咖啡合桃包

我個FD鍾意食,今晚同佢有約,所以特別做嚟請佢食,不過今日氣溫得7度,真係要用多一倍時間發酵先得,焗完後試食,發現咖啡味唔夠濃,但麵包就好軟熟.

喜氣洋洋迎兔年-手挽口金包

係網上買嘅日式和風縐布, 就嚟過年,所以就用咗呢塊布做咗個手挽口金包,準備去拜年,裡面仲車多一個暗袋.

柿子乾方包

因為長期都係整麵包做早餐,如果唔加啲新野落去會好悶,近排見到有韓國嘅柿子乾賣,都好軟身,買嚟除咗當零食外,靈機一觸,將佢切成塊狀,同麵團攪埋一齊,今次用咗黃糖,所以麵包顏色好睇啲.

4片口金包

因為應承朋友做個口金包送俾佢,所以又開工,今次做4片式,而口金架仲有埋鎖匙扣.

呢個係正面

背面,布款花紋有啲唔同

底部

裡面

紫菜芝麻梳打餅&藍莓牛油曲奇

今朝起身,發覺出面又濕又凍,幸好雪櫃有餸菜,可以唔駛出街,於是就整咗呢款好耐都想試做紫菜芝麻梳打餅,但因為呢款餅乾祗係用蛋白,所以就順便用埋剩低蛋黃做多款藍莓牛油曲奇.

我切得比較細塊,咁就可以一啖一塊嘞.

焗好之後,膨脹咗好似厚身啲,不過由於我無跟食譜係餅面洒鹽,所以食落唔似街出面賣嘅梳打餅,反而有少少甜味添,餅身比較硬.

藍莓牛油曲奇夠鬆脆,不過我焗爐細,變相爐溫高,雖然已降低爐溫,但仍然有幾塊焗得燶過頭要掉,哂咗啲....

2011年第一款-班蘭方包

踏入2011年第一次整嘅係麵包,因為想用完剩底嘅班蘭葉汁,所以就做咗呢款方包,不過今次無加椰汁,味道真係無咁香喎,而且發現麵包組織內有啲大洞,唔知係咪最後無將麵團內氣泡壓出呢? 不過麵包都好軟熟,食得過嘅.

班蘭椰香戚風蛋糕

今晚有中學同學聚會,班主任老師都會出席,見到屋企有上次未用完班蘭汁剩,加埋椰汁,就焗咗呢個班蘭椰香戚風蛋糕,準備送俾佢.

一焗完出爐表面好似火山爆發咁,不過唔駛驚,根據我經驗,反轉倒扣後會回縮,加上甩底後呢面反轉做底,所以淡定.

睇吓今次都唔錯喎,因為要送俾人,所以無切開.

加上簡單包裝,咁就可以攞去送禮嚕....

柚子蜜牛油蛋糕

前排係書局買咗呢本中譯日文專門製作磅蛋糕書,見到屋企有材料,所以嘗試跟住整,但其實無論材料,步驟都比較繁複,剩係酒都用3種,油都要分牛油,橄欖油,糖亦分紅糖,白糖,所以剩係磅材料,準備功夫都用咗成40分鐘以上.

結果出嚟嘛...我就覺得差強人意,蛋糕唔係好高,唔知係咪最後落麵粉攪拌太耐,令到蛋白泡消失太多? 但味道,質感都唔錯,下次可能要掉轉程序,最後先同發起蛋白混合.

椰糖栗子包&饅頭

因為想消滅屋企啲剩餘物資,加上連續3日聖誕節假期,所以做嚟俾奄尖大少做早餐,連栗子蓉餡都係自己煮架.

但唔知係咪新鮮酵母過期,無咗效力,等咗半個鐘都仲未發到理想程度,不過都照蒸,好彩蒸好食落都OK喎,祗係甜咗啲.

剩低仲有麵團,見到酵母又發唔起,所以臨時用泡打粉開少少水,再同麵團搓勻,靜置鬆弛5分鐘後再捲,切成饅頭,然後再蒸,果然鬆軟好多.

應節 Panettone

聖誕節就快到,所以做咗呢款 Panettone 應吓節, 乾雜果皮係舊年聖誕整Stollen麵包時買多咗,於是用Rum酒浸住,放係雪櫃內,有成一年,係咪好耐呢?不過真係令麵包焗完出爐後,香味好多,今年都會去買一盒再浸到出年用至得,為咗健康著想,我減咗牛油,如果跟足食譜,真係超多,我寧願無咁美味,都要健康好過囉.

由於無高身圓麵包模,所以用焗爐紙將圓形蛋糕模加高圍邊,個麵包面稍為燶咗啲,因為太早揭起蓋面錫紙.

攤凍後切開試食,幾好味唔錯.

聖誕禮物

今日同志同道合DIY好友食晏,意外地收到佢親手DIY兩份禮物俾我, 左邊係新鮮剛做好嘅洛神花果醬,其實之前我自己都想做,但因為雪櫃內已有幾款唔同果醬未食完,所以忍手無做,而家竟然不勞而獲,真係正中下懷.

右邊係隔熱墊,難得佢上次嚟我屋企,細心觀察到我塊隔熱墊已經破爛,所以做嚟送俾我,有時禮物貴重與否,同價錢未必成對等,我自己反而喜歡收到包含誠意禮物, 多過名牌禮品, 多謝哂.

一年一度又去行工展會

今日趁約咗朋友係銅鑼灣食晏,順便又去行吓工展會,今次由銅鑼灣方向入,天后方向出,首先當然要買入場卷喇,可能係平日關係,基本上唔駛排隊,就買到.

