雙色方包

我見係日本麵包網站,登咗呢個雙色包食譜,見都幾好,況且我又未整過雙色包,所以今日試吓焗.

首先用綠茶粉&紅蘿蔔汁分別搓咗兩舊粉團,原著係用菠菜葉攪爛搾汁,我嫌麻煩,所以改咗用綠茶粉.

同平常一樣,經過第1&2次發酵,放氣後,將麵團各分成3份,再搓成長條形

相間地放入麵包模中作最後發酵

發到8-9成滿,就可以放入焗爐焗

呢兩個就係焗完之後嘅側&正面

原本係相同份量麵粉,但發完後唔知點解紅蘿蔔個邊比較多,而綠茶個邊好似無咁發,應該係格仔樣,但而家變成唔知乜樣,但幸好食落都好軟熟無乜差別,祗係形狀唔得靚仔.

手痕又買書

今朝去街市買餸,經過書店,就行入去睇吓,見到所有烹飪書籍全部八折,以我意志力咁薄弱嘅人,梗係出事啦,結果....又買咗以下呢3本書,基本上海綿蛋糕我已經識焗,不過好奇睇吓書點寫,至於冰淇淋就留番出年夏天先試囉,做餅乾就對我非常有用,因為到而家我仲未掌握得好.

Boxing Day-焗蕃薯

今日繼續係屋企無所事事,下晝奄尖大少唸起之前買咗蕃薯,又唔想蒸咁悶,靈機一觸,不如用焗爐焗好似街邊煨蕃薯咁食,二話不說,即刻搬出焗爐.

將兩舊大蕃薯放入去開爐焗,呢個時候已經焗咗45分鐘左右,睇吓出面細個條已經開始流糖汁啦.

再焗多20分鐘度,攞咗條細嘅出來切開,雖然已經熟透,但未起糖心,食落口唔係好甜同唔juicy,所以由得大個條繼續再焗多45分鐘.

好啦,大個條終於出爐啦,表面明顯比較收咗水份同燶啲

切開之後,見到皮肉分離,食落肉質非常淋滑,好juicy,同係街買嘅無乜分別,哈哈,咁又攪掂咗一餐lu...

聖誕再戰雪芳蛋糕

繼上次失敗嘅斑蘭椰汁雪芳蛋糕後,今日下晝無無聊聊,又再試吓焗雪芳蛋糕,今次係檸檬雪芳,吸取上次失敗教訓後,知道我個焗爐溫度較高,所以今次降低爐溫20度先將蛋糕糊入爐,當焗咗10分鐘後,更將爐溫降低多20度,又用錫紙遮面,增加焗時間多10分鐘,結果就係..

睇吓呢幅相都知成功咗啦,好開心呀!

攤凍甩模後都無下陷,不過唔記得將表面燶嘅痕跡剷走,否則就可以完美啲.

呢個係蛋糕內部,好有彈性,同上次好唔同,比較乾身,我俾咗一舊奄尖大少食,佢無彈成舊食哂落肚,我自己就一口氣食咗半個,因為知道無乜油,同埋我又減咗糖,所以又唔太甜,最重要係終於有番啲自信心啦

中式蛋黃蓮蓉包

今日雖然好忙碌要準備聖誕大餐，但仍然抽空蒸咗蛋黃蓮蓉包，因為之前學人炒蓮蓉，攪到舊蓮蓉餡又硬又起哂砂，差啲要餵垃圾桶，但唔訓氣第二日再攞番佢出來，加水慢慢再將佢煮開，最後加埋粟粉打獻，估唔到竟然可以起死回生，攤凍後雪到今日都仲非常軟熟同滑溜。

講番呢個蒸包，首先將中筋粉加糖，依士，梳打粉，少量菜油同奶水攪勻，搓至光滑，成為麵團，再靜至少半個鐘以上。

等待麵團發酵時，將蓮蓉餡包入半隻蛋黃（已用燒酒蒸熟）

發酵後分割麵團，搓成圓形，拍扁成中間厚側邊薄嘅麵皮，包入蛋黃蓮蓉餡，收口向下，包紙墊底，放入蒸籠作最後發酵，坐在鑊中暖水約２０分鐘。

跟住開爐火（猛火）蒸約１０分鐘，再熄火焗１０分鐘，就可以將包攞出攤凍食。

蒸完之後變咗蓮蓉大包，右下角嗰個包，我用麻油掃面加蔥，捲成饅頭。

切開後試食，包皮幾煙ＵＮ，發得唔錯，餡唔太甜適中，仍然好軟滑，都叫做有番啲安慰。

平安夜聖誕大餐（Ｈｏｍｅｍａｋｅ）

今日係聖誕前夕嘅平安夜，我同奄尖大少都無約朋友或者屋企人慶祝，依照慣例兩個人自家係屋企泡製聖誕大餐撐枱腳。

今晚嘅聖誕大餐包括有蟹肉紅蘿蔔粒忌廉湯，主菜有薄牛扒，扒新鮮大蝦＆扇貝，煎龍利魚柳，伴碟有煙肉薯蓉同埋三色椒，至於甜品。。。就欠奉，因為我同佢都唔太鍾意食甜野，所以用生果代替，講咗咁耐，係時候睇吓有幾吸引同好味ＬＵ。

首先買咗一份大眼雞魚（有５條）加埋一份紅花蟹仔（有５隻），將魚煎香後加埋月桂葉，洋蔥，西芹，紅蘿蔔，胡椒粒等香料，再將蟹腳＆蓋一齊放入滾水中煲至少一個鐘以上，至於蟹身同蟹螃就拆肉同埋紅蘿蔔粒稍後放番入忌廉湯中食。

