顏色漂亮而又健康紫心蕃薯方包

去街市買餸時見到紫心蕃薯好平,於是買咗幾條做麵包.

隔日切開食仍然好軟熟,因為用咗低溫中種發酵關係.

繼續手作-眼鏡袋

做完小花屋鎖匙包後,仍然有興趣繼續想做,於是就揀咗呢款眼鏡袋做,不過袋身似乎稍為寬咗啲.

手縫小花屋鎖匙包

自從去學完拼布口金課程後,熱誠開始冷卻下來,無再做任何製成品,但諗起10月有朋友生日,於是就跟書做咗呢個小花屋鎖匙包,希望朋友收到後會喜歡喇.

雜果仁包

見到麵包書有呢款雜果仁包,諗起自己都買咗唔同種類果仁,一於試吓整先,首先將雜果仁(腰果,松子)烘香,再壓碎成粒狀,另外將杏仁粉,榛子粉都稍為焗至有香味,一齊同麵團混合發酵,其實打好麵團已經聞到好香果仁味.

最後發酵,搽上蛋汁再灑上雜果仁碎係面,就可以攞去焗喇.

焗好出爐,聞到好香果仁味,攤凍後切開試食都好好味呀

防曬抗氧化面霜

日間用乳霜已經用得7788,於是今日就做咗防曬抗氧化面霜,材料包括有玫瑰花水,紅酒多酚,維他命B5&E, EV橄欖油,二氧化鈦,再加上佛手柑精油,細個兩盒準備送俾我兩個老友試用.自己搽過都覺得幾好,唔錯.

夏日線衫套裝

終於織起呢套線衫喇,講你都唔信,前後織咗成3年,原因係想離職前,織好送俾一位提攜過我舊同事,但點知臨走前忙於做埋手尾同埋要同我工作繼任人交接工作,忙到抽筋,所以最後買咗一份禮物俾佢,咁樣呢件線衫就無乜特定目標要送,織吓停吓,轉眼就咁過咗成3年時間,我決定要今年之內完成埋手尾,唔想再拖,終於攪掂喇.

呢件係裡面背心

加上外套, 可以一齊著,或者拆開同其他顏色外套/背心成為另外一種配搭.

裸麥包

前幾日專登去烘焙店買包裸麥粉番嚟整呢個裸麥包,仲加埋全麥粉,但焗好後發覺裸麥味道唔太突出,唔知係咪落得太少?下次要加大份量至得,不過仍然都好好食,奄尖大少都有捧場,食咗一塊咁多.

無泡打/梳打粉黑糖糕

早前係網上見到台灣妃娟做呢款酵母版黑糖糕,諗起上次去沖繩旅行買番嚟嘅黑糖塊,於是就試吓跟食譜做一個.

就係呢包黑糖喇.

我隔晚已經煮好黑糖蜜,今日加熱水溶糖蜜後再加新鮮酵母,同麵粉,油混合,靜置室溫1.5個鐘,見到有泡升起,就倒入模中,蒸約20分鐘.

再趁熱灑上烘香黑白芝麻,味道都好特別,不過糕質似砵仔糕,唔係西式蛋糕咁鬆軟.

紅蘿蔔方包

打開雪櫃見到有半條紅蘿蔔,就將佢打成紅蘿蔔汁加茸,同麵團混合,焗咗呢款紅蘿蔔方包做早餐.

自製中秋月餅

一年一度嘅中秋節又快到,梗係要趁機練習整月餅喇,今日約咗朋友仔嚟我屋企一齊整,但由於時間關係,之前我已經煮咗蓮蓉餡,奶黃餡,同埋搓定餅皮,原本可以係烘焙店或街市買到蓮蓉餡,但試過覺得好多油,好甜,為咗健康著想,所以雖然工夫麻煩啲,都係DIY好啲.

今日主要係包餡,入模做型,同埋焗,不知不覺都要用咗兩個幾鐘先完成.

呢款係蛋黃蓮蓉月,鹹蛋黃要事先蒸熟,再用蓮蓉包裹住,不過剛焗完,餅皮比較啞色同埋硬身,要放係室溫等佢回油,先會油潤架.

趁攤涼後,急不及待即時切一個試吓,朋友覺得味道都OK,而且有陣陣香味,又唔太甜.

呢款比較迷你嘅係奶黃月餅,但係朋友帶嚟嘅"Hello Kitty"模,焗完後完全無哂樣,木印幾個就模模糊糊.

雖然賣相麻麻,但唔影響味道,祗係再減糖就更完美嘞.

食完晏見仲有時間,於是我提議焗蜂蜜蛋糕, 可惜今次仍然有啲沉底,要再研究改良先得,而且因為用哂高溫龍眼蜜,用普通蜜糖,所以蜜糖味唔太明顯,要努力再改進.

