今日晏晝-$10成本排骨粗炒

今朝起身,突然想食上海粗炒,於是趁去街市買餸,順便買咗兩件新鮮豬扒($10兩塊),另外$8上海粗麵,番屋企就可以開工煮lu.

好簡單嘅材料,將1/3上海粗麵($8/3=$3.7)煮淋,過冷河,隔水後俾少少油撈勻,以防黏埋一舊,豬扒就用刀背啄鬆,用生抽,老抽,糖,胡椒粉,仲有我至愛嘅玫瑰露,麻油(奄尖大少最唔鍾意,覺得肥膩),醃約30分鐘.

首先用猛火煎香豬扒至僅熟,待稍涼切條或塊狀,然後落薑絲炒白菜仔,最後炒上海麵,落埋個獻汁(生抽,老抽,麻油,糖,豆粉,少少水)同之前白菜仔兜勻,就可以上碟,豬扒肉放面,味道都唔錯,拍得住出面嘅味道.

雖然話無咁肥膩,但始終要用油炒,所以間唔中食吓好啦.

成本係一塊豬扒($5)-另一塊留番明日淥湯粉/麵+上海麵1/3份量($3.7)+白菜仔$1($3.3一斤,$10有3斤)=$9.7,但再加煤氣,油,鹽,糖,我唸應該約$13-14左右,計得咁清楚俾大家知,無非想講,有時間如果自己郁吓手,真係價廉物美架.

自炒鳳梨酥餡

次次整鳳梨酥都係出面買餡番來包,但係見到好多網友都係自己整,睇落都唔太複雜,起碼真係有菠蘿係裡面,所以我又試吓自己整.

係網上搵到以下呢個配方,首先將罐頭菠蘿隔去糖水,將菠蘿圈切碎,攪爛成蓉,然後隔出約半杯汁液.

將糖冬瓜浸去糖份,然後切碎,將半杯菠蘿汁液加入砂糖混合後,再打成蓉.

再將之前嘅菠蘿蓉加入混合後,落鑊放一湯匙油,不停攪動,煮乾水份,可以加入少許菠蘿香油,令顏色同味道提升.

炒至半乾,剩低少許水份就加入糕粉撈勻成黏杰狀就攪掂lu..好香菠蘿味,無出面個啲咁假,因為減咗糖,食落有些少微酸,不過我覺得好過買番來個啲餡囉.

全麥吐司-麥皮湯種

今日跟"65度C湯種麵包"書焗咗呢個健康嘅全麥吐司,但其實唔係100%都用全麥粉,否則一定起唔到筋性,所以實際上袛係40%全麥粉,60%係高筋粉,我見上次用麥皮湯種,麵包都幾軟熟,今次繼續用呢個配方嘅湯種.

呢個係打好嘅麵團,要比平時用多啲時間先打到有薄膜.因為全麥粉無乜筋性.

今日天氣同溫度都好,所以麵團發得唔錯,經過第一次發酵,排氣,第二次發酵後,就整形,捲好放入麵包模作最後發酵,今次用正方形麵包模.

發酵至8-9成滿,我再加料係包面搽上牛奶後,灑上小麥胚芽,咁就更加健康嘞.

經過35分鐘就焗好出爐.呢個係麵包正面同側面.不過唔夠一陣麵包就開始廋腰(中間凹陷),即刻將佢側放直至涼.

攤凍後切開,試食覺得麵包質地都好軟熟.明朝可以作三文治夾火雞肉+滑蛋,唔....唸起都好味.

中日素食-第三課_安琪梨&壽桃

新年過後又恢復上烹飪堂,今日學嘅係中式甜點,主要係做形.

用大滾水沖入調配好嘅澄麵粉+少許糯米粉+幼砂糖水或糖霜,若果是綠色皮就加入幾滴斑蘭葉油,紅色可以加食用紅色素,或士多啤梨色素,搓勻後,若果整安琪梨就用綠色皮做外皮,白色做內皮,搓成圓兜狀,包入白芝麻或黑芝麻餡,頂部插上桑寄生枝作果柄,約蒸5分鐘就得.

其實壽桃造法都差唔多,將紅色外皮包白色內皮,再包芝麻餡,搓成尖圓形,用牙簽係中間壓出一直線,另外再用綠色皮搓成尖長形壓扁,用牙簽刻出樹葉紋,黏上壽桃中就可以攞去蒸熟. 呢啲都係我堂上整嘅作品.

另外Miss趁我哋忙碌之際,自己同時又整咗紅蘋果&士多啤梨俾我哋參考,呢個點心如果蒸起即刻食都幾軟熟同好香麻蓉味,但如果凍咗,皮會變硬,就要重新蒸軟番先可以食.

潮州粉果&豉油雞

今日奄尖大少開始番工,而我亦可以做番我自己鍾意嘅野,就係整點心,潮州粉果.

