新麵包機第二擊-薯仔香草方包

今日又開始用麵包機試用另一種發酵方法焗麵包,我用咗低溫中種法,加埋之前買咗好耐無用嘅薯仔香草預拌粉,隔晚已搓定中種放落雪櫃,等佢自己發酵,跟住瞓覺覺LU...ZZZZZ

一宿無話到今朝將佢係雪櫃攞出來回暖約2個鐘,加埋主麵團,我抽起50克水用淡忌廉代替,又加咗10克糖,因為睇到有啲網友話呢隻粉咸同焗出來死死實實.

好啦,叫醒麵包機開工(插電掣),但攪落去覺得麵團好稀同黏手,唔知係咪有薯仔粉影響到呢?

都唔理咁多由得佢繼續整落去,焗嘅時候味道好香,全屋都散發住香氣,如果有人肚餓,肯定引死人

切開後試食發覺內部好濕潤同軟熟,仲好過上一次(用老麵),不過嫌外皮太厚同埋搓粉器藏係麵包裡面,唔係咁好囉,下次會試吓用湯種法,比較邊種方法最適合麵包機

今餐晏晝食乜野?蟹王麵

我之前係網上見到網友介紹呢隻麵話好食,剛巧俾我係裕記見到有,於是買咗兩包試吓.

就係呢個袋裝,我將昨晚食剩嘅西椒炒自家手打蝦膠同新鮮菜芯淥埋就食得,隻麵質都幾軟滑,但我嫌佢稍為淋身,我都係比較鍾意食"出前XX",不過價錢佢平啲,$3一包算唔錯.

見面禮-椰汁紅豆砵仔糕

之前我嘅朋友提過佢鍾意食砵仔糕,明日會同佢見面,所以今日整定砵仔糕,咁就可以帶俾佢食,雖然係啲粗野,但物輕情意重嘛,最緊要有.

我曾經跟過一個食譜整砵仔糕,但蒸完出來後,糕好稀,唔好食. 於是今次我搵到第二個食譜,除粘米粉外,加咗木薯粉&馬蹄粉,再加埋用剩嘅椰汁,蒸好後試食糕都好煙UN,但味道好似椰汁糕多啲,下次都係唔好落椰汁會好啲.

是日午餐-加料楊州炒飯

今朝趁住天氣轉涼,開始將衫換季,但係而家無做野,祗係攞1/3冬天衫出來就可以,以前因為番工有買衣服嘅需要,另外其實買衫亦係我用來發洩工作壓力嘅一種方法,而家當然已經無需要,但係我鐘意將所有要換季衣服重新熨一次先會著,所以都要化幾多時間,之不過我係百忙之中,都仍然為自己整咗楊州炒飯做晏晝.

經過半個鐘頭洗,切&炒就攪掂, 睇吓五顏六色買相已經夠吸引啦(自己話),我又將剩餘物資椰菜切碎,加埋一齊炒,多啲纖維好啲.好好味呀!

當然唔少得一碟綠油油芥蘭,咁樣一餐我就好滿足,做人有時就係咁簡單

烹飪課程-第五課(意式薯糰&菠菜茸魚柳)

好快今日已經上第五堂,即係課程嘅一半,今日Miss仍然都係教兩樣款式,意式薯糰&菠菜茸魚柳

薯糰係用蒸淋咗嘅薯仔加麵粉搓成麵團,再搓成一粒粒好似肚臍餅嘅形狀,煮熟後用白汁燴都幾得意,如果唔加麵粉可以直接當薯蓉食一樣得.

搓成肚臍餅形狀嘅薯糰

為咗加快煮嘅時間,所以一邊用滚水煮薯糰,一邊煮白汁,大家同學一齊幫手做

所以好快就煮好有得食啦

另一邊廂正忙於煎魚柳同埋煮菠菜汁液

眨吓眼菠菜茸魚柳都煮好囉,味道都唔錯,但唔好俾菜式表面呃到,好似好健康,其實汁料需要用牛油煮,所以少食無妨,唔好成日食就無問題.

朋友送嘅禮物-新麵包機

朋友用信用卡積分換咗個麵包機,但又唔想整麵包,於是轉送俾我,我當然求之不得,又多樣新玩具,懶惰時唔想用手搓包時就可以利用佢啦

今日終於開張攞佢出來焗麵包啦,第一次我揀咗做全麥方包,呢部機比較簡單祗有3種包款可以揀,穩陣起見,我祗係做咗食譜一半份量,將一半水改用奶,仲加埋老麵&麵包改良劑.

就係呢部機啦

麵團在發酵中

經過2小時&40分鐘後已經焗起咗,中間突起個舊係因為我係麵團發酵時,滅一細舊出來睇吓係咪有膜?答案係無,再黏番埋就變成咁核突

裡面組織都OK,祗係表皮有啲厚,試食後麵包都幾軟熟

唯一美中不足,係中間俾搓粉器介開,有幾塊唔完整,唔知有無方法可以避免呢? 總刮來講,麵包質素可以接受,日後我會試吓用其他方法,譬如湯種,中種,再加入其他材料,睇吓有乜野效果.

