新年蒸糕mode提早啟動

事緣因為今個星期六為咗遷就各人,會提早食團年飯,奶奶係唔蒸馬蹄糕,所以諗住蒸俾佢,另外亦會同老友見面,所以又送埋俾佢,再有一位常常幫我代買粗重野嘅朋友,為表示感謝,都要送,所以剩低俾自己都係一舊糕咋,希望收到嘅人會鍾意喇.

午後什錦煎餅

由於昨日BBQ完,奄尖大少唔like急凍鮮魷,燒熟後剩番好多,所以今日用來切粒,加埋洋蔥粒,粟米粒,混入數字屋買嘅韓煎餅粉內,加入蛋液,水等攪埋一堆,就倒落pan煎,都好easy,又有得食,味道都唔錯架.

健康燕麥藍紅莓包

雖然現在自己健康都無乜大毛病,但防範於未然,所以平時飲食都盡量控制下,好似麵包咁,自從識整後,就可以減油,糖,今日整嘅都係,昨日發好麵團,我用天然酵母,低溫冷藏發酵一晚,今朝放係室內回溫,唔想咁單調,全部都係餐包,所以就攞一半麵團做個辮包.

紅莓燕麥黑糖果仁曲奇

其實係我烘焙生涯中,真係數唔夠5次焗曲奇餅,原因曲奇餅多數含大量牛油,如果落唔足又唔好食,唔想害自己,更加唔想害人,所以少整為妙,今次呢款有加麥皮,紅莓,果仁比較健康(自我安慰),主要送俾朋友食,我自己祗係淺嘗一,兩塊就好,因為想有益啲,落咗黑糖,結果賣相就爭啲囉.

今日燉蕉

感冒前買嘅生果,因為驚食生冷野會咳,全部唔食得要介口,但生果唔可以擺太耐,上網話冰糖燉蕉都可以止咳,食完晏晝就即燉,雖然味道怪怪地,唯有當飲糖水吧.

止咳第2回合-冰糖燉水梨

繼昨日鹽燉橙後,今朝見到仲有一個水梨,反正呢幾日都唔可以食生冷野,於是索性加冰糖燉,聽講都可以止咳,其實昨日唔止鹽燉橙,仲有含喉糖,不停口渴就飲陳皮焗熱水,所以今日已經好番好多,無乜咳嗽,但都想試多幾樣,可以斷尾,你們可能奇怪,點解我整咁多野止咳?都唔去睇醫生,食藥咪仲快,原因係我希望用自然療法止咳,好過長期倚賴西藥啫,因為我本身已經氣管敏感,食咗幾年止咳藥,甚至乎吸埋類固醇,現在已經無乜效,因此越來越要加重藥份量,先可以止到咳,我唔想咁樣繼續落去,祗好試用其他治療法.

鹽燉橙,可止咳?

我次次感冒後,跟住就不停咳,今次都唔例外,咳到成晚都瞓唔到,上次朋友已經介紹我試下,但見到都唔方好飲,寧願選擇燉洋蔥汁,今次見咳成咁,屋企又有橙,即管試下,果然又咸又酸,仲有澀味添,不過好神奇,現在食完後兩粒鐘,一聲咳都無,明日是否要再食呢?

叉燒餐&菠蘿包

雖然感冒仲未好番,而且開始不停咳,幸好上次感冒食剩有止咳藥水同擴張氣管藥丸,希望食埋唔駛去睇醫生喇,為咗唔想瞓咁多,昨日打好麵團,今日就整有餡包,菠蘿茸本來想做鳳梨酥,但一諗起外層酥皮牛油,就打退堂鼓,所以索性做正宗有菠蘿餡嘅菠蘿包,而且菠蘿皮我都減咗牛油/糖,比較街買健康少少(自我安慰中)..

感冒中晏晝-魚湯菜心牛肉通粉

前兩日去剪頭髮,點知吹得唔夠乾,一出門口又凍又大風,結果當晚瞓到半夜開始喉嚨痛,好唔舒服,本來想唔食感冒藥,但點知仲開始不停留鼻水,祗好食藥喇,後果係收鼻水好見效,不過人就呆呆滯滯,無乜胃口食野,口淡淡,於是趁去開街市買餸,煲個魚腸,白灼牛柳片,菜心,簡簡單單煮啲通粉食就算.

黃鱔臘腸海味飯

我每年冬天都例必整嘅飯,因為有屋企人捧場,雖然預備工夫都幾多,但至緊要食得開心,而且自己整料多飯少,真係好好味架.

