拼布職員証件套&彈片口金包

近排做咗兩個職員証件套&彈片口金包,職員証件套準備送俾兩個老友返工時用,而彈片口金包就因為裁布多咗,正面加少少裝飾就完成.

不過幫老師買朴棉太厚,所以証件套好厚身.

証件套背面

彈片口金包,其實應該用深色線縫布邊,好似好啲.

總共就做咗三件作品.

紅蘿蔔方包

今日一口角氣做咗兩條方包,因為之前應承咗朋友請佢食包,另一條留番俾自己做早餐,自己有份食梗係要健康啲,今次用咗紅蘿蔔,一半打成茸,撈埋落麵粉搓,一半刨粗絲放埋入麵團中,咁焗出嚟又有顏色,又見到紅蘿蔔絲一條條嘞,仍然用低溫中種發酵,但可能紅蘿蔔茸同埋絲水份較多,結果麵團勁黏手,如果唔係用麵包攪拌機,肯定搓唔掂.

切開麵包組織都好軟熟,希望朋友鍾意食喇.

蜜糖芝麻全麥包

又要整包做早餐嘞,翻開書搵吓靈感,睇到呢款包幾健康喎,於是就決定做嚟試吓.

今次用中種法,將70%麵團打起後,置室溫個半鐘,再將剩餘30%材料加入,如常程序發酵入焗爐焗,而黑芝麻最好焗香先同麵團混合,咁芝麻香味會濃啲.

祗係頂部4邊未頂角咋,其餘3面都起哂角架.

唔知係咪因為夏天夠熱,所以發得幾好.

又嚟包粽

再包多次粽原因係上次端午節包完粽後,有剩低啲材料,所以就再買啲補充夠包多一次,一來可以練習多啲,二來將烚熟嘅粽放係雪格冷藏,要食嘅時候,攞出嚟放入滾水中焗一陣,解開粽葉就食得,一隻可以當一餐晏晝,真係乾手淨腳,雖然預備包粽工夫比較麻煩.

今次包咗13隻,其中4隻包俾奄尖大少食走"咸蛋黃".

今日晏晝就解一隻嚟試食先,今次比較好味啲,因為上次睇錯落鹽份量撈糯米,落少咗,所以淡口啲,希望出年包粽包得靚仔啲,今次俾奸商瞞騙,將細塊粽葉夾係中間,結果好多都因為太細唔用得,真係激死人.

三角口金包

呢款口金包係課程最後嘅一款,市面好難搵到呢款口金架,老師話要搵專人訂造.

原本老師教係側面返口,但發覺夾唔穩袋口,所以自己改為係頂部做返口.

再捲縫埋返口,插入口金鐵線,而下方度好位,縫好拍鈕.

將上間掛飾沿口金鐵線向下拉,同拍鈕合埋就成為三角形口金包,但實際並唔係咁好用,口金鐵線插入布內,並不容易,而且令裡布損壞,我會嘗試用Kelly口金包書所教方法再做,睇吓可唔可以改善上述問題.

免搓甜麵包

天氣咁熱,其實最啱發麵包,但奈何熱到直情唔想郁,最好就做呢款免搓包, 好簡單隔日將所有材料撈勻,用塗油保鮮袋索緊口袋,放係雪櫃一日,攞佢出嚟室溫回暖,作最後發酵,放入焗爐焗就攪掂,真係乾手淨腳.

麵包組織都OK架,口感同直接法所做麵包差不多,所以原來麵包唔一定要搓嘅.

手工皂

今日終於上完10堂手工皂課程,短期都唔會再學同類課程,原因係祗要識咗基本配方後,就可以運用自己想像力加材料配搭,自由發揮空間好大,我又無興趣玩渲染或用皂基玩不同製成品,以現在自己所學,應該可以夠用喇.

睇吓上堂學嘅製成品, 包括有由前排左至右, 椰子油皂(用作洗衫,洗碗,清潔力強),棕櫚油皂(中性,可沖涼,洗頭,潔力稍強),橄欖油皂(適合乾性皮膚用,滋潤),超脂皂(額外再加卯磷脂作超脂油份,所以性質同橄欖油皂一樣),中排由左至右,五油皂(即含有5種不同營養成份油做成), 雞蛋皂(用雞蛋做超脂),朱古力渲染皂(用食得黑朱古力加皂液劃線,不過由導師示範), 再生香蕉皂(刨椰子油皂成薄片加油,香蕉茸搓成球狀). 後排由左至右, 薑蜜皂 (加入蜜糖,薑粉,檀香粉,不過我覺得成皂後味道似麥香餅多啲), 最後就用皂基加入不同顏色 和模具,可以造成不同形狀.

呢啲就係用皂基加入不同顏色做嘅製成品嘞, 係咪好靚呢?

攪鬼比堅尼泳裝皂,係導師帶番嚟俾我哋參考, 唔係即場做架.

