慈母手中線,女兒身上衣

先知聲明呢件冷衫唔係我織嘅,係我娘親嘅傑作,其實佢都係編織高手,屋企子孫嘅冷衫都係由佢一手包辦,之前我發現呢包花冷買咗係度好耐,但又提唔起勁織,所以要求佢織俾我著,估唔到佢咁神速,2-3個禮拜已經織起,咁我新年就有新衫著嘞,下身襯裙或褲都得,雖然款式簡簡單單,但內裡已包含佢對子女嘅愛意,日後我亦可以作紀念之用.

烘焙日

今日差不多全日都係折磨個焗爐,唔俾佢停,用到佢夠本.死未!

今朝食完早餐,做完運動後,首先發咗個麵包中種,跟住將已回溫嘅忌廉芝士同溫熱牛奶,打成漿,再加牛油,最後將過篩麵粉/粟粉/蛋黃混合.

另再打起蛋白+糖至濕性狀態,同芝士粉漿快手撈勻,倒入模中,放入已裝有熱水嘅焗盤,就開始焗啦..,講咗咁耐,係整乜蛋糕? 之唔係焗日本芝士蛋糕囉.我都係第一次焗呢款蛋糕咋,都好驚唔得架.

經過約40分鐘左右就出爐,雖然大個底有啲裂痕,但相比前兩次焗日本棉花蛋糕已經算好啲,細個兜係我要來試味,大個兜係準備明日送俾我娘親嘅生日蛋糕.

甩模後,糕面掃上黃梅醬開嘅鏡面啫喱,睇吓個啲裂痕係冷卻後,竟然合番埋啲,無咁明顯lu..

切開蛋糕入面都好濕潤同鬆軟,至於味道...就同伊x家差唔多,其實我已經好開心有咁嘅製成品,唸番對上兩次日本海棉蛋糕,真係沮喪到對自己失哂信心呀.

好啦,食過好簡單嘅晏晝,又再開工,但焗爐就無得停,奄尖大少趁呢個空檔,攞咗有殼嘅夏威夷果仁,同松子仁,仲有公魚乾出來焗香,當零食,話咁先鬆脆喎,真係無佢咁好氣,而我呢就攞番今朝發個舊中種麵團出來,加入主麵團打至起薄膜,經過第一次發酵,排氣,第二次發酵後,用棍碾平麵團,放入呢啲白色葯丸,你估係乜呢? 係...我同網友買嘅芒果粒粒,第一次用,求其亂放,唔知變成點?

捲起麵團成條狀,放入呢個鐵筒(麵包模)裹面作最後發酵,約8成滿左右就將呢筒野放入焗爐焗.

180度火焗咗30分鐘,登登...出爐啦,係心形麵包嚟架.

切開後芒果粒粒已經變成啫喱糖咁,食落甜甜地,少少煙un,幾得意,麵包組織都OK.終於攪到4點幾先完,仲要洗埋用過啲工具,先至可以收檔同收爐,我唸如果唔鍾意烘焙嘅人,會覺得煩死,但我呢..就樂在其中囉!

第一百篇網誌-生日快樂

係咪覺得呢個標題有啲無喱頭呢? 其實今日係我生日,亦適逢寫到第99篇網誌,所以就寫咗呢一篇作為生日一啲感想同回顧過去,用作湊夠100篇.

首先要講吓生日願望,就係唔止生日先快樂,希望嚟近將來嘅日子日日都健康快樂,記得我18歲生日時,為咗記念自己大個女,同埋相差一個月嘅好同學,一齊開咗一個盛大嘅party,當時流行開party作為社交,請咗約20-30朋友&同學,當時真係好開心,亦好天真爛漫,唔知世途兇險,之後每逢生日又一定要有生日禮物或者去旅行慶祝,係多數情形許可下,至少生日當日都會請假,唔返工,覺得一年到晚,如果生日都要捱世界,好似好悽慘咁,但呢幾年,覺得生日同普通日子差唔多,祗係同死亡又行近一步而已,無乜特別期待或者好開心.

然而都仲收到好朋友同埋奄尖大少送嘅生日卡,前面個張有Hello Kitty就係佢昨晚送俾我,真係有啲意外,以佢咁古板,又唔浪漫(從拍拖到而家,祗係送過1001枝玫瑰花咁大把,好彩我鼻敏感,唔聞得花香味),竟然會揀張咁cutie嘅卡送俾我.

翻開內頁,竟然仲有立體生日蛋糕&hello kitty彈出來,都幾得意,本來佢問我想食乜野生日晚餐慶祝,但為咗唔想出去食咁多肥膩野,卒之決定今晚由佢親自下廚,買啲新鮮海鮮番來自己煮,又可以免舟車勞動之苦,人老真係越來越懶,

好啦,講咗咁多廢話,最後祝願所有人健康快樂,豐衣足食,世界和平.

甜品蛋糕技巧班-第三堂-Sacher朱古力餅

今日學整Sacher朱古力餅.

首先要焗個朱古力海綿蛋糕,再片成3片待用.

然後預備朱古力餡,坐溶牛油&朱古力,加淡忌廉攪至杰身.

然後一塊蛋糕片,一層朱古力餡相間,糕面同邊再抆朱古力漿至平滑,放入雪櫃雪至硬身.

將坐溶朱古力漿淋上雪凍糕面好似鏡一樣拎身.