韓式炆牛筋骨

見網上好多人都整,話水梨同牛好夾,咁我就一於試下,集各家之大成,急凍牛筋條解凍後,用水喉水過清血水,再跑活水,然後略為煎香下,就落蒜片,蔥頭,薑片,味琳等爆香味道,繼而落水梨茸/洋蔥茸,加少少水做汁去炆,代替糖,而且加上栗子,紅棗,紅蘿蔔,洋蔥等,分批跟時間落,煲30分鐘焗20分鐘,再開火煲,落埋其他配料,直至夠淋身,最後較調味,我落咗好少韓式辣椒醬,味道好清甜,而且菜多肉少,比較健康,啱我口味.

可愛座檯手機套

今日晏晝-豬潤牛肉魚湯河粉

本來呢餐平平無奇,重點係河粉自己蒸嘅,昨日蒸腸粉,順便蒸埋河粉,一舉兩得,今朝煲新鮮魚湯,咁就成為美味健康嘅一餐.

蒸腸粉

好耐已經無蒸腸粉,趁現在天氣凍凍地,對住火爐當取暖,所以又整番轉,齋腸OK無乜問題,但豬潤腸好唔掂,捲到爆開晒,幸好自己食無乜所謂喇.

boxing day=整包day

今日boxing day=整包day, 中式.西式一齊發, 法包+椰汁椰糖饅頭, 饅頭係因為應承老友整俾佢阿媽食, 因為佢話阿媽鍾意我整饅頭好食啲喎, 而整法包主要因為買咗入爐高溫石仔,加上又發咗星野酵母,趁有威力時整包就最好嘞.

入爐高溫石仔

法包因爐細,太近上火,結果..包面燶咗,幸好味道唔錯,不過真係馬拉松發酵呀,由昨日11點左右,室溫發到今朝8點,成20個鐘有多,無法鬼叫我選擇用天然酵母咩.

新鮮出爐蛋撻做早餐

其實已經係昨日早上早餐,不過昨日唔得閒寫blog, 由於昨日中午約咗朋友食晏,諗起N年前學烘焙時學過整蛋撻,但從來一次都無自己整過,原因係街買太方便,十元有3個,毋須咁辛苦自己整餐死,但近幾次買到撻皮好唔掂,唔知用乜油搓皮,所以趁可以同朋友分享就決心試整,預早一日搓好撻皮,放入雪櫃,第二朝就開好蛋漿,倒入撻皮內,放入焗爐,20分鐘唔駛就有得食,新鮮出爐蛋撻真係好好食,撻皮又脆,無怪油味,正呀!

冬至晚飯

今日冬至適逢係星期一,返工係無假放,所以通常同家人團圓食飯都會提早,但今年去開酒樓訂唔到位,祗好延後至嚟近星期六食,但又唔想今日正日太冷清,雖然得兩支公,都整咗3樣過節會食餸菜,包括有瑤柱炒豆苗,豉油王煎蝦碌,預早炆好海參冬菇蠔豉豬柳,結果係...食唔晒,真係眼闊肚窄囉.

冬日甜品-杏仁露加蛋

呢排頻頻整杏仁露,主要係買咗成斤杏仁,細粒個種,但又唔係成日煲湯,加上天氣乾燥成日會乾咳,所以就常整嚟食,今次突然想加隻蛋,於是趁煮滾杏仁露,就打隻蛋係碗底,再將滾熱杏仁露倒入碗內,靜置4-5分鐘,半熟在碗內攪拌就食得,咁蛋白會嫩滑啲.

又到聖誕!又到聖誕! 聖誕包Panettone

每年到聖誕,我都會焗聖誕包Panettone,今年都唔例外. 本來Stollen都得, 但我嫌用太多牛油/糖,自己焗可以減油/糖,健康啲,今次因為用天然酵種液,天氣又凍,結果馬拉松式發咗成20幾個鐘才可以焗,而雜乾果皮就早兩個月已經用RUM酒浸,所以焗完試食真係啖啖酒香味,好食.

冬日滋潤甜品-杏仁露

上次朋友來訪時,買了一斤細粒杏仁,為免變壞,而屋企有人都願意食杏仁露,所以昨晚浸咗杏仁同埋小許白米,今日開機攪碎,自己食就無謂隔渣,寧願粗孩啲,少甜食完晏晝即煮,好味!