餡料有沙葛,菜莆,冬菇,紅蘿蔔,蝦米,廋肉,唐芹,焗香花生,要全部切粒,都要用幾多時間.

跟住將所有餡料飛水,除咗唐芹&花生,用蔥頭(啄成蓉)起鑊,落餡料炒香,打獻後再加唐芹粒&花生攤凍.

將澄麵粉,生粉開好漿,用熱滾水撞勻,約焗2分鐘後倒出,再加入剩餘生粉同埋木薯粉,加少許油,搓成粉團,就可以包餡啦.

大火蒸約6-7分鐘,再焗多3-4分鐘,就食得啦,味道都唔錯,我無跟食譜落味精,以前幾次都無落炒花生,今次落咗就香口好多.不過都好化時間,連洗,切,煮,包,蒸,用咗3個鐘先有得食呀.

另外,由於奄尖大少要求我整豉油雞,趁住新年後,活雞價回落,所以買咗隻嘉美雞浸豉油雞,將上次豉油雞汁煮番滾後再加唐芹,芫茜,少許八角,花椒,玫瑰露煲一陣熄火焗3個鐘,先開始浸雞,為免好似上次咁雞脾位唔熟,今次浸多10分鐘,仲用瓦碟壓住,我唸今次一定熟啩?

點知斬開之後...雞脾位仍然見紅,即刻將雙脾放係飯面再焗一陣,先至可以食得,果然嘉美雞真係皮薄少肥膏,肉質都算嫩滑,雖然價錢貴啲但都值嘅.

牛年開爐-紅棗桂圓包

經過兩個禮拜忙碌,要大掃除,蒸糕,團年,拜年,開年,最後終於可以休息吓,今日(年初五)有時間再開爐,而且已經無麵包做早餐,為咗應節,所以焗咗呢個健康嘅紅棗桂圓包.

首先睇吓啲年花，雖然今日已經係年初五,但奄尖大少係年30晚買番來嘅花仍然開得好燦爛,但佢自己浸嘅水仙,因為天氣凍關係,就仍然未開花,祗係綠草如茵.

好嘞,講番麵包嘅材料,有隔日用Ruｍ洒浸過夜切碎嘅紅棗＆桂圓肉，我將一部份紅棗肉去衣壓成棗泥，仲有浸過紅棗桂圓水＋呢隻香棗片糖煮溶攤凍，另一碗係麥皮湯種。

經過第一次發酵，排氣，再發酵後，將麵團碌平成長方形，鋪上紅棗桂圓碎粒，再捲成長形，放入個半月形嘅模裡面作最後發酵至九成滿，就可以焗啦。

經過約２５分鐘左右，已經焗好出爐啦，睇落係咪好靚呢？其實。。。個包底焗燶咗，睇唔睇到條燶邊呀？因為我用另一個焗盤壓住麵包底個面焗（係焗爐焗時上下方向係掉轉，即係包面向上，見到車輪紋個面係下），開猛火焗，唔夠１５分鐘已變黑，即刻熄咗面火，較番細火再焗至熟。

焗好後攤凍，將包底片走，又變成靚樣ｌｕ。。切開試食後，好鬆軟，有啲紅棗香味，又唔甜，夠哂健康，唔。。。錯，幾好

牛年蒸糕,步步高升

每年新年我例牌都會蒸糕,一來自己蒸真材實料,二來希望能夠將呢啲傳統手藝繼續保留,今次蒸咗一底鹹二底甜糕.

鹹嘅係蘿蔔糕,材料雖然同往年一樣,但無論切同煮都有很大分別.因為我去學過蒸糕同埋參考其他網友嘅資料

1)蘿蔔切粗絲唔刨,話咁樣蘿蔔水份唔會流失咁多,會甜啲.

2)唔將粉漿倒入煮熟蘿蔔絲同配料中煮至半熟,改做熄火後先將粉漿倒入推勻.

3)粉漿中除咗粘米粉外,加入粟粉,生粉同澄麵粉,以往祗係將粘米粉加埋粟粉就算.

4)改用方型糕盤唔用圓型,切糕會容易啲.

呢盤就係已攪勻嘅蘿蔔糕生料,可以攞去蒸.

蒸咗45分鐘左右,就蒸好啦,係面灑上蔥粒同炒香芝麻,但奄尖大少唔鍾意芝麻係糕面,所以我淨係落埋一面.

無得抖,要繼續努力,批好馬蹄切租粒,煲桂花糖水,桂花係由奄尖大少親手種,再開粉漿,粉漿今次除咗馬蹄粉之外,仲加咗澄麵粉同吉士粉,.而糖就改用蒸年糕片糖,將馬蹄粒倒入糖水中,滾起後,將粉漿慢慢倒入,開慢火攪至半透明,就可以倒入糕盤中蒸約30分鐘.

好嘞,一氣呵成,最後蒸埋南瓜椰汁年糕就大功告成.

