楓蜜栗子方包

今日天氣轉冷又陰天,都唔係好願出街,所以就留係屋企整包,呢款包整過幾次,所以都無乜難度,繼續用低溫中種,即係將70%筋粉,加水,酵母,少少鹽搓成團後放係雪櫃內發至少16-17個鐘.

將新鮮栗子煲15分鐘後,去殼去衣切粗粒,最後整形時將栗子粒鋪係壓平成長方形麵團上,捲成圓柱體,放入麵包模內,合上模蓋,作最後發酵至8-9成,就可以放入焗爐焗.

焗好出爐嘞..,未頂角所以旁邊係白色.

切開方包,鬆軟到跌哂係度,至於味道嘛,唔太感受到有栗子味,因為我買個隻栗子蓉唔掂,今次旨在清貨用埋佢,預咗唔夠味,麵包就無問題,切咗幾塊俾朋友食,佢話"Good".

工展會半日遊

今日又係天陰不過落唔出雨,一早做好家務後,即刻單人匹馬搭車去行工展會,以往幾年都係約埋朋友一齊去,但因為要遷就佢哋食晏時侯去,結果加埋係入面食野,行約45分鐘就要鬆人,基本上祗夠時間行一圈,好多野未睇清楚,哂咗入場費,所以今年決定一個人去,可以唔需要睇時間.

我係由天后興發街入口進入會場,未入去之前,當然要買入場卷,仲有場刊送.

記住最好立即翻開場刊後面優待卷睇吓有無自己想買嘅野,可能會平啲或者有贈品送架.

由於我入場時間尚早,所以可以行近檔攤睇示範或者試食,但一過咗下午一點後,好多窄巷地方就擠得水洩不通,尤其是賣零食,醬油,粉麵地方,由於好多攤檔都做示範,開哂擴音機,都幾嘈架,卒之我行咗差不多3個鐘,包括10分鐘企係度食腸粉,魚肉燒賣,買杯野一路行一路飲,真係無浪費時間.

好嘞,最後睇吓我買咗乜野番歸? 其實買咗好少野,不過價錢就.....

包括有泰國札肉5條,用優待卷減咗$5,兼送冷藏袋一個,蜜糖係平時飲開嘅牌子,平過超市$10,所以又買多一樽,不過要買兩樽先可以用優待卷平多$5,所以即係無優惠.

充

登..登主角登場啦,原本想去睇吓智能煲,結果買咗呢部昂貴嘅生物精華萃取機,原因係我每日自己都會榨五青汁飲,但渣滓太粗鞋,唔食得,亦即一大半營養都吸收唔到,我企係度睇佢哋做示範,亦有試飲,假設自己可以日日用呢部機,應該都會值得嘅(係我自己說服自己買機理由),而且用場刊優待卷加多$1,就送埋部榨橙汁機,有一本食譜,光碟送,教人點用部機,仲可以打埋豆漿,芝麻糊之類.

打開箱,睇吓部機有兩個隔篩網,一個水漏斗,一個隔渣布袋.

仲可以裝埋個水籠頭添,希望真係用得番夠本,因為唔想一次過攞咁多錢出嚟,所以就碌卡,結果做咗6個月免息分期,啱啱係自己用開個張信用卡先有得做咋,係咪有啲自欺欺人呢?

環亞佳餚精選課程-第十課-鳥結糖&甘荀提子鬆餅

眨眼之間已經上到最後一堂,今日學嘅野比較簡單,就係鳥結糖&甘荀提子鬆餅.

鳥結糖主要用呢隻粟膠加牛油,砂糖煮溶至120度.

跟住用另外一個鐵兜打起蛋白加糖,當粟膠糖漿煮好後,倒入蛋白內,加入已焗香成粒杏仁,快手攪勻,倒入已鋪焗爐紙嘅平底盤內,再蓋上另一張焗爐紙,用手壓平糖漿,再用另外一個平底爐壓上糖漿面,令糖漿更加平均. 攤凍後,用刀切條長條狀,再切細塊,用米紙包完後,外面再包一張顏色玻璃紙.

食落唔係好甜,杏仁好香口,不過糖比較軟身,我自己鍾意食硬糖多啲,我都幾鍾意食鳥結糖,但係都唔好DIY,如果唔係我會食到唔停口,咁就慘嚕...

至於甘荀提子鬆餅,首先要將紅蘿蔔去皮刨絲,乾提子切條,牛油加糖打至鬆發後,分數次加入蛋,最後加入奶,自發粉,甘荀絲,提子乾撈勻,就放入紙模內.

好快焗熟就可以出爐嘞...不過味道較為平淡啲,如果我整會用香蕉合桃,會好食好多.

聖誕西點甜品班-第十課-裝飾曲奇

終於上到最後一堂,因為臨近聖誕,所以就做咗個裝飾曲奇,曲奇餅本身唔難整,最緊要將牛油,糖要打發至鬆起,加入蛋黃或蛋液,最後加入已篩麵粉,輕手攪勻,用保鮮袋包好,將粉團碌平,放入雪櫃雪至硬身後攞出,切開塊狀,搓勻再碌薄吸模,就可以放入焗爐焗嘞.

