第一次打蜜糖皂

已經上咗成6-7堂,而家先開始第一次自己打皂,其實都好驚會失敗,幸好第3日剪開紙盒都算成功,祗係切皂唔得平滑,仲要等多兩個禮拜先可以用呀,真係等到頸都長埋,如果好用都會繼續,但真係打到手軟,又無人幫,又無用機打,全程人手,加上計多咗減鹼量, 結果足足打咗成40分鐘,打到索哂氣.

健康南瓜仁南瓜方包

好耐都未做過呢款包喇,今次仲加埋南瓜仁添,可惜南瓜茸水份太多,結果麵團非常黏手,完全唔可以用手搓,引致未能充份排氣,所以麵包氣孔粗大咗,因為用低溫中種發酵,所以仍然好軟熟/

一年一度又嚟包粽

今年已經係第3年包粽,回想第一年嘅慘痛失敗經驗,真係印象深刻,今年要提早啲包粽,因為要遷就同朋友聚會時送俾佢, 但包粽預備工夫真係幾多,包括要浸/烚粽葉,浸/蒸江瑤柱,冬菇,栗子乾,又要浸糯米,綠豆,再用油鹽撈勻,仲有剝咸蛋攞咸蛋黃,醃五香鹹肉,一大堆工夫要做,如果唔係奄尖大少鍾意食,我肯定唔會包.

講完咁多費話,開工包粽嚕....,呢度係其中一部份,因為要練習包粽方法,所以有兩種唔同包法,有4角&5角形,內容一樣,不過奄尖大少怕膽固醇,所以佢食個啲就無咸蛋黃,而我剛巧相反,仲要落全隻,先覺得好食.

包完後烚4個鐘,再焗係煲內一晚,先攞出嚟隔去水份.兩斤糯米,一斤綠豆,總共可以包到21隻,一半送俾朋友,一半留番俾自己,食唔哂嘅粽要放係雪櫃冰格,留待要食時先解凍,或者放入滾水中原隻浸熱就得架喇.

呢隻係5角形粽子,下面係4角形,雖然包工有進步,但水草繩紮得唔夠實淨,加埋個啲粽葉係舊年用剩,數個夠包粽,咪諗住唔駛再買新粽葉,點知經過一年後,粽葉又乾又脆,非常容易裂開,差啲唔夠包哂所有粽,真係一步一驚心.

好嘞,終於解開粽葉試食喇.

睇吓餡料幾豐富,包括有冬菇,栗子,江瑤柱,五香鹹肉,咸蛋黃,食落糯米,綠豆夠火路,所以好軟滑,祗係味道比較淡啲,但同街外買嘅粽比較,真係好食好多,雖然幾辛苦,但都值得嘅.

又開工DIY護膚品

之前做嘅化妝水,潤唇膏都用得7788,而且又應承送護手霜俾朋友,於是今日開工,一口氣做咗以下幾款, 包括有:

潤唇膏可以自用或送禮都得,我用咗蜜臘,荷荷巴油,甜杏仁油混合而成,忘記加橙花精油,變咗無味,但都好滋潤.

呢兩支護手霜係做嚟送俾朋友, 材料有EV橄欖油,乳木果油脂,純水,乳化臘,薰衣草精油,我將燒杯內剩餘物資刮埋搽上手腳,都覺得好潤,我諗佢哋都會鍾意.

最後一樣係做俾自己用嘅西柚保濕化妝水,我用咗金縷梅花水,甘油,角鯊烯,玻尿酸,自製蘆薈莘取液,金盏花萃取液,西柚精油, 噴上塊面時覺得好舒服,又有西柚清香味道,幾好,唔錯.

繼續懶人免搓包-藍莓方包

繼續做免搓麵包,但用咗啤酒代替水份,將所有材料撈勻後,放入保鮮袋中,再擺係雪櫃一日,好似低溫中種咁,今日由雪櫃攞麵團出嚟一陣後,將麵團稍為伸展成長方形,放入浸咗Rum酒藍莓乾捲起,再放於方包模內發酵多50分鐘,就可以焗嘞.

麵包面簡單地灑上麵粉.

甩模後攤凍

攤凍切開睇吓麵包組織唔錯,同搓麵團差不多,食落雖然無用低溫中種發酵咁軟熟,但都叫做OK,好過用直接法,至少唔駛搓餐死,又要等發酵,以後都會用多啲呢個方法.

手機袋

好友呢個禮拜生日,昨晚用咗4粒鐘,做咗呢個手機袋送俾佢作為生日禮物,希望佢鍾意喇.

自家縫製第一個拚布袋

原本老師教我們縫製係拼布背囊,但我唔鍾意揹背囊,所以參考書本後,改成側背袋,但經壓縫後,好似袋尺寸細咗啲,基本上都叫做可以用得吓咁.

袋正面

袋後面唔想再做拚布,所以縫上喱絲玫瑰花作裝飾就算.

