黑糖麻糬

前兩日買咗一盒台灣製黑糖麻糬, $7.5內裡得6塊, 平均35g一塊, 轉眼之間,已經俾奄尖大少食咗4塊,見其實又唔係咁難整,今日就等我嚟試整先.

製作中,將蒸熟麻糬用抹油保鮮袋搓至煙韌,切塊狀滾上烘焙過黃豆粉,再放入膠隔中.

初次試整,祗係整咗6塊,唔敢做太多.

自己當然要試食喇,唔,,下次可以再減糖,再搓多一陣或加多啲木薯粉會煙韌啲.

夏日涼拌DIY鹽鹵豆腐

經過多次做豆腐,終於知道一啲問題所在,今次雖然豆腐質感仍然唔夠幼滑,但勝在豆味濃.

當蜜桃成熟時....

呢排見到生果檔有好多水蜜桃賣,而自製果醬又剛剛食完,於是就整咗一樽蜜桃果醬.

雖然已經擺咗一日係米缸,但桃仍然好生吓.

將桃去皮切粒,用黃砂糖醃咗兩個鐘,等桃出咗啲水份

無加水用煲開細火,加檸檬汁煮至杰身,再加麥芽糖,硬生果膠就完成,不過天氣熱,煮完成身濕晒,真係汗水之作呀.

是日甜品-香蕉雲尼拉雪糕夾餅

為咗要食呢個甜品,晏晝個餐專登食少啲,除咗可以快啲肚餓外,仲要平衡番食量,控制自己唔好食太heavy,今次加埋香蕉一齊食,好味啲.

夏日甜品最佳拍檔

天氣咁鬼熱,唔食啲凍野好似降唔到體內溫度,見到有現成買雲尼拉雪糕,於是整個窩夫夾住嚟食,今次唔跟隨機用泡打粉個食譜,改用係網上搵到呢個淨係落酵母,再用分蛋法食譜, 即係將麵糊加入打至企身蛋白內,發酵一個鐘或以上,出嚟效果唔錯,無咁硬身,比較柔軟,咁配搭食法都幾好.

清甜自製白糖糕

因為我鍾意食白糖糕,但之前整咗幾次都唔成功,攪到都無晒心機再試,但近日睇見Blog友整得好成功喎,於是心思思想再試,今日趁天氣熱,最適合發酵,今朝蒸嘅白糖糕,估唔到真係得咗,再無酸味,幾好食,不過仍然可以再減糖. 多謝網友翠兒分享食譜.

我發多半個鐘,即係1.5個鐘時間.

用塗油大碟蒸,不過下次可以鋪牛油紙先,因為雖然塗油都仲係好黏吓.

睇吓發得唔錯,不過唔知再發耐啲係咪好啲呢?

又嚟食豆腐

繼上次整石膏豆腐唔理想,今次試吓用另外一種方法,就係日本人慣用鹽滷豆腐,但唔知點解由豆漿凝固開始,祗係棉花絮狀,不能成一團或一塊,等咗成20幾分鐘,都要開始壓番水份出嚟,結果豆味就好濃,不過豆腐本身就粗孩啲,唯有再諗諗點去改良.

終於有收成喇-自家發芽菜

好耐之前曾經試過用土法發芽菜,但發出嘅芽菜唔得,又短身又粗根,好難食,近排見到朋友係淘寶買咗部發芽菜機,發出嚟嘅芽菜唔錯,於是再接再厲,又買番一部,部機雖然有自動灑水,但恐怕溫度過高,所以每日換水兩次,前後3日,終於今日有收成喇..
第一天將隔晚浸透綠豆放在養殖盤內,蓋上蓋子.

第2天已經開始長出新芽

第3天已經迅速成長,可惜因為光線問題,影響芽菜頭變成淡紅色,下次可能要再遮光.

係第3日發時已經有咁長喇..

第4天早上終於可以有收成喇,雖然無街賣咁肥壯,但勝在100%天然無添加任何人為野,所以食得安心,放心.

自家製健康黃豆食品

昨日收到新玩具後,即晚浸黃豆,今朝一早開工試新機,豆漿無問題,祗係嫌豆味唔夠濃,下次減少水份或加多啲豆,但石膏豆腐就唔算成功,可能溫度唔夠高同埋沖漿問題,下次會試整其餘鹽滷,內酯豆腐,睇吓效果如何?

將石膏溶液沖入豆漿凝固後,倒入已包裹上濾布嘅膠盒中,再用另一盛滿水嘅膠盒重壓出水份.

壓至無水滴出後,反轉濾布就成為豆腐,可惜質感唔好,所以最後倒咗落垃圾桶嚕....

至於豆漿就OK.

又有新玩具喇!!

見到朋友係淘寶買咗部發豆芽機,叫佢send條link俾我望吓,點知就出事喇,睇睇吓發現部豆漿/豆腐機, 個發熱線係基座,同不銹鋼杯分開,除可以整豆漿,豆腐花外,仲可以整3款豆腐花,而且賣家有埋發豆芽機賣,當時係限時速銷,比其他賣家平成200RMB, 路途雖然遠啲,運費自不然貴啲,中間平咗嘅錢就當運費囉.

