英式提子鬆餅

之前曾經試過用lemon soda汽水整scone,但發覺雖然比較健康,但較為硬身,無乜香味,所以今次轉試用英式傳統做法,即係有牛油,酸忌廉,蛋,糖,泡打粉,仲自己加埋忌廉芝士,一焗完出爐已經好香.

趁稍為攤凍後,切開搽上自製藍莓果占食,外脆內軟,真係好味到唔停得口呀,不過明知好味代價係高脂肪,膽固醇,所以會分甘同味,送啲俾朋友試吓,絕對唔會獨食架.

洋甘菊body lotion

上次做嘅body lotion差不多用完,於是今日攞齊材料出嚟,準備又要開工補貨先.

今次材料包括有洋甘菊花水,己過濾洋甘菊浸泡橄欖油,甘油,有機椰子油(無係圖中,因為後加),德國洋甘菊精油,乳化臘,抗菌劑等等.

攪完一輪後,見到杰身就完成,可以入樽,容易過打皂好多.洋甘菊可以舒緩神經,雖然無玫瑰或茉莉花咁香,但佢清新味道都唔錯架.最緊要係成份天然,對皮膚好好多.

焦糖燉蛋芝士餅-Cream Brulee Cheese Cake

呢款蛋糕係我朋友好耐之前推介俾我話好好食, 但係睇見食譜落好多蛋黃,好驚食完膽固醇過高,前兩日因為用咗蛋白做餸,於是決定試整一次,睇吓係咪咁好食.

做法都好簡單,我因為買唔到酸忌廉,結果用純乳酪化替,呢個餅要有耐性,用低溫慢慢焗,我仲係焗盤加少少水,等個餅無咁乾身.

焗完個面有些少燶

攤凍個餅後,灑上黃砂糖,用火鎗燒吓餅面,就會有一層脆糖面.

切一舊試吓食先,唔...質感好似NY Cheese Cake咁,但當然無咁濃郁芝士味喇,都幾好味,但咁高膽固醇嘅餅,祗可以偶然食吓,如果唔係一定"超脂'啫.

台式冬菇肉燥

係網上見到網友煮嘅台式肉燥,材料簡單又易整,我曾經買過一罐台灣"渡小月"嘅肉燥,但發覺好鹹,又好油膩,所以都係自己試吓整好過.

材料就係睇見咁多,自己再加料蝦米碎,首先爆香蔥,蒜蓉,落蝦米碎,加少少酒可以去腥味,再落免治豬肉,已經用胡椒粉,薑汁酒,豉油醃一陣,再加埋冬菇粒,調味,慢火煮兩小時,變成肉末狀,加麻油,生粉水埋獻就煮好嘞.

呢兜就係煮好嘅冬菇肉燥,可以用嚟撈粉,麵,或者加茄子撈飯又得,都有好多種食法.

又焗日式芝士蛋糕

主要見到芝士忌廉就快到期,但又唔想做凍餅,所以就再做日式芝士蛋糕,回想開始做呢款蛋糕時,簡直一塌糊塗,好彩而家終於掌握到些少技巧,爐溫等,可以見得人,食得入口喇.

首先餅面無裂開.

蛋糕倒扣後反轉,顏色深咗,食譜話唔駛倒扣,但上次我覺得效果唔係咁好.

我好少食番自己整蛋糕,多數係成個送俾朋友/家人,不過今次無諗住送俾任何人,所以就切一舊食吓喇,味道同蛋糕質感都幾好喎,夠幼滑,其實係我將芝士麵糊過篩兩次,先再加打發蛋白混合,所以真係懶啲都唔得架.

牛奶方包打孖上

而家為咗慳功夫,時間,通常都會一次焗兩條方包,今次就整咗兩條簡單牛奶方包, 主要係加奶粉同牛奶,而且開始用番以前買嘅乾酵母,因為新鮮已經用完,又唔想專登出去二記買,不過麵包組織都好軟熟.

