佳節精選課程-第三課-肉末釀海參&蛋白杞子扒豆苗

上星期一去咗旅行,所以第二堂無上到,祗係攞番食譜,今堂仍然教過節餸菜,包括有肉末釀海參&蛋白杞子扒豆苗.

其實上一堂已經將乾海參燒過表面,用大熱滾水焗過,呢個動作要反覆3-4次,再將內臟同表皮刮乾淨,再用大熱滾水又焗,所以真係好多功夫,而且價錢又唔平.

今日就將浸軟身海參用薑,蔥段,唐芹加入水中,放入海參拖水,去除腥味,用紙抹乾身後,釀入已調味免治豬肉,馬蹄粒,冬菇粒,薑蓉,外面再用拖過水大蒜絲或蔥綁實,放入蒸籠蒸30分鐘.

未蒸之前

蒸熟後.

另外一樣係蛋白杞子扒豆苗,杞子用熱水浸軟,蛋白,忌廉,上湯調味料,生粉攪勻,先用熱油爆香蒜蓉,加適量鹽,糖,再用大火炒豆苗至熟鏟起,再將蛋白混合物炒至杰身加入杞子放係豆苗上面就完成.

本來兩樣菜色都唔錯,可惜唔知乜原因,海參食落口覺得澀口,結果哂咗,可能係換水時清除內臟未洗夠徹底啩?

粒粒紅豆包

因為遷就奄尖大少食中式饅頭,好耐都無焗麵包,今日又重開焗爐,用湯種法焗咗呢個用粒粒紅豆做餡嘅麵包.

焗爐太細,所以黏埋一齊,變得唔夠圓.

如果出爐新鮮食,就同低溫中種發酵分別不大,但隔一日食,麵包明顯無咁鬆軟.

生日Buffet

眨眼又過咗一年,一月中係我嘅生日,我兩位好朋友專誠請我去灣仔某5星級酒店食dinner buffet慶祝一番.

首先環境幾好,樓頂好高,坐位間距好寬闊,唔會俾人騷擾,而望出去係落地玻璃窗,睇到維港夜景同激光表演,加上現場有隊菲律賓樂隊演奏音樂,情調一流,祗係覺得燈光比較暗啲.

而服務態度一流,每次我哋行開攞野食,侍應生即刻收碟,幫你摺好枱巾放番係枱面上,非常勤力,而所有杯碟襯成一套,好優雅.

最重要梗係食物喇,頭盤有新鮮白酌蝦,已經去殼,龍蝦仔,大隻青螺,帶子,全部都好鮮味,不過我哋食得最多係24個月西班牙火腿片伴蜜瓜片,火腿片唔太咸,好好味. 呀!另外佢哋自製肝醬搽多士都好好食,又係食咗好塊.

熱盤都有好多款,不過我覺西式煎魚,雞卷,豬肉卷始終鞋啲,所以祗係選擇咗呢款香芧牛油汁煎大蝦,蝦肉好彈口.

其實佢哋賣點就係即場煎鵝肝,無限量供應,但我食咗半塊已覺得好油膩,同好滯,最後就剩係食哂旁邊用紅酒煮啤梨片,葡提子咋.

當然我最留意梗係蛋糕甜品,款色都有好多,不過肚容量有限,祗係試咗一半,都好好味. 至於雪糕種類唔算多,祗有4款,不過我哋覺得紅色嘅Rasperry Sebert最好食,味道好清新,有些少酸味,我朋友食咗3球呀.

至於其他沙律就無乜掂過,我哋傾吓又食吓野,食咗成3個鐘先埋單走人,估唔到最後餐茶都可以揀蜜糖檸檬茶,成壺上任飲添.

雖然係佢兩個俾錢,都幾貴架,總共連加一要成$1,7xx,幸好我有某銀行信用卡85折後都要$1,5xx,真係好多謝佢兩位,不過嚟近佢兩位生日,已經約定再嚟同一間酒店,不過另外唔同餐廳再試唔同buffet種類.真係好期待呀!

