打底口金包

好耐都無做過口金包嚕,剛剛朋友送咗啲口金架俾我,所以就開工當做練習,順便送俾週末要見面一個朋友.

今次用咗新買較堅挺朴布,但太硬,反口同上口金架都好辛苦,上完又再拆口金架兩次,但仍然唔太滿意.

小束袋兩個

呢排天氣無咁熱,有番啲心機整吓野,見到之前買咗好多布塊,所以開工車咗呢兩個小束袋俾朋友仔.

車咗小小花邊同訂咗花鈕做裝飾,繩結都用碎布做花包住.

後面仲訂埋"Handmade"布標,驚死人唔知係DIY添,哈哈!

DIY 護膚品&香水

近排天氣開始轉涼,皮膚亦比較乾燥,加上應承朋友做美白面霜,今日就一氣呵成,做咗以下一堆野出嚟.

首先出場有簡單易做玉蘭花卸妝油,加花香味主要掩蓋油味,包括有葵花籽油,Twen80.

接住係要還人情債嘅美白面霜,材料包括有葡萄籽油,純水,綠茶,甘草,熊果素萃取液.左旋維他命C粉,Vita B5,尿囊素, 乳化蠟,玫瑰精油等等,不過因為葡萄籽油,維他命C粉會有光敏作用,所以祗可以晚上搽.

再跟住做呢款防老化面霜係俾自己用,因為自己比較成熟呀嘛,材料有玫瑰花水,玫瑰果油,卵麟脂,人蔘萃取液,尿囊素,甘油,乳化蠟等,質感真係好軟滑,又保濕,聞到有清淡玫瑰花味,不過呢款面霜唔係個個人啱用,年輕皮膚用咗可能會生暗蒼架.

剛剛上完做香水課程,買咗成20種唔同香精,梗係要做實驗,試吓自己設計香水配方喇,但呢5款係上堂做,左面1-3樽係老師設計配方,而左面4-5兩樽係自己設計配方,再俾老師修改過,無問題就可以入樽嘞,至於味道大致上都OK,不過就算同一種配方,入樽先後次序,出嚟味道都會唔同,加上唔同體溫同埋各人喜好,差異可能都會好大架.

而呢兩樽就係今日自己設計試做香水,一款基調係檀香,麝香,中調茉莉,前調青草+柑橘,另外一款基調白麝香+檀香,中調鬱金香+向日葵,前調百合,聞落味道都OK,但最少等2-3日後先清楚究竟掂唔掂? 無問題就送俾朋友當禮物.

顏色漂亮而又健康紫心蕃薯方包

去街市買餸時見到紫心蕃薯好平,於是買咗幾條做麵包.

隔日切開食仍然好軟熟,因為用咗低溫中種發酵關係.

繼續手作-眼鏡袋

做完小花屋鎖匙包後,仍然有興趣繼續想做,於是就揀咗呢款眼鏡袋做,不過袋身似乎稍為寬咗啲.

手縫小花屋鎖匙包

自從去學完拼布口金課程後,熱誠開始冷卻下來,無再做任何製成品,但諗起10月有朋友生日,於是就跟書做咗呢個小花屋鎖匙包,希望朋友收到後會喜歡喇.

雜果仁包

見到麵包書有呢款雜果仁包,諗起自己都買咗唔同種類果仁,一於試吓整先,首先將雜果仁(腰果,松子)烘香,再壓碎成粒狀,另外將杏仁粉,榛子粉都稍為焗至有香味,一齊同麵團混合發酵,其實打好麵團已經聞到好香果仁味.

最後發酵,搽上蛋汁再灑上雜果仁碎係面,就可以攞去焗喇.

焗好出爐,聞到好香果仁味,攤凍後切開試食都好好味呀

防曬抗氧化面霜

日間用乳霜已經用得7788,於是今日就做咗防曬抗氧化面霜,材料包括有玫瑰花水,紅酒多酚,維他命B5&E, EV橄欖油,二氧化鈦,再加上佛手柑精油,細個兩盒準備送俾我兩個老友試用.自己搽過都覺得幾好,唔錯.

夏日線衫套裝

終於織起呢套線衫喇,講你都唔信,前後織咗成3年,原因係想離職前,織好送俾一位提攜過我舊同事,但點知臨走前忙於做埋手尾同埋要同我工作繼任人交接工作,忙到抽筋,所以最後買咗一份禮物俾佢,咁樣呢件線衫就無乜特定目標要送,織吓停吓,轉眼就咁過咗成3年時間,我決定要今年之內完成埋手尾,唔想再拖,終於攪掂喇.