將牛油加熱溶解後落麵粉炒成麵撈，再逐少將上述魚＆蟹湯放入攪拌均勻，直至所有麵撈溶解，無粒粒為止，否則要過篩，最後加入淡忌廉，一滾即熄火，放入已盛有蟹肉＆紅蘿蔔粒湯碗中，灑上香草就可以上枱啦。

伴菜嘅煙肉薯蓉，材料有去皮煲熟薯仔，焗乾身嘅煙肉粒，已焯熟嘅紅蘿蔔＆西芹粒,

趁薯仔未凍時壓爛成蓉，如果仍然有薯粒，就要用篩將薯粒過濾，跟住落適量牛油，牛奶攪勻成軟滑狀，再加入煙肉粒，紅蘿蔔＆西芹粒，落調味就攪掂。

好啦，睇吓今日主菜嘅材料，有薄牛扒，解凍後，祗係灑上胡椒粉同用油掃面，因為已經煮咗黑椒汁伴食，所以唔駛落咁多調味料。

呢啲係奄尖大少下晝收早後去街市買番來嘅新鮮扇貝，同游水竹節大蝦，其實仲有龍利魚，不過唔記得影相

好少有我同奄尖大少一齊開爐煮野，但因為恐怕食物唔夠熱，所以分工合作，由佢負責煎海鮮，我負責煎牛扒，焯熟三色椒伴碟，加埋薯蓉，睇吓個碟都擺到爆哂棚，差啲裝唔哂。

好啦，一切準備就緒，可以埋位開餐，我哋兩個平時滴酒不沾，但今晚破例倒咗啲果子酒出來飲慶祝一番。

用來做完美Ｅｎｄｉｎｇ就係呢個香甜嘅巢皮瓜，我同奄尖大少食完呢餐都覺得好滿足，好過出街同人迫，又貴又唔好食，雖然今餐材料費都唔平，事前事後準備功夫都唔小，但起碼真材實料，食落自己肚有種幸福嘅感覺。

最後祝各位網友聖誕快樂＆新年進步！

第一次焗嘅班蘭椰汁雪芳蛋糕

今日除咗炒蓮蓉外,仲第一次學人焗雪芳蛋糕,成日係網上見到好多人推崇話呢款蛋糕比較健康又柔軟,啱啱買嘅蛋糕書都有食譜,所以就開工啦.

跟食譜做好麵糊倒落戚風模焗,雖然放係焗爐低層,但唔知點解糕面,越升越高,直情火山噴發,唯有較低爐溫度,又用錫紙摭面,結果焗完後就係圖中呢個核突樣啦.

但...當反扣攤凍脫模後,再幫佢整吓容,將糕面片走,竟然當堂變得似模似樣,又唔係咁樣衰,真係有啲驚喜,難怪咁多人要去整容,原來都有啲道理嘅.

切開蛋糕入面,都好軟熟同濕潤,又無下陷,我未食個雪芳蛋糕,唔知係咪咁嘅呢?.今次我唸都叫做勉強過關,仍需努力個隻,下次再試其他味道,睇吓會變成點?

炒蓬蓉

乜野叫做"明知山有虎,偏向虎山行"?就係我今日炒蓮蓉寫照,因為之前學月餅時,Miss已經話炒蓮蓉係需要加熱到特定溫度先可以成功,但屋企有一包乾蓮子,想用咗佢,所以點都試吓炒,睇吓結果會點.

首先昨晚浸定乾蓮子

今朝就煲滾水,放咗一湯匙梘水再放浸過蓮子落去,當煲滾後就熄火焗一個鐘,再將水倒去,跟住反覆沖洗多次,直至將衣沖走,同無梘水味為止

呢個時侯就可以放落滾水中煲約30分鐘左右,熄火焗,直至蓮子煲爛,一揘可以成粉狀,倒去水份,放入攪拌機打爛,再將蓮子溶液放入豆漿袋,扭乾剩餘水份成粉狀

咁就可以開始落鑊慢火炒,其間加適量油,糖,麥芽糖至杰身就可以鏟起攤凍.

其實唔想呃人或者自己,當攤凍後呢舊蓮蓉餡非常硬,而且起粒粒,好似叫做反砂,一啲都唔軟滑,我唸係炒過程中有問題,我都唔識,明日有時間再加水煮吓,睇吓會唔會好啲,基本上可以講係"失敗之作"啦.

蛋糕課程-第十堂_Cup of Tea

眨吓眼已經嚟到第十堂,亦即最後一堂,今次係學做一個甜品,"Cup of Tea"

首先將朱古力溶液倒滿布甸杯內,再將朱古力溶液倒出,擺在室溫或雪櫃內雪硬,然後脫模,但正宗做法係要將氣球洗乾淨,吹氣再用氣球底部黏上朱古力溶液,當乾硬後將氣球放氣,由於工序比較多,所以Miss用咗呢個改良方法.

跟住用朱古力溶液勾劃出杯柄於牛油紙上或朱古力膠片都可以

雪硬朱古力杯後就可以脫模,再黏上杯柄

將茶包放入熱奶中焗一陣,再倒入蛋黃漿中,加埋魚膠片攪溶,另外打起淡忌廉,同埋蛋白加糖,將3 樣混合後就成為紅茶毛士,再倒入朱古力杯中就完成啦

呢杯係my cup of tea, 我會帶番屋企慢慢嘆.