蛋糕課程-第四堂_鮮果忌廉&檸檬撻

今日Miss教兩種撻款,分別係鮮果忌廉撻&檸檬撻,首先要做咗撻皮先,搓完粉後就可以將麵團壓入撻殼中.

呢兩個係Miss整

呢3個係我整嘅,明顯邊皮唔夠圓同平均,用叉拮洞係撻皮後就可以放入焗爐焗

眨眼之間,已經焗好啦,係用來整鮮果忌廉撻

跟住掃上一層朱古力漿,以防忌廉吉士漿流入撻皮變淋

最後喞入忌廉吉士漿,加堆生果係面,放落雪櫃雪凍就食得,由於有同學唔要,Miss又有多餘分埋俾我哋,結果我總共有3大2細=5個拎番屋企有排食LU.

至於檸檬撻比較簡單,直接將檸檬餡注入撻皮中,就直接放入焗爐焗,由於Miss掛住同我哋講野,結果焗得過火,表面唔夠滑,我就覺得味道比較酸,可以減檸檬汁. 一人有1大2細共3個帶走,係堂上又有試食,今堂真係覺得超值.

我喜愛嘅越南蒸粉卷

每次去食越南野,我多數會叫蒸粉卷,但自從係網上發現有食譜,我就開始自己整,因為可以包多啲餡,同埋食到飽為止.

首先要準備餡料,有免治豬肉(稍為用魚露,糖,胡椒粉醃一陣,再加粟粉),啄碎沙葛,雲耳,紅蘿蔔

將餡炒熟,加埋芫茜,埋茨,攤涼後就可以用越南春卷皮包.

說時遲,那時快,(其實係肚餓),已經包起可以拎去蒸啦..

蒸好後灑上焗香咗花生碎&炸香蔥就食得啦雖然要啄野,又要包比較麻煩,但為咗滿足自己食慾,無法啦.

手打蝦膠&鯪魚肉

今日一不做,二不休,決定一次過做手打蝦膠&鯪魚肉餅,一早起身去街市買齊材料就開工.

首先將蝦剝殼,去腸,用生粉&鹽洗去潺,用乾毛巾儘量索乾水份,就用刀背開始拍爛蝦肉

拍爛蝦肉後,會見到有一條好似白線嘅蝦筋,要抽咗佢出來.就係左手邊白色個一條

加埋調味料,鹽,胡椒粉,鷹栗粉用筷子順同一方向攪至起膠,然後加入蛋白,不過如果買嘅係海蝦,拍爛蝦肉時已覺有黏性,所以好容易起膠,跟住撻10幾下就可以放入雪櫃雪凍.

至於鯪魚肉叫魚檔幫手起肉,番來洗淨後就將魚肉打橫切片,儘量切薄啲,將魚骨切碎,跟住就可以用刀啄,但我因為之前右手中指肌鍵炎,唔能夠屈曲攞刀太耐,所以祗好出動食物處理機攪碎,再加調味料,浸泡過陳皮&蔥碎一齊攪同撻,直至起膠為止.

魚膠打好啦,跟住要整乜野餸呢?

答案係我將鯪魚肉&部份蝦膠煎成魚&蝦餅,留番明日炒西蘭花.試食結果魚餅唔夠彈牙,因為俾多咗水&小咗鹽.但係蝦餅就非常彈牙好食

部份蝦膠我用來做蒸饟豆腐,作為今晚一道菜,老公雖然無讚,但食哂成碟餸,應該咁講,佢係從來都唔會讚,淨係識彈,所以無彈即係當讚,但真係幾好食,唔錯,以後會再整

又嚟清熱湯水一煲

昨晚老公話覺得喉嚨痛,牙肉腫咗,所以今朝我跑完步後,順便去就近嘅超級市場買咗包已經洗乾淨,切好嘅湯包,番屋企煲,包括有粉葛,黍米,紅蘿蔔湯,扁豆&赤小豆等,我今次專登唔落肉類,變咗齋湯,試吓味道如何?會唔會好卦?但煲好試飲後又覺得味道幾清甜.雖然湯包價錢貴過自己係街市買材料,但若果無時間洗切,又唔近街市,我覺得都係一個幾好嘅選擇.

睇吓都幾多料加. 黍米,紅蘿蔔湯又可以食番

日本棉花蛋糕第二擊

繼上禮拜整日本棉花蛋糕失敗後,今日又再出擊,今次記得哂所有先後次序,我減咗牛油同糖,入爐焗時亦將麵糊放係下格,爐火較低至150度焗20分鐘後,再轉140度焗多15分鐘,但唔知點解糕面始終裂開,雖然個樣無上次咁衰,但仍要有待改進,下次可能要用平底焗盤,唔好用高身嘅糕盤會好啲.

睇吓旁邊又爆咗啦唉!

用有花蛋糕袋包住送俾朋友,應該唔多覺啩.