杏仁香蕉包

今日見到梳蕉已經熟到出梅花點,諗起前排見到網友整嘅杏仁香蕉包,個個都話唔容易整,咁等我又嚟趁吓熱鬧先.

 熟透梅花點香蕉, 一部份壓爛成茸加入麵團搓勻,一部份切片擺麵包面.

將麵團壓成方形放係焗盤內.

將杏仁醬均勻搽係面,杏仁醬係用牛油,糖,蛋,杏仁粉,少許麵粉混合而成.

然後再鋪上已灑玉桂砂糖香蕉片,輕輕按實,作最後發酵.

終於焗好出爐喇,我就嫌香蕉片稍甜,偶而換新吓口味都幾好.

杏仁吉士牛奶包

今次麵包係用咗北海道牛奶方包食譜再加老麵(100g),而為咗唔想咁單調,又做咗個加杏仁粉嘅吉士醬做餡料.

麵團發酵好後,分成等份,將小麵團搓成長條形,包入杏仁吉士醬,然後打結而成,作最後發酵.

留心睇火,適當時候蓋上錫紙遮面,終於係小心看護下出爐嚕....

攤凍後切開試吓先,麵包軟熟加埋有杏仁香味又唔太甜吉士醬,好好味呀!

炆-叉燒

我從來整叉燒都係用焗爐焗,焗完之後肉會較為乾身,見到靚靚媽咪話可以用鑊煮乾水份都得,難得有高人指點,梗係要跟吓喇.

今日買咗舊梅頭廋肉,飛走豬皮同肥膏,醃,咗約4個鐘,加水片糖,冰糖,煮至汁變杰身,好似糖膠,就熄火,撈起叉燒攤凍.

攤凍後就切件上碟,淋些少叉燒汁就可以開餐嚕....味道同焗出嚟差不多,不過無咁乾身,呢個方法真係幾好,唔駛專登開焗爐,仲要成日將叉燒翻身,大家有時間不妨試吓.

簡簡單單芝麻卷

唔知整乜包好? 翻開麵包書見到呢款簡單芝麻卷,係我第一次去學整麵包時學嘅麵包款,咁就一於整喇.

今次用咗直接法,個焗盤細,所以最後發酵完就迫實哂,搽上蛋漿,灑上黑白芝麻就可以焗嚕....

因為唔想焗得太燶,所以蓋咗錫紙,有少少鹹味,都唔錯架.

榛子百利甜酒芝士凍餅

之前買淡忌廉就快到期,加上仲有半舊芝士忌廉,於是今日就整咗呢款凍餅.

因為無諗住送俾人食,就整細份啲,用個細四方模.

雪硬後可以甩模,下層係百利甜酒,上層係榛子醬+榛子粉

做埋餅面裝飾

切開試吓,芝士餅夠軟滑,但百利甜酒味道淡啲,不過我都係鍾意食慕士蛋糕多啲.

蝦米香蔥花卷

我嫌淨係蔥花味道太寡,於是將浸軟蝦米切粒加入成為呢款蝦米香蔥花卷.

準備最後發酵喇...

蒸熟後,試食咗一個都好鬆軟,有蝦米粒鹹鹹地味道都唔錯喎.

中式包點-芹菜肉包

食哂之前黑糖豆沙卷,打開雪櫃見到有用剩免治豬肉,而蔬菜袛有芹菜,於是就將兩樣撈埋做餡,成為咗呢款芹菜肉包.

8個大包迫爆蒸籠呀!

切開裡面餡料比較濕潤,因為我懶,無將芹菜拖水先切粒,但新鮮蒸好即食,真係好鬆軟,味道唔錯,可能我今次改咗用多啲低筋粉,所以就無咁煙韌.

中西合壁作品

好耐都無整蛋糕喇,自己近排因為心情有啲抑鬱,提唔起勁,又無特別原因,但呢個禮拜,因為好友喜歡呢款蛋糕,所以特別為佢哋而做.

紅豆慕士綠茶蛋糕,大家太熟,所以無整到餅面裝飾,就咁送走,不過佢哋話幾好食喎.

呢個芒果芝士蛋糕,就送俾遠道嚟香港親友食,希望佢哋鍾意喇.

最後係為我自己整黑糖豆沙卷,朋友去沖繩旅行番嚟,送俾我嘅見面禮黑糖,所以就攞嚟整包. 我用咗兩次發酵法,類似中種,所以外皮氣孔較大,不過食落煙韌,都好味架.

廢物利用-柑桔萃取液_洗髮&沖涼液

我之前食完柑後,就廢物利用,將唔要柑桔皮洗淨,烘乾,切碎用乙醇浸透做萃取液.

切碎咗柑桔皮

用乙醇浸約一星期就可以將汁液隔出做萃取液.

我試做咗柑桔沖涼液.

同埋檸檬洗髮慕絲,其實配方都一樣,祗不過在於泡泡劑和味道不同而已.

