路都唔得閒織,直至她回流返港,跟住係2000年時因Cancer去世,到咗今年2008我無做野後便決定將呢啲冷織咗件冷衫俾自己.前後我唸都有10年時間,但我無唸過掉咗啲冷,真係認真夠陳年歷史.

蛋糕課程-第一堂_啤梨毛士蛋糕

原本我無打算去學蛋糕,因為忌廉,牛油,&奶落好多,係唔健康嘅食物, 但我又唔想太無聊咁多時間留係屋企,見呢個課程學費平平地,而教嘅Miss以前跟佢學過整月餅,都教得唔錯. 今日第一堂學嘅係啤梨毛士蛋糕,味道比較清,但用罐頭啤梨,好似無乜香味.如果我自己做,會考慮改為用桃或且芒果.

其實係Miss整嘅,因為我上嘅係示範班,但我們都有負責打蛋,忌廉,唧餅乾條等工序.

應該每人一塊蛋糕,但有位同學俾埋我,所以我有兩塊帶番屋企食啦!

蘆莓麥香鬆餅

以前我返工嘅地方附近有一間Mrs. Fields, 偶而我都會買一個面上有合桃嘅鬆餅當午餐,雖然好味但亦知道肥膩&卡路里高,所以雖然好早已經想自行試吓整,都唔動工,就係怕肥死人.

呢排見到好多Blog友都整,同埋可以將油份減少,今日決定動工,我用咗RTHK嘅食譜,但一半麵粉用麥粉代替,牛油亦減咗.

雖然已經混有藍莓乾,但中間再加多一層自製藍莓果醬

焗好之後外表唔係太靓,但都幾好味,酸酸甜甜,但因為牛油少咗,唔係咁鬆化

鬆餅內裡組織

雷公鑿苦瓜真係唔苦

上個禮拜睇完"Good SO"教點揀同點煮苦瓜,心思思想試吓,因為自從開始食苦瓜,我都要用盡所有方法減少苦味,譬如用鹽醃,用水煮等等方法,昨日終於走去買咗番屋企煮,不過價錢都唔平,成$10一斤,兩隻都要盛惠$13.

跟阿SO做法: http://soszewong.blogspot.com/2008/10/good-09.html

1) 首先盡可能將白色內衣刮去,然後切大塊,開熱油鍋將苦瓜塊炒熟,因為煲咗魚湯,所以我用魚湯代替味精雞湯煮一陣.

2)捞起苦瓜後,落啄碎嘅蒜頭荳豉落鍋加油炒香,再將苦瓜塊回鍋炒一陣,洒酒後便可以食啦,

食後發覺果然唔苦,而且做法簡單,我無加牛肉,淨係清炒都好味,大家有興趣不妨都試吓,聽講雷公鑿苦瓜而家當造.否則可能要等明年先有得試囉.

烹飪課程-第一課海鮮忌廉湯+香草蒜茸法包

我從來都未上過烹飪課,因為我素來都係自己買烹飪書睇,然後跟住煮,多數都成功,但現在開始唔番工,又唔想太無聊,上個月見到呢個烹飪課程學費幾便宜,於是就試吓報名,今日係第一堂,對我而言,唔係咁難,但唯一俾我知嘅野,就係原來落勁多牛油&忌廉,但表面睇唔到,而家終於明白點解咁多人患血壓高,胆固醇等疾病,因為係出面唔知唔覺就會食咗好多脂肪落肚,加上又唔做運動,人一過中年就有問題.

今次無相係因為導師自己一人做哂示範,然後一人一碗湯,一塊蒜蓉法包,未夠鐘落堂已全部完成兼夾食埋. 無乜驚喜同特別.

自家發芽菜-失敗咗!

上個禮拜係Blog見到有些網友自己發芽菜,過程好似幾容易,於是走去買咗啲有機綠荳學人發芽菜,頭兩三日都順利,但...第4日開始綠荳芽頭轉紅並開始長出黃葉,但無法唔想前功盡廢,祗好繼續發落去,結果就係..無改變,根部雖然長粗咗,但芽菜頭依然係紅色,黃葉更長,最後我唸祗好摘去頭尾好過乜都無就係啦,不過檢討後我會再來試過,希望下次可以成功.

第2&3日正常情形:

跟住第4,5&6日就變成咁樣啦