雪糕焗麵包?

偶然係日本嘅麵包網站發現一個用雪糕焗麵包嘅食譜,都幾得意,因為自己從來無唸過用雪糕可以做材料焗麵包,啱啱雪櫃又有夏天食剩嘅Vanila雪糕,於是跟佢個食譜試吓焗麵包.

呢啲就係焗麵包嘅材料,我自己加咗用剩冷飯湯種&剩餘物資(蜜紅豆)

用坐枱打蛋機攪好麵團後,就照我平時習慣,攞佢出去近露台有陽光嘅地方作第一次發酵,呢啲叫做善用大自然資源

但都需要小心溫度過熱,我試過夏天氣溫太熱,結果發酵過籠,如果溫度太熱,就要移番入陰啲嘅地方

說時遲那時快,已經經過2次發酵及整型,可以放入模中作最後發酵,呢個時候我通常會放佢係鐵鑊裡裝有約30幾度嘅暖水中,咁就可以保持到有75%濕度.

經過約40分鐘左右,已經發至8-9成滿,搽上蛋液後就可以放入焗爐焗啦,但由於我兩舊麵團用唔同捲法,結果一邊高,一邊低,唔多對稱

終於焗完出爐啦,一個係側面,一個係正面

切開試食後都好軟熟同濕潤,味道唔錯,其實唸深一層,雪糕咪就係等於忌廉加糖加奶咁解,如果屋企真係無忌廉同奶,以後我唸都可以用雪糕代替嘅.

另外我終於知道點解上次蕃茄包發唔起嘅問題,今朝我磅高筋粉嘅時候,發現仲剩低有100g左右,但上次我磅成包剩低嘅麵粉時,總重量係220g,咁即係上次我祗係落咗約100g麵粉+100g預拌粉,總共為200g,但食譜份量應該係300g,唉!我梗係老人痴呆發作,忘記重新reset磅重量啦.

炒蝦米腸

今日唸起剛學完星洲炒蘿蔔糕,靈機一觸將雪櫃裡食剩嘅蝦米腸抄出來,加埋白菜,冬菇絲,&蝦米炒之可也.

就係以下呢啲材料

將白菜,冬菇切絲,蝦米切粒,開鑊炒熟白菜,再爆香蝦米粒,冬菇,加埋蝦米腸,灑啲浸過冬菇水,再落煲仔飯豉油,XO醬調味,最後灑上炒香芝麻就食得LU,唔錯,幾好味,好過剩係齋食蒸蝦米腸,多少少變化,食法就會唔同哂.

今日不宜baking

今日焗咗麵包同埋蛋糕,但兩樣都唔理想.

首先焗嘅係蕃茄包,材料有蕃茄洋蔥預拌粉,飲用蕃茄汁,茄膏,冷飯湯種(上次用剩嘅),加埋高筋粉,依士&牛油

中途係麵包機攪拌&發酵,都無乜唔妥.

但焗完出來後,竟然發唔起,相比以前同樣份量嘅麵團矮咗最少1/3高度,食落有啲煙UN,我唸原因係今次我跟預拌粉所貼嘅食譜份量,佢無話要落糖,我跟足去做,下次都係試吓加番些少糖,可能會發得好啲.

今次仲唸住送俾朋友,真係唔知送唔送好?

與此同時,開咗個蛋糕漿,準備焗貝殼蛋糕-Madeleine,因為之前買咗過矽膠模,所以要試新野.

倒落模後仲有剩蛋糕糊,所以多咗一個細兜蛋糕仔添.

經過放係雪櫃雪藏3個鐘後,就攞番出來焗,點知焗完後甩模,啲紋完全唔現又唔上色,其中有一隻仲無咗一"忽",你話係咪激死呀

呢個係蛋糕嘅正面,算幾上色,食落有啲脆,蛋糕都幾軟熟,我無係矽膠模內掃油&灑上麵粉,我唸下次都係好似用鐵模一樣做足,唯有希望明天會更好啦

最後用靚膠袋包裝好,等佢個樣無咁核突,因為唸住明日送俾朋友.

第一次浸豉油雞成功咗

繼上禮拜焗完南乳燒雞後,今日繼續同雞有仇,再浸豉油雞.

其實都要準備幾多煮豉油雞汁嘅材料,呢度仲未包括鹵水料在內

時間關係,我係即刻煮滾豉油雞汁後(約一個鐘左右,再焗多半個鐘), 就立即開始浸雞,但未浸之前,要將隻雞拖熱水,再浸落冰水一陣,以免陣間浸係豉油雞汁太耐甩皮.

跟住將隻雞放落豉油雞汁中浸約30分鐘,其間約每5-10分鐘要翻動雞一次,令到雞能夠平均受熱,而中途要將隻雞倒轉吊起,令雞腔內嘅汁倒出,以免過熱,其實大部份時間都係熄火浸,祗係當覺得雞汁唔夠熱時,先開細火,但盡量唔可以令汁滾起,否則雞就會"鞋"

經過一輪雞汁浸洗後,終於將雞浸熟啦

將雞攤凍後,就可以斬件,淋上雞汁,就可以開飯LU.

用呢個方法浸嘅雞,雞肉果然嫩滑,連雞胸肉都唔"鞋",百彈齋主(我老公)都祗顧食,話OK喎,但我稍嫌汁咸啲,應該唔好落咁多生抽,或者加多啲冰糖,無論如何,都算成功咗,自己都好有滿足感,Yeah!,下次會再試吓整白切雞,聽講如果要嫩滑,好似都唔容易.

