精緻蛋糕甜品班-第五課-原味疏乎里&木糠蛋糕

眨吓眼已經上到第5堂,今日Miss教兩款甜品.

第一款照講義應該係牛油果疏乎里,但因為買番來嘅牛油果太生,所以決定唔加入去. 其實呢款甜品我已經第3次學,所以無乜難度.

首先要煮咗個"較",就係將牛油加奶煮熱後,離火加入已篩麵粉拌勻,再加入蛋黃又拌勻,之後再開火煮至杰身.中途要不停攪拌.攤涼後備用.

另外將蛋白加糖打至企身,逐少加入"較"內,直至全部混合為止,可以用唧袋或茶匙放入已搽油&灑上砂糖嘅疏乎里杯中,放入焗爐焗至見到升起,而四周已經乾身就可以出爐,立即進食,否則就會回縮.

一人有一杯,睇吓比較上面剛出爐,明顯我呢杯已經回縮.

第二款係木糠蛋糕,材料都係非常簡單,首先將馬利餅壓碎,越碎越好,跟住將淡忌廉加煉奶打起至杰身,千祈唔好過硬,否則會唔軟滑,再加入坐溶魚膠液攪勻備用.

係餅模底層鋪上一層海綿蛋糕做底,用唧袋將忌廉唧上蛋糕面,刮平,灑上餅乾碎,重複動作唧忌廉,灑餅碎.直至滿至模頂,最面層要係忌廉.

若果唔做蛋糕,可以直接將忌廉唧入杯中,灑餅碎重複至滿,咁就變成木糠布甸.

一人分到一舊,但由於時間關係,未雪得較硬身,已經要切,所以仍然係軟淋淋,食落都好香滑又唔甜,幾好味.

捲土重來-包粽

繼舊年慘痛包粽(一隻粽至少包兩次以上,同埋手腕俾粽葉介損哂)失敗經驗之後,今年決定再嘗試,希望攞番啲信心番來.

首先睇吓有乜材料:

呢啲係包鹹粽餡料,有鹹蛋黃,五香豬肉,江瑤柱,冬菇,栗子,蝦米等.

當然唔少得最主要嘅白糯米,開邊綠豆,黑糯米.

甜粽材料有浸過夜紅豆,糯米,糖桂花,紅豆沙(做餡),我係想包桂花紅豆粽.

好嘞,一切準備就緒後,就開始懷住戰戰兢兢心情,俾心機包呀包....睇吓,呢盤係鹹粽,有用5塊葉包成嘅坦克車,亦都有用3塊葉包成5角粽.

而呢8隻係用兩塊葉包成嘅桂花紅豆粽

但因為烚完後仲要焗多幾個鐘,所以未有解開粽嘅相可以post住,總括今次比上次流暢,技巧純熟啲,其實主要係今次買咗啲大塊粽葉嚟包,起碼唔駛每隻粽包兩次,但外形仍然唔靚,草繩又紮得唔夠實,出年仍然要繼續努力,造到最好.

滋味家常菜餚課程_第五課_鹼水豆沙粽_薏米素粽

因為就快到端午節,所以今堂Miss教包粽,亦都係我好想再學多一次嘅野,其實舊年係工聯會已經學過一次,結果番到屋企包到一塌糊塗,兩隻手腕俾棕葉介到傷痕纍纍,完全失敗,非常挫敗,所以決定今年一定要征服呢個難題.

Miss示範包咗兩款粽.

呢款係傳統鹼水豆沙粽,材料好簡單,將糯米浸約8個鐘,然後加鹼水,芥末粉,油撈勻,而豆沙可以買或者自己炒.每人包兩隻,用高速煲烚約30分鐘,由水滾起計就攪掂.

解開粽葉後就係咁樣,因為一次要烚太多粽,所以未夠淋身,但唔太甜,幾好味.

另外呢款係薏米素粽,材料祗係浸淋薏米,糯米,綠豆,首先爆香蒜頭,倒哂所有材料落鑊炒一陣,加鹽調味就可以包嘞.

包成一個圓錐形,上面有一個圈,都幾得意,因為時間關係,各人帶番屋企蒸約1.5-2個鐘,然後再焗相同時間先夠軟滑.

