24小時低溫中種-斑蘭椰絲卷

呢款麵包係跟"天然麵包香"做嘅,因為今日忙碌,所以中種發足24小時.

主要用新鮮斑蘭葉切碎打汁,加埋椰汁去搓麵團,第一次發酵後,排氣,分割麵團成3等份,捲成圓柱體,約20分鐘左右,碌成長方形,搽上Kaya醬,重疊三層,因為屋企無原味,祗好用咗斑蘭Kaya醬,所以變成全部青BB,無乜層次感.

將麵團直切成長條後再扭繩,打圈成圓形,放係紙兜中作最後發酵.

發酵完搽上蛋汁,灑上椰絲,就可以放入焗爐焗.

新鮮斑蘭汁真係零舍唔同,一路焗已經聞到好香,焗完後出爐仍然聞到香味,同以往用班蘭油無得揮.

因為焗爐太細,所以攪到啲包包變咗形,但仍然保持一貫低溫中種包嘅鬆軟同好香,我諗以後都會買斑蘭葉自己打汁,唔會再用斑蘭油,因為相差實在太大.

蜂蜜蛋糕

我已經係第二次做呢個蛋糕,所以唔算太生疏,但預備功夫比較多.

首先要摺紙包木框.

跟住要將奶,牛油加熱,而蜜糖亦雖要加溫成液體,將全蛋加糖後坐熱水打至奶白色,再加入SP(蛋糕乳化劑),蜜糖,味霖等,再慢慢加入已過篩麵粉,煮熱奶,牛油,直至完全混合就可以倒入鋪紙木框裡面.

要凳幾下木框,令氣泡消失,入爐分半鐘後,拉出噴水(當然係暖水或凍滾水),再用刮刀刮平麵糊表層,重複共3次,主要作用係消泡同埋令糕面平滑,焗約30分鐘,蛋糕面已轉金黃色,再係糕面鋪上牛油紙,用另一個焗盤壓住糕面.

再降低爐溫,焗多20分鐘,插入竹籤,無野黏住就表示熟透,出爐要立即倒扣5分鐘再反轉,撕開四邊紙,甩開木框.

呢個係剛出爐個樣.

甩去木框後攤涼,見到有些少收腰,但好彩唔太嚴重,並無下陷,如果唔係急住食,最好用保鮮紙包好直至第二日先切,咁樣蛋糕會濕潤好多,其實類似月餅一樣.

終於等到第二日可以切蛋糕嚕....雖然味道幾好,蛋糕亦鬆軟,但氣孔較大,我諗因為我唔記得凳盤同減咗SP.

所謂分甘同味,包好可以攞去送俾朋友嘞.

精緻蛋糕甜品班-第八課-生薑芝士蛋糕

今日已經上到第八堂,學嘅係生薑芝士蛋糕.

餅底係用手指餅,不過唧成蛇餅圓形,剩餘嘅就唧成小圓餅作為餅面裝飾.

由於糖薑片要預早煮定,所以Miss祗係口述,並無即場煮,佢就自己帶咗自家製糖薑片嚟做示範,要將糖薑切碎成薑粒,忌廉芝士加糖薑糖水打至軟滑,加入薑汁,酸忌廉,坐溶魚膠液,糖薑粒等,再將蛋白加糖坐熱水打至硬身加入,最後將淡忌廉打至6-7成,加埋入芝士漿內,倒落墊咗手指餅嘅模內,放入雪櫃雪硬,再做餅面裝飾.

呢啲係切碎糖薑粒.

完成後擺上焗乾變脆身嘅薑絲加手指餅裝飾就完成嘞,我仲未食,所以唔知味道如何?

又有玩具玩

今日介紹俾大家睇嘅玩具已經唔算新,係3年前我工作時候,用信用卡換番嚟,就係呢部雪糕機,初時以為將所有材料放入去,機就會自動製造雪糕出來,咁大家同事就可以有自製雪糕食嘞,點知睇完說明書後,原來放入機之前要自己準備雪糕漿,放係雪櫃12個鐘,又要將個兜放係冰格24小時或以上,睇完已經唔想整,咁就放係公司,擺埋一邊無郁過,直至舊同事話公司要裝修,我而家先去攞佢番屋企,遲啲試吓整雪糕食.

