蛋糕課程-第六堂_玫瑰花芝士餅

今日Miss唔得閒,由佢老公代堂,佢老公係"專業糕點製作"烹調書嘅其中一位作者,所以同學見到佢代堂都好開心.

今日學嘅係玫瑰花芝士餅

首先要做咗個手指餅作餅底&圍邊,再鋪落模內

其餘有剩阿Sir唧咗做手指曲奇餅俾我哋食,睇吓幾多,我即刻食咗4條,因為好鬆脆,好香蛋味,但後來佢叫同學攞番屋企食,我無攞,因為怕食得多越來越肥.

整完芝士漿後,最後整玫瑰花啫喱溶液作為餅面裝飾

將啫喱溶液倒上餅面再雪凍,就大功告成啦

雖然今次祗係分到一塊,但都好夠,食落芝士餡好滑同埋有一陣玫瑰花香味,又唔甜,唔覺肥膩,好特別,好似食近Mousee蛋糕,但質地就好幼滑同有香味.

麵包機系列-甘旬楓蜜方包(冷飯湯種)

今日繼續試用麵包機焗麵包,由於無意中係網上見到有網友用冷飯做湯種,覺得幾得意,所以昨晚已將食剩冷飯加水煮然後再攪爛,攤凍後放落雪櫃,今朝攞出來回室溫再加埋其他材料就可以放入麵包機.

呢個就係米飯湯種嘅網址.

唔記得影相,呢啲係用剩冷飯湯種

麵團攪拌中,摸過都幾黏手,我唸用手搓有困難,最好用機搓,如果唔係會好哂力同要加好多手粉至掂.

但當我去完街番屋企,竟然見到麵包焗到升至頂蓋,有啲仲黏住個蓋,但係我已經跟足麵包機指引份量用450克麵粉,8克乾酵母,點解呢?唯一解釋係我無用佢講嘅直接法, 呢個湯種實在發得太勁囉,你話似唔似UFO呢?

當麵包攤凍後,索性將所有皮都切去,然後厚切,睇落個樣無咁核突,試食後麵包都好鬆軟,但唔知明日會唔會仍然咁軟熟呢? 比較之前,我用個3種方法發酵,然後用麵包機焗,結果係我覺得低溫中種較為好啲,其次就係湯種,最後係老麵種.

今朝早餐-熱香餅

昨晚係網上見到有熱香餅食譜,我自從無做野後,已經好耐無去麥記食過,於是今朝起身後就自己試吓整來做早餐.

跟網友嘅食譜,開好粉漿後,用紙巾索啲油,擦勻煎Pan,再將粉漿倒落煎Pan內嘅不銹鋼鐵圈,我係好耐之前買咗無用過,今次卒之有用LU.

見到粉漿起泡&凝固,就可以反轉另一面煎

煎好啦!呢個份量可以煎7塊

加埋親戚送嘅楓蜜糖漿&牛油,就可以開餐啦!,雖然樣子同味道都唔差,但始終唔及麥記咁鬆軟,而且要化起碼半個鐘去煎,事後又要洗碗碟,唔係咁化算,想食以後都係幫襯麥記算啦.

清熱湯水篇+焗叉燒

呢排成日有啲喉嚨痛,口又生痱茲,所以上完烹飪堂後去街市買粉葛煲湯,點知檔主阿嬸極力推介加埋新鮮土伏苓,話可以去骨火,佢仲幫我去皮切片,加埋扁豆同赤小豆都係$2X.

呢啲就係已經出水嘅土伏苓,阿嬸教話咁就無咁澀同無咁膠咊

將粉葛,扁豆,赤小豆,蜜棗,同埋自己哂嘅陳皮一齊煲LU...

呢樽就係奄尖大少自己哂製嘅陳皮,佢由1995年開始連逐5年都有哂,所以有排用

過咗3個鐘之後就有得飲啦,希望真係有效啦!

與此同時我將係雪格個舊豬柳解凍,並用醃料醃佢兩個鐘,今次我試吓跟網友聿太嘅醃叉燒配方,同自己用開嘅有乜唔同,我以前會醃過夜,但佢話糖入咗肉太耐會硬,但我都醃多一個鐘,因為怕唔入味

我個焗爐附有燒雞架,可以轉動,咁就唔駛咁麻煩成日要翻

經過大約30分鐘,終於焗好舊叉燒啦

試食後覺得同我之前醃嘅味道差唔多,肉質無明顯鬆化,可能我用咗豬柳無肥肉啩

烹飪課程-第六課(印尼沙律&沙爹豬)

今日上堂Miss教咗兩種菜式,就係印尼沙律&沙爹豬柳

印尼沙律首先要淥熟所有疏菜,除咗青瓜之外

跟住要炸蝦片,其實炸蝦片炸得好,都要有竅妙,不能太猛火,並且將蝦片落鑊後要用鑊鏟壓一陣,令到蝦片唔會彎曲,才由得佢慢慢炸透.

好快,大家夾手夾腳,就將所有疏菜淥熟

切好疏菜&蛋後加埋加多加多醬汁就食得,今次我食咗兩碗,因為我好鍾意呢隻醬汁,放學後即刻去印尼鋪頭買齊材料,番屋企唸住呢兩日自己再整來食,其實自己可以加薯仔,豆腐等配料.