中間吸咗洞嘅曲奇,仲可以放入唔同顏色水果硬糖.

眨吓眼已經焗好咗.

將蛋白加糖霜打起至可以挑起而不跌下,就加上唔同色素,同曲奇餅扮靚.

睇吓同學們唧得幾有創意.

可惜我無乜美術天份,唧得麻麻地,糖霜好甜,所以用嚟裝飾好過食.

黑森林&朱古力慕士蛋糕

今晚去學一堂蛋糕示範課程,原因係我續咗工聯會張會員卡,有番一張優待卷送可以減報課程學費,於是唔好哂,就補咗少少錢去上堂,攞番兩舊蛋糕走都有著數.

由於唔可以影製造過程,最後祗好影吓完成後蛋糕.

前面係黑森林蛋糕,後面係朱古力慕士蛋糕,師傅仲做埋朱古力裝飾.

由於今晚人數眾多,有成16-17人,所以淨係黑森林都要做兩個先夠分,一人一件餅.

朱古力慕士蛋糕

切開黑森林蛋糕,我今晚至知道原來裡面係車里子餡,仲以為係港式個隻啫哩粒,不過我唔係幾鍾意蛋糕用甜忌廉,真係無乜益.

我因為唔想晚夜食甜野,所以用盒帶走,不過隔離同學仔話好食喎,另外今晚得著係學到另外一種海綿蛋糕做法,同埋抆忌廉,整朱古力裝飾,收穫都唔錯.

焗肉醬千層麵

以前都好鍾意食Pizza Hut嘅肉醬千層麵,但次次加埋食沙律,飲凍汽水,結果一定攪肚痛,肚瀉收場,而且pizza太肥膩,已經絕跡無幫襯好耐.

近排上堂學整焗千層肉醬茄子,諗起好多年都無食過千層麵,於是昨日買齊材料自己DIY.

肉醬早一日煮定,因為要慢火煮差不多一個鐘先煮好茄汁肉醬.

首先將乾千層麵用滾水加少少油煮幾分鐘撈起,隔乾水份,將肉醬鋪係玻璃兜底層.

面放一塊千層麵皮,再一層肉醬,放上切粒"Mozzarella"水牛芝士+切塊狀芝士,如似類推,直至頂層.

頂部灑上帕馬臣芝士碎,面蓋上錫紙入焗爐焗30分鐘,揭去錫紙,再焗多10分鐘.

睇吓焗好嘞,個樣唔食都睇得下.

呢個千層麵一家要趁熱食先至好味,味道幾好,同Pizza h Hut有8-9成相似,但梗係多料好多,其實自己整成本都唔平,但勝在就真材實料嘛..

模型麵包

好耐都無用過呢兩個麵包模，所以今日專登打咗兩份麵團嚟焗模型麵包，一條係加藍莓乾，另一條係綠茶豆沙，仍然用低溫中種，麵包焗完會比較軟熟。

焗完甩模攤凍。

切開試食，麵包組織ＯＫ，夠鬆軟，不過出面街買豆沙始終太甜。

中上環廚具店半日遊

今朝起身無乜野要做,見天陰但無落雨,於是出中上環去高檔廚具店見識吓.

第一站就嚟到呢間,一出上環港鐵站就到.

雖然話兩折,其實大部份都要7折-9折不等,啱啱菜刀木柄裂咗,睇完售貨員做示範,連一捲布都可以切得開,係德國製造,而且刀身軾身又有免黏塗層,加埋把生果刀,平均差唔多半價,所以就買咗,至於其他不外國銹鋼煲&pan太重身,鋼水好都無用,我單手都拎唔起,所以無買到.

跟住向上行,經過又斜又彎街道之後,就到咗第2間廚具店.

呢到係店鋪其中一角.

裡面好多外國人會用廚具,矽膠模等,形形式式都有,設計有啲都好特別,但價錢亦都唔平,我祗係買咗呢個搾檸檬/橙汁"尖銳"咋,都要成$58架.

睇吓時間就順路行去個間好出名大排檔食晏,中途經過呢間古舊嘅蓮香樓.

再沿側邊條街行入去轉右行幾步就到,雖然時間尚早,已經高棚滿坐,好彩有人埋單起身,先至有位坐,叫咗個鮮茄牛蛋通粉,加杯熱奶茶,至少等咗成15分鐘先有得食,奶茶幾好飲,蕃茄湯底偏鹹,牛肉ok,不過試一次就算,唔會專登再幫襯,因為無乜特別.

大排檔對面就係個間好出名九記牛腩,,不過要12:30先開鋪,已經有人係外面等近.

食飽飽之後,就沿路落番中環,經干諾道中行人天橋去咗IFC City Supr遊蕩,又買咗以下呢堆野.

包括有高筋粉(特價所以買),海洋深層水(要嚟做護膚品),長形玻璃兜,兩種芝士,千層乾麵(準備整肉醬千層麵).

買完之後就打道回府嚕.....

今日所行店鋪同食野地方,都唔係咁就腳,如果出發前唔上網睇地圖,肯定有排搵,加上港島啲路又窄又斜,又要上石板樓梯級,好似番咗以前舊香港一樣,我覺得幾得意,有啲似鄉下人出城嘅感覺.