全麥方包-麵包機

我好少用麵包機自動程式,嫌程式太固定,唔可以因應麵粉質感,氣溫,濕度改變,今次破例試吓用全麥包快速設定,不過我用咗低溫中種發酵法,切開睇嚟效果都OK,咁以後可以乾手淨腳啲.

黃鱔煲仔飯

昨晚我家主人提議今晚食黃鱔煲仔飯,其實難度不大,不過準備工夫較多,例如要浸定蠔豉,蝦米,冬菇,今日買咗黃鱔番嚟,要將幼骨切除再切絲,又要蒸蠔豉,冬菇,臘腸,再全部切粒,濽酒全部炒熟,放回飯面再蒸,不過偶一為之都整喇, 睇吓餸同飯比例差不多1:1,好過出街食煲仔飯,得好少餸,所以雖然咁多工夫做都抵嘅,因為可以盡情食嘛..

糖不甩

之前整甜薄撐,用剩芝麻花生糖餡,今日就搓糯米粉整咗糖不甩做下午茶,前後所需時間約10分鐘已經有得食,真係快,靚,正呀! 

牛奶饅頭

今次試吓用麵條機壓麵團,睇吓係咪外皮真係光滑啲,不過可能我係用低溫中種,結果蒸完後都仲係有少少氣泡,未夠光滑,下次可能要再來回壓多兩,三次至得.

DIY 素麵條

今日忘記買上海麵番屋企,因為係我家奄尖大少指定今晚食糧,反正屋企又有中筋粉,於是搬出久違好耐嘅麵條機,實行DIY不求人,但已經好耐都無整過麵條,於是祗係嘗試做一半份量.

當分割麵條後唔想黏埋一堆,於是就用衣架晾起,令麵條稍為乾身.

當麵條有8成乾就可以除下,放係碟中.

煲滾水將都麵條淥熟,再過冷河就食得嚕...,至於奄尖大少評語係麵質幼滑,但稍嫌稔身,有改善空間喎.

三文治忌廉蛋糕

平時好少整蛋糕,今次係因為淡忌廉就快過期,想用咗佢,以免浪費,不過蛋糕稍為甜啲,下次可以再減糖.

今日一人午餐-七彩繽紛炒飯

加入雜菜粒,椰菜絲,蟹柳炒飯多菜少肉係我而家,或將來飲食習慣.

香蔥花卷

係咁寒冷天氣,最好就食番啲暖苙苙嘅包,唔知係咪太耐無整過,所以捲得麻麻地,不過加咗少少鹽,油,爆香蔥粒先捲,所以有一種蔥香味,唔錯.

健康版上海粗炒

我好少係上海鋪叫呢樣,因為超多油,非常肥膩,但自己炒就可以控制落油,而且仲多菜,少肉添,味道雖然無上海鋪咁濃味,但都唔錯架.

冬日美食-甜薄撐

好耐之前已經想整嚟食,但一直懶洋洋,提不起勁,見今日咁凍天氣,下晝最適宜食熱辣辣甜品,即整即捲嚟食,加上自家炒芝麻,花生糖餡,正!

生拆蟹肉蒸蛋

係街市見到有一堆紅花蟹拑賣,於是嘗試自己蒸熟再拆肉,加埋蒸蟹蟹汁,紹興酒,混入蛋液一齊蒸,好鮮甜,好味道!!!!

黃梅杏仁蛋糕

聖誕前夕無乜好做,又唔想出街同人迫,諗起之前整黃梅果醬,於是整幾個小蛋糕,加入果醬平衡番牛油肥膩感覺,唔錯!

Panettone

應節 Panettone-每年聖誕節都會做一次,用咗兩個月之前已用RUM酒浸透入味乾果粒,焗完酒味消失晒,祗剩番香味,好食!

南瓜布甸

好耐之前已經想整呢款甜品,前幾日買餸時,見到有迷你南瓜賣,即刻買番一個開工做布甸.

原隻蒸熟,可惜蒸得太熟,外皮好稔.

好處係好容易將瓜蓉刮出,再同埋椰汁,淡忌廉,魚膠溶液,砂糖混合,過篩,再倒番入瓜中,雪凍就食得.

雪咗約5-6個鐘,切成4塊就食得嚕....,味道唔錯,幾好食架.

新鮮黃梅(杏)果醬

新鮮黃梅(杏)果醬-好少係街市見到有,忍唔住買咗兩磅整果醬,而核剥開去衣後就係杏仁,將杏仁打爛加糖,變成杏仁茶,好濃郁杏仁味.

芝麻奶凍

之前買芝麻粉想盡快用完晒,見今日整開奶凍,順便加啲落去,等佢有香味.

自家蒸健康芝麻饅頭

因為奄尖大少每晚都要食啲澱粉質食物幫助入睡,但係如果晚晚食餅乾會好熱氣,於是唯有密密蒸饅頭俾佢食,今日加咗芝麻粉成為芝麻饅頭.

自製柑蜜

偶而行超市,見到特價就買嚟整果蜜,其實而家天氣乾燥,用嚟沖水飲都好正,又可以當果醬搽麵包,一舉兩得.

一包4個,共$4.4

剝開果皮,將果肉撕去根膜,要淨肉.

果皮浸軟身,刮去白色內衣唔要,再將果皮切碎.

加砂糖,麥芽糖,檸檬汁煮至杰身,就可以倒入已經消毒樽內.

健康全麥饅頭&方包

全麥方包係for自己每日早餐.

至於全麥饅頭係做俾我家大人,希望佢食得健康啲

健康飲料-自家浸泡紅茶菌

近日得到朋友介紹,並慷慨送贈紅茶菌種,前後6日已經飲得,味道係微酸,但經過分解後已經無乜紅茶味,好似飲汽水咁.

朋友送贈紅茶菌種,其實唔駛太多,我祗用咗一塊,一開二剪開浸兩樽已足夠,稍後菌種浸在紅茶糖水中會在上面增生新菌種.

用透氣紗布封口,橡筋紮好蓋口,放係室溫,經過6日後,整個室內已經彌漫酸宿味,打開蓋口後,見到好多氣泡,亦有新一片菌種黏貼係舊菌種上.

撈起菌種,舊個塊掉棄,祗留低新個塊繼續用作浸新紅茶菌,將紅茶菌液過濾後就可以飲用,味道微酸,似飲汽水,不過紅茶糖水經分解後已經無晒紅茶味.