裡面就做咗兩個大,小暗格,加一個拉鍊袋.

懶人做麵包-免搓咖啡合桃麵包卷

好耐都無做過免搓包,之前做過,覺得麵包好煙韌,口感唔係好似麵包,所以試完後就無做過,近日係網上見到呢個食譜,話麵包組織好鬆軟,所以又再試做.

首先將麵包材料撈勻成一個麵團,因為水份,蛋,油加埋液體成84%以上,所以好黏手,唔可以用手搓,祗可以用湯匙,或餐刀,將材料混合,將麵團放入已搽油保鮮袋包好,放入雪櫃一日,第二日再攞出嚟,將麵團拍成長方形,要落多啲手粉,搽上咖啡液,灑上烘香合桃碎捲起,再打直對半切開,頂部不切開,扭成麻花狀,最後發酵30分鐘,灑上筋粉係面,就可以焗喇.

稍為攤凍後,切開試食,果然真係好鬆軟喎,都幾好,以後想懶就可以用呢個方法嚕.....

無孔4片口金包

呢款係上堂學嘅無孔4片口金包,現在已經好少人做,因為要用一個工具鋏夾實口金邊,所以無孔,但要將布邊塞入口金邊內都有一定難度,唔易做.

菠蘿果醬包

今日就用咗前兩日煮好嘅芒果菠蘿果醬做包,今次無用低溫中種,而改咗用普通中種法,即係搓好70%麵團,放係室溫發酵兩個鐘後,再加埋30%粉,其他材料打至起薄膜,就可以第一次發酵,因為天氣熱,所以發酵30分鐘已經可以分割,搓圓後再等20分鐘就可以包餡,而最後發酵都係用咗20分鐘,就已經可以入焗爐.

放已經包餡包包入天使蛋糕模內作最後發酵.

搽上蛋漿就可以攞去焗嚕....睇吓出爐個樣係咪好吸引呢?

甩模後就好似個皇冠咁嘞.

攤凍切開試食先,麵包發得好鬆軟,果醬又唔太甜,真係好"正"呀.

莫名其妙留言,不可回應

近排我每次出網誌都會出現一啲莫名其妙留言,見到有啲網友什至有10幾個呢類留言,真係好離譜,但Yahoo好似無佢哋符,原本係呢度寫blog,係想同大家交流,分享一些自己生活鎖碎事,但現在似乎已經變咗質,攪到好多網友另外開facebook,而我覺得facebook始終對個人私隱保護唔夠,亦唔想再開多一個類似blog,所以暫時決定我會繼續係呢度寫blog,但全部都會設定"不可回應",以避免再受騷擾,請大家見諒.

芒果菠蘿果醬

之前整嘅士多啤梨果醬差不多食完,所以今日就整咗新口味嘅芒果菠蘿果醬.

首先買咗兩個超熟嘅菠蘿,加三隻芒果.

菠蘿去皮削釘去芯後,將菠蘿切塊放入鹽水浸一陣,撈起去除水份後,放入攪拌機打成菠蘿茸,芒果去皮後,亦將果肉打成茸,加入適當砂糖,因為要視乎生果甜與酸決定,無一定比例,再加半個檸檬汁,以防變色及增加果膠濃度.

靜置3個鐘後,用煲開細火煮,其間要不停攪拌,直至果醬變濃稠,或用茶匙攞少少放係碟中,用手指劃過,如果果醬分開無融合一齊,就差不多可以落果膠,但我無果膠,就用咗粟膠代替,最後加埋生粉水就完成喇.

記住玻璃樽要放落滾水消毒幾分鐘先可以用嚟裝果醬,否則果醬會好快變壞架. 未煮之前芒果味濃過菠蘿味,但經過高溫煮完後,反而祗覺有菠蘿味,下次再煮可以唔駛落芒果,反正都食唔出,哂料呀.

芝麻牛油卷

原本牛油卷應該精緻細個啲,但我唔想捲到手軟,所以變成咗呢個加大版嘅牛油卷, 仍然用低溫中種發酵,呢款麵包同普通芝麻卷分別在於係捲之前,搽上一層溶解牛油,令到焗完後麵包內部組織層次比較分明,我自己食梗係用植物油代替喇.

今日天氣好熱,所以第一次發酵祗係30分鐘,最後發酵亦祗係20分鐘已經足夠.

焗好切開睇吓,隠約見到麵包內部一卷卷.

食落明顯比芝麻卷鬆軟.

簡單又好味-雙色饅頭

已經食哂麵包,但又唔想焗麵包要等發酵咁麻煩,所以就做咗呢款簡單嘅中式包點,雙色饅頭做明日早餐.

啡色部份係加咗無糖可可粉,疊埋白麵團一齊捲,再切件,而家作最後發酵.

眨吓眼就蒸熟嘞.

趁熱食咗一個,饅頭好鬆軟,有淡淡朱古力味,間唔中換吓口味都唔錯呀.