派對開心小食課程-第二課-心形朱古力盒

第一堂因為去旅行無上到,不過發覺係之前已經教過嘅鬆餅,所以都無乜損失.

今堂教朱古力係用假力,不過Miss都有講解真力嘅調溫度,首先要將心形膠模或矽膠模放入雪格雪至冰凍,而朱古力硬塊切碎後坐熱水溶解或用微波爐叮溶,最好溶解一半朱古力後再將剩下一半加入,慢慢攪至溶解,咁就萬無一失.

將雪凍心形模由雪格取出,將朱古力溶液倒入至滿,再坐在碎冰或冰塊上一陣,然後將朱古力溶液倒出,但其實控制厚薄都好重要,太厚唔好食,太薄又容易碎,跟住就放入雪格雪至硬身甩模.

而盒蓋係將朱古力溶液倒係牛油紙上,用紋刀將朱古力溶液推平,待半凝固時,放心形模係上面,然後用燒熱尖刀沿模邊界一圈,咁乾硬後就可以將蓋攞出嚟,如果發覺邊位唔夠平滑,可以燒熱平底鑊或鐵片,將朱古力盒邊位輕輕移轉1-2秒,就會變得平滑.

之後就製造放入心形盒朱古力糖果,包括有士多啤梨,乾果杏仁合桃塊,提子乾杏仁片堆等.

將士多啤梨浸入朱古力溶液約2/3攞起放係牛油紙上冷卻,再用白朱古力溶液劃上花紋圖案.

另外用匙羹盛起朱古力溶液放係牛油紙上,再將焗香杏仁,合桃,提子&切碎杏脯乾黏係上面,凝固後就完成.

另一做法將朱古古力溶液同焗香杏仁片,提子乾拌勻,用匙羹畢係牛油紙作成堆狀,凝固後就完成.

最後將所有朱古力糖果放回心形盒內,合上蓋面就完成啦.

雖然做法唔複雜,可惜我唔好食朱古力,又無情人可送,所以做完後都係欣賞多過食.

馬來西亞悠遊行-吉隆坡

呢篇係延續上一篇馬六甲,第3日朝早退房後坐的士去馬六甲中央車站,不過係馬來西亞坐的士好多都無咪表,所以上車之前一定要講好價錢先好搭,以免搭完之後打死狗講價.

去到中央車站,就去唔同汽車公司買票窗口,睇吓時間,揀最快開出個架就行埋去買票,其實基本上每半個鐘已有車去吉隆坡,所以唔駛等好耐咋.

行車大約個半鐘左右已經去到吉隆坡外圍,但短短路程由於非常塞車,足足再坐多45分鐘以上,仲未埋到總站,結果全車人都落哂車,司機叫埋我哋兩個都落車,手指指前面方向係總站,所以祗好落車攞埋行李,幸好係馬路旁邊搵到的士,司機仲識廣東話,佢話去酒店$15馬幣,原來路程好短,5分鐘已經到預訂酒店,即係又俾人斬囉,無法啦,鬼叫你係遊客咩!

放低行李後,行出酒店,見到有lift上行人天橋,原來係通去著名"Pavilion"商埸.地庫有個好大food court，同埋supermarket，我哋係度叫咗一個湯麵，沙爹，仲食埋沙冰，不過價錢就貴過馬六甲，後來發現買同樣手信都貴過馬六甲，早知就係馬六甲買齊好過。

跟住由另一出口行出去就係著名淮海路Bukit Bantang,呢條街好似彌敦道，係做遊客生意，由於落雨，行咗一陣就行番去Pavilion商埸，再經酒店旁邊馬路步行去雙子塔，因為下晝當然無得上skybridge啦，祗係係商場行吓，但係全部都係名牌，唔啱我哋睇，所以行番出嚟外面影幾張相留念就行番去酒店，順便搵吓附近單軌車站，準備明日去參觀名勝同唐人街。

