豐富美味海鮮餐

昨晚同舊同事聚舊,其中一位因為與店主相識,託佢幫我們去街市買當日最靚海鮮,煮法亦由佢幫我們決定,所以在海鮮未上檯前,我們係完全唔知道有乜野食? 樣樣都係驚喜. 以下就係我們昨日菜單,包括有:
1) 凍龍蝦-同一般煮法不同,好簡單用清蒸或灼方法煮熟攤凍,再點桔油食,係完全食到龍蝦鮮味,而且肉質結實,又有膏,好甘香.

2) 跟住上埸係勁大size嘅豉油王煎大蝦, 有膏肉又彈牙

3) 蒜蓉粉絲蒸XLsize蟶子登場,蟶子蒸火侯剛好夠爽,而墊底粉絲吸晒汁液更好食

4) 鮮鮑片小炒,如果成隻鮑魚蒸好容易過火,今次係首先油泡生鮑片,再加韮黃,韮菜一齊炒,好冶味,而且鮑片唔會韌.

5) 薑蔥炒蟹,係花蟹雖然唔算大隻,但蟹肉飽滿,蓋亦多膏,祗稍嫌獻汁杰身,不過好多蔥,非常好食.

6) 今餐主角出場嘞...就係清蒸老鼠班,呢幾年係街市難得一見,魚唔太大條,但肉質非常嫩滑有魚味,大家其實都已經好飽,但經過最後努力,都食剩得番棚骨,可見魚好食程度.

7)醉蝦,呢樣我無食,因為我對酒精敏感,但望落係海蝦,頭又有膏,應該唔錯.

最後食完歇一陣,再食埋甜品,潮州綠豆爽/芋泥,嚟個完滿ending先收工,由於同店主相熟,所以各人俾錢時都好意外竟然咁抵食,一定係友情價,所以大家真係好滿意同開心,我亦寫低呢篇blog作為日後回憶.

今日試做-Carbonara 天使麵

結果係唔難整,不過醬汁份量唔夠多,而天使麵太淋,要煮少一分鐘,而味道都唔錯,OK嘅,不過唔可以成日食,好邪惡架...

紅/南棗合桃糕

因為我好耐之前應承幫朋友整,過兩日有聚會見面,所以趁機會兌現諾言,不過諗住用晒包合桃,結果比例上相對紅南棗糕少咗,祗係見好多合桃在內.

4色5油皂

好耐都無打過皂,原因係現在多數用皂液,比較方便,皂化期又短,兩星期左右已經用得,但皂就要4-6星期先可以用,近排天氣乾爽,又想消耗庫存油量,溫故知新,所以又開始打皂,而且仲可以試用多功能方筒模,真係一舉數得,今次用咗5種不同油,包括椰子油,棕櫚油,橄欖油,可可脂,小麥胚芽油,基本上係有乜油就用個種,除咗椰子/棕櫚油做主打外.
其實皂內有些少汽泡未清除,變咗唔夠完美.

我嘅今日下午茶點-黃梅果醬芝士餅

原來係中秋節前買咗芝士忌廉,準備朋友嚟學整冰皮月餅作餡料用,但點知後來佢病咗無整到,眼看芝士忌廉就快過期,於是就整咗芝士餅,今次係試新食譜,話係文華酒店嘅芝士餅,主要加咗白朱古漿,但超難溶,而且食落味道同平時芝士餅分別不大,所以已經"X"咗呢個食譜,唔會再用喇.

假日無聊之作-豆沙小丸子

朋友俾咗一包白玉粉(糯米粉)我,我擺咗係度好耐都無郁過,今日晏晝無聊之際,諗起上次用剩紅豆沙,索性攞出嚟解凍,半粒鐘已經有得食喇,真係簡單易做,味道淡淡地啱我.

當蜜桃成熟時?

近來去街市,成日都見到有不同品種桃賣,剛剛果醬食完,所以就買咗兩個桃嚟整果醬,加埋朋友送手信杏脯乾一齊煮,但由於杏脯乾已抽乾水份,所以除咗用水浸軟外,煮時仲要不停加水慢火煮,比較新鮮多好多時間,但幸好都係一樣咁好味.

自家製少辣XO醬

前排朋友送咗一小樽自製XO醬俾我,味道唔錯,但因我唔食辣,所以令我有自己整唔辣XO醬想法,況且現在買現成XO醬越來越貴,於是今日就實行開工,其實昨日已經要浸軟同蒸一蒸江瑤柱,再撕成絲狀,我就加咗焗香咸魚仔,左口魚乾碎.蝦米碎各樣,起鑊爆香紅蔥頭碎,蒜蓉,加酒炒香材料,覺得夠乾身,就落豉油,糖,蠔油調味,雖然顏色唔係好靚,但都好冶味,又唔難整,幾好唔錯.