一氣呵成-香蕉蛋糕&藍莓奇異果醬

今朝見到檯面食剩一隻梅花點香蕉,於是就用咗佢嚟焗蛋糕.

呢個蛋糕都好健康,因為祗係落咗一湯匙芥花籽油,蛋,糖,蜜糖,麵粉咋,但可惜蓋錫紙時遮唔哂攪到變咗鍾無艷,一邊比較燶.

又心急甩模,結果個底起得唔夠平滑,好彩自己食就無問題喇, 但都唔影響蛋糕味道,唔太甜又軟熟.

跟住做開唔好俾自己停,將有人嫌酸藍莓加埋金奇異果切粒,加入砂糖醃一陣.

煮到夠杰身,就加入麥芽糖再煮,最後加埋粟粉水就完成喇...自從識煮果醬後再無買出面果醬,自己整100%真正生果,健康好多架.

十元店掃貨

我趁今日下晝比較得閒,於是就去十元店巡視吓,結果掃咗呢堆野返屋企.

全部都係做手工藝材料,包括塞棉,不同顏色絨布,袋膠手柄,3條不同顏色尼龍帶,可以做側背包或手挽包,仲加埋我至愛黑糖米通添.

爐甘石消炎止痕膏

之前同學仔做咗呢隻藥膏俾我試用,發覺效果都唔錯,於是問佢攞咗配方,買齊材料實行DIY開工嚕....

我用咗金縷梅花水,甘油,紫草萃取油,乳化臘,爐甘石粉,氧化鋅,精油就用咗羅馬洋甘菊,尤加利樹, 呢度份量應該可以用好耐吓.

芝士粟米山形土司

好耐都無整個呢款包,今次仲加料"芝士",睇吓好唔好食,我將一半栗米粒打爛成蓉同麵團撈勻,另一半就原粒捲入麵團內,仍然用低溫中種,外面滾上玉米粉.

眨眼就焗好喇,不過由於有少許芝士溶咗漏出嚟,變咗好似豆皮咁.

不過隔夜切開後仍然鬆軟好食,幾好喎.

手作筆袋

原本唔諗住不再做拼布,但上堂時見到同學仔個個都好努力,埋頭苦幹,於是就揀咗個比較簡單筆袋做,但仍然要化咗幾日時間先完成.

行深水埗有收穫

因為近期去學拼布同埋口金,所以趁今日去開旺角.順便去埋深水埗,睇吓有無材料啱買,由深水埗地鐵站A2出口,沿北河街行去汝州街,基隆街一帶,非常多店舖,真係花多眼亂,結果行咗差不多兩個幾鐘,買咗以下呢堆野.

包括有4塊布(一碼一塊),兩個線轆,5條拉錬,一埋裝飾木公仔,一包花鈕,,幾條織帶,棉繩, 但都係用咗百幾元,都算好底買.

其中最貴係呢啲有顏色嘅木公仔裝飾,要成$8一個.

最底就係呢5條拉錬,$3有5條,真係平到笑.

仲有呢包花鈕,一"箕"買$16,有成14X粒,7-8種顏色,平均一毫子多啲,我一個人用唔哂,諗住上堂時,讓啲俾同學仔.

自製金磚...蛋糕&椰汁椰糖蒸雞蛋糕

好想整呢款蛋糕好耐,但諗起要落好多牛油,又有啲猶豫,結果決定做一次,今日將昨日已混合好麵糊由雪櫃攞出嚟回暖,再攪拌麵糊,令到麵糊均勻啲,再用湯匙放落錫紙兜裡面,放入焗爐焗約15分鐘就攪掂嘞.

撕去紙兜就食得,真係好好食,外皮脆而裡面軟熟.

呢個金磚蛋糕本來想整俾阿媽食,但又驚佢嫌外皮硬唔鍾意食,決定再蒸個椰汁椰糖雞蛋糕俾佢,用椰汁加椰糖會添加香味,仲可以去咗雞蛋腥味,我諗呢個會啱佢食多啲.

芒果慕士蛋糕

今日下晝會同一對新婚舊同事食晏,所以準備咗呢個簡簡單單芒果慕士蛋糕祝賀佢哋,百年好合,永結同心,但可惜呂宋芒已過造,水仙芒又唔夠香味,結果今次芒果比較酸,要加多啲糖先可以中和酸味.

晚裝手挽口金包

呢個口金包係上堂學嘅,但同導師買呢塊布好披口,一路做一路甩線,真係好擔心子口位都甩哂無剩,加上我應該唔會用,祗係用作交功課,所以內袋拉錬上得唔好都費事拆.求其縫埋就算.

因為用普通裡布,所以入面唔係好見得人.

裡面有兩個大,細袋,同埋拉錬袋,不過車得麻麻,我多數唔會用,祗係留作紀念就算.