湯種玉桂蘋果包

今日轉換另外一種方法焗麵包,就係好耐無用嘅湯種,而餡料係玉桂蘋果.

琴日我已經煮咗個餡先,攤凍放落雪櫃雪一晚.

就係呢兜嘞,其實唔止呢款餡料,仲有之前未用完嘅三文魚黍米餡.

今朝開咗個湯種攤凍,比例係筋粉1份加5倍溫水開勻煮至有紋路,但我多數用微波爐叮,效果一樣.

跟住同平常做麵包方法一樣,時間關係,眨眼已經到最後發酵啦,將麵團放入呢個花花模,呢個係玉桂蘋果餡.

呢款唔同型狀係三文魚黍米餡.

發大2.5-3倍左右,就放入焗爐焗,不過花花模個盤就要用牛油紙墊面,再加另一個焗盤壓住嚟焗,焗完先至有花花型.

好嘞,焗完出爐嚕...

花花包好似燶咗啲喎.

雖然未食,但用手指禁落去會回彈,証明都好鬆軟今次應該OK嘅.

精緻蛋糕甜品班-第四課-白朱古力芝士蛋糕

今日呢篇網誌祗係作為紀錄,唔打算公開,因為坐到最後又唔想頻頻行出去睇Miss示範,所以求其影咗兩張相就算數.

首先蛋糕底係用甜鬆酥皮,即係蘋果批皮個隻,不過分別係用一半高筋,一半低筋粉,牛油糖粉要打到鬆起狀態,先好加粉撈勻壓扁成圓形就可以放入冰格雪半個鐘.

而白朱古力餡,就首先要將忌廉芝士同白朱古力分開坐溶,將忌廉芝士打滑身後加砂糖,蛋攪勻,將雲尼那籽加埋入去,再將淡忌廉,白朱古力溶液,橙酒倒埋入去攪至滑身.

將批皮攞出來搓軟身,壓平放入模底,另加圍邊,叉洞係餅底後放入焗爐焗10分鐘,將麵粉掃係餅底洞填平,再將芝士餡倒入,用150度c焗40分鐘度.

攞出來攤凍後餅面淋一層白朱古力醬,再淋一層黑朱古力醬或者劃線條裝飾.

成個餅好甜,我又唔鍾意食白朱古力,應該唔會整.

17小時低溫中種黍米包

見到好多網友熱衷做17小時低溫中種包,個個都話"Good",加上前幾日買咗"天然麵包香"呢本書,所以等我都跟風做吓呢種包,我揀咗做黍米包.

首先琴晚已經發定個中種,擺係雪櫃超過17小時以上,將新鮮黍米粒打爛成蓉,另外仲有罐頭黍米粒.

主要材料就係呢幾樣嘞

將中種,黍米蓉,糖,新鮮伊士,奶粉等加入主麵團,打至起筋後,再加入牛油&黍米粒,直至拉開有薄膜,正如好多網友講,麵團好黏手,勉勉強強見到有薄膜就收手,無謂再繼續攪落去.

睇吓呢舊就係打好嘅麵團,比平時打起麵團軟身.

經過第一次發酵後就分割成等份,都要落多啲手粉先攪得掂.

靜置約20分鐘就可以拍平包餡,其實本書做嘅係無餡包,係我自己加料落去.左邊係奶黃餡(甜),右邊係三文魚黍米餡,罐頭三文魚係朋友由加拿大帶番來送俾我,唔知點用?所以咪攞嚟做麵包餡.

包好餡後放入圓模內,麵團太軟身,唔落模唔掂,經過最後發酵至8-9成滿,係包面灑上粟米粉(Cornmeal),少少牛油,記住唔係打獻個隻粟粉(Corn stratch)

外

焗約30分鐘就可以出爐嚕..呢款係奶黃餡.

另外個款面就灑高筋粉,饀料係三文魚&黍米粒.

睇吓撕開都有絲喎,食落好軟熟,但又同平時中種分別不大,睇吓放到明日,有無分別至得?

食Hotdog做晏晝

今日有事要出荃灣,順便去試吓有好多人係Openrice讚話好食嘅熱狗之家.