豆漿豆腐機比較高身,都唔算太抯地方.

反而估唔到部豆芽機比我想象中大部,而且說明書話溫度30或以上,最好唔好發芽菜,否則好容易腐爛,咁....成個夏天都唔可以發, 唔係嘛!!我唔會理,一於照發,如果唔係點知部機掂唔掂架?

連埋個盒好大部,,嚟到香港後仲要收多成$50送住宅費,所以抵唔抵真係見人見智.

暴風雨下午餐-青豆角三文魚青醬意粉

雖然昨日已經打完風,但今日天氣仍然好惡劣,同朋友本來有約會都改咗期,抄吓雪櫃有乜剩餘物資,結果就整咗呢款青豆角三文魚青醬意粉做晏晝.

酪梨橄欖油嫩肌皂

見到有好多油存貨,所以就消耗啲,以免擺到過期,今次無落椰子油,用咗棕櫚油,棕核仁油,橄欖油,米糠油,酪梨油,所以皂比較軟身,要厚切,但相對而言,就溫和啲,BB&皮膚敏感人士都啱用.

雞尾包&菠蘿包

呢類港式包,一次唔可以食太多,雖然我已經減糖又減油,今次祗係將上次整剩餡料,皮料做埋啫.

夏日消暑甜品-雜果涼粉

呢排天氣真係好熱,成日都想飲同食啲涼野,但飲太多汽水,食雪糕對健康又唔係咁好,諗起屋企有剩涼粉草,於是冒著炎熱天氣都整咗佢,經過一輪工夫,終於凝固成一盤涼粉嚕,今次參考咗另外一個做法,效果好好多.

上午整攤凍後放入雪櫃凝固,下午已經可以切粒食嚕....

當然要加埋啲新鮮生果,少少糖漿,咁就好好味,食完真係好似無咁熱喎

今日午餐-日式蛋包飯

原來係平平無奇嘅日式咖哩飯,但加咗蛋皮包裹住,同埋唧上茄汁,就變成另外一種食法.

自家製河粉&齋腸

見到好多網友整腸粉之餘,都會整埋河粉,等我又嚟趁吓熱鬧先,今次用咗另外一個食譜,加多咗木薯粉,咁會煙軔啲.

首先蒸熟粉皮攤凍.

再切成粉條撕開條狀.

我就即刻加埋小棠菜,雞絲成為炒河,粉條雖然無街賣咁幼細,但粉質就好軟熟,一啲都唔乾硬.

除咗整河粉,有剩就捲成齋腸,留番明日做早餐,一舉兩得.

夏日時令菜色

今朝去到街市,無論肉檔,菜檔都有免費荷葉送,睇清楚寫住原來明日係小暑,不過咁熱真係唔想煲湯整咁多野,祗係買咗塊新鮮荷葉包住雲耳,冬菇田雞蒸,再加多碟XO醬蒜蓉炒通菜就開得飯嘞..

將雲耳,冬蓉,醃過田雞放入拖過水軟身荷葉內,包裹好再用牙簽拮住反轉放在碟內,就可以攞去蒸嚕....

蒸熟後剪開荷葉頂部加入蔥粒,就可以開飯.

仲有加埋呢碟XO醬蒜蓉炒通菜,就夠晒冶味.

改良少油版-乾炒牛河

乾炒牛河如果係酒樓,飯館食,一定落好多油,食完碟底仲有成層油,所以好少係出面食,不過見到網友有post過改良健康版乾炒牛河,又心郁郁試吓自己整,睇吓效果如何?
材料都係個幾樣,不過關鍵在預先用老抽,豉油,糖混合後再同河粉撈勻醃一陣,等佢入味同埋有色,用極少油炒芽菜,牛肉醃時已加入少量油,所以唔駛用太多油炒,跟住將醃過河粉一齊加入炒埋一齊,唔駛再加油落去炒,因為炒粉本身已經有油免黏,最緊要係鑊一定要夠熱,夠猛火急炒再加些少麻油竟更香.

眨吓眼已經炒好有得食喇,味道都OK喎,偶然放縱吓自己都唔錯架.

夏日甜品-椰汁西米糕

天氣炎熱,又係開始停工製作美食時候,祗不過見到之前買落西米擺係度已經好耐,現成又有其他材料,於是就整咗呢款甜品.泰式做法應該用班蘭葉摺兜,但唔係送俾人食,好似好浪費,班蘭葉若果唔煮過,香味唔會好出,所以祗係用玻璃兜載就算嘞.

其實呢款甜品最晒時間係煮西米,又要焗到透明,又要用凍水或冰水再沖水,去除膠質,令口感爽口啲,今次用咗椰糖漿+粟米粒.

再將椰汁加糖,生粉水煮至杰身,倒上面鋪平雪凍就食得,可惜椰汁漿太少,結果糕面唔夠平滑.