第一次浸豉油雞成功咗

繼上禮拜焗完南乳燒雞後,今日繼續同雞有仇,再浸豉油雞.

其實都要準備幾多煮豉油雞汁嘅材料,呢度仲未包括鹵水料在內

時間關係,我係即刻煮滾豉油雞汁後(約一個鐘左右,再焗多半個鐘), 就立即開始浸雞,但未浸之前,要將隻雞拖熱水,再浸落冰水一陣,以免陣間浸係豉油雞汁太耐甩皮.

跟住將隻雞放落豉油雞汁中浸約30分鐘,其間約每5-10分鐘要翻動雞一次,令到雞能夠平均受熱,而中途要將隻雞倒轉吊起,令雞腔內嘅汁倒出,以免過熱,其實大部份時間都係熄火浸,祗係當覺得雞汁唔夠熱時,先開細火,但盡量唔可以令汁滾起,否則雞就會"鞋"

經過一輪雞汁浸洗後,終於將雞浸熟啦

將雞攤凍後,就可以斬件,淋上雞汁,就可以開飯LU.

用呢個方法浸嘅雞,雞肉果然嫩滑,連雞胸肉都唔"鞋",百彈齋主(我老公)都祗顧食,話OK喎,但我稍嫌汁咸啲,應該唔好落咁多生抽,或者加多啲冰糖,無論如何,都算成功咗,自己都好有滿足感,Yeah!,下次會再試吓整白切雞,聽講如果要嫩滑,好似都唔容易.

烹飪課程-第十課(焗芝士疏乎厘&法式冬律)

好快今日已經係最後一堂嘅烹調課,亦即第十堂,今日學嘅係甜品,焗芝士疏乎厘&法式冬律

首先焗芝士疏乎厘,要將牛油&粉搽勻錫紙兜,以防黏底

然後將砂糖&忌廉芝士打滑,再加蛋黃,淡忌廉,檸檬皮碎&汁

另外用盤打起蛋白&糖至企身

將忌廉芝士漿同蛋白混合後,就可以倒入錫紙兜,而焗盤底要加啲熱水先好放入焗爐焗

睇吓係焗爐中升起啦

呢啲就係焗好嘅疏乎厘, 可以灑上糖霜或者果醬食

而法式冬律要將牛油,奶&暖水煮滾,再倒入過篩麵粉攪勻,熄火後分幾次加入蛋液成麵糊

將麵糊倒入唧袋中,再唧落冬律模,放入滾油中炸熟

好快已經炸好啦,再將檸檬糖漿搽上面就食得

呢兩款甜品都好好味,尤其是法式冬律加埋檸檬漿,酸酸甜甜好味道,不過都係偶一為之,唔可以成日食,唔係會好肥架.

新鮮出爐藍莓黑糖麥包

今朝剛焗完新鮮出爐嘅藍莓黑糖麥包.

麵包材料有日本高筋粉,沖繩黑糖粉係去沖繩旅行時買嘅,白色個兜係冷飯湯種,琴晚食完飯後再加熱水煮爛米飯,攤凍後放入雪櫃,今朝攤番出來解凍.乾藍莓就用Rum酒浸一晚,等佢濕潤同有香味,黑麥汁今朝係超級市場順手買呢試吓,已經加咗糖,有甜味可以當飲品,有啲似飲啤酒感覺.

由於冷飲湯種太濕同黏手,所以今次用麵包機,等攪拌完準備發酵時先加埋浸過酒嘅藍莓落麵團.

睇吓焗完後,麵包嘅內部組織都幾好,非常軟熟,不過應該要再落少啲糖,雖然我已經減咗糖,但我唔記得乾藍莓本身已經甜,所以焗出來麵包甜咗啲.

根據上次經驗,冷飯湯種做出來嘅麵包,比較其他方法做嘅麵包濕潤&軟熟,2-3日後仍然可以保持軟熟,唔會咁快老化,唯一係要用水煮爛米飯,比較麻煩.

蛋糕課程-第九堂_鋼琴蛋糕

今日學嘅係鋼琴蛋糕,其實係朱古力蛋糕加造型.

首先要焗個海綿蛋糕底, Miss為咗慳時間,用大盤焗

跟住切成方塊俾我哋造型

 與此同時,先要準備好truffle餡,同埋用熱水煮溶栗膠,加入不同黑色/白色朱古力溶液成為朱古力膠,用刀切好鋼琴形狀後,中間塗上truffle餡,之後蛋糕面及四邊都要塗勻,再擺入雪櫃雪硬

再淋上朱古力漿放入雪檳雪硬,不過呢隻朱古力漿好容易變杰,結果批得個琴面唔夠平滑

最後將黑白朱古力膠切成琴鍵,黏上蛋糕便完成,我無將佢帶番屋企,因為兩個人共做一個,我又唔太鐘鍾意食咁甜嘅野,所以送埋俾我個同學仔,而我就將剩餘嘅朱古力海綿蛋糕同朱古力醬帶走,明日自己做朱古力三文治蛋糕食.

我唸呢個蛋糕我唔會係屋企做,因為手工太多,自己技術又未到家,都係做普通蛋糕算啦.

午餐@Freshness Burger

今日去荃灣幫朋友買"金桶"牛油,順便去二記買麵包粉,買完後本來想去新村街個間"家樂"冰室試下食晏晝,點知11點半已經人頭湧湧,要等位,裡面地方又細,於是漫無目的行咗去千色店附近,見到有一間"Freshness Burger",唸起係Openrice口碑都唔錯,於是入去order咗個set,但唔似麥記要排隊攞包,收銀員俾一個坐枱號碼你,入去自己揀個位坐低,會有人送埋來,時間都係5-6分鐘到.