材料有蒸熟壓爛嘅南瓜蓉,糯米粉加澄麵粉,糖係用年糕片糖,Miss之前話會比較黏同好色水,煮溶糖水攤凍,加入椰汁,南瓜蓉,再倒落粉中攪勻後過篩2-3次,令粉質幼滑.

當粉漿涂涂流落盤中,就可以倒落糕模蒸約30分鐘至熟為止,呢兩條係其中之二,總共蒸咗3條同埋半底留番俾自己,其餘會係年三十晚送俾奶奶,大伯&叔仔,每人一條金鯉魚.啲顏色係咪好金黃呢?無落人造色素架.

呢啲就係我今日嘅製成品,由朝早9:30開始,到晏晝約2點左右就攪掂哂,包洗切,煮蒸都算快手啦.其中有一細兜馬蹄糕已俾我同奄尖大少試味食咗lu.,另外你睇吓蘿蔔糕亦俾佢趁熱挖咗一舊食,好彩今次佢都覺得唔錯.

此外我要介紹係呢個12人嘅大飯煲,每次蒸糕我都會用佢,點解?因為貪佢比鑊存氣,又唔駛成日加水,令到啲蒸汽溜走,溫度下降,一次可以擺得8吋寬x2吋高圓糕盤兩底,蒸起碼45分鐘都唔駛加水架,今日係咁先,明年再嚟蒸過.

Home make火腿蛋早餐

今朝起身,唸起雪櫃仲有一塊火腿,驚佢過期,於是決定整咗個豐富嘅火腿蛋麵包早餐,我係跟阿蘇嘅炒蛋方法,首先用叉將蛋黃攪散,再倒番落蛋白內加豉油,胡椒粉攪勻,不過唔好起泡,燒紅鑊,落少少油,將鑊中心晾勻,然後將蛋漿倒落,之後急炒,見差不多凝固,就熄火鏟起炒蛋,用鑊餘溫熨熱火腿加埋之前自家焗嘅心型麵包,就上檯食得,當然唔少得我至愛嘅奶茶,我用一個百爵茶包加一個Marks&Spencer Extra Storng茶包沖製而成.

咁樣炒蛋真係好滑,雖然好食,但都係間唔中食吓好啦,因為蛋黃嘅胆固醇好高(266mg,但人每日可以吸收祗係300mg)

 回想起以前要番工日子,早出晚歸,相比而家可以為自己做一個早餐,慢慢欣賞食物,個種感覺真係轍然不同.

一人冬菇牛肉煲仔飯

今日開始大掃除,但淨係洗廚房抽氣扇,已經洗到索哂氣,但仍然為自已整咗呢個煲仔飯做晏晝.

材料包括有醃咗嘅牛栁粒,冬菇絲,蔥粒,至於個煲仔從來未用過,唔記得邊個送?因為太細,所以都唔知攞來點用好?而家剛好可以用來煲飯

首先落半筒米,水剛過米面同落幾滴油.

開大火煲到見水滾起,見到差唔多收水,其實祗係3分鐘左右,就收細火,落冬菇絲,再平均鋪好牛肉粒,再煲多5分鐘熄火,落埋蔥粒再焗多5分鐘就食得.

加埋碟焯菜就可以開飯,係咪好簡單呢?前後都係用咗20分鐘,已經食到又好味同健康嘅晏晝. 不過無乜飯焦,因為焗時間短. 而家又有力氣繼續大掃除啦.

中日素食-第三課_嘻哈滿堂&四海昇平

因為臨近新年,所以今日學嘅中日素食,又係好意頭餸菜

呢一款就係嘻哈滿堂,其實即係沙律海鮮卷,不過係素食,所以用咗素蝦仁&芒果條,用威化紙包捲好,上脆漿,再黏上麵包糠炸好就食得,熱食時都幾好味,但Miss話想脆啲,脆漿做好後等四個鐘頭再做多一份脆漿加入原來個份,就會更脆口,可惜我唔太鍾意食炸野,怕油膩,應該唔會係屋企整,除咗即場有得食之外,仲一人可以帶兩舊走.

另外一個叫四海昇平,係湯羹嚟架,湯底用大荳芽菜,用少許油同薑汁,略炒芽菜一陣再放落滾水中滾約45分鐘,再加入已爆過嘅薯仔粒,煲淋薯仔後,最後落已經爆過嘅蕃茄粒,草菇粒同竹笙,臨食前落馬蹄粉同埋生粉水作獻,芫茜,麻油,調味等等,就食得,因為始終係素菜,味道比較清,但都幾好飲,而且多材料,所以都幾飽肚.

上完呢堂後要放完年假後先再會繼續上堂lu.

呢兩個氣球公仔同上面煮野食無關,祗係回程時,經過一個戶外臨時遊樂場,見到幾得意就影低佢,其實呢兩個公仔可以俾小朋友係入面當彈床跳,應該會幾好玩,可惜我無得玩.