另外一款係沙爹豬柳,用焗爐焗嘅都幾好味,唔錯

蛋糕課程-第五堂_炸雪糕&火焰雪山

今日Miss教呢兩款甜品,就係炸雪糕同埋火焰雪山,其實都係雪糕做餡,出面外層分別係包脆漿&蛋白而已,所以都算簡單.

首先用保鮮紙札緊蛋糕片內嘅雪糕成球狀,然後放係雪格內定型

雪凍後就可以沾上脆漿,炸至金黃色,但要即刻食,如果唔係雪糕會溶,我食後就覺得蛋糕+雪糕(有啲溶)稍為甜,不過都幾得意,從來無唸過雪糕可以炸來食.

呢個係唧咗蛋白在蛋糕雪糕面嘅火焰雪山(迷你版)

Miss無用烈酒淋落面再用火燒,改為用火槍代替燒到蛋白變硬同焦.

呢個係我自己燒,當然無咁靚Lu,食落口覺得無出面整嘅蛋白糖霜咁甜,因為Miss減咗糖,但唔可以減太多,否則蛋白唔夠企身.

由於仲有時間,Miss額外再教我哋整海綿蛋糕,咁我又可以學多樣野,因為之前我整個兩次都失敗,現在終於知道乜原因,真係好啦,今堂除咗有雪糕食之外,仲可以額外帶兩塊海綿蛋糕番屋企,又係超值嘅一堂.

新麵包機第二擊-薯仔香草方包

今日又開始用麵包機試用另一種發酵方法焗麵包,我用咗低溫中種法,加埋之前買咗好耐無用嘅薯仔香草預拌粉,隔晚已搓定中種放落雪櫃,等佢自己發酵,跟住瞓覺覺LU...ZZZZZ

一宿無話到今朝將佢係雪櫃攞出來回暖約2個鐘,加埋主麵團,我抽起50克水用淡忌廉代替,又加咗10克糖,因為睇到有啲網友話呢隻粉咸同焗出來死死實實.

好啦,叫醒麵包機開工(插電掣),但攪落去覺得麵團好稀同黏手,唔知係咪有薯仔粉影響到呢?

都唔理咁多由得佢繼續整落去,焗嘅時候味道好香,全屋都散發住香氣,如果有人肚餓,肯定引死人

切開後試食發覺內部好濕潤同軟熟,仲好過上一次(用老麵),不過嫌外皮太厚同埋搓粉器藏係麵包裡面,唔係咁好囉,下次會試吓用湯種法,比較邊種方法最適合麵包機

今餐晏晝食乜野?蟹王麵

我之前係網上見到網友介紹呢隻麵話好食,剛巧俾我係裕記見到有,於是買咗兩包試吓.

就係呢個袋裝,我將昨晚食剩嘅西椒炒自家手打蝦膠同新鮮菜芯淥埋就食得,隻麵質都幾軟滑,但我嫌佢稍為淋身,我都係比較鍾意食"出前XX",不過價錢佢平啲,$3一包算唔錯.

見面禮-椰汁紅豆砵仔糕

之前我嘅朋友提過佢鍾意食砵仔糕,明日會同佢見面,所以今日整定砵仔糕,咁就可以帶俾佢食,雖然係啲粗野,但物輕情意重嘛,最緊要有.

我曾經跟過一個食譜整砵仔糕,但蒸完出來後,糕好稀,唔好食. 於是今次我搵到第二個食譜,除粘米粉外,加咗木薯粉&馬蹄粉,再加埋用剩嘅椰汁,蒸好後試食糕都好煙UN,但味道好似椰汁糕多啲,下次都係唔好落椰汁會好啲.

是日午餐-加料楊州炒飯

今朝趁住天氣轉涼,開始將衫換季,但係而家無做野,祗係攞1/3冬天衫出來就可以,以前因為番工有買衣服嘅需要,另外其實買衫亦係我用來發洩工作壓力嘅一種方法,而家當然已經無需要,但係我鐘意將所有要換季衣服重新熨一次先會著,所以都要化幾多時間,之不過我係百忙之中,都仍然為自己整咗楊州炒飯做晏晝.

經過半個鐘頭洗,切&炒就攪掂, 睇吓五顏六色買相已經夠吸引啦(自己話),我又將剩餘物資椰菜切碎,加埋一齊炒,多啲纖維好啲.好好味呀!

當然唔少得一碟綠油油芥蘭,咁樣一餐我就好滿足,做人有時就係咁簡單

烹飪課程-第五課(意式薯糰&菠菜茸魚柳)

好快今日已經上第五堂,即係課程嘅一半,今日Miss仍然都係教兩樣款式,意式薯糰&菠菜茸魚柳

薯糰係用蒸淋咗嘅薯仔加麵粉搓成麵團,再搓成一粒粒好似肚臍餅嘅形狀,煮熟後用白汁燴都幾得意,如果唔加麵粉可以直接當薯蓉食一樣得.

搓成肚臍餅形狀嘅薯糰

為咗加快煮嘅時間,所以一邊用滚水煮薯糰,一邊煮白汁,大家同學一齊幫手做

所以好快就煮好有得食啦

另一邊廂正忙於煎魚柳同埋煮菠菜汁液

眨吓眼菠菜茸魚柳都煮好囉,味道都唔錯,但唔好俾菜式表面呃到,好似好健康,其實汁料需要用牛油煮,所以少食無妨,唔好成日食就無問題.