地方都幾清靜,一邊有排矮嘅灌木,有音樂播放同電視睇,坐位都好寬落

打開包入面共有四層,上面係一層厚切蕃茄,跟住中間有碎肉醬&芝士,下面係漢堡扒,食落好多汁,扒都好鬆化,不過我唔鍾意生嘅洋蔥粒,我食完有時會嘔.

飲品係柚子茶,無乜特別,但要另加$5,認真唔抵

呢個係沙律焗薯皮,有蕃茄,青瓜,菠蘿粒,雖然無另一款芝士,煙肉薯皮咁香口,但就比較健康啲

呢個餐都唔平,要成$51,試吓無妨,但唔會再Encore囉

最後呢一堆就係我今日大出血換番來嘅大堆頭,包括有日本高筋麵粉,兩種預拌粉,椰絲,戚風&貝殼模,黑白朱古力,金桶牛油,香葉kaya醬,泰國棘醬,卷蛋蛋糕膠殼,呢兩日買咗咁多野,有排用,我唸近期都唔會再買野住,除咗麵粉類.

唔買又買

有時真係懷疑女人係咪天生購物狂?

上禮拜行入去"商務",見到萬里樹構做推廣,買滿3 本以上有75折,於是又順手買咗以下3本書,雖然明知其實都唔會跟書做多過3種款式,但總係忍唔住,朋友已經勸我不如去圖書館借,但我唔鐘意要有限期還書,而且見到有些好嘅食譜我又想永遠擁有,唔鍾意影印本,結果就係越來越多書,唉!唔知點算

今日去買餸,經過家庭用品店大減價,有幾款曲奇餅模加錫紙兜價錢都幾平,本來唸住唔好再買,但回心一唸,如果下次要用,可能已經無咁平,於是.....梗係又買埋添啦. 女人真係講一套做一套,無計

是日清潤湯水

而家天氣咁乾燥,為咗自己&家人著想,清潤湯水梗係唔可以停,今日去街市買粉葛,檔主提議我加栗子一齊煲,我未試過,不妨試吓,再加埋扁豆,赤小豆同一塊果皮,無落肉煲

簡簡單單祗係呢幾樣材料,加埋一塊陳皮放落滾水裡煲約3個鐘.

3個鐘後就已經飲得,味道幾清甜,我連蜜棗都無落但唔覺得淡.

南乳燒雞

今日焗咗南乳燒雞,但準備功夫係由昨日開始,首先我買咗一隻冷鮮雞,根據呢間店鋪介紹, 佢哋啲雞劏完之後,隔夜以冷風降溫，不經水浸,所以能夠保持雞味好過冰鮮雞,當然價錢亦都貴啲,要$55一隻,番屋企洗乾淨雞後,就落,乾蔥,蒜頭,薑粒,南乳(壓爛),玫瑰露,糖等,醃佢一晚.

一宿無話到今朝係雪櫃攞雞出來,用熱水淥雞皮,再立即用冰水淋一次,主要令雞皮收缩,稍後焗嘅時候皮會脆啲.再將上皮料(蜜糖或麥芽糖,加白醋,玫瑰露加熱成液體)搽上雞身表皮.

跟住要用鈎吊起隻雞風乾約5-6個鐘頭,最好放在當風地方,吹乾雞表面.我吊佢係廚房窗口,開窗吹乾.

過咗6個鐘頭後就可以將雞放入焗爐焗,因為焗爐有燒雞架,所以唔駛翻來翻去.

經過約半個鐘,就已經焗熟,但中間見雞背同雞翼已變燶,所以將溫度教低,熄火後再焗多一陣先從爐中攞出來攤凍.

攤凍後就可以斬件,再將醃雞汁煮滾加生粉作汁,用來點雞食就完成啦.

食完後我覺得幾好,當然唔可以同新鮮雞比,至於皮都係唔脆,但夠乾身可以單獨撕開皮食,但因為我怕肥,所以將皮掉哂. 下次我會試吓整豉油雞,睇吓食法有乜唔同.

烹飪課程-第九課(泰式魚餅&星洲蘿蔔糕)

今日上烹飪課學嘅係泰式魚餅&星洲蘿蔔糕.

第一步當然要刨蘿蔔蓉,然後用油,鹽,糖煮一煮再同粉撈勻,倒入糕盤後,再攞去蒸熟

蒸熟蘿蔔糕後要攤凍,雪硬,先可以切成丁方粒狀

爆香乾蔥,菜甫,免治豬肉,加入蘿蔔糕粒,紅椒碎,再落蛋&調味就食得,我覺得如果改落XO醬,蝦米炒會更冶味,而蘿蔔糕粒最好煎香先回鑊,會比較乾爽.

另一款泰式魚餅,要將檸檬葉切碎,豆角切粒,再加入調味撈勻,撻至起膠,用左,右手互相撻至成圓形,放落鑊中炸熟

炸好就可以開餐啦,味道同出面泰國餐館有9成相似,以後想食就可以係屋企自己整,慳番唔駛俾人賺囉.

凱撒包&法包

點解要做呢兩款包?因為剛買咗兩個新麵包印同埋介刀,要試新野.

就係呢3樣啦

準備功夫將浸水仙嘅石春洗乾淨

隔晚已經發定中種麵團,今次破例加咗2g麵包改良劑,又加埋法包粉

發酵完就用模壓印

但....點知焗完後完全無哂,唉激死人

跟住焗埋法包,放盤石春落底層,倒熱水落盤中,製造蒸汽,麵包面亦都噴咗水先入爐

焗好啦,中規中距,呢種包好難同出面鋪頭比較,因為始終係家用焗爐,中途我已經將石春移走兼散汽,再焗多10分鐘

麵包孔都有唔太大,麵包面算脆幾軟熟,唔太差入到口嘅