不過個雪糕兜都幾大個,唔可以淨係甩金屬個兜出嚟,所以要得閒清理吓冰格先放得入.

今日晏晝-三色椒札肉撈檬

今日成日都天陰又落大雨,所以無去街,留係屋企做家務.

晏晝就做咗呢個簡單開胃嘅三色椒札肉撈檬食.

將三色椒,札肉切絲拖水,將檬粉係滾水中揚散放係碟中,灑上芫茜,炒香花生碎,炸蒜片,倒埋自製"碌冧"汁,酸酸甜甜,又唔油膩,食完覺得好清爽.

黑芝麻饅頭

今日跟"孟老師中式麵食"一書做咗呢個黑芝麻饅頭.

首先將黑芝麻炒香打碎,加入中筋粉,糖,酵母,少許芥花籽油搓勻成光滑麵團,靜置一陣,然後用麵棍來回多次碌壓成長方形,掃水係麵團表面,灑上芝麻糖粉,要用手壓實於表面.

再捲成圓柱體,切成8等份,放入蒸籠作最後發酵.

蒸約15分鐘由水滾開始計,熄火後,揭開少許籠蓋,10分鐘後先開蓋,以免溫差太大.

呢個係饅頭裡面&側面,食落好香芝麻味,雖然無用中種或老麵,但饅頭質感還可以,而家我都儘量唔落泡打粉,可以嘅話,會用酵母代替.

滋味家常菜餚課程_第八課_魚香肉絲&中華冷麵

好快已經上到第八堂,今日Miss教嘅係適合而家天氣食嘅中華冷麵,另一款係魚香肉絲.

兩款都需要切好多絲,魚香肉絲包刮有豬肉絲(最好枚頭廋肉),濕木耳浸軟切絲,沙葛或馬蹄切絲,豬肉絲調味醃一陣.

開油鑊用暖油炒廋肉絲盛起,再爆香蒜茸,蔥粒,薑茸,紅辣椒粒,加入木耳絲,馬蹄絲贊酒,將肉絲回鑊,,最後加入調味料兜勻就可以上碟.

魚香係外省菜其中一種醬汁,但其實無魚係裡面,食落口祗覺酸甜味,又唔覺魚味喎,不過都算幾好味.

中華冷麵嘅材料其實可以自由配搭,豐儉由人,今日材料有青瓜,甘荀,火腿,,煎熟蛋皮,全部切絲,而麵就用咗日本牌子冷麵要預先煮熟,放入冰水中浸一陣再隔去水份.

其實最重要係撈麵個醬汁,用麻醬,花生醬,豉油,醋,麻油,糖再加少許冷滾水開稀.

一切準備妥當,各就各位就可以開餐嚕...放好材料澆上醬汁,灑上芝麻花生碎,蒜茸就攪掂,味道幾好,可以番屋企自製冷麵食嘞.

香蕉蕎麥雪芳蛋糕

今日同個新雪芳蛋糕模開張,但今次唔係落低筋粉,而係用蕎麥粉,睇吓出嚟效果點?

首先將熟透梅花點香蕉搓爛成茸加蜜糖,蛋黃加黃砂糖攪拌至溶解,再加入芥花籽油,奶,香蕉茸攪勻,最後加入已篩蕎麥粉撈勻.

另外將蛋白加糖打至8-9成硬身,分數次同蛋黃香蕉麵糊拌勻,倒入模中,係枱上輕"dun"數下,就可以入爐.

入爐後不到10分鐘已經爬升得好快,可能我加多咗蛋白原故,好快已到煙囪頂,除咗用鐵片蓋頂外,仲要減爐溫.

出爐後立即倒扣至涼,放入雪櫃雪一陣,就用刀界開甩模,但甩得唔係咁靚,有瑕疵.

切開後都算維持鬆軟,少許濕潤,無下陷,因為減咗糖,唔甜,今次叫做勉強合格,下次仍需努力.