門票+指南,裡面有唔同優待卷,但我都無用過.

咁跟住就即刻入去開始遊蕩.

入咗門口右手邊係食品區,有好多唔同種類零食,但估唔到平日都咁多人,簡直塞到水洩不通,行都行唔到,於是急急忙忙買咗自己想買嘅野,就即刻離開個區.

我祗係走馬看花,又唔想攞太重糧油食品,買咗幾樣野就由天后個面出番去嘞,前後都行咗一個鐘有多架.

睇吓我買咗啲乜野番嚟? 包括有無縫橡木枮板,蝦米,蠔豉,泰國札肉5條,亞麻籽兩包,楊枝甘露,因為口渴,所以買咗兩枝,即刻已經飲咗一枝,雖然好似買咗好少野,但係計吓數已經駛咗成$7XX,所以我都係留番係屋企上網好啲喇....

吉士檸檬蛋糕卷

又嚟整蛋糕卷,因為奶就快過期,加上整藍莓果醬用剩檸檬汁,所以就整咗呢款蛋糕卷,而蛋糕體係全蛋法,本來想用分蛋法,但分蛋時一唔小心有啲蛋黃跌咗落蛋白中,所以唯有用全蛋法,但蛋糕體無上次咁柔軟.

今次用外捲法,而餡料係吉士檸檬餡.

食落覺得餡料比較酸,下次要減少檸檬汁,但味道都唔錯架.

栗子蛋糕卷

呢排頻頻用栗子整野食,焗麵包,栗子炆雞,今日又整栗子蛋糕卷,原因有人傻咗.買咗3磅栗子番嚟,為咗要消耗哂,祗好諗不同食譜,用哂為止.

其實整栗子蓉都幾麻煩,用好多功夫,唯一係價錢平,比起係烘焙店買嘅栗子蓉罐頭,蛋糕體就用65度熨麵分蛋法,即係將牛油,牛奶加熱至65度,加入己打發好蛋黃,砂糖內,最後混入麵粉,粟粉,再溝埋打至企身蛋白混合.

好開心呀,捲完後蛋糕無裂開喎,主要係蛋糕體夠軟熟.

切開入面都OK,連平時唔like食蛋糕奄尖大少都一口氣食咗3件,真係捧場,証明好食喇.

栗子方包

呢排栗子當造,所以買嚟除咗蒸熟當小食外,仲攞咗嚟整麵包,真係另有一番風味架.

似狗骨頭嘅法國長棍

之前係烘焙店買咗法包預拌粉,今日就開工試吓整,但要小心預拌粉內已有鹽混合,所以可以唔駛再另外加鹽,否則會過咸.

今次用咗紅伊士,係特別用嚟係整咸包,但因為焗盤太細,所以影響造型,所以焗完出爐後似狗骨頭多過法國長棍,界紋又淺,外形完全"肥佬",下次應該做兩條好過分3條,,至少個形無咁幼長.

放涼後即刻試吓切開搽牛油食,幸好皮脆肉軟,非常好食,麵包氣孔唔算太大,但都叫做OK囉.

開心果牛油磅蛋糕

上次去上海街買野,經過烘焙店,順便買咗包牛油磅蛋糕預拌粉,袋上說明話祗要加3隻蛋,85g牛油撈埋就焗得,於是買咗一包粉試吓.

不過對於我嚟講85g牛油係好多,於是減咗10g,一半溶牛油,一半葡萄籽油,照足程序,不過我就分幾次落油,慢慢將油同麵糊攪勻,仲加埋開心果仁,但界直紋就麻麻,所以蛋糕面唔多靚.

切開入面睇吓都OK, 食落都唔錯,但牛油蛋糕肥死人,都係少食多滋味,唔可以成日整.

簡簡單單芝麻方包

唔知係咪整得麵包多,而家越嚟越懶,唔太想逐個滾圓做形,淨係做方包就算,而且可以隨意搽果醬,或者夾三文治又得,彈性好大,適合我呢種一年365日都食麵包做早餐嘅人,今日呢款包加咗芝麻粉,有啲香味,可惜我唔記得加大咗爐溫,時間應該縮短番,結果外皮較燶,麵包乾身咗啲.

拼布手挽袋

近期買咗本做袋嘅書,見到呢個款幾好,加上係10元店買咗塊牛仔布料,幾適合做袋用,於是就開工,加上簡單貼布縫,同埋花邊,不過上手挽位比較難用衣車,所以就用手縫.

用番襯色厘布,一個暗格位,再釘上磁扣就完成嚕...,睇落個樣都見得吓人,自己都幾滿意.

蜂蜜馬賽牛乳皂

天氣轉為乾燥,所以打咗啲較滋潤肥皂用作沖涼,今次參照娜娜媽個本"自己做100%保養級乳香皂"一書,但發覺用牛乳冰好難溶解NAOH,我又無分幾次加入NAOH,結果有部份沉係底部,要化好多時間先可以全部溶哂.

因為做馬賽皂,所以用咗75%橄欖油,我足足打咗起碼40分鐘先可以呈現"light trace"狀態,真係打到手都抽筋呀.

我將皂液一部份倒入新皂模,另一部份倒入牛奶盒印上皂章.

皂模呢幾舊都甩得幾好喎.

但皂身仍然唔夠硬,所以用印章呢幾塊就有啲走樣,不過算喇,核突個啲就留番俾自己用,靚樣就送俾朋友.

今次全部製成品