拼布手挽袋

近期買咗本做袋嘅書,見到呢個款幾好,加上係10元店買咗塊牛仔布料,幾適合做袋用,於是就開工,加上簡單貼布縫,同埋花邊,不過上手挽位比較難用衣車,所以就用手縫.

用番襯色厘布,一個暗格位,再釘上磁扣就完成嚕...,睇落個樣都見得吓人,自己都幾滿意.

蜂蜜馬賽牛乳皂

天氣轉為乾燥,所以打咗啲較滋潤肥皂用作沖涼,今次參照娜娜媽個本"自己做100%保養級乳香皂"一書,但發覺用牛乳冰好難溶解NAOH,我又無分幾次加入NAOH,結果有部份沉係底部,要化好多時間先可以全部溶哂.

因為做馬賽皂,所以用咗75%橄欖油,我足足打咗起碼40分鐘先可以呈現"light trace"狀態,真係打到手都抽筋呀.

我將皂液一部份倒入新皂模,另一部份倒入牛奶盒印上皂章.

皂模呢幾舊都甩得幾好喎.

但皂身仍然唔夠硬,所以用印章呢幾塊就有啲走樣,不過算喇,核突個啲就留番俾自己用,靚樣就送俾朋友.

今次全部製成品

今日去睇咗電子版清明上河圖

多得朋友幫手,佢去排隊買票,預埋我個份,我專登揀咗平日朝早10點個場,自己一個人去睇,又唔駛假期同人迫餐死.

今朝預早啲出門,轉咗一次巴士9:30左右已經到咗博覽館,我都係第一次嚟呢度咋,睇吓四周都好空曠,橙色帳篷係場館入口處,四圍都無乜人.

入到去見有時間,就順便睇吓記念品攤檔,不過就無買到任何野.

9:45分已經開放入場,未睇上河圖時,入口處有啲關宋朝,同埋上河圖歷史簡介俾人參觀,入場梗係要收門票喇,你睇吓等侯區有成個足球場咁大,但朝早人唔多,所以根本唔駛等已經入得場,而且有場刊派.

我因為早入場,當時唔算太多人,所以都可以影到一啲比較清淅嘅相.

日景-駱駝隊入城

駱駝隊經過趙太丞家門前

日景-河邊人民活動

夜景-船

船上活動

婦人坐驢

豪華四頭馬車

虹橋,可惜小童追豬情景太快,好難影到,一閃即逝.

我都前後來回睇咗成2-3次,逗留時間都有成個鐘,不過後來太多人,個個都舉機猛影相,結果我係外圍區影啲相,未夠鐘趕人離開,我就走先嘞,我覺得真係幾有意思,值得一睇架.

淘寶快速物流服務

昨日下晝夾埋一齊學護膚品/肥皂同學仔上淘寶網買油&花水,經網上代付後都攪到成4:30有多,點知今日下晝3:00左右,快遞已經call我收貨,其實我已經幫襯過呢個賣家幾次,佢嘅油品質唔差,價錢都算抵,最緊要佢用個間快遞唔駛到香港再收乜鬼特別行政費,因為我屋企要行4層樓梯,佢哋都肯照行上嚟,完全唔駛收額外費用,所以我要買野,通常都幫襯佢.

今次足足買咗8公斤油,花水,NAOH, KOH等等,都幾重架.

手工皂液+潤唇膏

過去星期日參加咗由老師特別為我哋開手工皂液示範班,但其實同實習班差唔多,因為由計落KOH,水,手打都係輪流由我哋負責,因為用蒸煮法,所以分咗皂團就可以番去立刻稀釋,我用咗玫瑰花水,有香味又保濕,加埋CDE椰子增稠劑,咁就唔駛用慕絲樽,但第一日量度鹼值8-9度,所以用完皮膚覺得痕癢,咁等到今日再試,鹼值已經回落到約6-7度,用完覺得皮膚較潤滑好多,但始終覺得用CP皂比較皂液好啲,因為唔需加熱太高溫度,油份營養價值保存會更多.

