又有玩具玩

今日介紹俾大家睇嘅玩具已經唔算新,係3年前我工作時候,用信用卡換番嚟,就係呢部雪糕機,初時以為將所有材料放入去,機就會自動製造雪糕出來,咁大家同事就可以有自製雪糕食嘞,點知睇完說明書後,原來放入機之前要自己準備雪糕漿,放係雪櫃12個鐘,又要將個兜放係冰格24小時或以上,睇完已經唔想整,咁就放係公司,擺埋一邊無郁過,直至舊同事話公司要裝修,我而家先去攞佢番屋企,遲啲試吓整雪糕食.

不過個雪糕兜都幾大個,唔可以淨係甩金屬個兜出嚟,所以要得閒清理吓冰格先放得入.

今日晏晝-三色椒札肉撈檬

今日成日都天陰又落大雨,所以無去街,留係屋企做家務.

晏晝就做咗呢個簡單開胃嘅三色椒札肉撈檬食.

將三色椒,札肉切絲拖水,將檬粉係滾水中揚散放係碟中,灑上芫茜,炒香花生碎,炸蒜片,倒埋自製"碌冧"汁,酸酸甜甜,又唔油膩,食完覺得好清爽.

黑芝麻饅頭

今日跟"孟老師中式麵食"一書做咗呢個黑芝麻饅頭.

首先將黑芝麻炒香打碎,加入中筋粉,糖,酵母,少許芥花籽油搓勻成光滑麵團,靜置一陣,然後用麵棍來回多次碌壓成長方形,掃水係麵團表面,灑上芝麻糖粉,要用手壓實於表面.

再捲成圓柱體,切成8等份,放入蒸籠作最後發酵.

蒸約15分鐘由水滾開始計,熄火後,揭開少許籠蓋,10分鐘後先開蓋,以免溫差太大.

呢個係饅頭裡面&側面,食落好香芝麻味,雖然無用中種或老麵,但饅頭質感還可以,而家我都儘量唔落泡打粉,可以嘅話,會用酵母代替.

滋味家常菜餚課程_第八課_魚香肉絲&中華冷麵

好快已經上到第八堂,今日Miss教嘅係適合而家天氣食嘅中華冷麵,另一款係魚香肉絲.

兩款都需要切好多絲,魚香肉絲包刮有豬肉絲(最好枚頭廋肉),濕木耳浸軟切絲,沙葛或馬蹄切絲,豬肉絲調味醃一陣.

開油鑊用暖油炒廋肉絲盛起,再爆香蒜茸,蔥粒,薑茸,紅辣椒粒,加入木耳絲,馬蹄絲贊酒,將肉絲回鑊,,最後加入調味料兜勻就可以上碟.

魚香係外省菜其中一種醬汁,但其實無魚係裡面,食落口祗覺酸甜味,又唔覺魚味喎,不過都算幾好味.

中華冷麵嘅材料其實可以自由配搭,豐儉由人,今日材料有青瓜,甘荀,火腿,,煎熟蛋皮,全部切絲,而麵就用咗日本牌子冷麵要預先煮熟,放入冰水中浸一陣再隔去水份.

其實最重要係撈麵個醬汁,用麻醬,花生醬,豉油,醋,麻油,糖再加少許冷滾水開稀.

一切準備妥當,各就各位就可以開餐嚕...放好材料澆上醬汁,灑上芝麻花生碎,蒜茸就攪掂,味道幾好,可以番屋企自製冷麵食嘞.

香蕉蕎麥雪芳蛋糕

今日同個新雪芳蛋糕模開張,但今次唔係落低筋粉,而係用蕎麥粉,睇吓出嚟效果點?

首先將熟透梅花點香蕉搓爛成茸加蜜糖,蛋黃加黃砂糖攪拌至溶解,再加入芥花籽油,奶,香蕉茸攪勻,最後加入已篩蕎麥粉撈勻.

另外將蛋白加糖打至8-9成硬身,分數次同蛋黃香蕉麵糊拌勻,倒入模中,係枱上輕"dun"數下,就可以入爐.