淘寶網購-足療機

上個月淘寶5大物流公司舉行¥1搶集運，包首3公斤，又唔收住宅／扁遠地區費，抵到爛，同朋友一齊搶，結果搶到3次。

原本想買部足浴機，但再三考慮清楚，因為要入水／放水，又要拖出／拖入，恐怕自己用唔到幾耐怕煩就擺埋一邊，最後趁咁平運費，就決定買咗呢部足療機，因為過咗3公斤都係計續重價錢，昨日收到打開，發覺比想像中大部，，試用咗約15分鐘，點知食完飯，沖完涼已經超眼瞓，九點幾已經忍唔住睡魔急call,要上床瞓，今朝起床，都仍然好攰，加上下半身好酸軟，呢啲唔知係咪排毒反應呢？我會試多幾日，希望能改善睡眠質素。

試係手機寫blog

前幾日睇到有網友話可以係手機寫blog,於是我又試吓，果然成功喎，咁日後如果唔方便用電腦時，又多一個選擇，幾好！另外順便預祝大家中秋節快樂。:)

大功告成,所有舊網誌發佈了

自從上星期成功匯入所有Yahoo網誌+相片到Blogger後,但由於相片規格問題,要全部網誌內相片要執過,才可發佈,經過一星期努力,每日執相,現在終於將851篇網誌全部發佈 👏,真係唔希望再有第二次要搬家,不過從中亦可以睇番呢幾年生活點滴,成功喜悅,失敗嘅經驗,都算有得著.

蛋黃蓮蓉月餅

轉過嚟之後,終於開始寫第一篇飲食網誌,一年容易又中秋,我已經幾年無整月餅,因為整完後頭痛要送俾人食,又唔知人哋是否鍾意食?自己又食唔得咁多,今年又心思思想整,於是6月已開始煮定轉化糖漿,用檸檬汁天然些,驚買番嚟嘅用工業用醋精之類,而蓮蓉都係自己炒,少油少糖,叫做健康些,有大有細,分別係半隻或全隻蛋黃,細隻就送俾朋友試吓.

終於搬家成功了!!!!

上星期一開始已經同雅虎申請備份,點知我想得太簡單,雖然有同一文件類別(XML),但原來格式規格不同,嘗試咗好多次都失敗,但又唔甘心放棄,雖然轉咗過嚟未必有人睇,但無理由唔得,終於今日搵到幾位同道中人網友分享,我集合佢哋嘅做法,終於成功搬晒嚟新家,當然唔係百份百完整無缺,加上相片size唔吻合,所以要逐張再調整過,暫時祗係試驗性質發佈5X多篇,其餘以後再慢慢修復發佈喇.自古成功在嘗試,大家要繼續努力呀! :D

緣盡緣散

我自從2008年提早退下工作崗位後,上網發現可以在呢度寫blog,為咗唔想忘記練得好辛苦中文輸入法,亦都想記錄低自己呢幾年生活瑣碎事,所以就開始寫blog,雖然近年生活平淡,無乜可以寫得好密,但總喜歡睇到有志同道合嘅網誌,但免費呢樣野係隨時可以中止,所以雖然唔捨得,但都總要離別😔，日後我都會繼續寫blog,不過剛開始,唔知是否會繼續,如果搬家情況隱定後,會再通知大家新網址,現在帶著不捨心情同大家講"再見珍重",日後有緣再係另一個虛擬世界見面喇.

今日午餐-韓式紫菜卷

韓式同日式分別在於飯內無加壽司醋,而係加炒香芝麻,而包好後再掃一層芝麻油,好啱我呢種胃有問題又想食紫菜卷嘅人食,而餡料可以各式其式,見到雪櫃有乜就落乜去包.

紅棗黑木耳特飲

我對黑木耳無特別喜好,但上星期回奶奶屋企,佢塞咗好多俾我,原因係佢都唔鍾意食,我唯有帶番屋企,諗吓點煮好,上網見到台灣好流行呢款飲品,咁就一於試吓整,其實都好簡單,將黑木耳,開邊無核紅棗浸軟,換水後倒晒落電壓煲當湯煲至淋,稍為攤凍再放落攪拌機攪碎就OK,但其實攪完後膠質好重,要用水溝稀嚟飲,否則就似食糊糊.

健康食品-自製豆腐花和豆漿豆渣饅頭

見之前買咗包黃豆好耐,昨晚臨瞓就浸咗,今朝起身整咗豆腐花,見有豆漿剩,加埋豆渣蒸埋饅頭,一舉兩得.

自家種有機西瓜

我家奄尖大少又一傑作,而我祗係繞埋雙手,等食而已.今次個瓜都幾重,有成兩公斤以上,皮薄多汁又甜,好正!

新鮮藍莓果醬

幫朋友整嘅果醬,難得有人欣賞.

泰式魚蝦餅

久違泰式魚蝦餅-因為製作工夫比較繁複,而且要煎炸,所以都係偶而整一次,不過味道同泰式食肆有得揮.