應節十字包

復活節應節食品除咗復活蛋,小白免外,仲有呢個十字包,咁多樣食品,我當然揀包嚟做喇.

其實材料同聖誕節士都倫包差不多,祗不過十字包搓成圓形,唧上十字紋裝飾,今次仲加咗用Rum酒浸軟提子,藍莓乾添.

包包最後發酵完成.

唧上裝飾十字麵糊.

焗好出爐嚕.....

撕開見到一絲絲架,因為用咗低溫中種發酵,所以麵包好鬆軟,玉桂香料味唔算太濃,唔錯.

近期DIY護膚品

之前用不同乾花浸嘅萃取液已經開以用得,所以做咗以下幾款護膚品,將以前買落個啲開始拋棄唔再用,希望皮膚早日健康,唔駛再俾不知名化學物料侵蝕.

呢款係用玫瑰花水加薰衣草萃取油,尿囊素,Vita E,薰衣草精油,乳化蜜臘加熱攪拌而成,不過真係攪到手軟,需時要攪15-20分鐘.

大盒自己用,細盒就送俾朋友.

除咗面霜外,仲做咗左邊個樽防曬乳液,用玫瑰花水,海洋深層礦泉水,荷荷芭油,保濕因子,海藻防曬萃取,玻尿酸,薰衣草精油,簡易乳化劑攪拌而成.

中間個樽係柔膚水,主要成份有訰水,茉莉玫瑰花萃取,膠原蛋白,玻尿酸混合而成.

我明日早餐－健康豆腐全麥方包

今朝打開雪櫃，發現之前係超市買盒裝豆腐就快過期，今日正準備焗麵包，於是將豆腐代替水份，加埋全麥粉，就成為咗呢個健康嘅豆腐全麥方包嘞。

準備作最後發酵

發到８成幾滿

表面灑上金黃玉米粉，就可以入爐焗嘞

點知......遲咗蓋錫紙，所以面燶咗啲添

好在仍然有內在美啫。

DIY 護膚品經歷

一路以嚟都覺得市面護膚品有好多化學成份,有時用一陣已經發覺唔妥,要拋棄唔敢再用,除咗價格昂貴外,自己皮膚比較敏感,試過一次用某日本著名牌子,塊面即刻痕癢,自此以後,呢隻牌子所有護膚品都唔敢再用,唯有自己逐隻試,將自己塊面當白老鼠咁.

幾個月前開始,係深圳書城買到幾本自製護膚品書睇,原來唔太複雜難整,又試過上網買咗自製潤唇膏,都係好容易整,卒之決定去工聯會報咗個課程讀,上完後好似學多好多生物,化學常識,唔同護膚品主要成份.作用,至於製造過程都唔太難,問題係唔可以大量製造,因為不含防腐劑,加上有植物成份,但整體都覺得好理想.

因為呢個課程側重教用植物萃取,分別用水,甘油,乙醇和油萃取,學咗梗係要自己試吓整喇,以下就係自己做嘅製成品或半製成品.

買咗呢一埋護膏品材料,包括有基底油,花水,精油,保濕因子,乳化劑等等,但都好貴架,超過$600以上.

呢啲係我自己做莘取液,包括有:

茉莉玫瑰花萃取水,蘆薈凝膠都有保濕功效,可以做爽膚水,精華素等等.

薰衣草萃取油,可以加入做面霜,乳液.

,

紫草萃取油主要做紫雲膏,其實除咗紅條紫草,仲加入咗當歸,白芷添.

白芷醋可以淡化暗蒼,去班.

製成品包括有:

洛神花爽膚水,除咗有洛神花萃取液,仲加入膠原蛋白,玻尿酸,搽完後覺得皮膚幾舒服.

上網買咗兩set材料做潤唇膏,基底油有甜杏仁油,荷荷芭油,蜜臘,精油,搽咗唔肥膩,又滋潤幾好,會自己繼續做,又平又啱用.

用紫草萃取油加山茶花油,乳化蜜臘做紫雲膚,用嚟搽有濕疹部位,藥材味都幾勁,功效比較溫和.

大盒自己用

細盒就送俾手部有濕疹朋友試用

薰衣草卸粧油,基底油加薰衣草萃取油再加Tween80, 用完再用洗面奶,非常乾淨,皮膚又唔會太乾燥,會繼續做同埋用.

沖涼洗髮泡沫液,用檸檬萃取加椰子起泡劑加水放入慕絲樽而成,由於上堂時為咗令佢可以兩用,用椰子起泡劑調配比例介乎中間,結果我覺得洗頭唔夠潔力,沖涼還可以,但就會唔似出面街買咁多泡.如果自己再做會分開調配.

最後一樣無相係染髮劑,祗不過買包指甲花粉加唔同濃茶.咖啡,或者木籃花粉開水搽係洗乾淨頭髮上,焗完一段時間再用水沖乾淨,不過染完後我發覺白頭髮色澤變咗橙啡色,有啲奇怪.

接住我已經報咗打皂課程同做併布,口金手工藝課程,以後若果有新製品再同大家分享,