紫草消炎抗菌皂

我將之前浸咗本來想做紫雲膏嘅紅條紫草浸泡橄欖油,加入椰子油,棕櫚油,白油,light trace後再加入尤加利,茶樹,薄荷精油,因為係準備打俾奄尖大少用,咁樣我諗應該可以洗淨啲汗味啩?

不過甩模,風乾相隔3日先切皂,仍然好軟身,係咪要落多少少椰子油或者白油呢? 至於菸菸藍藍顏色就一早係其他網友Blog度知道,不過自己人用,最緊要有益,顏色唔夠靚都係其次啫,係咪?

香橙牛油蛋糕

又嚟試整牛油蛋糕,當然係用來派街坊喇,今次加咗橙果醬,橙皮茸,焗完蛋糕再掃上橙酒糖水,用保鮮紙包實蛋糕,等香味滲入蛋糕內,隔日先切,果然香甜好味,不過牛油加砂糖要打起,真係好辛苦,因為砂糖好難完全溶解,打咗好耐,仍然覺得質感唔夠幼滑,下次都係要改用糖粉,效果可能會好啲.

士多啤梨慕士蛋糕_奶凍

本來做定呢個士多啤梨慕士蛋糕,準備上星期六送俾朋友生日,點知突然要入院,結果蛋糕要等到我出院後,自己食咗佢, 今次慕士餡比較甜,做得麻麻地.

另外將剩低忌廉做咗奶凍,加埋切片士多啤梨食,係唔錯甜品.

忽視小問題後果

昨天剛從醫院回家,原因係我自己忽略身體上一些小問題,結果積累到現在趁機爆發,上星期六去醫務所睇病時,醫生話要入院才可以處理,結果係毫無心理準備下,即時入院,仲要係坐救護車去,真係攪笑,入到院後,當晚零晨開刀,全身麻醉,不知什麼時間回病房,但回到病房後亦唔可以好好休息,因為同房個啲阿婆晚野會不停狂叫,自己高聲講野,完全失控,據姑娘話老人痴呆就會咁,希望自己將來老時,唔好變成同佢哋一樣, 翌日醫生巡房話剛做完手術唔可以立刻出院,結果又要捱多一日,俾阿婆轟炸,祗好趁日頭盡量休息,整日半睡半醒,當到咗晚上,情況又開始惡劣,阿婆們又開始大吵大鬧,直至天明,終於星期一早上等到醫生巡房,檢查傷口後,話批准我出院,回到家始鬆一口氣,昨晚一早上床瞓到今朝,完全瞓到似隻豬咁,跟住以後仲要每日去診所洗傷口,今次係教訓我自己不要忽視小問題,否則後果會好嚴重.

呢張相係插喉吊鹽水,因為手術前不能進食,無聊中自拍照.

椰汁紅豆饅頭

唔知點解已經無以前咁有興趣整野食? 今次蒸饅頭,都係因為上次中學同學聚會時,班主任老師話想食饅頭,但佢有糖尿病,街買個啲唔啱佢食,今晚又有聚會,所以就蒸咗呢款低糖椰汁紅豆饅頭俾佢試吓. 我用椰汁代替水份,捲入已蒸熟紅豆粒,咁可以多啲纖維,健康啲,不過唔知係咪天氣問題,發得唔係咁理想,而且表面唔夠光滑.

雜果杏仁朱古力

見到屋企有新年剩抵嘅原粒焗杏仁,又有提子乾,朱古力塊,所以祗係買多一樣杏脯乾,就做咗呢款雜果杏仁朱古力,今次用咗一半真力(85%),一半假力溝埋,真係好容易整,之前食過所謂名牌朱古力,其實都不外如是,祗要自己肯郁吓手,就已經有得食,何需買咁貴買呢?

年花盛開中-巨型黃百合

繼前兩日,年花紅百合開到好燦爛後,呢兩日其餘幾支黃百合亦相繼開花,而且花朵好大朵,係我結婚後開始買年花以來,見過最大朵百合,而家仲有成8-9個花蕾未開,今次真係好開心,令到成間屋都滿室生香,而且賞心悅目,希望自己同屋企人都好似花咁大發就好囉.