入爐後不到10分鐘已經爬升得好快,可能我加多咗蛋白原故,好快已到煙囪頂,除咗用鐵片蓋頂外,仲要減爐溫.

出爐後立即倒扣至涼,放入雪櫃雪一陣,就用刀界開甩模,但甩得唔係咁靚,有瑕疵.

切開後都算維持鬆軟,少許濕潤,無下陷,因為減咗糖,唔甜,今次叫做勉強合格,下次仍需努力.

富貴蛋糕模

昨日上甜品蛋糕班,同學報料話某超級廣埸搓麵粉矽膠墊大減價,我正想買嚟搓麵團,係番屋企途中,決定即刻去買,都叫做順路,祗係搭遠幾個站車,個商場位置唔容易搵,不過問吓人估吓都好快搵到,而且仲有貨未買完,點知跟住行過隔離個行貨架,俾我發現咗網友推介,而我又好想買嘅日本品牌"KAI"戚風蛋糕模,價錢梗係唔平,我本來想買17cm,但祗有15或18cm,諗吓如果要專登出"City Supr"或"Sogo"來回車費都唔少,於是即刻決定買咗個18cm,同17cm都係差1cm,應該無乜問題啩,咁又買咗呢個心頭好嘞. 遲啲焗完戚風蛋糕再講俾大家知,係咪真係好啲?

三色芒果慕士生日蛋糕

今日係奄尖大少生日,所以昨日借題發揮做咗呢個蛋糕送俾佢,其實係我自己想練習做蛋糕多啲,因為佢對蛋糕無乜興趣.

呢個係芒果奶凍變奏版,首先將海綿蛋糕墊底,將攤凍杰身嘅雲尼拉奶凍倒入成為底層,放入雪櫃雪至硬身.

再將芒果部份打成茸,部份切粒,將浸軟坐溶魚膠片加糖加入撈勻,攤凍至杰身,倒入成為第二層,又放入雪櫃雪至硬身.

最後將淡忌廉加糖打起至軟滑後,將芒果茸&溶解魚膠液加入撈勻,倒入模中成為第三層,雪凍後攞出再做裝飾.

當最後一層雪凍後係面掃上透明果膠,同芒果花咁就大功告成嚕...

今日由雪櫃攞出嚟,用火鎗燒熱甩模,睇吓個樣同裡面都幾靚仔架,食落又唔甜,因為我減咗糖,結果奄尖大少都讚話好食,成個食哂,不過佢話呢個係布甸,唔係蛋糕喎,唉..是但啦 好食就算嘞.

精緻蛋糕甜品班-第七課-香檳沙巴翁沙樂

眨吓眼今日已經第七堂,Miss教嘅係有香檳酒嘅慕士蛋糕,名稱叫做香檳沙巴翁巴樂.

首先要用分蛋法,分別將蛋黃漿加糖打至糖溶解,再倒入過篩麵粉撈勻,蛋白打至硬身同蛋黃漿混合後,用唧袋唧入已墊牛油紙焗盤內,唧兩塊圓形蛇餅,其他唧成手指餅放入焗爐焗熟.

圓形蛇餅做底,圍上手指餅作邊.

蛋黃同糖坐熱水打至黏稠,加入浸水坐軟魚膠片,香檳,拔蘭地酒少許攤凍至杰身,倒入已鋪蛋糕模中.

放入雪櫃雪硬身後,淋入混有橙汁,香檳啫喱面再雪凍,就可以食嘞.

入口感覺到有淡淡酒味,唔算太濃,係一個比較簡單凍餅.

蜜棗合桃黑糖麥包-湯種法

好耐都無用湯種做麵包,今日就再用番湯種法去做呢個包.

首先要煮好湯種攤凍,然後將高筋粉,全麥粉,糖,牛奶,沖繩黑糖加埋湯種如常攪拌至起筋後,加入牛油,切碎蜜棗,合桃一齊再攪拌均勻,就可以作第一次發酵,排氣,第二次發酵後滾圓,今次用咗新道具整形.