呢間鋪都幾隱閉,係華都中心地下一個角落.

睇完餐牌就叫咗呢個店主金牌推介嘅"香草芥末芝士熱狗餐"要燒烤芥末汁,配凍榛子咖啡.

個熱狗包內外都烘過,外脆內軟,熱辣辣都幾好食,祗係香腸比較細條同個汁酸啲,至於凍榛子咖啡就唔太甜,飲落有香味,都幾好飲. 成個餐要成$34,呢個價錢係貴咗啲,但味道唔錯,所以我覺得OK喎.

炒韓國粉絲

買咗包乾韓國粉絲好耐都未開工,今日決定郁身啦.

黃色個包就係嘞,首先將粉絲浸軟身,放落滾水中煮至透明色,撈起過冷河,隔乾水份,落啲麻油撈勻,咁就唔會黏埋一堆.

炒材料有三色椒,紅蘿蔔,洋蔥,雲耳浸軟,全部切絲,另外仲有乾蔥同蒜蓉,我無落泡菜,因為唔太鍾意食太咸同辣.

用乾蔥,蒜蓉起鑊,放哂所有材料落去炒,再放調味料(豉油,糖,魚露,胡椒粉,麻油,水等),再將粉絲回鑊兜炒至汁乾身,盛起放碟上,鋪上蛋絲,灑上芝麻就食得.

不過我覺得凍食好過熱食,因為熱食粉絲比較淋身,無咁煙韌.

西米盏

自從兩個禮拜前有幸食過靚靚媽咪整嘅水晶西米餅,覺得好煙韌,幾好食,今日就等我東施效顰,自己試吓整先.

首先將乾西米倒落大熱滾水中焗一個鐘左右,中途攪拌數次,以免黏埋一舊,再將西米倒出,用冷水衝走膠質至清爽,將馬蹄粉用水開稀隔去雜質,倒落西米中,加糖,油拌勻.

首先放1-2匙羹上述西米糊入撻模底,中間放入之前已經煮好嘅奶黃餡或蓮蓉餡,之後再放1-2匙西米糊鋪面.

咁就可以攞去蒸,蒸熟時西米會變透明色,熄火焗多5分鐘,先攞出來攤凍.

呢盤係奶黃餡

呢盤係蓮蓉餡

攤凍後反轉就係咁樣,因為減咗糖,所以淡淡地,唔係好甜,但都幾好味,唔錯.

慳得就慳-大魚兩味

香港雖然經歷金融風暴,百物騰貴,但其實如果自己煮,都可以豐儉由人,譬如我今日係街市買咗條淨魚身嘅大魚,叫檔主幫我將魚斬開兩舊,魚腩開邊,而魚尾原條.

番到屋企,將魚尾煎香滾湯成奶白色.

將白菜仔淖熟放湯碗底,而魚湯隔去渣後再滾起,放入豆腐塊,加鹽,糖,胡椒粉調味當湯再滾起時熄火,倒入湯碗中,咁就成為白菜豆腐魚湯嘞.

另外洗淨魚腩,蔥段墊底,係魚腩上放薑絲,再鋪上已出水,白鑊炒過加糖嘅梅菜粒就可以攞去蒸,我一滴油都無落,但一啲都唔腥,蒸熟後落埋豉油,就可以開飯.

係咪好健康又有營養呢?如果講俾大家聽今餐買咗幾多錢?包你哋會好驚奇,正確答案係約$25度.

條數係咁計: 大魚魚身$15+豆腐一塊$3+白菜仔一斤$3.3(我去菜欄買$10/3斤菜)+梅菜$4,總共係$25.3,就算加埋白飯,應該都係$30左右.

如果屋企有小朋友,又唔想咁清淡,可以將魚腩切條狀,用豉油,糖,酒醃一陣,半煎炸,再起鑊落薑,蔥焗,一樣咁冶味架.

呵呵!又買書嘞

今日出開旺角,順便去馬健記幫朋友買書,結果忍唔住自己又買多兩本,真係無事出街又破財,不過鬼叫我唔鍾意借書睇咩,唯有繼續買下去囉.無計