蛋糕課程-第七堂_西柚巴巴拉

今日又係去學整蛋糕嘅日子,Miss教嘅係西柚巴巴拉,其實同西柚慕士蛋糕差唔多,祗係蛋糕底唔係海綿蛋糕,而係混有杏仁粉&榛子粉,又極少牛油嘅蛋糕,可以當普通磅蛋糕咁食.

首先焗好蛋糕底,一開二,將一塊鋪係模底

跟住倒一半打起淡忌廉漿(已經加入西柚汁),再鋪上第二塊蛋糕,將下層忌廉漿壓上盡量遮蓋蛋糕塊,再倒埋餘下嘅漿,雪凍後再將西柚啫喱溶液倒係糕面,雪至硬身就可以食啦

睇吓甩模後,淺粉紅色幾靚,味道都好清香,唔似芝士餅咁肥膩, 本來糕面應該好平滑,但因為Miss掛住同我哋講野,雪耐咗啲,變咗有啲結冰.

呢舊係我帶番屋企食

由於做多咗蛋糕漿,所以Miss焗埋俾我哋食,食落好香杏仁同榛子味,最緊要唔肥膩,因為落咗好少油.

無事出街小破財

今日去完街市,順便行吓附近個間"吉之島10元店".點知見到呢樣想買,個樣又想要,結果要放低一百幾十先走得,而家經濟咁差,都要唸辦法控制吓自己購買欲,如果俾老公知道,肯定又係度哦..

睇吓我買咗啲乜野? 左邊係壓薯泥夾,同埋曲奇餅模, 中間係裝麵包or蛋糕靚靚花膠袋,右邊係切麵包刀,我已經有一把,但嫌佢唔夠長身同唔夠利,又買多一把,護膝係戴來跑步,墊底個個塊係卷蛋糕焗盤要成$70,已經唸咗好耐,好今次就決定買埋佢...,但其實前幾日係烘焙店買咗成$300,真係出血囉

繼續清熱湯水

今朝出去跑步,明顯感覺凍咗,風吹埋來覺得幾刮面,明天要著有帽嘅風褸先好出去跑步.見天氣咁乾燥,濕度得36%,所以即刻攞咗自家種哂乾嘅龍利葉出來,加埋紅蘿蔔,黍米,南北杏,羅漢果煲湯,我無落肉,因為咁樣無咁肥膩.煲3個鐘左右就有得飲LU...

今日午餐-日式鮮蝦椰菜燒餅

琴日學完日式燒餅,剛剛又經過銅鑼灣,順路去咗SOGO買咗呢包燒餅預拌粉,佢裡面已經混有乾雜菜粒,鰹魚粉,加埋燒餅醬油,不過價錢都幾貴.

將粉用雞蛋,水,少少油開勻後,再加埋切幼椰菜絲,鮮蝦撈勻,就可以用Pan煎

用慢火煎到熟&金黃色

唧上燒餅醬汁&沙律汁,再灑上鰹魚片&紫菜絲就食得,味道都幾好,間唔中當晏晝食都OK

我的第一次整曲奇餅

自從幾個月前去學完整曲奇餅,今日係第一次自己試整,係堂上睇阿Sir做,就無難度,點知道自己整就完全唔掂, 除咗搓麵團無問题外,無論整形,焗爐溫度控制都出問題,首先個支曲奇鎗完全唔得,唧唔到餅出來,黏住哂出口,所有以前網友所講問題,完全出哂來,咁祇好攞個模出來鈒啦,但係每鈒一個都黏實,要用好大力先甩到,跟住跟足食譜焗爐溫度,時間,但我個焗爐火力又過猛,結果有大約1/3燶咗,要掉落垃圾桶,真係激死我,不過短期內我都唔會再整,今次因為想送俾朋友嘅仔女食先會整,如果自己食肯定膽固醇過高.