夜景係番到酒店附近街道影，因為太近，我部相機仔影唔哂，其實係酒店房間都睇到單塔架，不過無咁清楚。

KLCC雙子塔商場

晚野再去Pavilion商埸food court食埋晚飯，不過又貴又唔好食，最搵笨最貴一餐，然後再去超市買生果番酒店食就休息嘞。

第４日開始攞住之前係網上download地圖，搭完單軌火車，跟住轉咗兩次唔同線火車，再行咗成30幾分鐘先去到嘅舊火車站。

呢個係酒店附迎單軌火車站，離開酒店行５分鐘就到好方便，所以以後個幾日都係盡量搭佢，再無搭搵笨的士嘞。

吉隆坡舊火車站，好有英國式彩，而且裡面都好大。

回教清真寺，不過講明非回教徒，謝絕參觀，所以祗係外圍影相就繼續去另一個地方。

呢度又有一群好有英國式彩建築物，好似係乜野紡織博物館之類，又係無得入去參觀，祗可以係出面影相，但朝早天氣真係好炎熱，成３０幾度，又攰又熱，老咗真係唔好自由行呀。

跟住仲要繼續行去中央市場，主要係賣工藝品，無乜好睇，唯一好處有冷氣同俾$0.5馬幣去厠所，過完冷河回完氣後，再向後行去唐人街，個度比較雜啲，好似香港女人街，打橫打直兩旁街道有花，手信賣，最多嘅係冒牌手袋，Ｔ恤，波鞋，結果祗係買咗食嘅手信，豬肉乾，蝦肉乾，飲咗杯出名嘅羅漢果龍眼燉冬瓜水就走嚕.....不過今次睇地圖見到附近有單軌車站，所以就沿住方向去搵，結果俾我哋搵到，咁就慳番唔駛轉兩次火車同車費，番到酒店放低手信後就出去食晏，今次去食肉骨茶，穿過Pavilion商埸，橫過淮海路，沿住一條小路行去後一條出名燕美路IMBI，個度有幾間賣肉骨茶同埋炒粉鋪頭，但因為下晝去到又已經過咗食晏時間無乜人，兩個人叫咗過細煲，加一碟炒菜同兩碗飯，原來個煲野好多料，裡面有豬軟骨，排骨，粉腸，豬肚，仲有好多唔同菜，加埋油炸鬼，豆腐卜另上，食到捧住個肚，味道都幾好，唯一係無冷氣，要一路食一路抹汗，真慘！

仲有番轉頭行另一條路有幾間肉乾店，售價平過唐人街好多，唉！又做咗老襯喇。

晚上今次去附近一間戶外式客家飯店食客家菜，佢嘅停車場好大，至少可以泊成百架車，大部份人都係揸車嚟食飯，而食飯地方80%以上都係戶外，如果落雨就有悵蓬伸出遮檔雨水，但原來價錢又幾平，食得過一餐。

睇吓幾多車泊係度，仲好有園林feel添。

一宿無話，第５日要搬酒店，因為想走時坐機鐵去機場，以免塞車誤點，結果係網上揀咗一間離機鐵站約１０分鐘路程酒店，搬完後無所事事，行去中央車站探路睇吓明日寄行李航空公司櫃位，同埋機鐵時間表，食完晏後番酒店休息一陣，約４點幾出發，點知又落雨，今次仍然坐單軌火車去一個叫＂秋吉＂地方，資料話個度有生果，蔬菜大市場，另外一面就賣衫褲鞋襪，點知去度市場好細，加上又落雨，有啲流浪漢瞓係行人天橋，四圍都唔係好乾淨，於是急急腳搭番車落淮海路行商場好過，到徬晚就行去阿羅街食飯，叫咗田雞粥，椒鹽中蝦，炒菜等，味道都ＯＫ，繼續再買沙爹，燒雞翼番酒店食。

最後一日退房後就拉住行李去車站，買咗當日機鐵車票，再行埋去航空公司櫃位寄行李同check-in，攞埋登機証就行去大堂中間買車票搭另一條火車線，去一個叫Mid Valley地方，個度有一個號稱亞洲最大商場嘅Mega Mall，入到入面真係好大，由起點直望唔到盡頭，總共有四層，又有戲院，遊樂場，保齡球場，家樂福超市，Jusco幾層，有好多香港品牌高店，最主.....主要嚟呢度原因係有冷氣，可以消磨幾個鐘. 混吉完夠鐘就搭車番中央火車站轉機鐵去機場番香港嚕......

