聖誕西點甜品班-第十課-裝飾曲奇

終於上到最後一堂,因為臨近聖誕,所以就做咗個裝飾曲奇,曲奇餅本身唔難整,最緊要將牛油,糖要打發至鬆起,加入蛋黃或蛋液,最後加入已篩麵粉,輕手攪勻,用保鮮袋包好,將粉團碌平,放入雪櫃雪至硬身後攞出,切開塊狀,搓勻再碌薄吸模,就可以放入焗爐焗嘞.

中間吸咗洞嘅曲奇,仲可以放入唔同顏色水果硬糖.

眨吓眼已經焗好咗.

將蛋白加糖霜打起至可以挑起而不跌下,就加上唔同色素,同曲奇餅扮靚.

睇吓同學們唧得幾有創意.

可惜我無乜美術天份,唧得麻麻地,糖霜好甜,所以用嚟裝飾好過食.

黑森林&朱古力慕士蛋糕

今晚去學一堂蛋糕示範課程,原因係我續咗工聯會張會員卡,有番一張優待卷送可以減報課程學費,於是唔好哂,就補咗少少錢去上堂,攞番兩舊蛋糕走都有著數.

由於唔可以影製造過程,最後祗好影吓完成後蛋糕.

前面係黑森林蛋糕,後面係朱古力慕士蛋糕,師傅仲做埋朱古力裝飾.

由於今晚人數眾多,有成16-17人,所以淨係黑森林都要做兩個先夠分,一人一件餅.

朱古力慕士蛋糕

切開黑森林蛋糕,我今晚至知道原來裡面係車里子餡,仲以為係港式個隻啫哩粒,不過我唔係幾鍾意蛋糕用甜忌廉,真係無乜益.

我因為唔想晚夜食甜野,所以用盒帶走,不過隔離同學仔話好食喎,另外今晚得著係學到另外一種海綿蛋糕做法,同埋抆忌廉,整朱古力裝飾,收穫都唔錯.

焗肉醬千層麵

以前都好鍾意食Pizza Hut嘅肉醬千層麵,但次次加埋食沙律,飲凍汽水,結果一定攪肚痛,肚瀉收場,而且pizza太肥膩,已經絕跡無幫襯好耐.

近排上堂學整焗千層肉醬茄子,諗起好多年都無食過千層麵,於是昨日買齊材料自己DIY.

肉醬早一日煮定,因為要慢火煮差不多一個鐘先煮好茄汁肉醬.

首先將乾千層麵用滾水加少少油煮幾分鐘撈起,隔乾水份,將肉醬鋪係玻璃兜底層.

面放一塊千層麵皮,再一層肉醬,放上切粒"Mozzarella"水牛芝士+切塊狀芝士,如似類推,直至頂層.

頂部灑上帕馬臣芝士碎,面蓋上錫紙入焗爐焗30分鐘,揭去錫紙,再焗多10分鐘.

睇吓焗好嘞,個樣唔食都睇得下.

呢個千層麵一家要趁熱食先至好味,味道幾好,同Pizza h Hut有8-9成相似,但梗係多料好多,其實自己整成本都唔平,但勝在就真材實料嘛..

模型麵包

好耐都無用過呢兩個麵包模，所以今日專登打咗兩份麵團嚟焗模型麵包，一條係加藍莓乾，另一條係綠茶豆沙，仍然用低溫中種，麵包焗完會比較軟熟。

焗完甩模攤凍。

切開試食，麵包組織ＯＫ，夠鬆軟，不過出面街買豆沙始終太甜。

中上環廚具店半日遊

今朝起身無乜野要做,見天陰但無落雨,於是出中上環去高檔廚具店見識吓.

第一站就嚟到呢間,一出上環港鐵站就到.

雖然話兩折,其實大部份都要7折-9折不等,啱啱菜刀木柄裂咗,睇完售貨員做示範,連一捲布都可以切得開,係德國製造,而且刀身軾身又有免黏塗層,加埋把生果刀,平均差唔多半價,所以就買咗,至於其他不外國銹鋼煲&pan太重身,鋼水好都無用,我單手都拎唔起,所以無買到.

跟住向上行,經過又斜又彎街道之後,就到咗第2間廚具店.

呢到係店鋪其中一角.

裡面好多外國人會用廚具,矽膠模等,形形式式都有,設計有啲都好特別,但價錢亦都唔平,我祗係買咗呢個搾檸檬/橙汁"尖銳"咋,都要成$58架.

睇吓時間就順路行去個間好出名大排檔食晏,中途經過呢間古舊嘅蓮香樓.

再沿側邊條街行入去轉右行幾步就到,雖然時間尚早,已經高棚滿坐,好彩有人埋單起身,先至有位坐,叫咗個鮮茄牛蛋通粉,加杯熱奶茶,至少等咗成15分鐘先有得食,奶茶幾好飲,蕃茄湯底偏鹹,牛肉ok,不過試一次就算,唔會專登再幫襯,因為無乜特別.

大排檔對面就係個間好出名九記牛腩,,不過要12:30先開鋪,已經有人係外面等近.

食飽飽之後,就沿路落番中環,經干諾道中行人天橋去咗IFC City Supr遊蕩,又買咗以下呢堆野.

包括有高筋粉(特價所以買),海洋深層水(要嚟做護膚品),長形玻璃兜,兩種芝士,千層乾麵(準備整肉醬千層麵).

買完之後就打道回府嚕.....