昨晚搓定三舊唔同嘅粉團,左邊係櫻花蝦芝士曲奇(咸味),中間係綠茶芝麻曲奇,右邊係朱古力曲奇

幾經辛苦,終於焗起哂啦,曲奇都好鬆化,唔知係咪同用咗印尼個隻"金桶"牛油有關? 芝士曲奇就稍為咸咗啲

真係人要衣裝,餅要袋裝,用花花袋裝好後都唔係好肉酸,明日就拎去送俾朋友,希望佢唔好嫌棄就好啦.

食晏晝要轉軚

今日約咗朋友去CAB世貿中心個間"元氣"食壽司,點知去到已經執咗,聽講時代廣場個間都執埋,因為我最鍾意食個度嘅軟殼蟹手卷,而家又要再搵其他地方食LU, 跟住我哋即刻更上一層樓,去咗個間好出名唔知叫"XX吉"嘅日式餐廳,佢哋最出名嘅係炸野,我哋叫咗個3人套餐,有齊炸豬柳(好淋滑,一啲都唔'鞋'),豬扒,蠔&蝦.雖然價錢有啲偏貴,但食物品質好,可以keep得住,而且佢有兩個特色都幾好.

呢個係我哋叫嘅套餐,食食吓先記得影相

我講嘅特色,其中一個係生椰菜絲任添,由於用機磨出來,所以好幼細,生食好清甜,加埋柚子或者紫菜酸汁,可以中和番炸物嘅肥膩,我哋次次都食好多,要添好多次.

另外一樣特色係侍應生會俾一兜焗香嘅芝麻客人,加埋一條細棍,你雖要用棍磨碎個啲芝麻,再加豬扒汁,用來點炸物食,芝麻磨嘅時候好香,加上唔駛等食野咁無聊,都幾好玩.

烹飪課程-第七課(日式蟹柳燒餅&味噌工文魚頭湯)

今日又去學烹飪堂啦,Miss教嘅係日式蟹柳燒餅&味噌三文魚頭湯

首先要將魚頭用味噌醃一陣,再用油爆香薑片落魚頭煎香,然後開始倒入熱水中滾湯

滾得差唔多時間,落埋白蘿蔔(切條)一齊滾

最後落埋調味,大蒜片就飲得啦, 其實若果加埋拉麵就可以變成晏晝,都幾容易做嫁.

呢個係日式燒餅嘅粉漿,主要係將椰菜切絲,越幼越好,將蟹柳亦撕成絲狀,用粉漿撈埋,就可以開鑊煎,不過要用細火,直至熟透先開大火煎面至脆身, 其實配料可以自由選擇,但一定要有椰菜絲.

煎好後唧上燒餅汁&沙律汁, 再灑上木魚碎&紫菜絲就可以食啦,味道都幾好,但就唔係好覺食到椰菜,最啱用來俾唔鍾意食菜嘅小朋友食.

蜜糖桂花糕

今年自家種嘅桂花開得特別荗盛,所以上個禮拜快快趣趣摘哂啲花落來哂乾,如果唔係,佢自己都會謝同埋跌落地,咁就浪費哂, 跟住我就攞咗部份整蜜糖桂花糕來滋潤吓.

呢幾棵就係桂花樹啦

哂乾咗桂花仍然好清香,香味比較街外買嘅濃郁

用熱水將桂花煮滾再焗一陣,加埋果凍粉煲溶,攤凍啲再加蜜糖,就可以倒入模內,放入雪櫃雪凍

睇吓幾晶瑩剔透,仲好好味添

蛋糕課程-第六堂_玫瑰花芝士餅

今日Miss唔得閒,由佢老公代堂,佢老公係"專業糕點製作"烹調書嘅其中一位作者,所以同學見到佢代堂都好開心.

今日學嘅係玫瑰花芝士餅

首先要做咗個手指餅作餅底&圍邊,再鋪落模內

其餘有剩阿Sir唧咗做手指曲奇餅俾我哋食,睇吓幾多,我即刻食咗4條,因為好鬆脆,好香蛋味,但後來佢叫同學攞番屋企食,我無攞,因為怕食得多越來越肥.