富貴蛋糕模

昨日上甜品蛋糕班,同學報料話某超級廣埸搓麵粉矽膠墊大減價,我正想買嚟搓麵團,係番屋企途中,決定即刻去買,都叫做順路,祗係搭遠幾個站車,個商場位置唔容易搵,不過問吓人估吓都好快搵到,而且仲有貨未買完,點知跟住行過隔離個行貨架,俾我發現咗網友推介,而我又好想買嘅日本品牌"KAI"戚風蛋糕模,價錢梗係唔平,我本來想買17cm,但祗有15或18cm,諗吓如果要專登出"City Supr"或"Sogo"來回車費都唔少,於是即刻決定買咗個18cm,同17cm都係差1cm,應該無乜問題啩,咁又買咗呢個心頭好嘞. 遲啲焗完戚風蛋糕再講俾大家知,係咪真係好啲?

三色芒果慕士生日蛋糕

今日係奄尖大少生日,所以昨日借題發揮做咗呢個蛋糕送俾佢,其實係我自己想練習做蛋糕多啲,因為佢對蛋糕無乜興趣.

呢個係芒果奶凍變奏版,首先將海綿蛋糕墊底,將攤凍杰身嘅雲尼拉奶凍倒入成為底層,放入雪櫃雪至硬身.

再將芒果部份打成茸,部份切粒,將浸軟坐溶魚膠片加糖加入撈勻,攤凍至杰身,倒入成為第二層,又放入雪櫃雪至硬身.

最後將淡忌廉加糖打起至軟滑後,將芒果茸&溶解魚膠液加入撈勻,倒入模中成為第三層,雪凍後攞出再做裝飾.

當最後一層雪凍後係面掃上透明果膠,同芒果花咁就大功告成嚕...

今日由雪櫃攞出嚟,用火鎗燒熱甩模,睇吓個樣同裡面都幾靚仔架,食落又唔甜,因為我減咗糖,結果奄尖大少都讚話好食,成個食哂,不過佢話呢個係布甸,唔係蛋糕喎,唉..是但啦 好食就算嘞.

精緻蛋糕甜品班-第七課-香檳沙巴翁沙樂

眨吓眼今日已經第七堂,Miss教嘅係有香檳酒嘅慕士蛋糕,名稱叫做香檳沙巴翁巴樂.

首先要用分蛋法,分別將蛋黃漿加糖打至糖溶解,再倒入過篩麵粉撈勻,蛋白打至硬身同蛋黃漿混合後,用唧袋唧入已墊牛油紙焗盤內,唧兩塊圓形蛇餅,其他唧成手指餅放入焗爐焗熟.

圓形蛇餅做底,圍上手指餅作邊.

蛋黃同糖坐熱水打至黏稠,加入浸水坐軟魚膠片,香檳,拔蘭地酒少許攤凍至杰身,倒入已鋪蛋糕模中.

放入雪櫃雪硬身後,淋入混有橙汁,香檳啫喱面再雪凍,就可以食嘞.

入口感覺到有淡淡酒味,唔算太濃,係一個比較簡單凍餅.

蜜棗合桃黑糖麥包-湯種法

好耐都無用湯種做麵包,今日就再用番湯種法去做呢個包.

首先要煮好湯種攤凍,然後將高筋粉,全麥粉,糖,牛奶,沖繩黑糖加埋湯種如常攪拌至起筋後,加入牛油,切碎蜜棗,合桃一齊再攪拌均勻,就可以作第一次發酵,排氣,第二次發酵後滾圓,今次用咗新道具整形.

就係呢一個灑滿筋粉嘅膠筲箕,因為無滕籃,太貴又唔捨得買.

將麵團面向下,底向上壓入筲箕中作最後發酵至2.5-3倍,之後倒扣落已灑粉烤盤就可以焗.

睇吓焗好啦,不過花紋消失哂,可能麵團壓得唔夠深.

切開內部都算鬆軟,比較濕潤,我都係鍾意用中種法多啲.