唧上字型&圖案作裝飾就完成啦,鐘意食朱古力嘅人一定會覺得好正,因為朱古力味非常濃郁,但落好多牛油先至咁好味,都係偶然食吓好啦.

南瓜椰汁年糕

啱啱學完蒸年糕,所以迫不及待試吓蒸.

黃色個兜係將南瓜批皮切粒蒸熟壓爛成蓉,再同糖水/粉漿混合,另一兜係椰汁同糖水/粉漿混合.

倒一層南瓜粉漿落模,大火蒸3分鐘左右.

見糕面凝固後,再倒椰汁粉漿,如是者直至模有8-9成滿為止.

蒸好後攤凍就反轉,就係呢個樣,因為今次試蒸,祗係用咗一半份量,所以模唔滿.

切開來食,幾煙un,我無放落雪櫃,淨係昨晚放係廚房攤凍一晚,所以唔硬,過幾日會做足一底份量.

不夜天蕃薯包

其實呢個係改良網友Toby嘅冬季薯仔包食譜,舊年冬天我已經做過一次,非常成功,真係多謝佢嘅分享,令我又識多一個做麵包嘅方法,不過我改咗用紫心蕃薯蓉,一樣掂喎.

昨晚將剩餘嘅紫心蕃薯蓉加入麵包同其他材料中.

跟住用機打至麵團撕開見到有薄模,就變成呢一個紫紅色嘅麵團.

好似平時咁樣,經過第一次發酵,放氣,再第二次發酵,分割成9個,滾圓,放係焗模上,不過發酵時間比平時短,每次約30分鐘左右,跟住我將成盤包放係廚房窗口旁邊,就上床訓覺覺lu..ZzzzZzzzz

一宿無話,今朝起身,就見佢發大咗好多.

跟住即刻預熱焗爐,搽上蛋汁同灑上金寶碎,去洗面刷牙後,就可以放入焗爐焗啦.

約焗咗18-20分鐘左右,就可以出爐

撕開啲包仍然見到一絲絲黏住

食落非常柔軟同濕潤,係寒冷嘅朝早,食到新鮮熱辣辣嘅出爐麵包,真係有種幸福滿足嘅感覺,遲啲再做多一次添.

中日素食-第二課_綠茶鲤魚年糕&黑白千層糕

今日又到上中日素食課程嘅日子,由於年近歲晚,所以今堂都係教蒸糕.

其中一款係綠茶鲤魚年糕,其實任你用乜野模都得,或者唔用綠茶粉,轉用其他代替品都可以,祗要粉同水比例啱就得,仲要記住掃油係模上,否則蒸完就好難甩. 呢個係蒸完未甩模嘅樣,仲有Hello Kitty添.

甩模後反轉就變成咁啦,好香綠茶味,但我就嫌稍甜,我整會減糖.

另外一款係黑白千層糕,層數越多越薄就最好,黑色係炒香芝麻,加糖水再打成蓉,隔出芝麻水再溝粉攪拌而成,白色係椰漿加糖,再加入粉攪拌,至無粉粒,如有需要要過篩,粉漿會比較滑.

慶生禮物-BB冷外套套裝

之前好朋友報告喜訊,今年5月會增添新家庭成員,非常替佢開心,所以趁而家天氣凍,即刻織&勾定一套BB外套加帽子&鞋子,準備遲啲送俾佢做禮物.由於唔知性別,所以用咗呢隻花冷,但我自己唔鍾意織花冷,因為織花好難見到清楚,祗好織高/低針,最基礎個種織法,非常沉悶.

BB冷外套

BB帽子

BB鞋正面&後面

消滅剩餘物資嘅晏晝

今日為咗要消滅椰菜同埋粉果餡,所以做咗椰菜包做晏晝.

呢啲就係椰菜&剩餘嘅粉果餡.

將椰菜葉逐塊摘下洗淨,然後拖熱水至軟身.

將餡包入捲起,放係已掃油碟,然後攞去蒸.

大概蒸咗10分鐘,就可以攞出來食得,因為我當晏晝食,所以無打獻汁,如果唔係餡內有瘦肉粒,咁就係素菜包,都幾健康架,又容易整,用咗30分鐘就有得食lu...

紫芋芝麻方包

由於早前幫襯網友買咗包紫芋粉,所以今日焗麵包試吓加埋落去,睇吓效果如何?

今日我用中種法,將呢包紫芋粉約5g加入中種面團,再加少許糖,伊士&糖,一齊搓勻唔黏手又唔黏缸就得,擺係度靜置約4個鐘.

今日天氣好凍,所以要攞出露台,借助陽光令溫度高番啲,麵團溫度約28-29度左右.

經過4個鐘之後,就將主麵團材料加入,用機搓至起薄膜,不過變成一個淡粉紅色麵團,唔係紫色,所以下次要再重手,加多啲紫芋粉先至得.

跟住如常一樣經過兩次發酵,放氣,整形後,放入方包模作最後發酵至8-9成滿,搽上蛋汁,灑上芝麻,就可以攞去焗啦.

焗咗約25分鐘後就可以出爐,呢個係麵包正面&側面.

切開食都好鬆軟,濕潤,都幾好食,不過就無芋頭味,我減咗糖,又改咗用葡萄籽油,所以都算健康嘅麵包.