另外因為潤唇膏存貨已送哂俾朋友,所以今日又再做多10幾支,準備送俾老公屋企人用.粉紅色&白色樽加咗薰衣草精油,透明色係無味.材料包括有荷荷巴油,甜杏仁油,可可脂,蜜蠟,加埋新買嘅堪地拉蠟, 呢款潤唇膏,朋友用完都讚好滋潤架.

綠茶方包+腸仔&豆沙包

昨日打好中種麵團做方包,準備星期六BBQ時可以用嚟夾豬扒,牛扒食,點知今日天氣轉陰涼同埋毛毛雨,天氣預告話明日差不多,咁即係BBQ多數攪唔成,於是將麵團一分為二,一份改做綠茶方包,一份做腸仔&豆沙包,咁就可以有排食嚕....

班蘭椰汁方包

我用攪拌機將新鮮班蘭葉加水打爛,再隔出汁液,當作水份與麵團,椰汁搓勻,放入焗爐後不久已傳出陣陣香味,同用班蘭香精味道真係相差好遠.

加上搽埋呢樽班蘭KAYA醬就更加Yummy喇.

香蕉百利朱古力慕士蛋糕

呢個蛋糕係送俾朋友生日,原本係分開兩層,一層係香蕉慕士,一層係百利甜酒朱古力慕士,點知我糊里糊塗將兩種混合埋一齊,於是就變成而家咁款,而且魚膠落得少,好似稀身啲,但味道都唔錯.

開齋-試新麵包模

朋友知道我鍾意整麵包,所以送咗呢套麵包模俾我,其實之前我已經單買咗其中兩款,但仍然感激佢一番心意,於是開齋試用吓.

我用心型同埋星型麵包模焗咗呢款無花果藍莓麵包,

攤凍後切片,如果開party,用佢嚟焗白麵包切片,加上不同餡料當小食,都唔錯架.

茉莉綠茶柔膚水

上次做柔膚水已經用到7788,今次我用咗朋友係加拿大帶番嚟送俾我嘅茉莉綠茶包做水底,將幾個茶包放入滾熱水中浸泡,涼透後就隔起茶汁,再加入蘆薈萃取液,膠原蛋白,玻尿酸,甘油等,雖然顏色唔靚,但聞到好香茉莉花味,而且綠茶含豐富兒茶素,可以防氧化.

應節南瓜方包

眨吓眼西方鬼節"Halloween"又到,亦都表示2010年已經過咗2/3,時間真係過得好快,於是就做咗呢款南瓜方包應節,不過麵包氣孔稍嫌大咗啲.

士多啤梨手機套

今日又開工做手作,因為上次送咗個小束袋俾朋友,佢好鍾意,仲想要多一個手機套,我當然應承喇,難得有人欣賞嘛.

呢個係機套正面

其實有士多啤梨嘅係一個袋,可以俾佢放少少野.

呢面係背後

仲加埋可以甩得嘅手繩,咁就可以唔駛成日用手攞住部機.

紅桑子朱古力慕士蛋糕

見到雪櫃內淡忌廉就快過期,加埋之前買咗紅桑子果蓉,所以就做咗呢款慕士蛋糕.

首先焗好朱古力海綿蛋糕,我用分蛋法,無落任何油份,將底面都片去唔要,然後橫片2-3塊.

將一塊蛋糕置底

倒入紅桑子慕士漿

放上一塊蛋糕

再倒入朱古力慕士

因為無諗住送俾人,所以無做餅面裝飾,祗係簡簡單單做咗個紅桑子果凍面就算

雪凍後甩模

切開試食,紅桑子微酸(因為加咗糖,如果唔係就好酸),加朱古力苦澀味,味道好微妙,但都好夾,可以平衡朱古力濃郁味道,唔錯.