整完芝士漿後,最後整玫瑰花啫喱溶液作為餅面裝飾

將啫喱溶液倒上餅面再雪凍,就大功告成啦

雖然今次祗係分到一塊,但都好夠,食落芝士餡好滑同埋有一陣玫瑰花香味,又唔甜,唔覺肥膩,好特別,好似食近Mousee蛋糕,但質地就好幼滑同有香味.

麵包機系列-甘旬楓蜜方包(冷飯湯種)

今日繼續試用麵包機焗麵包,由於無意中係網上見到有網友用冷飯做湯種,覺得幾得意,所以昨晚已將食剩冷飯加水煮然後再攪爛,攤凍後放落雪櫃,今朝攞出來回室溫再加埋其他材料就可以放入麵包機.

呢個就係米飯湯種嘅網址.

唔記得影相,呢啲係用剩冷飯湯種

麵團攪拌中,摸過都幾黏手,我唸用手搓有困難,最好用機搓,如果唔係會好哂力同要加好多手粉至掂.

但當我去完街番屋企,竟然見到麵包焗到升至頂蓋,有啲仲黏住個蓋,但係我已經跟足麵包機指引份量用450克麵粉,8克乾酵母,點解呢?唯一解釋係我無用佢講嘅直接法, 呢個湯種實在發得太勁囉,你話似唔似UFO呢?

當麵包攤凍後,索性將所有皮都切去,然後厚切,睇落個樣無咁核突,試食後麵包都好鬆軟,但唔知明日會唔會仍然咁軟熟呢? 比較之前,我用個3種方法發酵,然後用麵包機焗,結果係我覺得低溫中種較為好啲,其次就係湯種,最後係老麵種.

今朝早餐-熱香餅

昨晚係網上見到有熱香餅食譜,我自從無做野後,已經好耐無去麥記食過,於是今朝起身後就自己試吓整來做早餐.

跟網友嘅食譜,開好粉漿後,用紙巾索啲油,擦勻煎Pan,再將粉漿倒落煎Pan內嘅不銹鋼鐵圈,我係好耐之前買咗無用過,今次卒之有用LU.

見到粉漿起泡&凝固,就可以反轉另一面煎

煎好啦!呢個份量可以煎7塊

加埋親戚送嘅楓蜜糖漿&牛油,就可以開餐啦!,雖然樣子同味道都唔差,但始終唔及麥記咁鬆軟,而且要化起碼半個鐘去煎,事後又要洗碗碟,唔係咁化算,想食以後都係幫襯麥記算啦.

清熱湯水篇+焗叉燒

呢排成日有啲喉嚨痛,口又生痱茲,所以上完烹飪堂後去街市買粉葛煲湯,點知檔主阿嬸極力推介加埋新鮮土伏苓,話可以去骨火,佢仲幫我去皮切片,加埋扁豆同赤小豆都係$2X.

呢啲就係已經出水嘅土伏苓,阿嬸教話咁就無咁澀同無咁膠咊

將粉葛,扁豆,赤小豆,蜜棗,同埋自己哂嘅陳皮一齊煲LU...

呢樽就係奄尖大少自己哂製嘅陳皮,佢由1995年開始連逐5年都有哂,所以有排用

過咗3個鐘之後就有得飲啦,希望真係有效啦!

與此同時我將係雪格個舊豬柳解凍,並用醃料醃佢兩個鐘,今次我試吓跟網友聿太嘅醃叉燒配方,同自己用開嘅有乜唔同,我以前會醃過夜,但佢話糖入咗肉太耐會硬,但我都醃多一個鐘,因為怕唔入味

我個焗爐附有燒雞架,可以轉動,咁就唔駛咁麻煩成日要翻

經過大約30分鐘,終於焗好舊叉燒啦

試食後覺得同我之前醃嘅味道差唔多,肉質無明顯鬆化,可能我用咗豬柳無肥肉啩