朋友仔仲送咗個自己縫製針線包俾我做禮物,真係多謝佢.

呢款書籤係佢上次送俾我,仲绣咗我個英文名,真係好有心機同誠意, I like it.

粟米芝士包

基本上而家整麵包都係見到有乜材料係屋企就整乜野包, 今次係雪櫃搵到粟米粒同芝士片,所以就整咗呢款粟米芝士包.

因為懶惰無將麵團磅好平均兩等份,結果變成邊大邊細.

切開見到有洞洞就係芝士溶咗,但間中換吓唔同風味都幾好,雖然隔咗一日先切開,麵包仍然柔軟,果然用開低溫中種好難轉用其他發酵方法.

綠茶豆沙麵包卷

見到雪櫃仲有豆沙餡,但又唔想哂咁多時間做細包,逐個搓同包餡,所以就整咗呢款麵包卷.

焗好外面好似普通方包一樣.

但切開就會見到一卷卷豆沙餡,有好清新綠茶香味,但豆沙餡就稍為甜咗啲.

香茅豬扒撈檬

今日約咗志趣相投朋友嚟屋企,一齊焗麵包,晏晝都係自己整,我同佢都好鍾意食香茅豬扒撈檬,所以今日午餐就係呢款嘞.

豬扒係用咗自己種嘅香茅同埋九層塔醃,味道特別濃,加上用新鮮豬扒,好味到我哋兩個人食哂成兜粉.

至於麵包,今日試吓做咗呢款杏仁醬花生麵包,麵團無加任何油,祗係加咗花生醬代替,而麵包面就搽上杏仁醬,但因為錫紙蓋唔到全面,結果有部份燶咗,但切開仍然好鬆軟,好好食.

柚子蜜戚風蛋糕

想整蛋糕俾阿媽食，打開雪櫃見到樽柚子蜜，好喇就決定整咗呢款柚子蜜戚風蛋糕。

焗完倒扣後就向下縮埋一堆。

跟住甩模，個樣都ＯＫ。

切開迫不及待試吓食一舊，都幾好味喎，唔知係咪肚餓呢？

雙色芝麻包

我成日都係整一條條方包,主要係方便慳功夫,又可以保持麵包柔軟,但其實都好悶呀,所以雖然係方包,都要攪攪新意思,好似今日焗呢款就係嘞.

外面同平時普通方包無乜大分別.

但...切開後,就唔同樣,主要將部份麵團加入芝麻粉,再將兩份麵團捲起,就有螺旋紋出現,有啲變化之餘,仲有芝麻香味添.

香蜜花生醬

買咗包生花生豆番嚟好耐,今日終於攞嚟整花生醬,首先將生花生豆白鑊炒至有香味.

攤凍後去衣

6

再用攪拌機打爛成茸,中途要停機多次,將花生茸攪散,同埋郁動攪杯,因為花生打爛後會出油,黏埋一舊舊,但又未變成醬,最後打至見到出油,成團狀攪唔郁,就加些少花生油,鹽,蜜糖調味,再攪多一陣,就可以放入已用滾水煲過玻璃樽內攤凍. 因為百分百用花生做,味道真係比街賣香好多,而且無加白油(反式脂肪),咁就健康好多,唯一缺點係因為無落防腐劑,加上放室溫會有油浮面,所以要擺在雪櫃內雪藏,用時要再放入微波爐稍為加熱至軟身,才可以食用.

另外因為明日約咗舊同事食晏,所以做咗幾支潤唇膏送俾佢哋,今次用咗荷荷巴油,甜杏仁油,可可脂,蜜臘做,無落精油,搽上咀唇都好滋潤,希望收到嘅人會高興喇.

無花果黑糖麥包

今次用咗之前去沖繩旅行買番嚟黑糖,加浸咗Rum酒嘅無花果乾,再加全麥粉,令到纖維增加,就變成呢款無花果黑糖麥包.

俾一塊奄尖大少試食後,竟然破例要求留幾塊俾佢明天做早餐,証明麵包好食喇.

首烏艾草分層洗髮皂

由於開始慢慢習慣用人工皂洗頭,於是前兩日開工做洗髮皂俾自己用,油份有椰子油,棕櫚油,蓖麻油,茶花籽油,添加物有首烏粉和艾草粉,今次試吓做分層,仍然全程用手打,約20分鐘後已經trace夠杰身，將1/3皂液同首烏粉混合，另外1/3同艾草粉混合，再逐層倒入模內。

今日可以切皂，但甩模時好淋身，下次應該再等多兩日應該會硬身啲。

個樣係咪好似黑白朱古力呢？可惜艾草粉同首烏粉都係深色，所以層次唔得明顯，應該將原皂液夾係中間層，出吁嚟效果會明顯啲。

用波浪切刀切花紋，好期待試吓好唔好用？　不過要等４－６星期先可以用，真係等到頸都長埋。