呢件係裡面背心

加上外套, 可以一齊著,或者拆開同其他顏色外套/背心成為另外一種配搭.

裸麥包

前幾日專登去烘焙店買包裸麥粉番嚟整呢個裸麥包,仲加埋全麥粉,但焗好後發覺裸麥味道唔太突出,唔知係咪落得太少?下次要加大份量至得,不過仍然都好好食,奄尖大少都有捧場,食咗一塊咁多.

無泡打/梳打粉黑糖糕

早前係網上見到台灣妃娟做呢款酵母版黑糖糕,諗起上次去沖繩旅行買番嚟嘅黑糖塊,於是就試吓跟食譜做一個.

就係呢包黑糖喇.

我隔晚已經煮好黑糖蜜,今日加熱水溶糖蜜後再加新鮮酵母,同麵粉,油混合,靜置室溫1.5個鐘,見到有泡升起,就倒入模中,蒸約20分鐘.

再趁熱灑上烘香黑白芝麻,味道都好特別,不過糕質似砵仔糕,唔係西式蛋糕咁鬆軟.

紅蘿蔔方包

打開雪櫃見到有半條紅蘿蔔,就將佢打成紅蘿蔔汁加茸,同麵團混合,焗咗呢款紅蘿蔔方包做早餐.

自製中秋月餅

一年一度嘅中秋節又快到,梗係要趁機練習整月餅喇,今日約咗朋友仔嚟我屋企一齊整,但由於時間關係,之前我已經煮咗蓮蓉餡,奶黃餡,同埋搓定餅皮,原本可以係烘焙店或街市買到蓮蓉餡,但試過覺得好多油,好甜,為咗健康著想,所以雖然工夫麻煩啲,都係DIY好啲.

今日主要係包餡,入模做型,同埋焗,不知不覺都要用咗兩個幾鐘先完成.

呢款係蛋黃蓮蓉月,鹹蛋黃要事先蒸熟,再用蓮蓉包裹住,不過剛焗完,餅皮比較啞色同埋硬身,要放係室溫等佢回油,先會油潤架.

趁攤涼後,急不及待即時切一個試吓,朋友覺得味道都OK,而且有陣陣香味,又唔太甜.

呢款比較迷你嘅係奶黃月餅,但係朋友帶嚟嘅"Hello Kitty"模,焗完後完全無哂樣,木印幾個就模模糊糊.

雖然賣相麻麻,但唔影響味道,祗係再減糖就更完美嘞.

食完晏見仲有時間,於是我提議焗蜂蜜蛋糕, 可惜今次仍然有啲沉底,要再研究改良先得,而且因為用哂高溫龍眼蜜,用普通蜜糖,所以蜜糖味唔太明顯,要努力再改進.

朋友仔仲送咗個自己縫製針線包俾我做禮物,真係多謝佢.

呢款書籤係佢上次送俾我,仲绣咗我個英文名,真係好有心機同誠意, I like it.

粟米芝士包

基本上而家整麵包都係見到有乜材料係屋企就整乜野包, 今次係雪櫃搵到粟米粒同芝士片,所以就整咗呢款粟米芝士包.

因為懶惰無將麵團磅好平均兩等份,結果變成邊大邊細.

切開見到有洞洞就係芝士溶咗,但間中換吓唔同風味都幾好,雖然隔咗一日先切開,麵包仍然柔軟,果然用開低溫中種好難轉用其他發酵方法.

綠茶豆沙麵包卷

見到雪櫃仲有豆沙餡,但又唔想哂咁多時間做細包,逐個搓同包餡,所以就整咗呢款麵包卷.

焗好外面好似普通方包一樣.

但切開就會見到一卷卷豆沙餡,有好清新綠茶香味,但豆沙餡就稍為甜咗啲.

香茅豬扒撈檬

今日約咗志趣相投朋友嚟屋企,一齊焗麵包,晏晝都係自己整,我同佢都好鍾意食香茅豬扒撈檬,所以今日午餐就係呢款嘞.

豬扒係用咗自己種嘅香茅同埋九層塔醃,味道特別濃,加上用新鮮豬扒,好味到我哋兩個人食哂成兜粉.

至於麵包,今日試吓做咗呢款杏仁醬花生麵包,麵團無加任何油,祗係加咗花生醬代替,而麵包面就搽上杏仁醬,但因為錫紙蓋唔到全面,結果有部份燶咗,但切開仍然好鬆軟,好好食.