美國網站購物分享

較早前朋友介紹我一個美國購物網站,話價錢好抵,剛剛食開鈣片差不多食完,就算係香港網上買,都貴咗好多,而呢個網站就買得好平,就算加埋運費(US$3)都平一半,見重量仲未超過規定上限,就加買咗一支Jojoba油(118ml),一支茉莉花水(118ml),變相免運費,經過約10日,終於收到喇,佢哋包裝得幾好,仲送咗包沖劑Vita C添,下次如果買維他命之類補充劑都會再考慮幫襯,不過有兩樣野要注意,第一用信用卡找數,兌率銀行要成7.9(港幣):1(美元),第二咁平運費,其實要符合佢哋規定,就係重量唔可以超過3磅(約1361g)或者價值唔大過$80美金,否則用番DHL/UPS就貴好多, 真係要小心計算,或者拆開兩張單比較運費,睇吓抵唔抵至好訂貨呀.

偶然巧遇－年花－花開富貴

舊年三十去街市買餸時，偶然係行邊見到一個阿叔推住單車，用水桶載住幾札百合，有幾個師奶圍住睇，我又走埋去趁熱鬧，阿叔話自己係元朗大棠附近種，佢開價$120/6支，諗起朋友話年27-28買最平都要$280/10支，見到平咁多，就即刻攞起一札有１－２朵花準備開，其他師奶見到就二話不說，搶住俾錢買走，然後再打電話通知奄尖大少唔駛買年花，以往呢個任務係由佢負責。

睇吓年三十晚買番嚟仲係青必必，自己浸水仙亦都未開。

好彩新年幾日天氣回暖，估唔到今日已經全部開得好燦爛，仲滿室清香添，真係機緣巧合呀。

新年剩餘物資-花生芝麻糯米糍

經過新年前繁忙準備工夫,同埋新年期間忙碌應酬拜年後,今日終於可以歸於平靜,食完晏後,將之前包湯圓剩下糯米粉團蒸熟,再包入花生芝麻餡,外層滾上片栗粉,就成為我今日嘅下午茶點嚕....

儲糧-全麥方包兩條

預計過年會比較忙碌,要向長輩拜年外,又要做屋企瑣碎事務,所以趁今日得閒啲,就焗定兩條全麥方包,攤凍後就放入冰格,咁至少嚟近1-2個星期都唔怕無麵包做早餐嘞.

蒸糕最後一擊-芋頭糕

今朝起身,蒸埋最後一底芋頭糕,咁今年要蒸嘅糕已經完成晒,今次分開幾日蒸唔同糕,我覺得好過往年一氣呵成,至少無咁辛苦,亦唔駛咁踢腳,出年都可以咁做.

蒸糕第二擊-足料瑤柱蘿蔔糕

繼前兩日蒸完桂花紅豆年糕後,今日繼續蒸瑤柱蘿蔔糕,

今年我分開逐日蒸糕,因為一次蒸晒多款唔同糕,其實都幾辛苦,好似呢底蘿蔔糕,淨係將蘿蔔切絲都用咗半個鐘以上時間,本來有部機可以用,但因為老友屋企每年要做成幾十底蘿蔔糕派街坊,所以我捱義氣借部機俾佢用,加上奄尖大少鍾意食有蘿蔔粗絲嘅糕,話好食啲喎,所以唯有用手切,再加上豐富材料,基本上係每年必蒸嘅糕. 明日再蒸埋芋頭糕就可以收爐嚕....

桂花紅豆年糕

終於開始蒸糕喇,首先蒸嘅係桂花紅豆年糕,因為明日番奶奶屋企,提早過節,所以蒸啲帶返去俾佢哋試吓,細個兜就留番俾自己,桂花係自己種,晒乾花後加片糖,煮溶成桂花糖水,再加埋煮稔紅豆入粉漿中,又減糖,咁就比較健康啲. 至於蘿蔔糕,芋頭糕會遲啲蒸,驚太早蒸,放係雪櫃都會變壞.