終結今次旅行真係順風順水，之前計劃去嘅地方全部都去到，駛錢唔算多，大部份人都識講廣東話，普通話同英文，鋪頭都好多中文字，完全無溝通上問題，食野搭車價錢都平過香港，所以係一個絕對適合自由行嘅地方，下次我諗會再去馬來西亞其他地方玩，因為面積實在太大，一次去唔哂，其實今次已經係我第３次去架喇。

馬來西亞悠遊行-馬六甲

上個禮拜四同奄尖大少兩個人去咗馬來西亞旅行,主要係休息吓,所以今次祗係去兩個地方,就係馬六甲&吉隆坡.唔知係咪淡季關係,由開始訂旅遊套票,網上訂酒店都好順利,而且價錢都算平宜.

我哋係搭馬航早機去,雖然話9點機,但其實7:30已經要去到機場,加上個朝氣溫得11-12度,都幾凍,但係馬來西亞個面係30-32度,所以我祗好將短衫,褲放係手提行李,再係機上換衫.

飛機準時降落吉隆坡機場後,照原定計劃坐的士直去馬六甲先,因為我計過如果去吉隆坡,再明日搭長途巴士入馬六甲再轉的士去酒店,走時又要搭番車落吉隆坡,車錢祗係平幾十元,但哂多咗時間.

講番坐的士去馬六甲,的士司機唔太熟路,去到後搵咗一陣先搵到預訂酒店,應該叫客棧.

就係呢間位於唐人街隔離一條街,所以非常方便,呢區特別保留中國人以前嘅房屋做特色,好有古舊風味,香港都無類似嘅特色可見啦.

呢度係客棧大堂天井位,以前用作空氣流通,落雨時雨水會經地下去水位排出,

客棧內有間燕屋,晚上燕子會飛番來休息,掛係度睡覺,灰白色就係我哋食嘅燕窩嘞.

放低行李後已經下晝3點幾,因為祗係機上食咗個飛機餐,所以即刻走出街搵野食,但又唔想食咁飽,所以就走咗入呢間娘惹(即馬來西亞女人嫁中國人)餐館,食咗出名馬來晶露,味道內容同珍多冰相似,都幾好味,另外糕點比較怪啲,黃色係椰汁味軟糕,而,下層係灰藍色咸糯米,另外一種類似薄餅,就普通啲.

跟住就去馬六甲著名景點觀光,因為好近唐人街,徒步已經行得到,包括呢座200幾年前教堂.

仲有可以坐嘅花車,大約40馬幣一個鐘,不過我嫌汽車經過有費氣,所以無坐到.

之後就行上山,參觀舊時遺留葡萄牙古堡.

係山上望落嚟見到山下有個好大商場,於是又落山沿住方向行去睇吓,但發覺裡面無乜特別,空空蕩蕩咁,結果祗係係家樂福超市買咗兩個細蜜瓜番酒店食,而晚餐就係酒店內咖啡室攪掂,因為可能平日關係,祗係得我哋兩個包場.

一宿無話,第2 朝食完早餐後,準備出街四圍行吓,正當係酒店正門影相時,有兩個路經識講唔咸唔淡廣東話男人,好熱情主動幫我哋影相,傾談之下,原來其中一個係本地但已經移民星加坡華裔,另外一個係佢朋友,佢亦都係中國番禺地區工作成10年,後來更主動帶我哋觀光唐人街差不多兩個鐘先分開,佢哋因為下晝要離開番星加坡.

呢度係酒店個條街道,所有屋都係兩層嘅平房,門口唔太寬闊,但一行入去就別有洞天,非常深,有幾進天井位,街頭比較狹窄,仲一邊有車泊位.