烹飪課程-第十課(焗芝士疏乎厘&法式冬律)

好快今日已經係最後一堂嘅烹調課,亦即第十堂,今日學嘅係甜品,焗芝士疏乎厘&法式冬律

首先焗芝士疏乎厘,要將牛油&粉搽勻錫紙兜,以防黏底

然後將砂糖&忌廉芝士打滑,再加蛋黃,淡忌廉,檸檬皮碎&汁

另外用盤打起蛋白&糖至企身

將忌廉芝士漿同蛋白混合後,就可以倒入錫紙兜,而焗盤底要加啲熱水先好放入焗爐焗

睇吓係焗爐中升起啦

呢啲就係焗好嘅疏乎厘, 可以灑上糖霜或者果醬食

而法式冬律要將牛油,奶&暖水煮滾,再倒入過篩麵粉攪勻,熄火後分幾次加入蛋液成麵糊

將麵糊倒入唧袋中,再唧落冬律模,放入滾油中炸熟

好快已經炸好啦,再將檸檬糖漿搽上面就食得

呢兩款甜品都好好味,尤其是法式冬律加埋檸檬漿,酸酸甜甜好味道,不過都係偶一為之,唔可以成日食,唔係會好肥架.

新鮮出爐藍莓黑糖麥包

今朝剛焗完新鮮出爐嘅藍莓黑糖麥包.

麵包材料有日本高筋粉,沖繩黑糖粉係去沖繩旅行時買嘅,白色個兜係冷飯湯種,琴晚食完飯後再加熱水煮爛米飯,攤凍後放入雪櫃,今朝攤番出來解凍.乾藍莓就用Rum酒浸一晚,等佢濕潤同有香味,黑麥汁今朝係超級市場順手買呢試吓,已經加咗糖,有甜味可以當飲品,有啲似飲啤酒感覺.

由於冷飲湯種太濕同黏手,所以今次用麵包機,等攪拌完準備發酵時先加埋浸過酒嘅藍莓落麵團.

睇吓焗完後,麵包嘅內部組織都幾好,非常軟熟,不過應該要再落少啲糖,雖然我已經減咗糖,但我唔記得乾藍莓本身已經甜,所以焗出來麵包甜咗啲.

根據上次經驗,冷飯湯種做出來嘅麵包,比較其他方法做嘅麵包濕潤&軟熟,2-3日後仍然可以保持軟熟,唔會咁快老化,唯一係要用水煮爛米飯,比較麻煩.

蛋糕課程-第九堂_鋼琴蛋糕

今日學嘅係鋼琴蛋糕,其實係朱古力蛋糕加造型.

首先要焗個海綿蛋糕底, Miss為咗慳時間,用大盤焗

跟住切成方塊俾我哋造型

 與此同時,先要準備好truffle餡,同埋用熱水煮溶栗膠,加入不同黑色/白色朱古力溶液成為朱古力膠,用刀切好鋼琴形狀後,中間塗上truffle餡,之後蛋糕面及四邊都要塗勻,再擺入雪櫃雪硬

再淋上朱古力漿放入雪檳雪硬,不過呢隻朱古力漿好容易變杰,結果批得個琴面唔夠平滑

最後將黑白朱古力膠切成琴鍵,黏上蛋糕便完成,我無將佢帶番屋企,因為兩個人共做一個,我又唔太鐘鍾意食咁甜嘅野,所以送埋俾我個同學仔,而我就將剩餘嘅朱古力海綿蛋糕同朱古力醬帶走,明日自己做朱古力三文治蛋糕食.

我唸呢個蛋糕我唔會係屋企做,因為手工太多,自己技術又未到家,都係做普通蛋糕算啦.

午餐@Freshness Burger

今日去荃灣幫朋友買"金桶"牛油,順便去二記買麵包粉,買完後本來想去新村街個間"家樂"冰室試下食晏晝,點知11點半已經人頭湧湧,要等位,裡面地方又細,於是漫無目的行咗去千色店附近,見到有一間"Freshness Burger",唸起係Openrice口碑都唔錯,於是入去order咗個set,但唔似麥記要排隊攞包,收銀員俾一個坐枱號碼你,入去自己揀個位坐低,會有人送埋來,時間都係5-6分鐘到.

地方都幾清靜,一邊有排矮嘅灌木,有音樂播放同電視睇,坐位都好寬落

打開包入面共有四層,上面係一層厚切蕃茄,跟住中間有碎肉醬&芝士,下面係漢堡扒,食落好多汁,扒都好鬆化,不過我唔鍾意生嘅洋蔥粒,我食完有時會嘔.

飲品係柚子茶,無乜特別,但要另加$5,認真唔抵

呢個係沙律焗薯皮,有蕃茄,青瓜,菠蘿粒,雖然無另一款芝士,煙肉薯皮咁香口,但就比較健康啲

呢個餐都唔平,要成$51,試吓無妨,但唔會再Encore囉

最後呢一堆就係我今日大出血換番來嘅大堆頭,包括有日本高筋麵粉,兩種預拌粉,椰絲,戚風&貝殼模,黑白朱古力,金桶牛油,香葉kaya醬,泰國棘醬,卷蛋蛋糕膠殼,呢兩日買咗咁多野,有排用,我唸近期都唔會再買野住,除咗麵粉類.