就係呢一個灑滿筋粉嘅膠筲箕,因為無滕籃,太貴又唔捨得買.

將麵團面向下,底向上壓入筲箕中作最後發酵至2.5-3倍,之後倒扣落已灑粉烤盤就可以焗.

睇吓焗好啦,不過花紋消失哂,可能麵團壓得唔夠深.

切開內部都算鬆軟,比較濕潤,我都係鍾意用中種法多啲.

健康嘅綠茶紅豆沙蒸包

今日專登做咗呢個健康嘅綠茶豆沙蒸包送俾我朋友,因為佢鍾意食呢種健康包.

我用咗中種法,將70%中筋粉加水,新鮮酵母,綠茶粉,仲有之前學烹飪堂攞番嚟嘅豆渣,一齊搓勻成團,放置約1個鐘.

再將其餘30%粉,糖,少少芥花籽油搓勻成軟滑麵團,包入豆沙餡(無去豆殼,因為我朋友話豆殼有益喎),整形作最後發酵.

靜置作最後發酵.

蒸咗十零分鐘就蒸熟嘞不過包啲花紋唔見咗.

攤凍切開都算OK,不過氣孔好似大咗啲,但食落唔差,包皮鬆軟有淡淡綠茶味,豆沙餡少甜,希望朋友鍾意啦.

無油嘅Scone

一日偶然見到網友T&P發表呢個好簡單Scone食譜,唔複雜又無落牛油,雖然有落忌廉,但都好有興趣試整.

材料有自發粉,檸檬味梳打水,淡忌廉,浸過Rum酒提子乾(自己加料)

將梳打水加淡忌廉溝埋,慢慢倒入已過篩自發粉中,用餐刀界十字撈勻,再倒落枱面,用手按壓成團狀,唔駃大力搓架,再按平約1-1.5吋高,用模吸出麵團(模要灑粉,否則會好黏住吸唔出),搽上蛋白係面,放入已鋪不黏布焗盤內.

我試做咗1/4份量,所以祗有3大1小個.

大約焗15分鐘就可以出爐.

攤凍切開後,搽牛油同自製士多啤梨果占,外面都幾鬆脆,而內部軟熟,偶而換吓口味都唔錯,但我都係鍾意食麵包多啲.

今日晏晝-札肉腸粉

為咗想儘快消滅雪櫃內札肉,就做咗呢個札肉腸粉作為晏晝.

材料好簡單,將札肉同紅蘿蔔拖滾水再切絲,加埋係街市買嘅齋腸粉.

將腸粉一開三段,再解開成粉皮,捲入紅蘿蔔絲,札肉絲放係掃油碟內.

然後放上鑊蒸一陣,灑上蔥粒,我無再俾熟油,配上自製"碌淋"汁,就可以開餐嚕..腸粉蒸完都幾軟滑,加埋汁料酸甜味道,會無咁肥膩,啱我食,唔錯.

滋味家常菜餚課程_第七課_豉汁煎釀涼瓜&涼瓜糖不甩

今日Miss教兩個用當造苦瓜做嘅菜色.

第一個係豉汁煎釀涼瓜,最好用長形苦瓜,頭尾切去唔要,橫切約半吋環狀,將囊同種籽括走,搽上生粉係圈內,再將絞碎豬肉,馬蹄,冬菇切碎,加入調味料後釀入苦瓜環內.

將釀好苦瓜環兩邊煎至金黃色鏟起,豆豉,蒜蓉啄爛下油鑊爆香,再加其他調味料,將苦瓜回鑊煮一陣打獻就可以上碟.

第二款係甜點,用涼瓜起肉切塊放入攪拌機打成汁,將汁加入糯米粉,粘米粉,糖內撈勻成粉團, 將粉團搓成小湯圓, 放入滾水中煮至浮起,撈起隔去水份.

將煮熟粉圓放入已預先混合好嘅椰絲,花生碎,芝麻,糖內,就攪掂食得.