唐人街入口牌樓,中文名叫做"雞場街"

馬拉人住嘅屋,原來拔起屋底幾條柱,就可以成間屋搬走,真係好方便,名正言順叫做"搬屋"

呢條係行出唐人街橫過馬路嘅河,係河堤兩邊有餐廳,仲可以步行漫步,真係好悠遊自在架.

唐人街好多店舖都係咁樣,非常古樸,好似番咗去古時咁,聽講最早移民到馬六甲中國人可以追溯到明末清初,而鄭和嘅遺蹟更處處可見.

係碼頭附近見到呢隻彷製嘅葡萄牙古時戰艦,但要俾入場費先可以入去參觀,見到無乜特別,祗係出面影張相就算.

到了中午,晏晝就去食蔡瀾都有介紹過嘅雞飯波,即係將飯搓成波形,內裡已經調味,我覺得似米糕多過飯,而白切雞就凍冰冰,好普通,試吓無妨.

跟住下晝就去坐旅遊巴士,諗住四圍觀光吓,點知搭錯同一巴士號數平民巴士,誤打誤撞去咗中央車站即係明日去吉隆坡長途巴士站,裡面有好大平民商場,衣服,鞋襪,食店全部都有,一面係去其他省市長途車,另一面係馬六甲市內巴士,所以轉車好方便,行完之後就搭番原號數巴士番酒店,點知一落車就傾盆大雨,行雷閃電,雖然有帶傘,都要搵地方避雨,大約落咗大半個鐘先細雨,行番酒店.

休息一陣又準備出動,因為適逄星期五開始,一連3日,唐人街有夜市,類似廟街咁,有野睇有野食,但行完一輪都無乜野啱,就走去食咗晚飯先,因為仲要趕住下場節目去遊船河.

沿岸都佈置有燈飾,都幾靚,加上沿岸酒吧飲酒嘅人又會同坐船嘅人打招呼,氣氛唔錯,值得一坐,全程約45分鐘.

遊完船河後又再去行多一次夜市就番酒店休息,明日就會離開馬六甲去吉隆坡嚕...,會係另外一篇再講吉隆坡嘅遊歷.

佳節精選課程-第一課-黃金南瓜糕&芝麻豆沙角

今日又開始去上新烹飪課程,主題環繞新年嘅糕點同食物,第一堂教咗呢兩款食物,就係

黃金南瓜糕-其實舊年上另一類烹飪課時,已經學過,基本上大同小異,主要將南瓜蒸淋再壓成蓉,同糯米粉,少少澄麵粉,糖,油撈勻成麵糊,倒入模內蒸熟,但由於即刻蒸完太軟身,唔可以切片煎嚟食,所以MISS預早蒸熟一底,俾我哋試食. 不過比較軟身,自己整可能要加多啲澄麵粉會好啲,唔太甜幾好味.

另外一款係芝麻豆沙角,將蕃薯去皮蒸熟壓成蓉,同糯米粉,麵粉,糖,油搓勻成麵團,包入豆沙,再滾上白芝麻炸透就食得. 剛炸好食真係very good呀,但仍然係個句,少食多滋味.

2010年第一炮-金絲捲

雖然遲咗啲,仍然係呢度恭祝各位網友新年快樂!寫多啲Blog同大家分享.

至於我自己由聖誕節到2010年新年都無特別整啲應節食物慶祝,因為並無去參加任何慶祝聚會,或約朋友慶祝,祗係好安靜地渡過呢兩個節日而已.

唔知係咪天氣影響?每日天色都係陰陰沉沉,或者落住毛毛細雨,所以連街都唔想出,今日為咗解決剩餘BBQ嘅燒蕃薯,決定整咗呢個中式嘅金絲捲.

主要將一部份麵團同蕃薯蓉搓勻,再切絲,而外面則用白麵皮包實捲成圓柱體,再切等份.

蒸好後就係咁樣,而家無用兩次發酵法,所以表面好似平滑好多,至於蕃薯味就無乜,但仍然好鬆軟好食.