今日所行店鋪同食野地方,都唔係咁就腳,如果出發前唔上網睇地圖,肯定有排搵,加上港島啲路又窄又斜,又要上石板樓梯級,好似番咗以前舊香港一樣,我覺得幾得意,有啲似鄉下人出城嘅感覺.

試新玩具-DIY 花生醬

近排買咗個新直立手控式攪拌機,主要因為舊乾磨機玻璃兜俾我跌落地打爛咗,而且磨得唔夠粉碎,經過一輪資料搜集後,終於買咗呢部有600W嘅新機嘞.

今次首先試吓整花生醬,將生花生米炒香去衣,放入機內開掣攪,嘩! 好快20-30秒已經好碎,再攪多陣已成漿狀,仲出埋油,基本上都唔駛再落花生油,加啲蜜糖,真係好好味,係攪拌過程中,已經聞到好香花生味,以後再試吓其他配件先.

一人午餐-改良版菜飯

今日天陰落毛毛雨,真係唔想出街,於是利用屋企有限資源整咗呢個改良版菜飯.

材料有白菜絲,臘腸切粒,浸軟蝦米切粒,冷飯一碗.

首先將臘腸粒爆香,利用爆出嚟嘅油爆蝦米粒,再落薑絲,白菜絲,灑酒,煮一陣,落埋冷飯兜勻,加少少浸蝦米水,將冷飯炒開,最後落麻油,豉油調味就食得嚕.....係咪好容易呢?都幾好味架,如果米飯再硬身啲就好嘞.

環亞佳餚精選課程-第九課-照燒銀鱈魚&檳城喇沙

昨日學嘅兩款菜色,分別有日式照燒銀鱈魚,同埋馬來西亞檳城喇沙.

一開始首先煮咗照燒汁先,因為要煮成30分鐘先可以用,將薑,蔥段,日本醬油,清酒,味醂,糖加水慢火煮至剩1/3左右,加入少許生粉水攪勻.

銀鱈魚解凍,抹割水份,用煎pan慢火煎至金黃色,再倒入煮好照燒汁,慢火煮一陣就可以上碟.

照燒汁好好味,其實可以用呢個汁整串燒雞柳,煮定多啲備用,用途都好廣泛架.

至於檳城喇沙,香料比較多,將蒜頭,紅蔥頭,香芧打成蓉備用,將蝦去頭,殼加外層硬香芧,芫茜頭滾湯作上湯之用,椰菜切絲同芽菜一齊熨熟隔水,本來應該用一半米粉,一半油麵,Miss改咗用乾裸條,用冷水浸10分鐘,放落滾水中略為滾2-3分鐘撈起,放入冰水中過冷河備用.

當一切準備就緒後,就開鑊下油爆香香料蓉,辣椒膏,羅望子膏(亦即叫亞參或酸子),粗粒花生醬,芫茜,檸檬葉,紅辣椒粒,將蝦上湯倒入煮滾後再加椰漿,調味料.

羅望子膏包裝

蝦頭漿加入湯內更加好味

煮近蝦上湯

將鮮蝦放入滾湯中焯熟,並將已經焯熟椰菜絲,芽菜,粉條回鑊煮至滾起就可以食嚕....

都相當好味,但如果自己整要減辣.

士都倫麵包

好快又臨近聖誕節,所以今日做咗呢款麵包應吓節,不過雜果皮粒,提子乾就要預早用Rum酒/拔蘭地酒浸定,我就浸咗有成10日.

除咗用酒浸雜果皮粒,提子乾外,仲有杏仁片,少量香粉(丁香,玉桂,豆寇粉)加埋發咗3個鐘嘅液體酵種,而麵粉係一半高筋,一半低筋粉.

呢兩舊係發好嘅麵團.

做型後準備作最後發酵.

焗好出爐,立即搽上溶牛油.

攤涼後灑上防潮糖霜.

切開試食覺得唔太甜,OK啦,但奄尖大少就唔like,因為佢唔鍾意食提子乾,香料麵包,聽講要隔1-2日食,等酒味發揮出嚟,味道會香啲喎.

黃金饅頭&蒸雞蛋糕

饅頭內當然唔會有黃金,祗不過用嚟形容金黃色蕃薯蓉,做咗兩次芝麻饅頭,所以今次改一改餡料,而發酵方法仍然用兩次發酵,類似中種,將70%麵粉,水,酵母發酵一個鐘,再加其餘粉,糖,少許油搓至麵團光滑,休息7-8分鐘,用棍來回捍壓,摺疊重複數次,鋪上蕃薯蓉.

將麵團捲成圓柱體,切成等份,作最後發酵.

蒸咗18分鐘左右就蒸熟,再揭開蓋小小約5分鐘,讓蒸汽散走,就可以完全開蓋.

因為無用壓麵機壓麵皮,所以表面仍然有氣孔,凹凸不平,但都無影響味道,趁熱食好鬆軟.

但蒸雞蛋糕就好失敗,呢個係跟網友教祗係用雞蛋加糖打發後,加入過篩麵粉,泡打粉,攪滑後,再分幾次加奶,慢慢攪勻,最後加少少油撈勻就蒸,但...點知蒸完後,完全死死實實,一啲都唔發,我懷疑泡打粉失效有關.

但又應承咗蒸俾阿媽食,於是祗好用番第一次方法,搬出電動打蛋機,將蛋加糖打至淡色加企身,再加奶,麵粉,用另一樽泡打粉,倒入模中再蒸過,今次好啲,但氣孔相當大,下次要再努力改良至得.